Read Swahilli Mathayo 23 Bible Online

Mathayo 23 - Swahilli bible

Mathayo 23

¹Kisha Yesu akauambia umati wa watu pamoja na wanafunzi wake,

²“Waalimu wa sheria na Mafarisayo wana mamlaka ya kufafanua sheria ya Mose.[377]

³Kwa hiyo shikeni na kutekeleza chochote watakachowaambieni. Lakini msiyaige matendo yao, maana hawatekelezi yale wanayoyahubiri.

⁴Hufunga mizigo[378] mizito na kuwatwika watu mabegani, lakini wao wenyewe hawataki kunyosha hata kidole wapate kuibeba.

⁵Wao hufanya matendo yao yote ili watu wawaone. Huvaa tepe zenye maandishi ya sheria[379] juu ya panda la uso na mikononi na hupanua pindo[380] za makoti yao.

⁶Hupenda nafasi za heshima katika karamu na viti vya heshima katika masunagogi.

⁷Hupenda kusalimiwa kwa heshima sokoni na kupendelea kuitwa na watu: ‘Mwalimu.’

⁸Lakini nyinyi msiitwe kamwe ‘Mwalimu,’ maana mwalimu wenu ni mmoja tu, nanyi nyote ni ndugu.

⁹Wala msimwite mtu yeyote ‘Baba’ hapa duniani, maana Baba yenu ni mmoja tu, aliye mbinguni.

¹⁰Wala msiitwe ‘Viongozi,’ maana kiongozi[381] wenu ni mmoja tu, ndiye Kristo.

¹¹Aliye mkubwa miongoni mwenu ni lazima awe mtumishi wenu.

¹²Anayejikweza atashushwa, na anayejishusha atakwezwa.

¹³“Ole wenu[382] waalimu wa sheria na Mafarisayo, wanafiki! Mnaufunga mlango wa ufalme wa mbinguni mbele ya macho ya watu. Nyinyi wenyewe hamwingii ndani, wala hamwaruhusu wanaotaka kuingia waingie.[383]

¹⁵“Ole wenu waalimu wa sheria na Mafarisayo, wanafiki! Mnasafiri baharini na nchi kavu ili kumpata mtu mmoja afuate dini yenu. Mnapompata, mnamfanya astahili maradufu kwenda katika moto wa Jehanamu kuliko nyinyi wenyewe.

¹⁶“Ole wenu viongozi vipofu! Nyinyi mwasema ati mtu akiapa kwa hekalu, kiapo hicho si kitu; lakini akiapa kwa dhahabu ya hekalu, kiapo hicho kinamshika.

¹⁷Enyi vipofu wapumbavu! Kipi kilicho cha maana zaidi: dhahabu au hekalu linalofanya hiyo dhahabu kuwa takatifu?

¹⁸Tena mwasema ati mtu akiapa kwa madhabahu si kitu; lakini akiapa kwa zawadi iliyowekwa juu ya madhabahu, kiapo hicho humshika.

¹⁹Enyi vipofu! Ni kipi kilicho cha maana zaidi: ile zawadi, au madhabahu ambayo hufanya hiyo zawadi kuwa takatifu?

²⁰Anayeapa kwa madhabahu ameapa kwa hiyo madhabahu, na kwa chochote kilichowekwa juu yake.

²¹Na anayeapa kwa hekalu ameapa kwa hilo hekalu na pia kwa yule akaaye ndani yake.

²²Na anayeapa kwa mbingu ameapa kwa kiti cha enzi cha Mungu,[384] na kwa huyo aketiye juu yake.

²³Ole wenu waalimu wa sheria na Mafarisayo, wanafiki! Mnatoza watu sehemu moja ya kumi,[385] hata juu ya majani yenye harufu nzuri, bizari na jira,[386] na huku mnaacha mambo muhimu ya sheria kama vile haki, huruma na imani.[387] Haya ndio hasa mliyopaswa kuyazingatia bila kusahau yale mengine.

²⁴Viongozi vipofu! Mnatoa nzi katika kinywaji, lakini mnameza ngamia![388]

²⁵“Ole wenu waalimu wa sheria na Mafarisayo, wanafiki! Mnasafisha kikombe na bakuli kwa nje, lakini ndani mnaacha kumejaa vitu mlivyopata kwa unyang'anyi na uchoyo.

²⁶Mfarisayo kipofu! Kisafishe kikombe ndani kwanza[389] na nje kutakuwa safi pia.

²⁷“Ole wenu waalimu wa sheria na Mafarisayo, wanafiki! Mko kama makaburi yaliyopakwa chokaa[390] ambayo kwa nje yanaonekana kuwa mazuri, lakini ndani yamejaa mifupa ya maiti na kila namna ya uchafu.

²⁸Hali kadhalika nyinyi mnaonekana na watu kwa nje kuwa wema, lakini kwa ndani mmejaa unafiki na uovu.

²⁹“Ole wenu waalimu wa sheria na Mafarisayo, wanafiki! Mnajenga makaburi ya manabii na kuyapamba makaburi ya watu wema.

³⁰Mwasema: ‘Kama sisi tungaliishi nyakati za wazee wetu hatungalishirikiana nao katika mauaji ya manabii!’

³¹Hivyo mnathibitisha nyinyi wenyewe kwamba nyinyi ni watoto[391] wa watu waliowaua manabii.

³²Haya, kamilisheni ile kazi wazee wenu waliyoianza![392]

³³Enyi kizazi cha nyoka wenye sumu! Mnawezaje kuiepa hukumu ya moto wa Jehanamu?

³⁴Ndio maana mimi ninawapelekea nyinyi manabii, watu wenye hekima na waalimu; mtawaua na kuwasulubisha baadhi yao, na wengine mtawapiga viboko katika masunagogi yenu na kuwasaka katika kila mji.

³⁵Hivyo lawama yote itawapateni kwa ajili ya damu yote ya watu wema iliyomwagwa juu ya ardhi. Naam, tangu kumwagwa damu ya Abeli[393] ambaye hakuwa na hatia, mpaka ile ya Zakaria,[394] mwana wa Barakia, ambaye mlimuua hekaluni kati ya patakatifu na madhabahu.

³⁶Nawaambieni kweli, kizazi hiki kitapata adhabu kwa sababu ya mambo haya.

³⁷“Yerusalemu! Ee Yerusalemu! Unawaua manabii na kuwapiga mawe wale waliotumwa kwako. Mara ngapi nimejaribu kuwakusanya watoto wako kwangu, kama vile kuku anavyokusanya vifaranga vyake chini ya mabawa yake,[395] lakini hukutaka.

³⁸Haya basi, nyumba yako[396] itaachwa mahame.

³⁹Nakuambia, hutaniona tena mpaka wakati utakaposema: ‘Abarikiwe huyo ajaye kwa jina la Bwana.’”[397]