Read Biblia Mixe de Quetzaltepec Génesis 32 Bible Online

Génesis 32 - Biblia Mixe de Quetzaltepec bible

Génesis 32

¹Tam ënäty yë Jacob tyu'uye'ey, ko t'ijxpaty may yë Tios yë tsyajpjotmëtë kukäjpxy nyiminyë.

²Ko jëtu'un t'ijxy yë Jacob tää y'ënäny: Ya'atë n'ixyësën Tios yë tsyiptuunpëtëjk, paaty ojts txëëwmo'oy ja tampë ja it naaxwiinyëtë Mahanaim.

³Ënät yë Jacob mäjtsk tëkëëk tkejxy yë tyuunpë jam Seir ma ja nyaaxjotmën ja Edom, tääts tuk'ëwaanëja'any ja y'äjty Esaú ko tää wyinkony.

⁴Ya'atë aaw ayuk tyuknikäjx: Jëtu'un xy'ënëëmëty yë n'ajtyës Esaú: Yë m'uty Jacob yë'ëjës xytyukmëkäjxëp ya'atë aaw ayuk ets m'ënë'ëmxëty: Jamës të n'ity të ntsëënë ma Labán yë jyëën tyëjkën, jënu'un ya'atë xëëw jëmëjt të nyäxyën.

⁵Nmëëtës jëyujk, tsajpkaa, tsajppax, kupixyny, tuunpë, ye'etyëjkpë to'oxytyëjkpë. Tyam nkexyës ya'atë aaw ayuk ma mijts myajpaatyën wintsën, n'ëwxityës ets ya'atë aaw ayuk oy tsuj xy'ëxajëty xykyupëkëty.

⁶Ko ojts wyimpijnëtë mëti'ipë yaj'ëyukye'eytyëpën, ënät t'ënëmaaytyë ja Jacob: Tëës ojts n'ixtë ja m'ajty Esaú, jëtu'un të y'ëtsoy ko tää kë'ëm myina'any ets m'ixa'anyë mpaata'anyë mëët nimajktaxk mëko'px yë jyä'äy.

⁷Ko jëtu'un tmëtooy yë Jacob ënät ojts ja tsë'ëkë tyuktëkëty ets tyëjkëy moonpë tujkpë. Ënät tyajnäywyä'kxyë mäjtskpëky ja jyä'äy, mëti'ipë ënäty jam mëëtën; näjyëtu'un tyajwa'kxtaay ja jyëyujk, tsajpkaa, tsajppaxëty ets ja kyupixynyëty.

⁸Jä'ä ko tyaa ënäty myäy tyäjy: Pën miimp yë Esaú ets tnipëtë'ëky tu'kpëky, jatu'kpëky jyëkyäpëp kyä'äkëty.

⁹Tää ojts tyëkë nu'kxtakpë ets ja Tios tmëpëjktsooy: Wintsën mëti'ipë y'ëwtajtën ja ntatwelës Abraham ets ja nteetyës Isaac, mijtsës të xy'ënëëmë koos nwinpitëty maas ja nnaax nkajpnën, ma tsyëënëtën jyuuky'atën ja njëëky nmëku'ukës. Mijtsës të xy'ënëëmë näjyëtu'un, ko oy tsuj xyajwinpita'anyës.

¹⁰Ëjts ka'apës xyjyapaaty, je'eyë mijts oy tsuj xymyëët'atyës. Koos ya'atë Jordán mëjnëë ntuknajxy, yi'iyës ënäty nkë'ëkap'ajtypyës yë ntajkës, nitiijës ënäty nkamëëtëty. E tyam mäjtskpëkyës të nyajwä'kxy mëti'ipës nmëët'ajtypyën.

¹¹Paaty tyam tun yë mëyajtën kuwaank nixajkës ma kyë'ë y'aawën yë n'ajtyës Esaú. Ntsë'këpës ko y'ëkmiinëty ets t'ëkyaj'o'ktaaynyëty ja to'oxytyëjktëjkëty mëët ja u'unk ëna'k.

¹²Mijts jëtu'un të m'ëna'any koos oy mëk xyajwinpita'any ets ko may ja n'u'unk n'ëna'kës xymyo'oja'any. Jëtu'un xyajnimayëja'any tä nëë'ajinën, ka'apë tjëkyepy yajmëtyowëtyën.

¹³Jam ojts yë Jacob tyajnaxy ja tsuu ets mëti'ipë ënäty kë'ëjoty myëët'ajytpyën twin'ijxtaay mëti'ipë ja y'äjty Esaú ënäty nyamo'ojäämpyën:

¹⁴mäjtsk mëko'px ja tsajppaxto'oxy ets i'px ja yä'äypyë, mäjtsk mëko'px ja kupixynytyo'oxy ets i'px ja yä'äypyë,

¹⁵i'px majk yë jëyujk jëku'ux, aakmëët yë y'u'unk ets wëxtyikxy yë tsajpkaato'oxy ets majk yë mëjtsajpkaa, i'px yë krukts to'oxy ets majk yë yä'äypyë.

¹⁶Ënät ja tyuunpë tukë'ëtëjkëtyääy ja jëyujk ets t'ënëmaay: Jaamë'ëktë miitsëty ets ëwä'kxyjyäty yë jëyujk xyajye'eytyëty.

¹⁷Ënät ojts tuk'ëne'emy ja mëti'ipë jëyëjp kyäjxën ets t'ënëmaay: Ko xypyaatëty ja n'ajtyës Esaú ets ko m'ënë'ëmxëtëty: ¿pën mwintsën'ajtyp? ¿maatën mnëjkxy ets pën yë jyä'ä tääpë jëyujk mëti'ipë mënëjkxypyën?

¹⁸Tyaa xy'ëtsowëty: Mijts wintsën Esaú, yë'ë yë näynyamo'ojë mëti'ipë mtukmëkäjxëyëpën yë m'uty Jacob mëti'ipë m'oyjya'awëyëpën, tä ja näjyëtu'un myiny ëx'ok.

¹⁹Näyjyëtu'un ja mëmäjtskpë tkejxyën ets ma mëtëkëëkpë ets aakjëtu'un t'ënëmaay ninaak ojts tkexyën: Ko mja'tëty ma Esaujën aakjëtu'un xy'ënëëmëtëty ijxtëm yam të n'ëna'anyënës,

²⁰Ënëëmëtë näjyëtu'un: yë Jacob tää näjyëtu'un myiny ix'ok. Jëtu'un ënäty ja Jacob myäy tyäjy: Wä'än jëtu'un yë tsyip y'äkë nyanaxëty yë n'ajtyës Esaú, oknëmës kë'ëm ntim'ixëty wä'änxyëp jëtu'un'äämpy xynya'ëxaj xynyakupëkëtyës.

²¹Jëtu'un ja näynyamo'ojë jëyëjp tkäjxë'ky, e yë'ë ojts jyaak maawë'ëmy ma jam ja wyittëjkën.

²²Ënät yë Jacob ojts koots pyëti'iky ja tsu'um ets pyëtë'ktë nimäjtsk ja tyo'oxytyëjk näjyëtu'un ets näjyëtu'un nimajktu'uk ja y'u'unk y'ëna'këty. Tä tyajnëënajxtaay ma tu'uk ja mëjnëë txëëwatyën Jaboc.

²³Tyajtso'ontaay tu'kë'ëyë jënu'un ënäty winë tmëëtëtyën.

²⁴Ko ja Jacob ojts atu'uk wyi'imy, ënät tu'uk ja ye'etyëjk ja'ay tyëjkëy mëët tsiptuunpë. Jeky ojts tsyiptuntë ijxtë koonëm xyiinyëy.

²⁵E ko ja naaxwiinyëtë ja'ay t'ijxy ko ka'ap ja Jacob myäyë, ënät ojts wäänë tyajtsëtyut ma pyuuykyopkën. Tä jëtu'un ja Jacob ojts ja tyekpyajk jyäjxma'aty, ma ënäty jam jëtu'un tsyiptuntën.

²⁶Ënät ja naaxwiinyëtë ja'ay ojts ja Jacob y'ënë'ëmxëty: Ëxmajtskës, jä'ä ko tää xyiinyënë. Pën ka'apës xymyo'oy yë kënu'kxën, ka'ap yam mijts n'ëxmatsëty, jëtu'un y'ëtsooy ja Jacob.

²⁷Ënät ja naaxwiinyëtë ja'ay yajtëëwë: ¿Tiixë yë mxëëwajtyp? Tää y'ëtsooy: Jacob ëjts nxëëwajtyp.

²⁸Tää ja naaxwiinyëtë ja'ay y'ënëmaayë: Ka'ap tyam mijts xy'ëkxëëwajtnëty Jacob, Jä'ä mxëëwajtnëty Israel. Jä'ä ko mijts Tios tyam mëët të mtsiptuny ets mëët tu'kë'ëyë yë naaxwiinyëtë ja'ay ets tëë xymyëmëtä'äky.

²⁹Ënät ja Jacob ojts näjyëtu'un tyajtëy ja naaxwiinyëtë ja'ay: Mijts ënät tyam tuk'ëwa'anëkës, ¿tii mxëëwajtyp? Tää ja naaxwiinyëtë ja'ay y'ëtsooy: ¿Wi'ixës ko yë nxëëw xyajtëy? Ënät ja naaxwiinyëtë ja'ay jämyë kyënu'kxë.

³⁰Tä yë Jacob tyajxëëwpejty ja jampë ja it naaxwiinyëtë Penuel, jä'ä ko y'ënäny: Tyam tëëjës ënät ja Tios kë'ëm ntim'ixy wiinxë jëjpxë ets ixës tyam njaakjuuknyëmëty.

³¹Tam ënäty yë Jacob tuknajxtaaynyë ja it naaxwiinyëtë mëti'ipë xyëëwajtypyën Penuel, ko ja xëëw pyëtsiimy. E jä'ä ko tëë ënäty ja tyeky jyäjxma'aty, paaty ënäty na'ëxma'at ye'ey.

³²Yë Israel ja'ayëty tyampaat ka'ap tsu'utstë yë eemy'u'unk mëti'ipë yajpatpën ma pajk nyämyukyën. Jä'ä ko jää ojts yë Jacob tsyëtyuty.