Read Biblia Mixe de Quetzaltepec Génesis 3 Bible Online

Génesis 3 - Biblia Mixe de Quetzaltepec bible

Génesis 3

¹Ja tsa'any jaakwijy jëyujk ënäty ni'ik këtiinëm ja wiinkëtypë ja jëyujk mëti'ipë ja Wintsën të tyajkojyën, paaty tyajtëëy ja to'oxytyëjk ets t'ënëmaay: Jëtu'un ja Tios të m'ënë'ëmxëtë ets ka'ap xyjyë'kxtëty ja ujts mëti'ipë jap jë'kxy kyamjotyën ¿këtiijë?

²Ënät ja to'oxytyëjk y'ëtsooy: Jyëkyejpy ëëts një'kxtëty oy tyimmëti'ipë ujts tëëmëty.

³Mëti'ipë tëy ka'ap tjëkyepyën ëëts një'kxtëty ets ntontëty yë'ë mëti'ipë jap yajpatpën kam'itkujky. Tiosës të xy'ënëëmëtë ko ka'ap mëpaat një'kxtës tääpë kepy yë tyëëm. Jä'ä ko pën ntuuntëpës jëtu'un kopkpëky koos n'ooktëty.

⁴Ënät ja tsa'any t'ënëmaay ja to'oxytyëjk: Ka'ap tääpë tyiyajtënëty. Ka'ap m'ooktëty.

⁵Yë Tios wa'ats tnijawë, ko tääpë ujtstëëm xyjyë'kxtëty, nëjkxëp xynyijawëtë mëti'ipë oy ka'oyën. Tä nëjkx tu'kë'ëyë winë xynyija'awëtya'atë ets nëjkx mja'ay'atë tä Tiosën.

⁶Ënät ja to'oxytyëjk t'ijxy, ko ja ujtstëëm janty'oy kyëxë'ëky ets janty oyjyë'kxnë. Tää tu'uk tnëtujky ets ojts tjë'kxy. Jä'ä ko y'atsojkpy ja këpetyajtën. Ojts tmo'oy näjyëtu'un ja nyiye'etyëjk ets ojts tjë'kxy.

⁷Jä'ä xëëw jä'ä jëmëjt ma ojts ja ujts jëtu'unpë tjë'kxtën, mëti'ipë ja Tios ka'ap t'ëwa'atsyën tjë'kxtëty. Ënät ojts wyinma'anytyëkëtë ets ja wyiin y'ëwatstë ets nyäjya'awëpyatëtë nimäjtskëty ko niwa'ats ëxwa'atstëm ënätyëty. Ënät ojts oywyi'ix t'atsuummujkojtë yë ujts'aay ets yë'ë mëët nyätyuk'ëtujkëtë.

⁸Yë ye'etyëjk ets tyo'oxytyëjk myëtoowtë ko ënäty yë Wintsën jam jyëtity kamjotm, ko jyënäky xyëëwajnë ma ënäty tyitykpyojyën. Ënät ojts pojën nyäyu'utsëtë jam kepypya'tkë'ëm jë'kxykyamjotm.

⁹E yë Wintsën ojts tmëkäjpxy ja ye'etyëjk ets t'ënëmaay: ¿Maamës jëtu'un mijts?

¹⁰Tää yë ye'etyëjk y'ëtsooy: Tëës njamëtoy ko ënäty mijts jap kamjoty mjëtity, Patyës ënätyë të nyäyu'utsyë. Jä'ä ko tsëtyuunpës koos niwa'ats n'ëxwa'atsëty.

¹¹Ënät ja Tios tyajtëëy ets t'ënëmaay: ¿Pën të m'ënë'ëmxëty ko mniwa'ats m'ëxwa'atsëty? ¿Ijxkëm të xy'ëkjë'kxnë ja ujtstëëm mëti'ipë ntuk'ënëmaaytyën ets ka'ap xyjyë'kxtëty?

¹²Ënät ja ye'etyëjk y'ëtsooy: Yë to'oxytyëjk mëti'ipës mijts të xymyo'oyën etsës xyjyämyëët'atëty, yë'ëjës të xymyo'oy yë ujtstëëm etsës të një'kxy.

¹³Ënät yë Tios tyajtëëy yë to'oxytyëjk ets t'ënëmaay: ¿Wi'ix ko jëtu'un të m'ëtë'ëtsy? Ënät yë to'oxytyëjk y'ëtsooy: Yë tsa'any yë'ëjës të xywyin'ëëny, paatyës yë tääpë ujtstëëm të një'kxy.

¹⁴Ënät yë Wintsën t'ënëmaay yë tsa'any: Mëëtkyëjxm ko jëtu'unpë të xytyuny, poky mijts xëmë m'itëty ma wiinkëtpyë jëyujkën. Tyam ets kë'ëyxyëëw kë'ëyjyëmëjt mox'ak mtukye'eyëp ets naax mjë'kxëp ets yë'ë xynyijuuky'atëty.

¹⁵Mijts ets to'oxytyëjk xëmë mnämyëtsip'atëtëty. Ets jëtu'un y'itëty ma m'u'unk m'okën ets ma to'oxytyëjk näjyëtu'un yë y'u'unk y'okën. Mkutä'änë'ëkëtëp yë y'u'unk y'ok ma nkëpajkën. Ets mijts nëjkxëp xytyekymyëtsu'utsë ma tyeky'ixpo'kxën.

¹⁶Tä t'ënëmaay ja to'oxytyëjk: Mëjwiinëp këjääjëp yë mpëjkën m'ijxën ko u'unk maay xyajmin xyajja'tëty. Ets mëët yë pëjkën ijxën xyajmëxu'unk'atëty yë m'u'unk maay. E mtsojkën ënäty jëtu'un mëët'ajtyp ma ja mniye'etyëjkën. Ets yë'ë myëët'atëp yë ënä'ämën kutujkën ma mijtsën.

¹⁷Tä ja ye'etyëjk näjyëtu'un t'ënëmaay: Mijts, ko yë mto'oxytyëjk të xymyëmëtoy ets të xymyëpëjkë ja y'aaw y'ayuk ets xyjyë'kxëty ja aaytyëëm ujtstëëm mëti'ipës ka'ap të n'ëwa'atsyën ets xyjyë'kxtëty. Tyam poky yë naax kam wyë'ëmëty mëët mijts mpokykyëjxm. Mëk mnäyajtunëtëty ets mjë'kxy mpëky pyëtsëmëty kamwinm tu'uwinm mapaat yaa mjuuky'ätyën naaxwiiny.

¹⁸Jam naaxwinm muxëp yë aay ujts mëti'ipë kuumpën ets yajtsëtyujtpën. Yë aay ujts yë'ë mjë'kxëp.

¹⁹Mëk mtunëty ets mpëxyikëtëty, täänëm ja mka'ayën m'ukën xypyaatëty, jëtu'un mjuuky'atëty koonëm m'awinpitëty jatëkok naax, ma ojts mtsoonyën. Jä'ä ko mijts naax mëët m'oytyunyëty ets naax jatëkok mkawinpita'any.

²⁰Yë ye'etyëjk jä'ä txëëwmooy ja tyo'oxytyëjk: Eva. Jä'ä ko yë'ë ojts y'ity Taak tsi'tsk ma tu'kë'ëyë winë mëti'ipë juukyajtpën.

²¹Tios ojts kë'ëm t'oytyuny yë wit xox mëët yë jëyujk po'o jëyujk ni'ak, mëti'ipë wyit'at xyox'atëpën ja ye'etyëjk mëët ja tyo'oxytyëjk,

²²ets y'ënäny: Tyam jëtu'un yë ye'etyëjk të y'awinpity tä ëëtsajtëmën. Jä'ä ko tyam nyija'ap mëti'ipë oy ka'oyën. Ijxkëm ënät näjyëtu'un tjë'kxpë ja aaytyëëm ujtstëëm mëti'ipë ja juukyajtën myëët'ajtypyën ets y'ëkjuuky'ajtnëty winë xëëw winë jëmëjt.

²³Paaty ojts yë Wintsën tim yajpëtsëmy ja ye'etyëjk jap ujts tsa'am jë'kxykyamjotm. Ets tpëjktäky wiinktsow ets tyunëty naaxwinm tu'uwinm ma ojts kyojyën.

²⁴Ko ënäty tëë ja Ye'eytyëjk jap tju'tnë kamjoty, ënät nyäpyëjktakëtë jam awinmtsow ja Wintsën ja kyukäjpxy ets tu'uk yë tëypyujxn jëënmëët wyojpminy wyojpxëpy xiitsow yaatsow, yë'ë kyëwent'ajtëp ja jë'kxykyam. Jä'ä këtiipë pën tmëwinkonëty ja ujtstëëm mëti'ipë myëët'ajtypyën ja juukyajtën.