Read Swahilli 1 Yohane 1 Bible Online

1 Yohane 1 - Swahilli bible

1 Yohane 1

¹Habari[1] hii yahusu Neno la uhai[2] lililokuwako tangu mwanzo. Sisi tumepata kulisikia na kuliona kwa macho yetu wenyewe; tulilitazama na kulishika kwa mikono[3] yetu wenyewe.

²Uhai huo ulipotokea sisi tuliuona na sasa tunasema habari zake[4] na kuwaambieni juu ya uhai huo wa milele uliokuwa kwa Baba na uliodhihirishwa kwetu.

³Tulichokiona na kukisikia ndicho tunachowatangazieni nyinyi pia, ili nanyi mpate kushirikiana nasi katika umoja tulio nao na Baba na Mwanae Yesu Kristo.[5]

⁴Tunawaandikia nyinyi mambo haya kusudi furaha yetu[6] ikamilike.

⁵Basi, habari tuliyoisikia kwake Yesu na tunayowahubirieni ndiyo hii:[7] Mungu ni mwanga na hamna giza lolote ndani yake.[8]

⁶Tukisema[9] kwamba tuna umoja naye, na papo hapo tunaishi gizani, tutakuwa tumesema uongo wala hatuishi kwa ukweli[10] kwa maneno na matendo.

⁷Lakini tukiishi katika mwanga, kama naye alivyo katika mwanga,[11] basi, tutakuwa na umoja sisi kwa sisi, na damu yake Yesu Kristo,[12] Mwanae, inatutakasa dhambi zote.[13]

⁸Tukisema kwamba hatuna dhambi, tunajidanganya wenyewe, na ukweli haumo ndani yetu.

⁹Lakini tukiziungama dhambi zetu,[14] basi, Mungu ni mwaminifu na mwadilifu, naye atatusamehe dhambi zetu na kututakasa uovu wote.

¹⁰Tukisema kwamba hatujatenda dhambi, tutakuwa tumemfanya Mungu mwongo, na neno lake halimo ndani yetu.