Read Biblia Mixe de Quetzaltepec Génesis 42 Bible Online

Génesis 42 - Biblia Mixe de Quetzaltepec bible

Génesis 42

¹Ko ojts yë Jacob tnijawë, ko tap yë tsajpmok Egiptë, ënät ojts y'u'unk y'ëna'k t'ënëëmë: Tiijën mtuuntëp ko je'eyë mnäywyintë'kxëtë xim yam.

²Tëëjës nnijawë ko jap Egiptë tap yë tsajpmok, nëjkxtë jap ets xyjyuytyëty yë tsajpmok, tääts njaakjuuky'ajtmëty.

³Ënät ojts nimajk yë José yë y'äjtytyëjk nyëjkxtë jap Egiptë tsajpmok juupyë.

⁴Yë Jacob ka'ap ojts tkexy yë Benjamín, yë José y'uty, jä'ä ko tyaa ënäty myäy tyäjy ko tii y'ëkjajt y'ëkëpäjtënëty.

⁵Yë y'u'unk y'ëna'k yë Israel ojts nyëjkxtë mëët wiinkëtpyë ja'ayëty, mëti'ipë näjyëtu'un jap nëjkxtëpën tsajpmok juupyë, jä'ä ko ma tu'kë'ëyë Canaán nyaaxjotmën jam'ajtp ënäty ja yuu xëëw.

⁶Yë José yë'ë ënäty ënä'ämpë ijtp jap Egiptë ets yë'ë ja tsajpmok tyukmëto'kpy ja ja'ay mëti'ipë miintëpën tsajpmok juupyë. Ko ojts ja y'äjtytyëjk jam jya'të ma yë'ëjën, ënät nyäjyijtakëtë yë'ë wyintum ets nyaaxkoowtë.

⁷José ojts t'ixkäpy ja y'äjtytyëjk, ko t'ijxy; jëtu'un ojts nyäpyëjktä'äkyë ijxtëm jeexyë ka'ap t'ixkäpyën ets tyajtëëy: Miitsëty ¿Maaxë mtsoontë? Canaán ëëts ntsoontë tsajpmok njuyantëpës, jëtu'un y'ëtsoowtë yë'ëjëty.

⁸Oy ënäty ja José tëë ja myëku'uk tja'ijxkajpta'ay, ja myëku'uk ka'ap y'ijxkapëtë.

⁹Ënät ja José tja'amyejtsy ja wyinkuma'ay mëti'ipë ënäty të t'ixyën mëët yë'ëjëty, tä t'ënëmaay: Miitsëty je'eyë min xy'ixa'an xytyuna'antë tii yaa kajpn myëët'ajtyp kyamëët'ajtyp.

¹⁰Ka'ap Wintsën. Jëtu'un y'ëtsoowtë. Ëëtsëty mijts yë mtuunpëtëjk, tsajpmok ëëts njuyantëp.

¹¹Tu'kë'ëyë ëëtsëty tu'ukyë teety ëëtsëty ets oyës nja'ay'atë, jamës ntsëënëtë Canaán, ëëtsëty nijëna'a muum nkanëjkxtës ets je'eyë n'ixtës ntuntës winë.

¹²José ni'ikyë y'ënaan'ëtëtsy: Ka'ap tyiyajtënëty m'ëna'antë, miitsëty je'eyë të mintë ijxpë tuunpë ma ya'atë naax kajpnën, pën tii myëët'ajtyp oy ëxëëk.

¹³Ënät y'ëtsoowtë: Ëëtsëty Wintsën jä'ä ëëtsëty nyiwinë'atë nimajkmäjtsk ets tu'uk ëëts ja nteetyëtyës ntukmuktë ets jamës ntsëënëtë Canaán. Ja n'utyëtyës ja mutskpë tëë ja wyi'imy mëët yë tyeety, e ja wiinkpë ka'apës yam mëëtëtynyë.

¹⁴Ënät ja José y'ënaankojnëpë: Jëtu'un ijxtëm n'ëna'anyënës je'eyë mijts mintë ijxpë tuunpë,

¹⁵ets ya'atë ënät mëët n'ëkjanty'ijxmëty. Yajxon miitsëty yam n'ënëëmëtë ko ka'ap yaa mtsoontëty, koonëm xyajmintëty ja m'utyëty ja mutskpë.

¹⁶Wä'än miitsëty nitu'uk pën nëjkx tyajtsoony, ja nimaypyë wä'än twë'ëmtë tsumy. Tsojk n'ëkjanty'ijxëm pën janty tëy m'ëna'antë, e pën ka'ap tyiyëty, jää jyänty yaj'ixëty ko miitsëty ijxpë tuunpë je'eyë të mintë. Ja mëj yajkutujkën xyëëwkëjxmës yam jëtu'un n'ëna'any.

¹⁷José tsumy ojts tyaj'ity ja myëku'uktëjk tëkëëk xëëw,

¹⁸e kom tëkëëk xëëw ojts t'ënëëmë: Ëjts ntsë'këpës yë Tios, tuntë ya'atë ets miits npokymyä'kxtëty.

¹⁹Pën mijts janty'oy mja'ay'atë, ëxmatstë yaa tu'uk yë mmëku'ukëty ets wiinkpë wä'än tmënëjkxtë yë tsajpmok, mëti'ipë kyäytyëp y'uuktëpën yë mjëëky mmëku'ukëty.

²⁰Ets xyajmintëty ja m'utyëty mutskpë ets n'ëkjanty'ijxmëty pën tëy mkajpxtë, e pën ka'ap, m'ooktëp ënät. Ënät tkupëjktë ja José ja y'ayuk,

²¹ets nyäy'ënanëtë jaxim jayam: Tyam ënät n'ijxëm ets tyam ënät nkëpäjtëm ko ojts ëxëëk ja n'uty'ajtëm ntu'unëmë. Ojts xyjyamënu'kxtakëmë ets jeexyë npa'ëyo'owëm nas'ëyo'owëmë e ëëtsajtëmë ka'ap ja ntu'unëmë këwentë, ojts nja'ijxëm ko ënäty mon tuk yajpaaty. Paaty ënät ëëtsajtëm tyam ya'atë ëxëëkajtën npatëm n'ijxëmë.

²²Ënät yë Rubén t'ëtsooy ja myëkä'äxtëjk: Ëjts ojtsës nja'ëna'any ets jeexyë ka'ap wi'ix ntu'unëmë, e miitsëty ka'apës ojts xykyäjpxymyëmëtowtë, e ëëtsajtëm kwanë ënät n'ëtsoowinpijtmëty yë y'o'kën tyëko'oyën.

²³Yë'ëjëty ka'ap ënäty nijawëtë ko ja José wa'ats tja'akyukë mëti'ipë myëtyaktëpën, yë José wiink ayuk ënäty tyukmëkäjpxyp ja y'äjtytyëjk, ëpëky tmëëtëty ja wiinkpë ja ja'ay mëti'ipë kajpxwatsëyëpën ja y'ayuk.

²⁴Ënät ja José twinwa'ktuty ja jyiiky myëku'uk ets ojts nyijkxy yaxpë. E ko jatëkok wyimpijty, tää ojts jatëkok tmëkäjpxy, ënät ojts ja Simeón jä'ä tyajwë'ëmy ets tkë'ëtsuumy tekytsyuumy, tam jëtu'un ja myëkä'äx t'ixtë

²⁵Ojts tni'ënä'ämë ets ja xya'k y'utstëty mëët yë tsajpmok ets jatëkok ja myeeny yajmo'otëty ets yajmo'otëty näjyëtu'un ja kyä'äyënëty y'ukënëty mëti'ipë tyu'ukaytyëpën. Jëtu'un ojts jyänty yajtuny.

²⁶Tä ja jyëyujkëty tukjëtsëëmë'ktaaytyë ja xya'këty ujts mëët yë tsajpmok, tä ojts jap tsyo'onëtë.

²⁷Ko jya'ajtë ma ja tsuu tyajnaxa'antën, tu'uk ojts t'akejy ja xya'k ets tyajjë'kxa'any ja jyëyujk, e ko t'ijxy taptëm ja meeny myiny ma xa'k'aawën.

²⁸Ënät t'ënëmaay ja myëkä'äxtëjk: Tä mëk jyänty jotmaypyätë ets tsë'ëkëmëë nyäy'ënanëtë jaxim jayam: ¿Tiitën ko jëtu'un yë Tios xytyu'unëmë?

²⁹Ko jya'ajtë jam Canaán, ënät ja tyeety tukmëmëtyaktaaytyë tiijaty ënäty të jyat të kyëpätëtën ets t'ënëmaaytyë.

³⁰Ja ja'ay mëti'ipë jap ënä'ämpë'ajtpën Egiptë, janty ëxëëkëty të xy'ëktimmyëkajpxnëtës, etsës të xy'ënëëmëtë ko ëëtsëty je'eyës jap nëjkxtë kyajpnjoty ijxpë wo'ompë ets n'ixa'antës tii myëët'ajt kyamëët'ajtëp.

³¹Ënät ëëtsëty të n'ënëëmëtë ko ka'apës jëtu'un nja'ay'atë, nijëna'a ëëtsëty maa nkanëjkxtë kajpntum je'eyë ijxpë wo'ompë;

³²tëë n'ënëëmëtës näjyëtu'un ko jä'ä ëëts ntu'kä'äx'atë niwinëty nimajkmäjtsk tu'ukyë teety, tu'uk tyëkoy'ity ets ja mutskpë jä'ä të wyi'imy Canaán mëët mijts.

³³Ënät të xy'ënëëmëtës: Tyam y'ëkjanty yaj'ixëty pën oy miitsëty yë mjot mwinma'anyëty xymyëët'atë. Ko yaa nitu'uk wyë'ëmëty yë mmëkä'äxëty ets nitu'uk xymyënëjkxtëty yë tsajpmok, mëti'ipë yë mteety mtaak ets mjëëky mmëku'uk jyë'kxtëpën pyëktëpën,

³⁴ets xyajmintëty ja m'uty mëti'ipë mutskën, jëtu'untsës nmëpëkëty ko miitsëty oy yë mjot mwinma'any xyjyänty myëët'atë ets ka'ap je'eyë mintë ijxpë wo'ompë; nyaj'ëwaatsëpëtsëmëpës ja mëku'ukëty ets miitsëty jotkujk mnaxtëty mtëkëty naaxjoty kajpnjoty.

³⁵Ko tyajku''ëwatstaaytyë ja xya'këty, ënät ja José ja myëkä'äxtëjk t'ijxtë ko aak taptëm ja meeny yajpaaty xa'k'ëkë'p, xuumyjoty atsumy. Ko jëtu'un t'ijxtë ja meeny atsumy xuumyjoty, ënät tsyë'këtyaktë, jëtu'un yë'ëjëty ets näjyëtu'un ja tyeetyëty.

³⁶Ënät ja Jacob t'ënëmaay ja y'u'unk y'ëna'k: Miitsëty u'unktukës je'eyë xyajwë'ëmnëtë, yë José ka'ap yajpaaty ma ëtsajtëmën, Simeón nän ka'ap e tyam yë Benjamín ënät näjyëtu'un xypyëjkëjantëpës ets xëmë aak'ëjts jëtu'un winë xytyukkëtakpäjtääpy.

³⁷Ënät yë Rubén ja tyeety t'ënëmaay: Ixmats yë Benjamín, ëjts nkëwent'atëp ets mijts jatëkok nëjkx ntukë'ëtëkë e pën kajts ntukë'ëtëkë jatëkok, nkë'ëyäjkpyës yë n'u'unk nimäjtsk ets xyaj'ookëty.

³⁸Tä yë Jacob y'ëtsooy: Yë n'u'unkës ka'ap yë mpanëjkxëtëty, ojts yë y'äjty José y'ooky, e yi'iyë tu'uk jaakwë'ëmp, ko tii jyatëtëty kyëpätëtëty ma mnëëye'eya'an ntu'uye'eya'antën, mijts ënäty yë poky mëët'ajtëp ko ya'atë mëjja'ay y'ookëty mëët yë monyëtukyë.