Read Biblia Mixe de Quetzaltepec Génesis 28 Bible Online

Génesis 28 - Biblia Mixe de Quetzaltepec bible

Génesis 28

¹Tä ja Isaac ojts tmëkäjpxy ja Jacob ets tmooy ja kënu'kxën ets ojts tuk'ëne'emy, t'ënëmaay: Këtii yaa mpëkëty m'uukëty, mëët ja to'oxytyëjk mëti'ipë yaa kukajpnajtëpën, ma Canaán y'itjotmën.

²Nëjkx jam Padán-aram ma ja tyëjkën yë mtatwelë Betuel ets jam mëët mpëkëty yë nyëëx yë mjämy Labán.

³Yë Tios mëti'ipë myëët'ajtypyën yë mëj'ajtën ets kutujkën yë'ë mkënu'kxëtëp ets mo'ojëtëty ja m'u'unk m'ok nimay ets jëtu'un kanaak ja naax kajpn kyojëty ma ja m'u'unk m'ëna'kën.

⁴Wä'än mo'oyë ja kënu'kxën ets näjyëtu'un ja m'u'unk m'ëna'k mëti'ipë ojts tukwinwanën ja Abraham ets yë'ë tjä'ä'atëty ya'atë naax kam ma tyam ntsëna'ayëmën ijxtëm yë jaaypyaat jaaypyo'kxyën, jä'ä ko jëtu'un ojts yë'ë tukwinwanë ja Abraham.

⁵Jëtu'un ijxtëm ja Isaac tkejxën ja Jacob jam Padán-aram, jam ojts nyijkxy ja Jacob ets jam jyä'äjty ma ja jyämy Labán ja tyëjkën, ja y'u'unk ja Betuel, ja arameë ja'ay; yë Labán yë'ë Rebeca y'äy, yë Esaú ets Jacob yë tyaak.

⁶Yë Esaú ojts t'ixy ko yë Isaac ojts tkënu'kxy yë Jacob ets tkejxy jam Padán-aram ets jam pyëkëty y'uukëty. Näyjyëtu'un ko ja tyeety ojts tyuknipëkyë ets ka'ap pyëkëty mëët ja to'oxy'ëna'k mëti'ipë yajpatëpën Canaán.

⁷Ko ja Jacob ojts ënätyë nyijkxy jam Padán-aram, ijxtëm ënäty ja tyeety tyaak të y'ënë'ëmxëtyën.

⁸Tä ja Esaú twinja'awëy ets tja'akyujkëy ko ja tyeety ka'ap ënäty tukjotkëtä'äky ja to'oxy'ëna'këty mëti'ipë kukajpnajtëpën jam Canaán.

⁹Paaty ojts tninëjkxy ja Ismael, ja Abraham ja y'u'unk ets mëët pyijky ja nyëëx mëti'ipë xyëëwajtypyën Mahalat, jä'ä ja y'äy xyëëwajtyp Nebaiot, ëpëky ja wiinkpë tyo'oxytyëjk mëti'ipë ënäty mëët të y'ëkpëjkpën, mëti'ipë Canaán ja'ayën.

¹⁰Ënät ja Jacob tsyo'ony jam Beerseba ets ojts ja tu'u tpëky, mëti'ipë ja'ajtpën Harán.

¹¹Tä ojts jyä'ty ma tu'uk ja it naaxwiinyëtën, jam ja tsuu tyajnajxy. Jä'ä ko tëë ënäty kyutsu'ujënyë. Tä tu'uk ja tsaa tkoy'äjty mëti'ipë ënäty jam koonääpyën ets ojts jëtu'un myä'äy.

¹²Ënät jam wyinkumaay: t'ijxy ko tu'uk ja teeny yaa naaxkëjxy tsyoony ets jyä'ty tsajpkëjxm ets Tios tsajpjotmëtë kyukäjpxy jëtu'un jyänty pyät jyänty jyënaktë.

¹³Näyjyëtu'un t'ijxy kootëm ja Tios wyintänëty ets y'ënë'ëmxëty: Ëjts jëtu'un Wintsën, mëti'ipë Tyiosajtën yë mtatwelë Abraham ets mteety Isaac. Mijts nmo'ojäämpy ya'atë naaxjot ma jam mko'knën ets m'u'unk m'ëna'k.

¹⁴Yë m'u'unk m'ok jëtu'un nyimay'ata'antë ijxtëm yë naaxwayën ets xiitsow yaatsow tyajwintuka'antë yë naaxwiinyëtë, jëtu'un anëkëjxy'äämpy ets ëpa'tkë'ëy'äämpy, a'oytsyow ets anajnytsyow. Tu'kë'ëyë ja'ayëty kënu'kxy y'ita'antë mëët mijtskyëjxm ets m'u'unk m'ëna'këty.

¹⁵Ëjts mijts mëët n'ity, nkëwent'atäämpy oy ma mtimnyax mtimtyëkëty. Ets nän ëjts mijts nyajwinpitëp jatëkok ma ya'atë naaxjotmën. Ka'ap nmajtstu'uta'any, maanëmës ka'ap nkuuytyunyën ja mëti'ipë të ntukwinwanën.

¹⁶Ko ja Jacob ojts myä'äywyijy ënät ojts myäy tyäjy: Tëytyëm jëtu'un ko Tios yajpaaty ma ya'atë itjotmën. Ëjts ka'apës ënäty nijawë.

¹⁷Tä yë Jacob mëk tsyë'këy ets myääy tyäjy: Ya'atë itjot janty wa'atstëm yë'ë ets Tiostëm yë jyä'ä. Yaa jëtu'un ja Tios ja jyëën tyëjk. Ma ja tsajp tmëët'atyën ja nyitëjkëtyakn.

¹⁸Komjëpom ja Jacob ojts myä'äypyëtë'kojy tsojk ets ja tsaa tkoonë'ky mëti'ipë ënäty të tukmapetyën, tääts tänë tpëjktäky tä potsyën ets ojts tkënu'kxy mëët yë on ko tukniteemy.

¹⁹Ma tampë ja it naaxwiinyëtën tam ënäty tu'uk yë kajpn, mëti'ipë yajtijpën Luz, yë Jacob ojts ja xyëëw tyajtëkajtsë ets ojts tijy Betel.

²⁰Jam yë Jacob ojts tu'uk yë waantakën tuny ets y'ënäny: Pën Tios yë'ëjës xyjyämyëët'ajtp ets pën xykyëwent'ajtpës maas nëëye'ey ntu'uye'eyën ets pën xymyoopyës yë nka'ayën n'ukën ets mëti'ipës nwit'at nxox'atëpën.

²¹Ets koos nwinpitëty oy mëk ma ja jyëën tyëjkën ja ntaak nteetyës, ënät tëy njanty'ëna'anëtyës ko yë Wintsën yë'ë nTios'ajtyp.

²²Ya'atë tsaa mëti'ipës yam npëjktäkpyën ijxpäjtën yë'ë, Tios jëna'a tyëjk'atëp ets xëmës nmo'oja'any tu'kpëkyjyäty ja majkpë, mijts Tios koos tii npaatëty n'ixëty, mëti'ipës ënäty mijts xymyoopyën xykyäjxpën.