Read Biblia Mixe de Quetzaltepec Génesis 31 Bible Online

Génesis 31 - Biblia Mixe de Quetzaltepec bible

Génesis 31

¹Yë Jacob nyija'awëy ko ja Labán ja y'u'unk y'ëna'këty y'ëna'antë ko yë Jacob të tpëjkëtyä'äy winë yë Labán paaty ja Jacob të nyäyyajkumeenytyä'äkyë.

²Näyjyëtu'un yë Jacob t'ijxy ko yë Labán äjkëp xëmë kyëxë'knë. Ka'ap ijty jëtu'un jyä'äy'äty ko yë Jacob jyemyjyä'äjty.

³Ënät ja Jacob myëkajpxë ja Wintsën ets y'ënëmaayë: Wimpit ënät tyam ma ja nyaax kyajpnën ja mteety mtaak ets ma ja mjëëky mmëku'uk jam y'itën ëjts mijts njämyëët'atäämpy.

⁴Ënät ja Jacob ojts tnikäxë ja Raquel ets ja Lea ets myintëty jam kamjotm ma ënäty jam ja Jacob tsyajppax këwent'atyën ets kyupixyny këwent'atyën,

⁵tääts t'ënëmaay: Ëjts nnija'apës ko yë mteetyëty ka'apës xy'ëk'oyjya'awënë, tä ijty xy'oyjyawënës ko myë''ëka'any'äjty; e ja Tios mëti'ipës ja nteety y'ëwtajtën, ka'apës xy'ëxmatsy.

⁶Miitsëty wa'ats xynyijawëtë ko tuunpës mëk ma mteetyëtyën ets tëës mputëkë jëtu'un ijxtëm mëpaat tjëkyepyën ntunëtyës,

⁷e yë'ë je'eyës xëmë xywyin'ëëny ets janaam jatsojkës yë nmëju'uny xyajkunajkë. E yë Tios mëti'ipës n'ëwtajtypën ka'ap tyajkutuky ets wi'ix xytyimtunëtyës;

⁸ko ënäty kë'ëm yë'ë y'ënä'äny: Oy yë'ë ntukmëjuyëty yë jëyujk mëti'ipë najaamëtyën; ënät ijty ja to'oxyëtypë aakjëtu'un y'u'unk myääy tyajja'të; e ko ënäty y'ënä'äny: Tyam nmo'ojëty ja kupixyny mëti'ipë moxkeetsyëtyën, ënät ijty ja to'oxyëtypë aakjëtu'un y'u'unk myääy tyajja'të aak moxkeetsyëty.

⁹Jëtu'un ja Tios ojts wäänjaty pyëjkxëty ja jyëyujk etsës ëjts xymyo'oy.

¹⁰Tu'kxëëw tu'kpo'o ojts tëkok n'ixyës ma ënäty ja kupixynytyo'oxy ets kupixyny yä'äy nyämyukëtën, nwin'ijxyës kuma'ay joty ko ja yä'äypyë tsajppaxëty, mëti'ipë mëët ja to'oxypyë nyämyukëtën aak namoxkeetsy, aak najaam, aak wooxy ënätyëty.

¹¹Maas ënäty jam jëtu'un nkuma'ayën, ënät ja Tios tsajpjotmëpë kyukäjpxy xytyukmëkäjpxyës ja nxëëwës etsës n'ëtsooy: Tyaajës jä'ä.

¹²Ënät xy'ënëmaayës: yajxon xy'ixëty ets m'ixëp ko ja yä'äypyë tsajppax ets kupixyny nyämyukëtëty mëët ja to'oxypyë mëti'ipë jaamëtyën, tsixëtyën ets moxkeetsyëtyën, jä'ä ko wa'atsës n'ixy wi'ix yë Labán mtunyën.

¹³Ëjts jëtu'un Tios'ajtp, mëti'ipë ojts xy'ixyën jam Betel, jam ma ojts xykyënu'kxyën ja tsaa ets waantakën xytyuuny mëët ëjts. Paaty tyam jam ënät. Pëtë'ëk ets mtsoonëty ma ya'atë it naaxwiinyëtën. Nëjkx jatëkok ma ja mnaax mkajpnën ma ojts mëxu'unk'atyën.

¹⁴Ënät ja Raquel ets ja Lea y'ëtsoowtë: Ëëtsëty nitii kuma'ayën nka'ëkjëjp'ijxnëtës maas yë nteetyëty yë jyëën tyëjkën.

¹⁵Jëtu'un ëëtsëty xyjya'awënëtë, tä jaaypyaat jaaypyo'kxyën. Jëtu'un tpatnë ijxtëm jeexyë ëëtsëty të xytyo'knëtën, ko mijts kanu'un të xynyituun të xynyiye'eynyëtës maas yë nteetyën, mëët je'eyëp ko të napëktës mëët mijts.

¹⁶Paaty tu'kë'ëyë jënu'un yë nteetyës Tios të pyëjkxëtyën winë, ëëts yë njä'ä'ajtëm ets n'u'unk'ajtëm n'ëna'k'ajtëm. Paaty mijts yë'ë tun mëti'ipë ja Tios të mtuk'ëne'emyën.

¹⁷Ënät yë Jacob ojts nyänyipëjktaakëty ets nyëjkxanë jatëkok Canaán ma ja tyeety Isaac tsyënaayën. Tääts tyajpäjtaay ja y'u'unk tyo'oxytyëjk jëyujkëjxy jëyujk jëku'uxkëjxy. Tää nyätyu'ujëjpëjkëtyë tu'kë'ëyë jënu'un ja Jacob tmëët'atyën ets jënu'un ënäty të tpaatyën ma ja tyuunkën jam Padán-aram.

¹⁸

¹⁹Jä'ä ënäty ja Labán të tninëjkxy ja kyupixyny ets ja nyijëmk tnëkääpanë, e jam ënäty muum yajpaaty ko ja Raquel ojts tmeetsy ja naaxpotsy u'unk mëti'ipë ja tyeety ijty y'ëwtajtypyën.

²⁰Jëtu'un ojts ja Jacob twin'ëëny ja myë't Labán ja arameë ja'ay, ko ka'ap tuknija'awëy wi'ix ojts jam tsyo'onën.

²¹Ojts tmëkäkta'ay tu'kë'ëyë jënu'un ënäty tmëët'atyën, poj'am tuknajxtë ja Éufrates mëjnëë ets tuktëjkëtyë ja Galaad kopkjotm.

²²Tëkëëk xëëw ënäty të nyajxnë, ko ja Labán tnija'awëy ko ja Jacob të kye'eky.

²³Ënät ojts tnitsoontë nimay mëët ja jyiiky myëku'uk ets tnajtspatëtyë kom wëxtujk xëëw jam Galaad kopkjotm.

²⁴E jä'ä tsu'um ja Labán y'ënëmaayë ja Tios teety kuma'ayjoty: Ëkmëtow yajxon, këtii yë Jacob xymyëkajpxëty mëët yë äkë.

²⁵Yë Labán jam ojts tnajtspaatë yë Jacob ma ja Galaad kopkjotmën, ma ënäty ja Jacob të jyajtä'äkyën, najamtëkë tni''ijxëtyë ja jya'ajtakn myaatakn ja Labán mëët ja myëku'uktëjk, winkon ma ënäty ja Jacob jam näjyëtu'unën

²⁶Ënät ja Labán ojts tuk'ojy ja Jacob, wi'ix ko jëtu'un të y'ëti'itsy ets t'ënëmaay: ¿Tii të xytyuny? ¿Wi'ix ko të xywyin'ëënyës? Jëtu'unës yë n'u'unk nmaayës yaa të xyajmiinë tsumjyä'äy matsyjyä'äyën.

²⁷¿Wi'ix ko të xywyin'ëënyës ets jëtu'unyë të mke'eky, nitii të xykyatuk'ëwaanës? Koos jeexyë të nnijawë, oy tsuj jeexyë të n'ëxmatsy mëët yë xuxpë wojpë ets ëëpë koopë.

²⁸Ni yë'ëjës wäänë yë nnëëx etsës yë n'ok'u'unk n'ok'ëna'k të xykyatuk'ixy etsës jeexyë të ntsu'kxy, täänëm jeexyë akujk jotkujk të näy'ëxmajtsënë. Jëtu'un mijts të m'ëtëtsnë tä tsuuja'ayën.

²⁹Ëjts ka'apës nkajaty jeexyë mijts ëxëëk ntuntë ets jeexyë yam nyajtsëyut nyajwintëkoytyë, Tiosës tyam koots të xymyëkäjpxy etsës të xy'ënëëmë: Ëkmëtow, këtiis yë n'u'unk Jacob xymyëkajpxëty mëët yë tsip äkë.

³⁰Pën mijts mjanty wyinpitanëp ënäty ma ja mteety ja jyëën tyëjkën ets paaty të mtsoony. ¿Wi'ix ko të xy'ëkmä'tspë ntsaamëxanës?

³¹Ënät ja Jacob t'ëtsooy ja Labán: Jä'ä ko mijts ënäty ntsë'këp, tyaajës ënäty nmay ntajy ko ntij mijts atsip ja mnëëx xy'ëkpëjkënëtyës.

³²E pën jääts pën ma ëëtsëtyën të tkoonke'eky ja mtsaamëxan, wä'än t'ooky. Yë nmëku'ukajtëm yë'ë wë'ëmtëp ijxpë mëtoowpë, pën nmëët'ajtypyës winë mëti'ipë mijts mjä'ä'ajtypyën. Ko tii xypyaatëty ma ëëtsëtyën mëti'ipë mijts mjä'ä'ajtypyën oy xyajnëjkxëty. Yë Jacob ka'ap ënäty tnijawë pën Raqueltëm ënäty myëët'ajtyp ja tsaamëxan mëti'ipë ja Labán nyikäjpxypën.

³³Ënät ja Labán tyëjkëy ma ja Jacob ja wyitnikemyën, tääts tyëjkëy näjyëtu'un ma ja Lea ja jyä'äjën ets ma ja nimäjtskpë ja tyo'oxytyëjktuunpëtyën, ka'ap tpaty ja tsyaamëxan. Ko pyëtsiimy ma ja Lea ja wyitnikkämën, ënät tyëjkëy ma ja Raquel ja jyä'äjën.

³⁴Ënät ja Raquel ojts pojën ja tsaamëxan tyu'utsy yujktuumpäjnpa'tkë'p ets jam tni'ënyaaypyejty. Yë Labán tëë ënäty tja'ixtaaytyä'äy ja tsyaamëxan ma ja wit tëjkën, ka'ap nimaa tpaty.

³⁵Ënät yë Raquel t'ënëmaay yë tyeety: Tatë, këtii m'äkëtëty oyës nkawä'ätsë'ëkëty, mijts mwintuuy, ëjts ëmaay'ijtpës tyam. Yë Labán ojts tjajaak'ixtaay'ëti'itsy ja tsyaamëxan, e nikä'äpyëm nimaa tpaty.

³⁶Ënät ja Jacob ojts jyoot'anpëjknë ets ojts t'ojy ja Labán, tä t'ënëmaay: ¿Tiitën mijts të ntukmëtëkoy? ¿Ets tii pokyën ëjts të ntuny ko mijts janty jëtu'un xy'ixjëtijt xypyajjëtijtnës?

³⁷Tëë xy'ijxnajxta'ay xypyëjknajxta'ay maas winë nmëët'atyën. ¿E tii të xypyääty mëti'ipë mjä'ä'ajtypyën ma mjëën mtëjkën? Pëjkta'ak yaa itkujky pën tëë winë xypyääty ets t'ixtëty ja mëku'uktëjk etsës ja nmëku'uktëjk näjyëtu'un t'ixtëty ets yajnijawëty pën mëtëy ënaanp.

³⁸I'pxjëmëjtës mijts të nmëtuny ma mtëjkën ets nijëna'a ja mtsajppax ets ja mkupixyny të kya'u'unk'ookyë, ets nitëkokës wäänë të nkatsu'utsy yë mtsajppax ets mkupixyny.

³⁹Nijëna'a mijts yë mjëyujk ooky të nkatukwinkuwitsë mëti'ipë yaj'o'këtëpën kaa jëyujk; ko ijty jyëtu'un'aty ënetyës ijty xytyimnatukujuy ko tu'uk muum pyutëkoy ets ko ijty xëëny ëkë koots pën tmeetsy.

⁴⁰Ko xyiinyëty mëpaatëpës ijty n'an'ooky mëët yë xëëw'an; e ko kyootsëty, mëpaatëpës ijty ntip'ooky, ëts käknëpës ënäty ja ntsuunë.

⁴¹I'px jëmëjt mijts të nku'itë ma mjëën mtëjkën, ix wi'ixës tyam xy'ëktuka'anë: yë nimäjtskpë yë mnëëx majkmajkts jëmëjtës të nituny, e mëët ja mjëyujk mëti'ipës tyam njä'ä'ajtypyën, tëtujkjëmëjtës të xytyuknituny; ets janaam jatsojkës ijty yë nmëju'uny xyajtëkajtsë.

⁴²Ko jeexyë ja Tios xykyani''ijxkëtä'äkyës mëti'ipë yë Abraham y'ëwtajtën, ja Tios mëti'ipës ijty ja nteety Isaac y'ëwtajtypyën, katii nija'awën wä'änxyëp jeexyë jëtu'unyë mijts të xy'ëkwinpakäjxnës. Yë Tios yë'ë të t'ixy, ko ënäty ëjts mon tuk nyajpaaty ets koos ënäty mëk ntuny n'ëyoy, paaty ya'atë tsu'um të mëkmëkäpxyë.

⁴³Ënät yë Labán t'ëtsooy yë Jacob: Yë to'oxy'ëna'këty ëjts yë n'u'unk ets yä'äy ëna'k u'unkëty ëjts näjyëtu'un yë n'ok'u'unk n'ok'ëna'k, e näjyëtu'un yë jëyujk ëjts yë njä'ä. Tu'kë'ëyë jënu'un ya'atë tyam xy'ixyën aak'ëjts yë njä'ä. E koos n'ëkmay n'ëktajy, ¿wi'ixës jëtää nkë'ëm'u'unk nkë'ëm'ëna'k n'ëktuna'any. Etsës yë n'ok'u'unk n'ok'ëna'k tiijës n'ëktukpaatäämpy?

⁴⁴Paaty tyam mijts n'ënëëmë ets tu'uk ja käjpxytyu'unën ntu'unmëty, mëti'ipë yajtukja'amyätsëpën ko tyam ëtsajtëm oy tsuj winë nkajpxmujkëmë nkajpx'o'oyëmë.

⁴⁵Ënät ja Jacob tu'uk ja tsaa tkoonë'ky mëjpë ets t'ënyääytyäky kujkyë tä tu'uk yë xenyën.

⁴⁶Tääts t'ënëmaay ja jyiiky myëku'uk: Koonmujkta'atë tsaa mëjpë mutskpë. Tääts jam nyaaxwä'tstaaytyë jënu'un jam yajpaatën ets tyëjkëtyë kääpyë ukpë jam winkon ma jam ja may tyaa të tnikoompätën.

⁴⁷Jä'ä ojts yë Labán tyajxëëwpety tampë ja it naaxwiinyëtë Jegar Sahaduta, jëtu'un ijxtëm ënäty yë'ë kyäjpxyën; e yë Jacob jä'ä ojts txëëwmo'oy Galaad jëtu'un ijxtëm ënäty yë'ë kyäjpxyën.

⁴⁸Ënät yë Labán y'ënäny: Ya'atë tsaa mëti'ipë yam të yajnipiiwpetyën, yë'ë ijxpë mëtoowë wë'ëmp ma ëëtsajtëmën ets yë'ë nëjkx nyajtukja'amyäjtsëmë. Paaty jëtu'un ojts yajxëëwmo'oy ja it naaxwiinyëtë Galaad.

⁴⁹Mispá ojts näjyëtu'un yajtijy, jä'ä ko ja Labán y'ënäny: Tios xy'ijxijt xykyëwent'ajtmëp ëëtsajtëm nimäjtsk. Oy jëna'a nka'ëknäy'ijx nka'ëknäypyatënëty.

⁵⁰Pën ëxëëk xytyuny ja n'u'unkës nnëëxës ets pën mpëjkpy m'ukpy wiinkpë ja to'oxytyëjk, oy ënäty pën tka'ixy tkanijawë, Tios yë kë'ëm kyëwentëpëkëp.

⁵¹Tä yë Labán tjaakënëmaay yë Jacob: Ëk'ix, ya'atë tsaa mëti'ipës tëë mpëjktä'äkyën tänë tä xenyën ma ëëtsajtëmën nimäjtsk.

⁵²Yë'ë jëtu'un ijxpë tuunpë ko ka'ap pën nyäy'ënaxëtëty ma ëtsajtëmën nimäjtsk ets ka'ap näpyëjkëmëty ja naax kam ma ja tsëpa'an nmëët'ajtëmën.

⁵³Wä'än yë'ë tkëwentëpëky yë Tios mëti'ipë yam nikajpxëmën nimëtyakëmën, mëti'ipë y'ëwtajtën yë mtatwelë Abraham etsës yë ntatwelë Nahor. Ënät yë Jacob ojts tukë'ëwan tukë'ëyaaxë ja Tios mëti'ipë ënäty jam y'ëëwmujk kyajpxmujktëpën, ja Tios mëti'ipë ja tyeety Isaac y'ëwtajtën.

⁵⁴Jëtu'un yë Jacob tyaj'apatëy tu'uk yë wintsë'kën jam kopkëjxm, tääts tmëkajpxmujktaay ja jyiiky myëku'uk ets mëët kyäyä'äny y'uuka'any. Ojts jam nimay kyäytyë y'uuktë ets jam jëtu'un ja tsuu tyajnajxtë kopkkëjxm.

⁵⁵Komjëpom ja Labán ojts myä'äypyëtë'kojy jopyëp ets tsu'kxtaay ja y'ok'u'unk y'ok'ëna'k ets ja nyëëx nimäjtskpë, jä'ä ko jëtu'un ënäty tu'unën'atë. Tää tkënu'kxtaay nitu'ukjaty, tä ojts wyimpijnë ma ja nyaax kyajpnën.