Read Biblia Mixe de Quetzaltepec Génesis 11 Bible Online

Génesis 11 - Biblia Mixe de Quetzaltepec bible

Génesis 11

¹Ko jyeky'äjty tu'ukyë ijty ja aaw ayuk mëti'ipë ja naaxwiinyëtë ja'ay kyajpxtëpën.

²Ko ja ja'ayëty tsyo'ontë jamtsow ma ja xëëw pyëtsimyën, ënät ojts tpaatë tu'uk ja joy'it jam ma ja it naaxwiinyëtë txëëwatyën Sinar. Tä jam tsyënaaytyaknpëjktë.

³Tu'kxëëw tu'kjëmëjt ojts tkäjpxy'atë: Tsojk nyajkojëm yë muutsy ets jëënjoty nyajkë'ëwmëty. Muutsy kyë'ëw ojts tyajtuntë ijxtëm jeexyë tsaajën ets tukpojtstë yë mo'onts.

⁴Ënät nyäy'ënanëtë: Mintë, tsojk nyajkojëm tu'uk yë kajpn ets nyajpëtë'kmëty tu'uk yë potsy mëti'ipë ja'tëpën tsajpwinm. Jëtu'un nyajjëkyajpmëty mëj'äämpy yaa naaxwiiny. Ka'ap nëjkx xity ko'oy n'ijtëmë.

⁵Ënät ojts ja Wintsën tniku'ijxnaxy ja naax kajpn ets ja mëjpotsy mëti'ipë ënäty ja naaxwiinyëtë ja'ay ëka'any kyojtso'ontaktëpën.

⁶Tääts myääy tyäjy: Yë naax kajpn tu'ukyë nyäyaj'itëtë ets tu'ukyë yë aaw ayuk mëti'ipë kyajpxtëpën. Paaty të tyajtso'onta'aktë ya'atë tuunk. Tyam nitii jotmay tkamëët'atë ets t'ëxmatstëty mëti'ipë tëë tnipëjktaakëtën.

⁷Nikë tim oy'atëp yowë ko yë y'ayukëty ntimyajnäyjyo'pëmëty, këtiipë nyäjyä'äkyukëtëty yë'ëjëty.

⁸Jëtu'un'äämpy ojts yë Tios tyajye'eywya'kxta'ay ja ja'ay naaxwiinyëtë apëtsëmy ets ojts t'ëxmajtsnëtë ja kajpn mëti'ipë ënäty të tkojtsoontën.

⁹Ma tääpë ja it naaxwiinyëtën ojts ja Tios tyajtëkajtsta'ay ja aaw ayuk mëti'ipë ënäty ja ja'ay naaxwiinyëtë apëtsëmy kyajpxtëpën ets ye'eywya'kxtaaytyë. E paatykyëjxm ojts tampë ja kajpn xyëëpety Babel.

¹⁰Ya'atë y'u'unk'ajt yë Sem. Ko myäjtsk jëmëjtpejty ma ënäty ja komtuu të nyäxyën, ko ënäty ja Sem mëko'px yë jyëmëjt ënät ojts ja y'u'unk myääy myëxu'unk'atë mëti'ipë xyëëwmooytyën Arfaxad.

¹¹Ko yë Sem y'u'unk myääyëty myëxu'unk'ajtë, jä'ä ojts jyaakjuuky'äty mëkoxk mëko'px jëmëjt ets ojts tmëët'atë y'u'unkëty ye'etyëjkpë to'oxytyëjkpë.

¹²Arfaxad jä'ä ënäty yë jyëmëjt i'px majkmokx, ko ojts yë y'u'unk myëxu'unk'aty mëti'ipë xyëëwajtypyën Sélah.

¹³Ko ojts ja y'u'unk y'ëkmiiny naaxwiiny mëti'ipë xyëëwajtypyën Sélah, yë Arfaxad jä'ä ojts jyaakjuuky'äty taxk mëko'px ja tëkëëk jëmëjt ets ojts jyaak mëxu'unk'atë y'u'unkëty ye'etyëjkpë to'oxytyëjkpë.

¹⁴Sélah jä'ä ënäty yë jyëmëjt i'px majk ko myëxu'unk'ajty ëka'any ja y'u'unkëty mëti'ipë xyëëwmooytyën Éber.

¹⁵Ko ja y'u'unkëty jëtu'un y'ëkmëxu'unk'ajty yë Sélah, jä'ä ojts jyaakjuuky'äty taxk mëko'px ja tëkëëk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.

¹⁶Yë Éber jä'ä ënäty yë jyëmëjt i'px majkmajkts ko myëxu'unk'ajty yë y'u'unk mëti'ipë xyëëwajtypyën Péleg.

¹⁷Ko jëtu'un y'ëkmëxu'unk'ajty yë Péleg, yë Éber jä'ä ojts jyaakjuuky'äty taxk mëko'px ja i'px majk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.

¹⁸Péleg jä'ä ënäty yë jyëmëjt i'px majk ko myëxu'unk'ajty y'u'unkëty, mëti'ipë xyëëwmooytyë Reu.

¹⁹Ko yë Reu jëtu'un y'ëkmiiny naaxwiiny yë Péleg jä'ä ojts jyaakjuuky'äty mäjtsk mëko'px ja taxtujk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.

²⁰Reu jä'ä ënäty yë jyëmëjt i'px majkmäjtsk ko myëxu'unk'ajty ja y'u'unk, mëti'ipë xyëëwmooytyën Serug.

²¹Ko yë Serug jëtu'un y'ëkmëxu'unk'ajty yë Reu jä'ä ojts jyaakjuuky'äty mäjtsk mëko'px ja wëxtujk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.

²²Serug jä'ä ënäty yë jyëmëjt i'px majk ko myëxu'unk'ajty yë y'u'unk mëti'ipë xyëëwmooytyën Nahor.

²³Ko yë Nahor jëtu'un y'ëkmëxu'unk'ajty, yë Serug jä'ä ojts jyaakjuuky'äty mäjtsk mëko'px jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.

²⁴Nahor jä'ä ënäty yë jyëmëjt i'pxtaxtujk ko myëxu'unk'ajty yë y'u'unk mëti'ipë xyëëwmooytyën Taré.

²⁵Ko yë Taré jëtu'un y'ëkmëxu'unk'ajty yë Nahor jä'ä ojts jyaakjuuky'äty mëko'px ja majkmokx majktaxk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.

²⁶Taré jä'ä ënäty yë jyëmëjnë tëkë'px majk ko myëxu'unk'ajtë yë y'u'unkëty mëti'ipë xyëëwmooytyën Abram, Nahor ets Harán.

²⁷Ya'atë jëtu'un ja y'u'unk y'ok yë Taré mëti'ipë tyeety'ajtën yë Abram, Nahor ets Harán. Harán, yë tyeety yë Lot,

²⁸jam ojts y'ooky Ur, ma ja Caldeo ja'ayëty ja nyaaxjotmën. Ka'anëm ënäty yë tyeety Taré y'ookynyëm ko ojts yë'ë y'ooky. Jam y'o'ky ma myiinyën naaxwiiny.

²⁹Abram yë'ë ojts mëët pyiky tu'uk yë to'oxytyëjk mëti'ipë xyëëwajtypyën Sarai. E yë Nahor yë'ë ojts mëët pyiky ja to'oxytyëjk mëti'ipë xyëëwajtypyën Milcá, yë'ë nyëëx yë Harán, yë'ë y'uty yë Iscá.

³⁰Sarai ka'ap ijty tjëkyäp y'u'unk'ixëty, jä'ä ko jëtu'un ënäty jyä'äy'äty.

³¹Taré ojts jam tsyo'onë Ur ma ja Caldeo ja'ayëty ja nyaaxjotmën ets ojts nyijkxy ma ja it naaxwiinyëtë txëëwatyën Canaán. Ojts twoownëjkxy ja y'u'unk mëti'ipë xyëëwajtypyën Abram ets ja y'ok'u'unk mëti'ipë xyëëwajtypyën Lot ets ja tsyë'ë Sarai. E ko jya'ajtë ma ja kajpn txëëwatyën Harán, jam ojts wyë'ëmtë tsënääpyë.

³²Ets Taré jam ojts y'o'knë Harán, jä'ä ënäty yë jyëmëjt mäjtsk mëko'px ja mëkoxk ko y'o'ky.