Read Biblia Mixe de Quetzaltepec Génesis 14 Bible Online

Génesis 14 - Biblia Mixe de Quetzaltepec bible

Génesis 14

¹Jä'ä xëëw jä'ä jëmëjt yë Amrafel mëti'ipë yajkutujkpën jam Sinar, yë Arioc jampë yajkutukyën Elásar, Quedorlaomer jampë yajkutukyën Elám ets Tidal jampë yajkutukyën Goím.

²Ojts tsyiptuntë mëët yë Bera mëti'ipë yajkutujkpën jam Sodomë, mëët yë Birsá mëti'ipë yajkutujkpën jam Gomorra, mëët yë Sinab mëti'ipë yajkutujkpën Admá, mëët yë Seméber mëti'ipë yajkutujkpën Seboím ets mëët ja yajkutukpë mëti'ipë jam yajkutujkpën Belá ets ma ja Zoar kajpnën.

³Ya'atë ojts nimëkoxkpë yajkutujkpë nyämyukëtë tu'ktsiptuunpë jam ma naax joyjyotpë txëëwatyën Sitim, ma ja mejy mëti'ipë yajtijpën Ooky Myejy.

⁴Yë yajkutujkpë Quedorlaomer tëë ënäty t'ëkmëmëtakpë majkmäjtsk jëmëjt, e kom majktëkëëk jëmëjt ënätynyë ko ojts tuknipëjktaakëtë yë nimëkoxkpë yajkutujkpëty tsyiptuna'antë mëët yë Quedorlaomer.

⁵Kom jëmëjt yë yajkutujkpë Quedorlaomer ets mëët ja yajkutujkpëtëjk jënu'un mëët oy nyäyaj'ityën, ojts nyëjkxtë ma ja it naaxwiinyëtë txëëwatyën Astarot Carnaim. Jamts ojts tmëmëta'aktë ja Refa ja'ayëty, zuzitë ja'ayëty jam ma yajtijyën Ham, ja emitas ja'ayëty jam ojts yajmëmëta'aktë ma yajtijyën Save-quiriataim,

⁶e ja Hor ja'ayëty jam ojts yajmëmëta'aktë ma ja kopkjot txëëwatyën Seir ets ojts yajpapo'otë jampaat ma ja joyjotm txëëwatyën Parán, winkon wyë'ëmnë mëët ja të'ëts'itjotm.

⁷Ko ojts wyimpijnë ja Quedorlaomer mëët ja mayjyä'äy jënu'un ënäty të jyämyëët'atyën, ënät jyajtë jam En-mispat, mëti'ipë näjyëtu'un yajtijpën Cadés ets tyajma'taaytyë, tyajkutëkooytyääytyë jënu'un winë tpatën ma ja Amalec ja'ayëty ja nyaax kyajpnëtyën. Näyjyëtu'un ojts jam y'ëtë'ëtstë ma ja Amor ja'ayëtyën, mëti'ipë jam tsënaaytyëpën ma tu'uk ja it naaxwiinyëtë mëti'ipë yajtijyën Hazezón-tamar.

⁸Ënät ja yajkutujkpëtëjk, mëti'ipë tsënaaytyëpën ma ja kajpnën Sodomë, Gomorra, Admá, Seboím ets Belá, ojts nyëjkxtë ma ja it naaxwiinyëtë txëëwatyën Sitim. Jam ojts tääpë nimëkoxkpë yajkutujkpëty tsyiptuntë mëët yë yajkutujkpëty Quedorlaomer, Tidal, Amrafel ets Arios, mëti'ipë nimajktaxk yajkutujktëpën ma ja kajpnën Elám, Goím, Sinar ets Elásar.

¹⁰Tu'kë'ëyë ma ja Sitim joyjyotmën tam ijty myäyjyätyë yë may jut ets tsajpkëk ma ijty tyajpëtsëmtën yë yëk mo'onts mëti'ipë o'tspën. Ko ojts ja yajkutujkpëty mëti'ipë tso'ontëpën Sodomë ets Gomorra jyakä'äkanëtë ma ja tsipën, jam ojts kyënajxta'atë jutjoty, e wiinkpë yajkutujkpëty tunkëjxm kopkkëjxm ojts jyaak kä'äktë.

¹¹E ja mëti'ipë mëtaktën jä'ä ojts tyajnëjkxta'atë tu'kë'ëyë ja jë'kxy pëky ets mëti'ipë tsowjatyën japë yajpaatyën Sodomë ets Gomorra ets winë tmënëjkxtaaytyë.

¹²Ja Lot jam ënäty tsyëënë Sodomë, yë Abram yë tsyojkmaank, ojts tmënëjkxtë näjyëtu'un tsumy matsy mëët tu'kë'ëyë jënu'un winë tmëët'atyën.

¹³E tu'uk yë ja'ay mëti'ipë ënäty të kyäktso'okyën ma ja tsipën, ojts myiny ma ja Abram, hebreo ja'ay jam yajpaatyën, jampë tsyëënën xojjoypyë'am ma tjä'ä'atyën yë Mamré ja Amor ja'ay. Tääts yajtukmëmëtyäky ko ënäty yë Lot të yajmatsy ets të yajmënëjkxy. Yë Mamré tu'kmëkä'äx ënäty mëët yë Escol ets Aner, yë'ëjëty oy ënäty mëët yë Abram nyäyaj'itëtë ets näpyutëjkëtëp ko muum tsyippaatë.

¹⁴Ko yë Abram tnija'awëy ko yë tsyojkmaank të yajmatsy, ënät ojts tyajmujkta'ay yë tyuunpëtëjk mëti'ipë të myëxu'unk'atën jam ma tyëjkën. Jä'ä nyiwinë'atë tëkëëk mëko'px ja majkmokx tëkëëk. Ënät ojts tsyoony mëët yë'ëjëty ets tpapooytyë ja yajkutujkpëtëjk, jampaat tpaja'ajtë ma ja Dan kajpnën.

¹⁵Koots yë Abram mëët yë jyä'äy tukja'ajtë ajotkumonë ja yajkutujkpëtëjk ets ojts tmëmëta'aktë, jampaat tpaja'ajtë ma ja Hobá itjotmën, mëti'ipë yajpatpën anajnytsyow ma Damaskë kajpnën.

¹⁶Tääts tpëjkëtya'atë tu'kë'ëyë, mëti'ipë ënäty të tmäätstën. Jëtu'un ojts yë Abram tyajtso'oky yë tsyojkmaank Lot. Yë Lot ojts jatëkok tpata'ay mëti'ipë ënäty të yajpëjkën, jëtu'un tsyoktë ja to'oxytyëjk ets ja ye'etyëjk mëti'ipë ënäty të yajmatstën.

¹⁷Ko yë Abram wyimpijty ma ënäty të tmëmëtä'äkyën yë Quedorlaomer ets ja yajkutujkpëtëjk mëti'ipë näypyupäjtëtë mëët. Yë yajkutujkpë, mëti'ipë Sodomë ënä'ämpën, ojts tyu'ujëjpye'eyi'ikyë yë Abram jam ma ja joy'it txëëwatyën Save, mëti'ipë ja yajkutujkpë jyä'ä'ajtypyën.

¹⁸Näyjyëtu'un yë Melquisedec, mëti'ipë ënäty yajkutujkpën jam Salem ets teety ma ja Wintsën Ni'ik Këjxmëpë, tä tyajpëtsëëmy yë tsajpkääky ets uuky,

¹⁹ojts tkënu'kxy yë Abram mëët ya'atë aaw ayuk: Yë Tios Ni'ik Këjxmëpë mkënu'kxëtëp mjëkyäpëtëp, mëti'ipë yajkojën yë tsajp ets naaxwiinyëtë.

²⁰Tukxoontä'äky xëmë y'itëty yë Tios Ni'ik Këjxmëpë, mëti'ipë të mputëkëtyën, ko tëë yë mëtsip xymyëmëtakta'ay. Ënät yë Abram ojts majk tpupëky mëti'ipë ënäty myëët'ajtypyën.

²¹Tä ja yajkutujkpë mëti'ipë jam Sodomë ënä'ämpë t'ënëmaay ja Abram: Mooykyës yë ja'ay ets mijts mëwë'ëmta'a tu'kë'ëyë mëti'ipë yaa ijtpën.

²²Tyaa Abram y'ëtsooy: Tëës yë Tios nwinwanë, yë Tios Ni'ik Këjxmëpë, mëti'ipë tsajp ets naaxwiinyëtë yajkojën,

²³ko ka'apës tii ntonëty mëti'ipë mijts mjä'ä'ajtypyën, ni yë'ë piity tu'kpoty nkatonëtyës ni yë'ë po'o tu'ktsuky, mëti'ipës jeexyë yë nkë'ëk ntuk'oytyuunpyën, këtiipë ok m'ëna'anëty ko mijts të xyajkumeenytyä'äkyës.

²⁴Nitiijës nkatsoky, yi'iyë tëy mëti'ipë të tkay të t'uuktën yë tuunpëtëjk. Yë ja'ayëty mëti'ipës të xyjyämyëët'atën, yë Aner, Escol ets Mamré, yë'ë tëyëty patëtëp t'ëxajëtëty yë kyuma'ayënëty.