Read Biblia Mixe de Quetzaltepec Génesis 27 Bible Online

Génesis 27 - Biblia Mixe de Quetzaltepec bible

Génesis 27

¹Yë Isaac tëë ënäty myëjja'ayënë ets ka'ap y'ëk'ijxnë, paaty ojts tëkok tmëkäjpxy ja myaank mëti'ipë kä'äxkopkën, ja Esaú ets t'ënëmaay: U'unk maay. Tä y'ënäny yë Esaú: Wi'ix tatë.

²Ënät y'ënäny ja Jacob: Mijts m'ijxyp mnija'ap ko tëëjës nmëjja'ayënë ets wä'än ajotkumonë n'o'knëty.

³Paaty yam n'amëtoy npëjktsoy ets nëjkx m'ëk jëtity kamjotm tu'ujotm, mpapëkëp yë mti'pxn mëti'ipë aayjëyujk ujtsjëyujk mtukmajtsypyën, tääts xymyëja'tëty ets xyaj'oyëty yë tojkx, wä'änës n'ëkkäy n'ëk'uuky. Tääts ënät ok nkënu'kxëty maas naamka'anëm n'ookynyëmën.

⁴

⁵E yë Rebeca tap ënäty tmëtoow'ity tu'kë'ëyë, wi'ix ja Isaac myëtyä'äkyën mëët ja myaank Esaú. Paaty ko ja Esaú ojts nyijkxy tsu'utsy ixtääpyë kamjotm tu'ujotm.

⁶Ënät ja Rebeca ënätyë t'ënëmaay ja y'u'unk ja mutskpë, mëti'ipë xyëëwajtypyën Jacob: Ëk'ix mijts Jacob, tëëjës wa'ats tmëtoy ko ja mteety të myëtyä'äky mëët yë m'ajty Esaú ets të t'ënëëmë:

⁷Nëjkx ixta'a tu'uk yë jëyujk ets xy'oytyunëty tu'uk yë tojkx, täätsës nkayëty n'uukëty. E ok ënät nmo'ojëty ja nkënu'kxënës mëët yë Wintsën yë xyëëw yë'ë wyintuuy, maas ka'anëm n'ookynyëmën.

⁸E paaty tyam, mijts u'unk mëtoow'it mëti'ipë yam ntuk'ënëëmëjäämpyën:

⁹Nëjkx ma jap yë tsajppax kupixyny tyänëtën ku'ëkemy ets yajmin mäjtsk yë tsyajppax. Wä'änës n'oytyuunë yë mteety yë tyojkx, mëti'ipë oy tyimtsojkën'ajtypyën.

¹⁰Koos nyaj'o'oyëtya'ajëty tääts xymyënëjkxëty ja kyä'äyën y'ukën ets kyäyëty. Jëtu'unts mijts myajmo'ojëty ja kënu'kxën, ma ënäty ka'anëm y'ookynyëmën.

¹¹Ënät ja Jacob ja tyaak t'ënëmaay: Nanë yë n'ajtyës Esaú ni'u'kxy yë'ë, e ëjts ka'apës ni'u'kxyëty.

¹²Wi'ix m'ëna'ana'any, koos yë nteety xykyë'ënixajëty ets tjawëty ko ka'apës n'Esaujëty. Yë'ë jëtu'un myäyä'äny tyajja'any koos nëxi'ik ntukxi'iky, tääjës je'eyë xy'ëkjaakpojknëty jëtu'un ijxtëm jeexyë xkyënu'kxyënës.

¹³Tä ja tyaak y'ëtsooy: U'unk pën npojkëp, ëjts nkëpätëp mijts yi'iyë patun ijxtëm n'ënëëmën, nëjkx yajtso'onkoj mäjtsk yë tsajppax.

¹⁴Ënät ja Jacob ojts tyajtsoony mäjtsk ja tsajppax ets tuknimiiny ja tyaak. Ënät ja tyaak tyaj'o'oyëy ja tojkx janty xu'kx jëtu'un ijxtëm ënäty ja Isaac oy tsokyën.

¹⁵Tä tju'ty ja Esaú ja wyit mëti'ipë oyën, mëti'ipë ënäty jap pëjkë'ëky yaj'ijtëpën ma ja tyëjkëtyën, tääts tukxojxy jä'ä ja Jacob ja mutskpë ja myaank.

¹⁶Ënät tukniye'py ja myaank yë tsajppax ak ma ja kyë'ëjën ets ma ja nyas'uunën, ma ënäty ja Jacob ka'ap ja u'kxyajtën tmëëtëtyën,

¹⁷ets tmooy ja tojkx ets ja tsajpkääky mëti'ipë ënäty të tyaj'apaatën.

¹⁸Tää ja Jacob tyëjkëy ma ënäty jap ja tyeetyën ets t'ënëmaay: Tatë. Tä ja Isaac y'ëtsooy: ¿Wi'ix, tyaajës jä'ä, mpën u'unkës jëtu'un mijts?

¹⁹Ëjts Esaú'ajtp ja kä'äxkopk: jëtu'un y'ëtsooy ja Jacob. Tatë pëtë'ëk, tun yë mëyajtën, ëk'u'unyë, tää mkay m'uukëty, tëëjës ojts ja tuka'any n'ixta'ay ets ënät xymyo'ojëtyës ja mkënu'kxën.

²⁰Tää ja Isaac tyajtëëy: ¿u'unk wi'ix tëy poj'am të xytyimpatnë ja tuka'any? Ets ja Jacob y'ëtsooy: Yë mWintsën Tios, yë'ëjës të xypyutëkë etsës tsojk'am të npaaty.

²¹Ënät ja Isaac t'ënëmaay: Nimiinkës winkon, wä'än n'ëktonyës, pën janty mijtsëtën mEsau'ajtp.

²²Ënät ja Jacob ja tyeety twinkuwa'këy ets kyë'ënitona'anyë. Tää ja Isaac y'ënäny: Ja aaw yo'kn jëtu'unës nmëtoy tä Jacob, e ja kë'ë aaw jëtu'un tä Esaujën.

²³Paaty ja Isaac ka'ap tnija'awëy, pën jëtu'un ënäty, ko janty ni'u'kxy toony ja Jacob jëtu'un ijxtëm ënäty ja y'äjtyën Esaú. E tam ënäty ja Jacob tmo'ojanë ja Isaac ja kënu'kxën,

²⁴Ko jatëkok tyajtëëy: ¿Janty tëytyëm m'ëna'any ko mijts mEsaujëtyë? Ets ja Jacob y'ëtsooy: Jëtu'un tëyës n'ëna'any koos nEsaujëty.

²⁵Ënät ja tyeety y'ënëmaayë: Mooykyës yë nka'ayën n'ukën, u'unk maay, wä'änës n'ëktukkay n'ëktuk'uuky mëti'ipë ojts të xy'ixta'ayën. E koos nkaaytya'ajëty täänëm nkënu'kxëty. Ënät ja Jacob ja tyeety tyajkaay tyaj'uky, jëtu'un'äämpy ojts yë Isaac jyänty kyäy jyänty y'uuky.

²⁶Ko kyääytyääy y'uktaay tää t'ënëmaay ja myaank Jacob: Min winkon etsës xytsyu'kxëty.

²⁷Ko ja Jacob tmëwinkoony ja tyeety ets tsu'kxa'any. Ënät ja Isaac ojts xyuuk'ajtxëty ja wyit, tä ojts kyënu'kxyë mëët ya'atë ja aaw ayuk: Pën ya'atë mëti'ipës nxuukajtypyën n'u'unkës yë jyä'ä. Jëtu'un yë'ë ijxtëm xyuuktën yë aaypyijy ujts pëjy kamjotm tu'ujotm mëti'ipë, Tios kyënu'kxypyën jyëkyejpyën.

²⁸Tios mo'ojëtëp ja nëë tuu tsajpjotmëpë tsyoonyën, ets mnëë mmok may xyajpëtë'ëktëty, mëti'ipë mkayëp m'uukëpën.

²⁹May ja ja'ay mëtunëtëty ets mwinkoxtänëtëty ja naax ja kajpn mijts mwintuuy. Mijts mniwintsën'atëp ja mjëëky mmëku'uk, ets näjyëtu'un mwinkoxtänëtëty. Pën mpojkëp, poky näjyëtu'un wyë'ëmëty; e pën mkënu'kxëp, kënu'kxy näjyëtu'un wyë'ëmëty.

³⁰Të ënäty yë Isaac tnakënu'kxtaaynyë yë Jacob ets tap ënäty tyimpëtsëmy yë Jacob ma jap ja tyeetyën ko ja Esaú jyä'äjty, tsu'utsy ixtääpyë ënäty të y'otsy.

³¹Ënät ojts ënätyë timnyanipëjktaakë ja ka'ayën ukën xu'kxpë, ko tyaj'apatëtyääy tä ojts tukninëjkxy ja tyeety ets t'ënëmaay: Tatë ëkpëtë'ëk ets m'ëk kay m'ëk uukëty, tëëjës nyaj'oyë, mëti'ipës ojts të n'ixta'ayën, etsës xymyo'ojëty ja mkënu'kxën.

³²Ënät ja Isaac tyajtëëy: ¿Pën jëtu'un mijts? Ëjts yë Esaú yë m'u'unk yë mëjpë: jëtu'un y'ëtsooy yë Esaú.

³³Ënät ja Isaac ojts jëtu'unyë kyumon kyutukë ets natsë'ëkëmëët y'ënäny: ¿Pën ojts të tsyu'utsy'ixta'ay etsës të xytyukniminy ja nkääkyës n'uukyës? Ëjts tëëjës ja ntimjyë'kxtaaykyojy ma ënäty mijts ka'ap mjajtynyëmën ets të wyi'imy kënu'kxën mëët ja mëti'ipë jëyëjp të myinyën.

³⁴Ko ja Esaú jëtu'un tmëtooy wi'ix ja tyeety y'ënä'änyën, ënät ojts tyëkë yaxpë ets mëk yujk'ënany: Tatë mooykyës näjyëtu'un wäänë yë kënu'kxën.

³⁵Tä ja tyeety Isaac y'ëtsoowë: U'unk yë m'uty, yë'ë të myiny etsës të xywyin'ëëny ets të tmënëjkxy ja kënu'kxën mëti'ipë ënäty mijts mpatëpën.

³⁶Ënät yë Esaú y'ënäny: Tyimxëëw jëtu'un Jacob, jä'ä ko jëtu'un jyä'äy'äty. Mëmäjtsk'okës tyam ëka'any jëtu'un winë xypyëjkë. Më''ëka'any ojtsës xypyëjkë nkä'äxkopk'ajtën e tyam ja nkënu'kxënës ënät të xypyëjkë mëti'ipës xypyatpën. ¿Tatë këtii jap maa xyjyaakpëjkë'ëky etsës jeexyë näjyëtu'un wäänë xykyënu'kxpë?

³⁷Ënät ja Isaac y'ëtsooy: Ëk'ix, yë m'uty Jacob yë'ëjës të nmo'oy ja kutujkën ma mijtsën etsës të n'ënëëmë ko tuunpë'atëty ja jyiiky myëku'uk ets ko tmëët'atëty ja jyi'kxy pyiky mëj këjää. ¿Tiijës ënät tyam ntuunta'akëp mëët mijts u'unk maay?

³⁸Ja Esaú ni'ikyë ja kyajpx'ëtë'ëtsy: ¿Tatë tii këtiis mëpaat xytyimmooynyë ja kënu'kxënë, oyxyëp jeexyë ja tu'ukënë? Ënät jatëkok ja Esaú tyëjkëy yaxpë.

³⁹Ënät ja Isaac y'ënäny: Mijts mëjëkäm'atëp ja naax kam ma winë y'ity wyintëyën, ets ma ja nëë tuu xëmë kyä'äyën.

⁴⁰Kë'ëm nëjkx mnäkyuwa'anyë mëët ja mtujn mpujxn, yë m'uty yë'ë mëtunëp. E ko mëk mnäpyëjkta'akëtëty, tääts mnäyaj'ëwaatspëtsëmëtëty ma yë'ëjën.

⁴¹Jä'ä xëëw jä'ä jëmëjt yë Esaú ojts tmëtsiptso'onë ja Jacob, ko ënäty të pyëjkëty ja näkyënu'kxë, mëti'ipë yë'ë patëpën ma tyeetyën. Ënäty ja Esaú ojts myäy tyäjy: Tim wäänë jëtu'un täätsës nmëët'atëty yë monyëtukyë mëët yë nteetyës, ko wiinkoonëp ma y'o'knëtyën. Ko ja jëtu'unpë kyëxëty nyaxëty, taats nyaj'ookëty yë n'uty Jacob.

⁴²Ko ja Rebeca tnija'awëy wi'ix ja myaank myäy tyäjyën, tä ojts tmëkäjpxy ja mutskpë ja myaank mëti'ipë xyëëwajtypyën Jacob ets t'ënëmaay: Ëk'ix; yë m'ajty Esaú tëë mtukjoot'anpëkyë ets mtimyaj'ookanëp yë'ë, mëët wi'ix të xytyunyën ets jëtu'un ja tsyip y'äkë tyajnaxa'any ma mijtsën.

⁴³Paaty mëtoowit mëti'ipë tyam ntuk'ënëëmëjäämpyën. Kä'äk ets nëjkx jam Harán, jam mja'tëty ma ja tyëjkën ja n'ayës Labán.

⁴⁴Jam mwë'ëmëty, koonëm ja m'ajty ja tsyip y'äkë xyäämëty.

⁴⁵Ets tja'atyëkoyëty wi'ix të xytyunyën, e nän kë'ëm ntuk'ëwaanëty jëna'a jatëkok mwinpitëty. N'u'unkës jëtu'un nkayajtëkoyäämpy nimäjtskëty tu'ukyë xëëw.

⁴⁶Tä ja Rebeca t'ënëmaay ja Isaac: Ëjts tëëjës xynyatim tsyijpnë ya'atë juukyajtën mëët yë Hit ja'ayëty, mëti'ipë mëët të pyiky të y'uukyën yë Esaú. Pën Jacob yë'ë mëët pyiky näjyëtu'un yë Hit to'oxy'ëna'këty ijxtëm yë Esaú tyo'oxytyëjkën, mëti'ipë yaa tsënaaytyëpën Canaán, ni'ikë tim oy'atëp koos ëjts ntimy'ookëty.