Read Biblia Mixe de Quetzaltepec Génesis 15 Bible Online

Génesis 15 - Biblia Mixe de Quetzaltepec bible

Génesis 15

¹Ënät yë Tios ojts tmëkäjpxy yë Abram kuma'ayjoty ets t'ënëmaay: Këtii mtsë'ëkë Abram, jä'ä ko ëjts mijts nkuwäämpy. Yë mkuma'ayën mëj y'ita'any.

²Tääts yë Abram y'ëtsooy: Wintsën, ¿Tiijës nyajwa'anëty mëti'ipës xytyukkumayaanpën, mijts wa'ats xynyijawë ko ka'apës u'unk ëna'k nmëëtëty? Ka'apës yë u'unk maay nitu'uk të xytyukmëkënu'kxës, tu'kë'ëyë kuma'ayën mëti'ipës nmëët'ajtypyën yë'ë jyä'ä'atäampy yë Eliézer mëti'ipë jam Damaskë ijtpën, tu'uk yë ntuunpës.

⁴Ënät yë Wintsën y'ëtsooy: Yë mkuma'ayën yë'ë jyä'ä'atäämpy yë mkë'ëm'u'unk, ka'ap wyiinkja'ayëty.

⁵Ënät ojts yë Wintsën yë Abram tyajnëjkxy ëpëky ets t'ënëmaay: Ëk'ix yë mëtsa'a tsajpjotmëpë, ëkmëtyow pën y'ëkjëkyejpy xymyëtyoowëty. Timjëtu'un myäy'ata'any yë m'u'unk m'ok jëtu'un ijxtëm yë mëtsa'a myäyëtyën.

⁶Abram ojts tmëpëky yë Wintsën. E paaty ojts kyupëkyë ets yajnajxë wa'ats.

⁷Jëtu'un y'ënëmaayë: Ëjts jëtu'un Wintsën. Ëjts mijts të nyajpëtsëmy Ur, ma nyaaxjotmën yë Caldeo ja'ayëty ets ya'atë naax kam mijts ntukkumayä'äny.

⁸Ets Abram y'ëtsooy. E Wintsën ¿wi'ixës jëjp'ixy nmëët'atëty, koos xytyukkumayä'äny ya'atë naax kam?

⁹Tä yë Tios y'ënëmaayë: Yajmin tu'uk yë tsajpkaa ayääkë to'oxypyë, tu'uk yë tsajppax ets tu'uk yë kupixyny yä'äy yä'k'apetypë, mëti'ipë tëkëëkëty yë jyëmëjtën; näjyëtu'un xyajminëty tu'uk yë muuxy ets tu'uk yë kuuk.

¹⁰Abram ojts tyajmiinta'ay tääpë jëyujk ma Tiosën. Këëkujkmjaty ojts tsujkwä'kxy ets tpëjktäky wiinkuwopëty. E yë joonëty ka'ap ojts tsujkwä'kxy.

¹¹Ja majkwejkxy jëtu'un tjanty nyikä'äk tjantykyukä'äktë ja jëyujk'ooky, ja Abram jä'ä y'ëtsë'këp ënätyë.

¹²Ko ojts kyootsënë, ënät yë Abram yë mëk ma'ayë myajtsë. Ajotkumonë ojts t'ixy, ko yë kootsajtën të nya'ëwtijta'ayë. Ënät ojts mëk tsyë'ëkë.

¹³Tääts ja Wintsën y'ënëmaayë: Mnijawëp ko yë m'u'unk m'ok jëkäm jyuuky'ata'antë wiink naax wiink kajpn. Jam yajtëytyuna'antë ets ëxëëk jyata'antë. Majktaxk mëko'px jëmëjt yajtëytyuna'antë.

¹⁴E ëjts ntëytyunäämpyës näjyëtu'un mëti'ipë ënäty ëxëëk tuunëtëpën ja m'u'unk m'ok. Jëtu'un ja m'u'unk m'ok y'ëwaatsëpëtsëmtëty ets jatëkok jyotmëkta'aktëty.

¹⁵Mëti'ipë mijts mpatëpën, yë'ë ko m'ooka'any oy yajxon ko mëjja'ayënëty, jëtu'un tyu'ukmuka'any yë m'anëmë mëët yë m'ap m'ok yë y'anëmë.

¹⁶Koonëm ënäty të myintë naaxwiiny ja m'u'unk m'ëna'k, taxk'oknipety täänëm jatëkok wyimpitëty ma ya'atë it naaxwiinyëtën. Jä'ä ko ka'anëm ënäty kyukëxënëm ma ja Amor ja'ayëty ja ëxëëkpë tuntën tkajpxtën.

¹⁷Ko ënäty të tsyu'ujënë ets koots kyëxë'knë. Ënät ojts t'ixy tu'uk tsijtk, jëënjok jap pëtsëëmp. Ets tu'uk t'ijxy yë jëënyä'änk, jam nyäxy ma ja jëyujk ookyën.

¹⁸Jä'ä xëëw ojts ja Tios tuny tu'uk ja käjpxytyu'unën mëët yë Abram, ets t'ënëmaay: Ya'atë naax kam yë'ëjës nmo'ojäämpy yë m'u'unk m'ok. Jampaatës nmo'oja'any ma ja nëë'aawën Egiptëpë ets jampaat ma ja Éufrates mëjnëë'aawën.

¹⁹Yë'ë mëti'ipë nyaax'ajtëpën yë Quenehe ja'ayëty ets Catmón ja'ayëty.

²⁰Näyjyëtu'un ma y'itën yë Hit ja'ayëty, Ferez ja'ayëty, Refa ja'ayëty,

²¹Amor ja'ayëty, Canaán ja'ayëty, gergeseos ja'ayëty ets Jebús ja'ayëty.