Read Biblia Mixe de Quetzaltepec Génesis 23 Bible Online

Génesis 23 - Biblia Mixe de Quetzaltepec bible

Génesis 23

¹Jä'ä ojts yë Sara jyuuky'äty mëko'px ja i'px wëxtujk jëmëjt.

²Jam y'o'ky ma ja it naaxwiinyëtë txëëwatyën Quiriat-arbá, ma tu'uk ja kajpn txëëwatyën Hebrón, ma ja Canaán nyaaxjotmën wyi'imy. Jekpyaat yë Abraham tnimoony tnitujky yë tyo'oxytyëjk Sara ko y'o'ky.

³Ënät ja Abraham tsyo'ony ma ënäty jam ja Sara ja nyini'kx wyijtsnën ooky ets ojts nyijkxy ma ja Hit ja'ayëtyën mëti'ipë jam tsënaaytyëpën ma tampë ja it naaxwiinyëtën, tääts t'ënëmaay:

⁴Oyës n'ëkjaaypyaat n'ëkjaaypyo'kxëty ma yaa miitsëty yë mnaax mkajpnëtyën, mëpaatës yë naax wäänë xytyukmëtooktë, ma tjëkyäpëtyën yë nto'oxytyëjk nyaaxtëkëtyën.

⁵Tää ja Hit ja'ayëty y'ëtsoowtë:

⁶Tun yë mëyajtën mijts Wintsën, ëkmëtow yajxon. Mijts Tios m'u'unk'ajtëp ets yë'ë të mwin'ixyë yaa ma ëëtsëtyën. Yajnaaxtëkë yë mto'oxytyëjk ma jawäänë oypyë ja it nnaaxwiinën, ijxtëm mijts mja'ay'ätyën, pën tii mka'ëkmo'ojanëp.

⁷Ënät ja Abraham wyakë'ky ets tyajnikëxë'k ja winkutsë'kën ma ja Hit ja'ayëtyën,

⁸ets t'ënëmaay: Pën janty tëy m'ëna'antë etsës yë nto'oxytyëjk yaa nyajnaaxtëkëty, tuntë mëyajtën amëtowtë yë Efrón, yë Zohar yë y'u'unk,

⁹etsës xytyukmëtookëty ja y'aank, mëti'ipë myëët'ajtypyën ma ja y'it nyaaxwiinyën jam Macpelá. Ëjts nkujuyäämpyës yam oy jënu'un tyimtsowpaatëty, jëtu'unës jotkujk njä'äniwa'anëty maas ja n'o'kpë nyaaxtëkëtyën ma tääpë it naaxwiinyëtën.

¹⁰E yë Efrón, ja Hit ja'ay tam ënäty näjyëtu'un yajpaaty ma ja myëku'ukëtyën. Ënät t'ëtsooy ja Abraham ets ja myëku'uktëjk tukmëtowa'any ets tu'kë'ëyë jënu'un nyaxtën jam ma yajnitëkën ja kajpn.

¹¹Ka'ap mëku'uk, tun yë mëyajtën. Tyam mijts namo'ojëty yë it naaxwiinyëtë ets ja nyi'aank mëti'ipë jam naaxjotmën. Yë nmëkunaax nmëkukajpnës yë'ë yam myëtoowtëp, ko mijts yam namo'oy ja nnaaxës nkamës ets jam ja mto'oxytyëjk xyajnaaxtëkëty.

¹²Ënät yë Abraham tyajnikëxë'ky jatëkok ja winkutsë'kën ma ja ja'ayëtyën mëti'ipë jam kunaax'ajtp kukajpnajtëpën,

¹³tääts t'ëtsooy ja Efrón jämyë ma ënäty jam nimay ja ja'ayëtyën: Tun yë mëyajtën amëtoow'ijtkës yë n'aaw n'ayuk. Mpëjtsoopyës yë mëyajtën ets xy'ëxaj xykyupëkëty ja nwit nmeenyës mëti'ipës yam ntukujuyäämpyën ja m'it mnaaxwiinyëtë, ënätnëmës ja nto'oxytyëjk jam nyajnaaxtëkëty.

¹⁴Ënät y'ëtsooy ja Efrón:

¹⁵Amëtoow'ijtkës Wintsën, yë it naaxwiinyëtë, jä'ä tsyowpaaty taxk mëko'px aakyë'ë poop pujxn meeny. E yë nyitsow ka'ap mëpaat tyam yë'ë nätyukäjpxy tsyi'këmë, tiits tim yajnaaxtëjkëkyoj yë mto'oxytyëjk jam.

¹⁶Ojts ja Abraham tkupëky jënu'un ënäty tsyoowpaatyën ja it naaxwiinyëtë ets ojts tim kyujuy ja nyaax ja Efrón, ma ënäty jam nimay yajpaatën ja Hit ja'ayëty, mëët yë poop pujxn meeny, aak kijpxtä'äky nu'unjaty ënäty jye'emtyëtyën.

¹⁷Paaty ja nyaax kyamtëjk ja Efrón, mëti'ipë ënäty jam myëët'ajtypyën Macpelá, awinmtsow wyi'imy mëët yë Mamré, jä'ä jëtu'un ja it naaxwiinyëtë mëti'ipë ënäty mëët ja y'aankën ets kepyjyot.

¹⁸Yë'ë ojts ja Abraham tjä'äniwanë. Nimay ja Hit ja'ayëty t'ijxtë tmëtoowtë ets tu'kë'ëyë jënu'un ënäty jam nyaxtën ma ja kajpn yajnitëkën, jä'ä ojts wyë'ëmtë ijxpë mëtoowpë.

¹⁹Ënät ja Abraham ojts ja tyo'oxytyëjk jam tyajnaaxtëkë ma ja tsaajutën mëti'ipë jam yajpatpën Macpelá, winkon nyäpyäätyë mëët yë Mamré, yajtijp näjyëtu'un Hebrón, mëti'ipë jamën Canaán.

²⁰Jëtu'un ojts wyë'ëmnë kyë'ë'am ja it naaxwiinyëtë ets näjyëtu'un ja aank mëti'ipë ënäty jamën Macpelá, mëti'ipë tukmëto'kën ja Hit ja'ayëty, tääts jam nyäyajnaaxtëkëtëty.