Read Biblia Mixe de Quetzaltepec Génesis 36 Bible Online

Génesis 36 - Biblia Mixe de Quetzaltepec bible

Génesis 36

¹Ya'atë y'u'unk'ajt y'ëna'k'ajt yë Esaú, mëti'ipë näjyëtu'un yajtijpën Edom.

²Yë Esaú yë'ë pyëjk yë to'oxytyëjkëty mëti'ipë ënäty jam kukajpnajtëpën Canaán. Tu'uk yë tyo'oxytyëjk jä'ä xyëëwajt Ada, yë Elón yë nyëëx, ja Hit ja'ay; wiinkpë tyo'oxytyëjk jä'ä xyëëwajt Oholibamá, yë'ë nyëëx yë Aná, yë Sibón yë y'oknëëx, ja Heve ja'ay;

³wiinkpë tyo'oxytyëjk jä'ä xyëëwajt Basemat, yë'ë nyëëx yë Ismael, yë y'uty yë Nebaiot.

⁴Yë Ada y'u'unk mëti'ipë mëët t'u'unk'atyën yë Esaú, jä'ä xyëëwajtyp Elifaz, yë Basemat jä'ä y'u'unk xyëëwajt Reuel.

⁵Yë Oholibamá yë'ë yajmëxu'unk'ajt yë Jeús, tääts yë Jaalam ets Coré. Ya'atë jëtu'un yë y'u'unk y'ëna'k yë Esaú, mëti'ipë ojts myintën jya'tën naaxwiiny ko ënäty jam tsyëënëtë Canaán nyaaxjotm.

⁶Ënät yë Esaú tmëtso'ontaay yë y'u'unk y'ëna'k ets y'u'unk tyo'oxytyëjk ets tu'kë'ëyë jënu'un ënäty winë tmëët'atyën ma jam të tsyëënën, yë'ë myëjëkämkekpy ja y'uty Jacob, jä'ä ko may ënäty winë tmëët'ajnë. Ojts tëkokyë tmënëjkxta'ay jënu'un ënäty winë të tpaaty të t'ixyën jam Canaán,

⁷e ja y'uty Jacob nän may winë tmëët'ajnë paaty ka'ap t'ëkjëkyäjpnë nimäjtsk y'ijtmuktëty, ja naax kam ka'ap y'ëknipatënë ma ja jyëyujk tsajpkaa, tsajppax kupixyny tyänëtëty.

⁸Paaty yë Esaú, mëti'ipë näjyëtu'un yajtijpën Edom, ojts jam tsyo'onë ets nyëjkxnë tsënääpyë ma jam ja kopkjot txëëwatyën Seir.

⁹Ya'atë y'u'unk'ajt y'ok'ajt yë Esaú, mëti'ipë txëëwajtën Edom ja'ayëty ets jam ojts tsyëënëtë jyuuky'atë ma ja kopkjot txëëwatyën Seir.

¹⁰Ya'atë y'u'unk'ajt y'ëna'k'ajt yë Esaú. Tu'uk txëëwaty Elifaz, yë'ë y'u'unk yë Ada, Esaú tyo'oxytyëjk; wiinkpë txëëwaty Reuel, yë'ë y'u'unk yë Basemat yë Esaú tyo'oxytyëjk.

¹¹Yë y'u'unk y'ëna'k yë Elifaz jä'ä xyëëwajtë Temán, Omar, Sefó, Gatam ets Cenaz.

¹²Yë Elifaz tam ijty wiinkpë to'oxytyëjk tmëëtëty mëti'ipë yajmëtuumpyën, jä'ä txëëwaty Timná. Ojts tu'uk yë u'unk maay tyajja'ty naaxwiiny, jä'ä txëëwmooy Amalec. Ya'atë jëtu'un y'u'unk'ajt y'ëna'k'ajt yë Ada, yë Esaú yë tyo'oxytyëjk mëtu'ukpë.

¹³Yë y'u'unk y'ëna'k yë Reuel, jä'ä xyëëwajtë Náhat, Zérah, Samá ets Mizá. Ya'atë y'u'unk'ajt y'ëna'k'ajt yë Basemat ja wiinkpë tyo'oxytyëjk yë Esaú.

¹⁴Oholibamá xyëëwajt yë wiinkpë yë tyo'oxytyëjk yë Esaú mëti'ipë yë Oholibamá y'u'unk'ajtën, jä'ä xyëëwajtë Jeús, Jaalam ets Coré; yë Oholibamá yë tyaak'ajt yë Aná ets y'oknëëx yë Sibón.

¹⁵Ya'atë ojts y'ënä'ämtë ma ja jyä'äyëtyën mëti'ipë y'u'unk'ajt y'ëna'k'ajtën yë Esaú. Ja myëtu'uk u'unk jä'ä xyëëwajt Elifaz; ma Elifaz yë y'u'unk y'ëna'kën, yë myëtu'uk u'unk yë Esaú. Yë'ë ënä'ämpë ijtë Temán, Omar, Sefó Cenaz,

¹⁶Coré, Gatam ets Amalec. Ya'atë ojts y'itë ënä'ämpë ma ja Elifaz ja y'u'unk y'ëna'kën, jam ma Edom nyaaxjotmën ets ya'atë yë'ë tyaak'ajtë yë Ada.

¹⁷Ma ja y'u'unk y'ëna'kën ja Reuel yë Esaú myaank, yë'ë ojts y'itë ënä'ämpë: Náhat, Zérah, Samá ets Mizá. Yë'ë ojts y'itë ënä'ämpë ma ja Reuel ja y'u'unk y'ëna'kën jam ma ja Edom ja nyaaxjotmën ets jä'ä tyaak xyëëwajtë Basemat yë Esaú tyo'oxytyëjk.

¹⁸Ma y'u'unk y'ëna'kën yë Oholibamá, yë nyëëx yë Aná, yë Esaú mëtëkëëkpë tyo'oxytyëjk; yë'ë ojts jam ënä'ämpë y'itë, Jeús, Jaalam ets Coré.

¹⁹Tu'kë'ëyë yë'ëjëty yë tyeety'ajt y'ap'ajtë yë Esaú, mëti'ipë näjyëtu'un yajtijpën Edom. Yë'ë jëtu'un ojts y'ënä'ämtë ma ja nyaax kyajpnëtyën ets ma jyiiky myëku'ukëtyën.

²⁰Yë Seir, mëti'ipë Hor ja'ayën, jampë tsyëënëtën ma jam ja it naaxwiinyëtë, jä'ä y'u'unk y'ëna'k xyëëwajtë Lotán, Sobal, Sibón, Aná,

²¹ets wiinkpë txëëwajtë Disón, Éser ets Disán; ya'atë ojts y'ënä'ämtë ma Hor ja'ayëtyën, mëti'ipë y'u'unk'ajt y'ëna'k'ajtën yë Seir jam Edom nyaaxjotm.

²²Yë y'u'unk y'ëna'k yë Lotán, jä'ä xyëëwajtë Horí ets Hemam; ja to'oxytyëjk mëti'ipë xyëëwajtypyën Dimná yë'ë Lotán yë myëkä'äx.

²³Yë y'u'unk y'ëna'k yë Sobal, jä'ä xyëëwajtë Alván, Manáhat, Ebal, Sefó ets Onam.

²⁴Yë y'u'unk y'ëna'k yë Sibón jä'ä xyëëwajtë Aiá ets Aná. Yë Aná yë'ë ojts tëkok tpaaty ja nëëwooky jam wintë'ës'itum, ma ënäty jam kyërukts këwent'atyën, mëti'ipë ja tyeety Sibón jyä'ä'ajtypyën.

²⁵Yë Aná ojts tu'uk yë y'u'unk myääy tyajmëxu'unk'aty, mëti'ipë xyëëwmooyën Disón ets tu'uk yë nyëëx mëti'ipë xyëëwmooyën Oholibamá.

²⁶Yë y'u'unk y'ëna'k yë Disón jä'ä xyëëwajt Hemdán, Esbán, Itrán ets Queran.

²⁷Yë y'u'unk y'ëna'k yë Éser, jä'ä xyëëwajtë Bilhán, Zaaván ets Acán.

²⁸Yë y'u'unk y'ëna'k yë Disán, jä'ä xyëëwajtë Uz ets Arán.

²⁹Mëti'ipë ojts y'ënä'ämtën ets y'ijtë mëj'äämpy ma Hor ja'ayëtyën, jä'ä xyëëwajtë: Sobal, Sibón, Aná,

³⁰Éser ets Disán. Ya'atë ojts y'itë mëj'äämpy ma Hor ja'ayëtyën, aakmëët yë jyiiky myëku'ukëty ets y'u'unk y'ëna'këty jam ma ja naaxjot txëëwatyën Seir.

³¹Ya'atë ojts yajkutujkpë'atë mëti'ipë ojts y'ënä'ämtën Edom, ma ënäty yë Israel ja'ayëty ka'anëm yë yajkutujkpë tmëët'atënëm.

³²Tu'uk xyëëwajtyp Belá, yë'ë y'u'unk yë Beor; yë'ë ojts yajkutujkpë'aty jam Edom ma tu'uk kajpn txëëwatyën Dinhabá.

³³Ko ojts yë Belá y'o'knë, yë'ë ojts kyutëkëty Jobab, yë Zorá y'u'unk; jam kyukajpnëty ma tu'uk kajpn txëëwatyën Bosrá.

³⁴Ko yë Jobab ojts y'o'knë, yë'ë ojts kyutëkëty yë Husam ets yë'ë yajkutujkpë'atëty; jam ënäty kyunaax kyukajpnëty ma txëëwatyën Temán.

³⁵Ko ojts yë Husam y'o'knë yë ojts kyutëkëty yë Hadad ets yë'ë yajkutujkpë'atëty; yë'ë y'u'unk yë Bedad, mëti'ipë ojts tmëmëtä'äkyën yë Madián ja'ay, ko tsyiptuuntë jam ma nyaax jyotën yë Moab, jam ënäty kyukajpnëty ma txëëwatyën Avít.

³⁶Ko yë Hadad y'o'ky, yë'ë ojts kyutëkëty yë Samlá, jam kyukajpnëty ma tu'uk yë naax kajpn txëëwatyën Masrecá.

³⁷Ko ojts y'o'knë yë Samlá, yë'ë ojts kyutëkëty yë Saúl ets yë'ë yajkutujkpë'atëty; jam ënäty kyukajpnëty ma tu'uk yë naax kajpn txëëwatyën Rehobot, jam tu'uk yë mëjnëë nyäxy yë'ë myëwinkon'ajtyp.

³⁸Ko ojts yë Saúl y'o'knë, yë'ë ojts kyutëkëty Baal-hanán, yë'ë y'u'unk yë Acbor ets yë'ë yajkutujkpë'atëty.

³⁹E ko ojts y'o'knë näjyëtu'un yë Baal-hanán yë'ë ojts kyutëkëty yë Hadad, jam ënäty kyukajpnëty ma tu'uk yë kajpn txëëwatën Pau. Yë tyo'oxytyëjk jä'ä xyëëwajtyp Mehetabel, yë'ë nyëëx yë Matred ets yë'ë y'oknëëx yë Mezaab.

⁴⁰Yë'ë jëtu'un yaa xyëëw miintëp mëti'ipë jyä'äyajtën yë Esaú, aakmëët yë y'u'unk y'ëna'këty ets nyaax kyamëty ets xyëëwëty, Dimná, Alva, Jetet,

⁴¹Oholibamá, Elá, Pinón.

⁴²Cenaz, Temán, Mibsar,

⁴³Magdiel ets Iram. Esaú, mëti'ipë näjyëtu'un yajtijpën Edom. Ya'atë ja'ayëty mëti'ipë xyëëw të yajkajpxnaxtën yë'ë ojts nikopk'atë yë jyä'äyëty ma Edom nyaaxjotmën, jëtu'un ijxtëm yë nyaaxjotmëtyën ma ënäty tsyëënëtën jyuuky'atën ets tu'kë'ëyë mëti'ipë ënäty jyä'ä'ajtëpën.