Read Biblia Mixe de Quetzaltepec Génesis 43 Bible Online

Génesis 43 - Biblia Mixe de Quetzaltepec bible

Génesis 43

¹Ja yuu ja xëëw ni'ikyë myëjë kyëjääjë,

²ko ojts ja Jacob ets ja y'u'unk y'ëna'k tkaaytyääy t'uktaaynyëtë ja tsajpmok mëti'ipë ënäty jap ojts të tyajtsoontën Egiptë, ënät ja Jacob t'ënëmaay ja y'u'unk y'ëna'k: Nëjkxtë jatëkok jaakjuytyë ja tsajpmok jap Egiptë.

³E ja Judá y'ëtsooy: Ja ja'ay jëtu'un të xy'ënëmaaytyës wa'ats: Pën këtii yaa ja m'uty xyajmintë ja mutskpë, këtiis yaa xytyimnimintëty.

⁴Paaty pën m'ëwatsypy ets mëët nëjkxtëtyës, ënätnëm ëëts nëjkxtëty tsajpmok juupyë.

⁵E pën ka'ap xy'ëwa'atsy ets nyëjkxëty mëët ëëtsëty, ka'apës näjyëtu'un nëjkxtëty, jä'ä ko ja ja'ay jëtu'un ojts xy'ënëëmëtës: Pën miitsëty ka'ap xywyoowmintë ja m'utyëty ja mutskpë, këtiis xytyimnimintëty.

⁶Ënät y'ënäny ja Israel: ¿Wi'ix ko miitsëty ëxëëk xytyimtuntës? ¿Wi'ix ko të xytyuk'ëwa'anëtyëpë yë ja'ay ko jyääjëty wiinkpë m'utyëty mutskpë?

⁷Ënät y'ëtsoowtë yë'ëjëty: Jä'ä ko wiinkëm ënäty winë tyajtëëwnë: tjantyyajtëy wi'ix nyajpatëmë, pën ninaakajtëmë ets näjyëtu'un të xy'ënëëmëtës: ¿Juuky'ajtpnëm ja mteetyëtyë? ¿Jaakjamnëm yë m'utyëtyë? E ëëtsëty tiijës ntuunta'aktëp, kwanë ko ëëtsëty n'ëtsowtë mëti'ipë jä'ä yajtëëpyën ets tii ëëtsëty n'ëknijawëtëp pën jëtu'untëm y'ëna'ana'any: yajmintë ja m'utyëty.

⁸Tää yë Judá t'ënëmaay yë tyeety Israel: Pën juuky'ata'anëm, ëxmats yë m'u'unk wä'änës mëët nëjkxtë, ëjts nkëwent'atëp ets tyämyës nëjkxtëty. Jëtu'un ka'ap nyuu'o'kmëty ni mijts ets ni ëëtsëty ets ni yë'ë n'u'unk'ajt n'ëna'k'ajtëmë.

⁹Ëjts nku'ëtsowëp mëët yë'ë, ko tii jyatëtëty kyëpätëtëty. Pën ka'ap jatëkok nkë'ëmo'oy, ëjts pokymyëët wë'ëmëp ma mijtsën winë xëëw mapaatës njuuky'ätyën.

¹⁰Ko jeexyë ëëtsëty yaa nëkooyë të nkapo'oxtë, wä'än jeexyë ëëtsëty të njanëjkxnëtë ets të njawinpijnëtës mäjtsk'okën.

¹¹Ënät ja tyeety y'ëtsoowë: Tyam ka'apës tii winma'any nmëëtëty, tii ënät tëy mtuntëp, nikë yë'ë mënëjkxtë ma mxa'këtyën, mëti'ipë mnamo'otëpën yë ja'ay, ijxtëm mëti'ipë yaa yajmëët'ajtpën ets mëti'ipë yaa ijtp wintëëpën, ijxtëm yë onën, uuxpa'akën, pa'akxu'kpë ets mëti'ipë ja'ay nätyuku'tsëpën ets pya'akxuuky, ujts tëëmëty ets tu'uk ja ujts mëti'ipë xyëëwajtypyën almendrë.

¹²Mmënëjkxtë näjyëtu'un ja meeny, kujkwä'kxy xyajni'ikëtëty ets kë'ëm xytyimkë'ëmo'otëty ja ja'ay mëti'ipë ojts mooywinpitëtën, wä'änxyëp tka'ijxtë ëkë tja'atyëkooytyë.

¹³Oy mnëjkxtëty, mënëjkxtë yë m'uty ets nëjkxtë tampë ja'ay jatëkok ëk'ixtë.

¹⁴Tios mpa'ëyowëtëp tääts tnajtsmatsëty ja tu'ukpë ja mëku'ukëty ets Benjamín, e pën ëjts jëtu'unës ënät u'unktuk nwë'ëmëty, minës jëtu'un n'ëkwë'ëmy.

¹⁵Yë Jacob yë y'ëna'këty ojts tmënëjkxtë ja näynyamo'ojë ets ja meeny kujkwä'kxy jyaak ni'ikëty ets mëët ja Benjamín ojts nyëjkxtë Egiptë.

¹⁶Ko jya'ajtë ma ja José wyintumën ënät ojts t'ixy ko tam mëëtëty ja Benjamín, tää t'ënëmaay ja pyutu'unëpë: Mënëjkxtë ya'atë ja'ayëty maas yë ntëjkën ets yaj'ooktë tu'uk yë tsajpkaato'oxy ets xy'oytyunëty yë tojkx, jä'ä ko yë'ëjës yam mëëtëty nkayä'äny n'uuka'any kujkxyëëw.

¹⁷Ja putu'unëpë jëtu'un tuuntaay tä ja José tyuk'ënä'ämën ets ojts twoownëjkxy.

¹⁸E yë'ëjëty ojts tsyë'ëkëtë, ko ënäty jam yajwoownëjkxtë ma ja José ja tyëjkën, tääts nyäy'ënanëtë aak yë'ëjëty: Ya'atë win'ë'ënën yë je'eyë nëkoo, paatykyëjxm yaa të xyajmi'inëm yë'ë ënät xytyukmatsa'anëm ja meeny mëti'ipë ojts xymyooywyimpijtëmën ets ënät xytyuk'akëwanë'ajtmëty ets nmëtu'unmëty ma yë'ëjëtyën tu'ukyë mëët yë njëyujk'ajtëmë.

¹⁹Paaty ko ojts jya'të jam winkon ma ja tëjk'aawën, tä ojts tmëkajpxtë ja putu'unëpë ets myëtya'aka'antë mëët yë'ë,

²⁰ets t'ënëmaaytyë: Ay wintsën, koos ojts n'ëkmiintëpë, tsajpmok ojts nimintës etsës njuya'antë,

²¹e koos nja'ajtë maas ënäty jam ja tsuu nyajnaxa'antën, ënät ja xa'k'aaw n'ijxtës aak tap ja meeny mëti'ipës njä'ä'ajtëpën, ja meeny kä'pxy jap, e tyam tëëtsës ja nmëmintë ets nyaka'antës;

²²tëë näjyëtu'un yë meeny njaakyajmintës etsës njaakjuya'antë yë tsajpmok, yë'ëjës tëy ka'ap nijawëtë pën jëtääjën ojts ja nmeenyëtyës tyajwinpitë maas yë nxa'këtyën.

²³Tä yë putu'unëpë y'ëtsooy: Jotkujk itë, këtii mtsë'ëkë mjawëtë, yë mTiosëty mëti'ipë m'ëwtajtëpën ets mëti'ipë yë mteetyëty y'ëwtajtypyën, yë'ë ojts tpëjktä'äky yë meeny ma mxa'këtyën, ëjts ojtsës ja meeny n'ëxajë, mëti'ipë ojts xytyukkujuytyën. Tä ja putu'unëpë ojts tyajpëtsëmy ja Simeón pujxn tëkoty ets ojts twoownëjkxy ma ënäty jam ja myëku'ukëtyën.

²⁴Tä ojts tu'ukmukyë twoownëjkxta'ay ma ja José ja tyëjkën, tmooy ja nëë ets tyekpyujtëty ets ojts näjyëtu'un ja jëyujk tjë'kxymyo'oy.

²⁵Tä yë'ëjëty tnipëjktakëtyë ja näynyamo'ojë ets t'a'ix tjëjp'ixtë ko ja José myina'any kujkxyëëw, tëë ënäty nijawëtë ko jam mëët kyäya'antën.

²⁶Ko ojts ja José jyä'ty ma ja tyëjkën, tä ojts tmo'otë ja näynyamo'ojë, mëti'ipë ënäty të tyajmintën ets nyaaxkoowtë, tä jëtu'un ja José yajwintsë'ëkë.

²⁷Ojts ja José tyajtëy wi'ix ënäty jyatë kyëpätë ets ojts näjyëtu'un tyajtëy: ¿Wi'ix yajpaaty ja mteetyëty, ja mëjja'ay mëti'ipës xytyukmëmëtyaktën? ¿Jaakjuuky'ajtpnëmë?

²⁸Ënät ojts nyaaxkowtë, tyajnikëxë'ëktë jëtu'un ja winkutsë'kën ets y'ëtsoowtë: Ja nteetyëtyës oy mëk ja yajpaaty ets jaakjuuky'ajtpnëm.

²⁹Tää yë José y'ijx'ëwtijty ets t'ijxy ja y'uty Benjamín, mëti'ipë ënäty tu'ukyë mëët ja teety taak tukmukyën, tääts y'ënäny: ¿Ya'atë jëtu'un ja m'utyëty mutskpë, mëti'ipës xytyukmëmëtyaktënë? Tios mkënu'kxëtëp u'unk maay. Ko jëtu'un y'ënäny,

³⁰Ënät yë José jyänty nyäjya'awëyë jotkujk, ko yë y'uty t'ijxy ets nyäjya'awëy ya'axaanp yowë, tä jyänty kyupëyë'këy ënätyë tyëkoty ets jap tyëjkëy yaxpë.

³¹Ko yaxmoony, tää ojts wyimpujy wyinje'etsy ets pyëtsiimy jap tyëkoty ets ojts tni'ënä'ämë ja ka'ayën ukën ets t'apëkëtëty.

³²Ja José ëpëky ojts ja kyä'äyën y'ukën yajni''ixë, e ja Jacob ja y'u'unk y'ëna'k nän ëpëky, ja Egiptë ja'ayëty, mëti'ipë ënäty mëët kyäytyën ja José, nän ëpëky ja jyä'äjëty yajni''ijxëtyë. Jä'ä ko yë Egiptë ja'ayëty ka'ap ënäty tyajkutuktë kyääymyuk y'ukmuktëty mëët yë hebreo ja'ayëty.

³³Ënät ja myëkä'äxtëjk yë José nyaaxwä'tstaaytyë ijxtëm ënäty yë'ë të tni'ënä'ämën, tyajnaaxwe'tsy mëti'ipë ënäty mëjjëtyën ets mëti'ipë këjxm ja xyëëw jyëmëjnën ets ok ja mutskpë, je'eyë tmëmay tmëtajtë ko ënäty jëtu'un jam kyäytyë ets nyäwyintë'kxëtë jaxim jayam.

³⁴Yë José ja myëku'uktëjk yë'ë tyukjë'kx mëti'ipë ënäty näjyëtu'un jam jyi'kxypyën ets ja Benjamín jaakni'ik ojts winë tmo'oy këtiinëm jyëtu'unëty ja wiinkëtpyë; ojts kyääymyuk y'ukmuktë ets jotkujk nyäjya'awëtë.