Read Biblia Mixe de Quetzaltepec Génesis 24 Bible Online

Génesis 24 - Biblia Mixe de Quetzaltepec bible

Génesis 24

¹Mëjja'ay ënäty yë Abraham oynyë, e Tios mëj këjää të kyënu'kxyë.

²Paaty ojts tëkok t'ënëëmë ja tyuunpë mëti'ipë mëjja'aynyën mëti'ipë kyëwent'ajtypyën tu'kë'ëyë winë mëti'ipë ja Abraham myëët'ajtypyën. Tä t'ënëmaay: Pëjkta'ak yë mkë'ë ma npuuypya'tkënës.

³Ets nikajpx mëët yë Tios xyëëwkëjxm, mëti'ipë Tios'ajtpën tsajpjotm ets naaxwiiny, ko këtii xy'a'ixëty ets nmaankës pyëkëty y'uukëty mëët yë to'oxy'ëna'k yaapë kyukajpn'atën Canaán, maas tyam ntsëënën njuuky'ätyën.

⁴Jam nëjkx yë tyo'oxytyëjk xy'ixtaayë maas yë nnaax nkajpnën ets xywyin'ixëty tu'uk ja to'oxytyëjk, mëti'ipë tyo'oxytyëjk'atëpën, mëti'ipë winkon yajjëëky'ajtp yajmëku'uk'ajtpën.

⁵Tä ja tyuunpë y'ëtsooy: E ko xykyamëëtmina'anëtyës ja to'oxytyëjk. ¿Tiijës mëpaat ntuny? ¿Koonëmës ja myaank nwoownëjkxëty jam ma ja naax kajpnën ma ojts mtsoonyënë?

⁶Tä ja Abraham y'ëtsooy: Ka'ap, këtii jam xywyoownëjkxëty.

⁷Yë Wintsën, yë Tios tsajpjotmëpë, mëti'ipës ojts xyajtsoonyën maas yë nteety ntaak yë jyëën tyëjkën ma ja y'it nyaaxwiinyëtën ja njëëky nmëku'ukës. Ets ojts xytyukwinwanës ya'atë it naaxwiinyëtë, ko tmo'oja'any yë n'ok'u'unk n'ok'ëna'kës, yë'ë näjyëtu'un ënät kyäxëp ja Tios ja tsyajpjotmëtë kukäjpxy ma mijtsën. Ets xyajmin xyajja'tëty ja to'oxy'ëna'k, mëti'ipës ja nmaank Isaac tyo'oxytyëjk'atëpën.

⁸Pën ja to'oxytyëjk ka'ap mëëtmina'anyë, mijts ëwaatsëtum je'eyëm mwë'ëma'any, ma ya'atë ja amay jotmayën. E yë n'u'unkës niwi'ixtsow mëpaat jam xykyayajnëjkxy.

⁹Ënät ja tuunpë ojts ja kyë'ë tpëjktä'äky ma ja wyintsën Abraham ja pyuuypya'tkën ets ojts tnikäjpxy mëët yë Tios xyëëwkëjxm ko tuna'any jëtu'un tä ënäty ja wyintsën Abraham të y'ënë'ëmxëtyën.

¹⁰Tä ja Abraham ja tyuunpë nyänyipëjktakëyë. Jä'ä wyin'ijx ja oyëtypë näynyamo'ojë, mëti'ipë ënäty ja Abraham myëët'ajtypyën ets näjyëtu'un tmënëjkxy majk yë jëyujk jëku'ux ma ja nyaax kyajpnën ja Nahor, mëti'ipë jam yajpatpën Mesopotamia.

¹¹Ko ja Abraham ja tyuunpë jam jyä'äjty kajpn winkon, kujk ënäty jyajmoonë, e jä'ä xëëw ënäty ja to'oxy'ëna'këty myintë nëëwijtspë nëëkoompë ja jampë kyukajpn'atën. Paaty ja tuunpë jam tyajwa'ak'o'oyëtyääy ja jëyujk jëku'ux winkon mëët ja nëëjut ets jam pyo'kxtë.

¹²Ënät ojts tyëkë kajpxtakpë ets y'ënäny: Wintsën mëti'ipë y'ëwtajtypyën yë nwintsënës Abraham. Mijts myajkutukëp ets oy wyimpëtsëm jyëjpëtsëmëty ya'atë amay jotmay tyampës nkujëtitën. Yaj'ixët yë m'oyajtën maas yë nwintsën Abrahamën.

¹³Tyamës nwë'ëma'any winkon ma ya'atë nëëjutën ets ja to'oxy'ëna'k myintëty nëëkoompë, yaapë kyunaax'at kyukajpn'atën.

¹⁴Mijts myajkutukëp, koos ja to'oxy'ëna'k n'ënëëmëty: Tun yë mëyajtën tuk'ënu'kxkës wäänë yë mnëëtsiiyë wä'änës n'ëknëë'uuky, koos xy'ëtsowëty: Tyaa nëë uuk, pën mijts m'ënaanp n'ëkyajnëë'uukyës näjyëtu'un yë mjëyujk jëku'ux, yë'ëjës ntuk'ixëp ko yë'ë ënäty mijts të xywyin'ixy ets to'oxytyëjk'atëty ja mtuunpë Isaac. Jëtu'untsës ëjts jotkujk nwë'ëmëty ko mijts mjanty'oyjya'ap yë nWintsënës.

¹⁵Ka'anëm ënäty tuunta'ay ja kyapxtakën, ko myiiny tu'uk ja to'oxy'ëna'k mëët yë nyëëtsiiyë kyejkyijxy. Jä'ä ënäty ja Rebeca, yë Betuel yë nyëëx, jä'ä ënäty Betuel xyëëwajtyp ja Milcá ets ja Nahor ja myaank, ja Abraham ja myëkä'äx.

¹⁶Janty oy janty tsuj ënäty yë Rebeca kyëxë'ëky. E ka'anëm ënäty ni pën ye'etyëjk mëët tsyëënënëm. Tä kyëtäky ma ja nëëjutën ets tyaj'ujtsy ja nyëëtsiiyë mëët yë nëë.

¹⁷E winpijnëpts ënätynyë ko ja Abraham ja tyuunpë pyëyë'ktso'ony ets tnajtspatëy ja kiixy, tä t'ënëmaay: Tun yë mëyajtën tuk'ënu'kxkës wäänë yë mnëëtsiiyë, wä'änës n'ëknëë'uuky.

¹⁸Oy mnëë'uukëty Wintsën: jëtu'un y'ëtsooy ja kiixy. Ënätyë nyätyukuwijtstutë ja nyëëtsiiyë ets ojts tyajnëë'uuky ja Abraham ja tyuunpë.

¹⁹Ko ja tuunpë nyëë'uuktaay, tä ja Rebeca y'ënëmaayë: Wintsën nëjkxës yë nëë n'ëkjaakkony wä'änës n'ëkyajnëë'uuky näjyëtu'un yë mjëyujk jëku'ux.

²⁰Janty poj'am tuktäämtuty ja nyëëtsiiyë ma ja nëë'a'ukënën, tää ojts pëyi'ikyë wiinkpë tninëjkxkojnëpë, koonëm tyajnëë'uuktaay ja jëyujk jëku'uxëty.

²¹Ja tuunpë je'eyë t'ëkna'ixy ets ka'ap nitii ayuk tkäjpxynyëm. Yi'iyë ënäty jam myëmääpy myëtäjpy ko ja Tios ja y'oyajtën tyajnikëxë'ëky ets jëtu'un wyimpëtsëm jyëjpëtsëmy oy mëti'ipë pyatijtypyën.

²²Ko ja jëyujk jëku'ux nyëë'uktaaytyë, ënät ja ye'etyëjk tju'ty tu'uk ja pu'ts pujxnkë'ëjiits, jä'ä jye'emtyëty tëtujk nikonë ets tukjëjpëjkëy ja to'oxy'ëna'k. Ënät näjyëtu'un tmooy mäjtsk yë pu'ts pujxn kë'ëjän, naxy jye'emtyëty tu'kmëko'px nikonë,

²³tä t'ënëmaay: Tun yë mëyajtën tuk'ëwa'anëkës pën m'u'unk'ajtëp. Wä'änxyëp xynyamëët'atë ja'ajtakn ma mjëën mtëjkëtyën, tääjës jeexyë jam yë tsuu nyajnaxtë mëëtës yë nja'ay, mëti'ipës mëët nminyën.

²⁴Ënät ja to'oxy'ëna'k y'ëtsooy: Yë'ëjës nteety'äjtyp yë Betuel, yë y'u'unk yë Milcá ets Nahor.

²⁵Maas yë ntëjkën tam yë ja'ajtakn ma mpo'kxtëtyën ets tam näjyëtu'un yë jë'kxy jyätyë ma mëpaat y'oktë wyëtstën yë mjëyujkëty.

²⁶Ënät ja tuunpë nyäkyoxtënaaytyakë ets t'ëwtajty tmëpëjktsooy ja Wintsën,

²⁷tä y'ënäny: Nmëjja'ap nkënu'kxyjya'apës yë Wintsën, mëti'ipë y'ëwtajtypyën yë nWintsënës Abraham. Yë'ë të tyaj'ixyë y'oyajtën maas yë nWintsënën, paatyës të xytyu'uwinwoy ma ja jyiiky myëku'uk ja jyëën tyëjkën.

²⁸Rebeca pëyi'ikyë ojts nyijkxy ma ja tyëjkën ma ënäty jam ja tyaakën ets tukmëmëtyäky, mëti'ipë të jyäty të kyëpetyën.

²⁹Tam ënäty ja y'äy, jä'ä xyëëwajtyp Labán. Ënät ojts pëyi'ikyë tninëjkxy ja ja'ay ma ënäty nyëëkontën. Jä'ä mëti'ipë ënäty ja y'uty Rebeca nyikäjpxypën.

³⁰Të ënätyë t'ix ja kë'ëjiits ets ja kë'ëjän, mëti'ipë ja y'uty myëët'ajtypyën ma kyë'ëjën. Ets ko tëë ënäty tmëtoy, ko ja y'uty tnimëtyä'äky wi'ix ja ja'ay të y'ënë'ëmxëtyën. Tä ja Labán ojts tmëwinkony ja Abraham ja tyuunpë, mëti'ipë jam yajpatëpën ma ja nëëjutën,

³¹tä t'ënëmaay: Min maas yë njëën ntëjkën, mijts Tios y'u'unk, ko yë Tios mtsokyë mjawëty. Wi'ix ko yaa muum m'ëk wë'ëmpëty, ëjts tëëjës jam ni''ix nipëjktaakë ma mpo'kxtëtyën ets ma ja mjëyujk jëku'ux pyo'kxtëtyën näjyëtu'un.

³²Ënät ja tuunpë jam jya'ajtë ma ja Labán ja tyëjkën, tä ja Labán tniwë'ëntuty tnikäjtuty ja jëyujk jëku'uxëty ets tmooy ja jyi'kxy. Tä ja nëë näjyëtu'un tmëmiiny ets ojts tyaj'apujy tyajtekpyujy ja tuunpë mëët ja myëku'uktëjk.

³³Ko ënäty tëë ja kyä'äyën y'ukën yaj'apëjkëtya'atë, ënät ja Abraham ja tyuunpë y'ënäny: Ëjts ka'apës jëyëjp nkayä'äny, ma ka'anëm nkäjpxynyëmës ja n'amay njotmayës. Nikajpx tiitën mkajpxäämp: jëtu'un y'ënäny ja Labán.

³⁴Tä ja tuunpë tyëjkëy mëtyakpë ets y'ënäny: Ëjts jamës ntuny ma mëjja'ay Abrahamën.

³⁵Mëj yë Tios oy kyënu'kxyë jyëkyepyë ets jotkujk yaj'ityë ma jyëën tyëjkën ets ma jyuukyajtënën. Yë'ë të myo'oyë kumeenyajtën. Yë'ë myëët'ajtyp yë jyëyujk, tsyajpkaa, tsyajppaxëty, kupixynyëty ets tyuunpë ye'etyëjkpë to'oxytyëjkpë.

³⁶E ja tyo'oxytyëjk Sara, ojts tu'uk yë u'unk maay tyajmëxu'unk'aty ma ënäty kujk myëjja'ayënëtën. E yë nWintsënës Abraham yë'ë të tukkë'ëtëjkëtyä'äy ja y'u'unk myääy tu'kë'ëyë jënu'un winë tmëët'atyën.

³⁷Yë nwintsënës yë'ëjës ojts xyajkäjpxy mëët yë Tiosë xyëëwkëjxm etsës xy'ënëmaay: Këtii xy'ëwa'atsëty etsës yë nmaank Isaac pyëkëty y'uukëty mëët ja to'oxytyëjk yaapë Canaán kyukajpn'atën maas tyam ntsëënë njuuky'ätyën.

³⁸Jam mnëjkxëty maas ja njëëky nmëku'uk tsyëënëtën jyuuky'atën ets xy'ixta'ajëty tu'uk ja to'oxytyëjk mëti'ipës ja nmaankës pyëkëp y'uukëpën.

³⁹Tä ojts ëjts n'ëtsoyës: Wintsën, ¿Pën ja to'oxytyëjk ka'ap xypyamina'anyës?

⁴⁰Ënät ojts yë'ë xy'ëtsoyës: Ëjts Wintsënës yë nyë'ë tyu'u të npaye'eyë. Yë'ë kyäxäämpy yë tsajpjotmëtë kukäjpxy ma mijtsën ets oy wyimpëtsëm jyëjpëtsëmëty ma mnëjkxa'anyën. Ets xyajminëty tu'uk ja to'oxytyëjk mëti'ipë najëkäm yajjëëky'ajtp yajmëku'uk'ajtpën ets yë'ë mëët ja n'u'unkës nmaayës pyëkëty y'uukëty.

⁴¹E pën yë'ë ja nmëku'uktëjkës ka'ap mo'oja'anyë ja nyëëx, mijts ëwaatsëtuuy je'eyëm mwë'ëma'any ma ja mëti'ipë të xyjyanikäjpxyën Wintsën xyëëwkëjxm maas ëjtsën.

⁴²E jëtu'un ko tyam të nja'tyës ma yaa nëëkopkën, tääjës yë Wintsën të nmëpëjktsoy, Wintsën mëti'ipë y'ëwtajtypyën yë nwintsënës Abraham: pën janty tëyajtën ko oy wyimpëtsëma'any jyëjpëtsëma'any mëti'ipës mpajëtijtypyën,

⁴³tyam mijts n'amëtoy nmënu'kxtä'äky, ko ma tyam nyajpaatyënës winkon ma ya'atë nëëjutën. Ko ja to'oxy'ëna'k myinëty nëëwijtspë etsës n'ënëëmëty tun yë mëyajtën yajnëë'ukës wäänë,

⁴⁴ets koos xy'ëtsoowëty: Oy mnëë'uukëty wintsën ets min näjyëtu'un n'ëkyajnëë'uukyës yë mjëyujk jëku'ux. Jä'ä ënäty ja to'oxytyëjk mëti'ipë mijts të xywyin'ixyën ets yë'ë to'oxytyëjk'atëty ja nwintsënës ja y'u'unk myääy.

⁴⁵E ka'anëm ënäty nkajpxtakta'ayës, koos të n'ixy myiny yë Rebeca nëëwijtspë mëët yë nyëëtsiiyë kyejkyijxy. Tääjës të ninëjkxy ma ënäty jam ja nyëë tjuutyën etsës të n'ënëëmë: tun yë mëyajtën yajnëë'ukës wäänë.

⁴⁶E yë'ë ënätyë të nyätyukejky wyijtstu'utyë yë nyitsiiyë etsës të xy'ënëëmë: Oy mnëë'uukëty wintsën, min näjyëtu'un n'ëkyajnëë'uukyës yë mjëyujk jëku'ux. Jëtu'unës të xyajnëë'uuky të xyyajnëëpëky ku'uxyë ets tëë näjyëtu'un tyajnëë'uuky yë njëyujk jëku'uxës.

⁴⁷Tääjës të nyajtëy: ¿Ko pën tyaak'ajtyp tyeety'äjtyp? Etsës të xy'ëtsoy: Yë'ëjës nteety'äjtyp yë Betuel, yë myaank yë Nahor ets Milcá. Ënätës të npëjktä'äky tu'uk yë kë'ëjiits ma jyëjpën ets kë'ëjän mäjtsk ma kyë'ëjën.

⁴⁸Täätsës të nyäkyoxtënaaytyä'äkyë etsës të n'ëwtaty yë Wintsën; etsës të nmëjjaw të njaanty jawë ja Tios mëti'ipë y'ëwtajtypyën yë nwintsënës Abraham. Koos të xytyu'uwinwoy të xytyu'uwinwitsy ma ja në'ë tu'ujën ja oypyë etsës të nja'ty maas ja nwintsën ja jyiiky myëku'ukën. Jëtu'unës ja y'u'unk nyëëx n'amëtowanë npëjktsowanë, mëti'ipë pyëkëp y'uukëp ja nwintsënës Abraham ja myaank.

⁴⁹E tyam mijts ënät nëmaaytyëkës, pën oy ja aaw ayuk xy'ëëw'ëtsowa'antë, mëti'ipës ja nwintsën të xytyukmëkäxën ma miitsëtyën. E pën kajts nijawëjäämpyës näjyëtu'un, tääjës n'ixëty pën tiijës n'ëktuumpy.

⁵⁰Ënät ja Labán mëët ja tyeety Betuel y'ëtsoowtë: Tu'kë'ëyë ya'atë jam tsyoony ma Wintsënën, yë'ë ka'ap tjëkyepy ëëtsëty n'ëna'antëty jëtu'un'atëp, ëkë ka jëtu'un'atëp.

⁵¹Ëk'ix, tyaajës ja n'u'unk Rebeca, oy xywowëty ets yajnëjkx. Wä'än mëët tpëky t'uuky ja y'u'unk ja mwintsën, jëtu'un ijxtëm yë Wintsën të tyajnikutukën.

⁵²Ko ja jëtu'unpë ja aaw ayuk tmëtooy ja Abraham ja tyuunpë, ënät ojts nyäjyijtä'äkyë naaxkëjxy ets t'ëwtajty ja Wintsën mëët kukajpxën ja'awëkyëtakën.

⁵³Ënät tyajpëtsëëmy kanaakpëky ja näynyamo'ojë tä yë kë'ëjiitsën, nantsëmën, tatsktëyën, mëti'ipë oytyunyën mëët yë pu'ts pujxn ets poop pujxn ets wit tujkxy mëti'ipë nyamooyën ja Rebeca ets näjyëtu'un yajnamooytyë winë ja y'äy Labán ets ja tyaak.

⁵⁴Täänëm ojts ja tuunpë kyääytyëkë mëët ja myëku'uktëjk, mëti'ipë ënäty të pyaminyën. Jam ojts ja tsuu tyajnaxtë. E ko komjëpom myä'äypyëtë'ktë, ënät ja Abraham ja tyuunpë y'ënäny: Oyës ënät jatëkok nwinpitëty maas ja nwintsën ja jyëën tyëjkën.

⁵⁵Ets ja Rebeca ja y'äy ets ja tyaak y'ëtsoowinpijtë: Wä'än jeexyë yë kiixy t'ëkjaakwë'ëmy oy majk xëëwën mëët ëëtsëty. E ko majk xëëw kya'pxëty tääts mpanëjkxëtëty.

⁵⁶Tä ja tuunpë y'ëtsooy: Këtiijës nëkoo xyajpo'oxtë. Tios të tyajkutuky etsës oy yë nnë'ë ntu'u wyimpëtsëm jyëjpëtsëmëty. Paaty tyam ëxmajtstëkës wä'änës n'ëknëjkxy maas ja nwintsën ja jyëën tyëjkën.

⁵⁷Ënät ojts y'ëtsoowkojnëtëpë: Min ëjts n'ëkmëkajpxtë ja kiixy, wi'ix yë'ë y'ëk'ënaanpë.

⁵⁸Tä tmëjyaxëtyë ja Rebeca ets tyajtëëwtë: ¿Wi'ix mnëjkxaanp mëët tyaapë ja'ayë? Tä ja Rebeca y'ëtsooy: Oyës npanëjkxëty.

⁵⁹Ënät ojts t'ëxmajtsnëtë ja Rebeca ets nyëjkxëty, ojts näjyëtu'un tukpakäjxtë ja tyuunpë to'oxytyëjkpë, mëti'ipë ënäty të kyëwent'atyën xëmë. Näyjyëtu'un ojts t'ëxmajtsnëtë ja Abraham ja tyuunpë ets mëti'ipë ënäty jämyëët'ajtëtëp.

⁶⁰Tä ojts tkënu'kxtë ja Rebeca mëët ya'atë aaw ayuk: Jëëky mëku'uk ets mëkä'äx, Taak tsi'tsk m'itëty ma nimayjyä'äyën. Ets ja m'u'unk m'ok myëmëta'akëp ja naax kajpn ma ja myëtsip tsyëënëtën jyuuky'atën.

⁶¹Ënät ja Rebeca mëët ja tyuunpë ojts tukwä'tspäjnëtë ja jëyujk jëku'ux ets ojts tpanëjkxnëtë ja Abraham ja tyuunpë. Jëtu'un ja tuunpë ojts twootso'onë ja Rebeca ma tyëjkën.

⁶²Yë Isaac jam ënäty ojts të wyimpity ma jam tu'uk ja nëëwookyën mëti'ipë xyëëwajtypyën Mëti'ipë juukyajtpën etsës xy'ixy. Jam ënäty tsyëënëtë ma ja naax kam txëëwatyën Négueb.

⁶³Uxëp ojts nyijkxy najxwij pëjkwijpë, ko ojts ajotkumonë t'ixy jam jëkäm myintë ja jëyujk jëku'uxëty.

⁶⁴E yë Rebeca näjyëtu'un tëë ënäty y'ijxpaatyë; e ko t'ijxy ko jä'ä ja Isaac, ënät ojts ja jyëyujk jëku'ux ënätyë tukjënäky.

⁶⁵Ets tyajtëëy ja tuunpë: ¿Pën ja'ay ximpë myintën? Tä y'ëtsooy ja tuunpë: Yë'ëjës yë nwintsën. Ënät ja Rebeca ojts ja wyit nyätyukwinkujuuxëty.

⁶⁶Ja tuunpë tyukmëmëtyaktaay ja wyintsën Isaac tu'kë'ëyë mëti'ipë ënäty të tunyën.

⁶⁷Ënät ja Isaac ojts ja Rebeca twoownëjkxy ma ja tyaak ja jyëën tyëjkën, tä ojts mëët pyiky y'uuky. Yë Isaac mëk tsojky tja'awëy yë Rebeca, jëtu'un ojts jotkujk nyäjyawëty jatëkok oy ënäty ja tyaak të y'ëk'ooky.