Read Biblia Mixe de Quetzaltepec Génesis 16 Bible Online

Génesis 16 - Biblia Mixe de Quetzaltepec bible

Génesis 16

¹Yë Sarai ka'ap ënäty tjëkyepy tmo'ojëty yë u'unk maay yë Abram. Jam tu'uk ja tyuunpë, Agar xyëëwajtyp, Egiptë kyukajpnëty.

²Ënät t'ënëmaay ja Abram: Ëk'ix, mijts mnija'ap ko yë Tios yë'ëjës xykyamoopy yë u'unk maay. E paaty yam nmënu'kxtä'äky ets xymyëët'atëty yë ntuunpës Agar. Wä'änxyëp yë Tios u'unk maay myo'ojëtëty etsës ëjts n'u'unk'atëty. Ënät ja Abram ojts tkupëky ijxtëm ja Sarai y'ënë'ëmxëtyën.

³Ojts ja Abram tmëët'aty ja Agar, kom majk jëmëjt ma ënäty jam Canaán të jyä'tyën.

⁴Ko ja Abram tmëët'ajty ja Agar, ja Agar ojts wyi'imy u'unk mëët. E ko nyäjya'awëyë u'unk mëët, ka'ap ojts t'ëkmëj'ijxnë ja wyintaj.

⁵Ënät ja Sarai t'ënëmaay ja nyiye'etyëjk Abram: Mijts poky mëët'ajtyp koos yë Agar ka'ap xy'ëkmëj'ijxnë. Ëjts mijts kë'ëm të nmo'oy ets xymyëët'atëty ijxtëm jeexyë xytyo'oxytyëjkëtyën. E ko ënät nyäjyawëty u'unk nyëkëjxm'ajtyp, mëj këjxm nyäjya'awënë. Tios ënät ëna'anëp, pën yë poky myëët'ajtyp, pën ëjts ëkë mijts.

⁶Tä ja Abram y'ëtsooy ja tyo'oxytyëjk: Yë mtuunpë mijts mkë'ë'am'ajtyp, mijts mnija'ap wi'ix xytyuna'any. Ënät ja Sarai tukjoot'anpëjky ja Agar ets koonëm tyajkeky.

⁷Tëë ënäty yë Agar yë të'ëts'it tpëjknë ko ojts tu'uk yë Tios tsyajpjotmëtë kukäjpxy myëkäjpxyë, jam winkon ma tu'uk nëëwookyën, jä'ä xyëëwajtyp Shur,

⁸ets yajtëëwë: Agar, mëti'ipë tuunpë'ajtëpën yë Sarai. ¿Maa jëtu'un mtsoony? ets ¿maa jëtu'un mnëjkxy? Ënät ja Agar y'ëtsooy: Yë'ëjës nkukekpy yë nwintajës Sarai.

⁹Tä ojts ja Tios kyukajpxpë y'ënë'ëmxëty: Wimpit jatëkok ma të mtsoonyën, ma mwintajën Sarai tyëjkën ets mëmëtow, pën tii mtuk'ënä'ämëp.

¹⁰Tyaa ja Tios kyukajpxpë ojts näjyëtu'un jyaakënë'ëmxëty: Ëjts nyajmayëjäämpyës yë m'u'unk m'ëna'k, ets m'ok'u'unk m'ok'ëna'k, jëtu'un ijxtëm ka'ap pën tmëtyoowta'ajëtyën.

¹¹Mijts u'unk maay mnëkëjxm'ajtyp, ko myinëty jya'tëty naaxwiiny jä'ä xyëëwmo'ojëty Ismael, jä'ä ko Tios tëë tmëtoow'ity yë mjë'ëyën myaxën.

¹²Jëtu'un nëjkx y'in'aty tä jëyujkën, mëti'ipë mëk inën. Tsip tunëp oy tyimpënëty mëët, ets tu'kë'ëyë tsiptuna'antëp mëët yë'ë. Ja jyëën tyëjk ta'tspëky tyaj'itëty, oy ja jyiiky myëku'uk kya'oyjyawëtëty.

¹³Yë Agar, yë'ë ënäty Tios mëët të myëtyä'äky, paaty ojts txëëwmo'oy: Tios mëti'ipë winë y'ijxypyën tyuunpyën, jëtu'un nyämyä'äy nyätyajxëty: Tiosës kë'ëm të xytyim'ixy, e tyamës je'eyëm njaakjuuky'äty.

¹⁴E paaty näjyëtu'un jampë ja nëëjut txëëwaty: Ja nëëjut mëti'ipë juukyën ets xy'ixës. Ya'atë nëëjut jam yajpaaty itkujky ma Cadés mëët yë Béred nyäpyäätyë.

¹⁵Ënät yë Agar tu'uk yë u'unk tyajmëxu'unk'ajty, Abram mëët t'u'unk'aty. Jä'ä ojts txëëwmo'oy Ismael.

¹⁶Majkta'px tëtujk ënäty yë Abram yë jyëmëjt ko myëxu'unk'ajty yë Ismael.