Read Biblia Mixe de Quetzaltepec Génesis 44 Bible Online

Génesis 44 - Biblia Mixe de Quetzaltepec bible

Génesis 44

¹Ko jëtu'un y'ëkkëjxy y'ëknajxy, tää yë José t'ënëmaay yë pyutu'unëpë: Yaj'ujtsta'a xya'këty ya'atë ja'ayëty mëëtë tsajpmok, mëti'ipë myënëjkxtëpën ma jyëën tyëjkëtyën ets näjyëtu'un xy'apëjkëtëty yë myeenyëty mëti'ipë të tukujuytyën maajaty yë xa'k'aawën.

²Pëjkta'ak yë n'a'ukënës ma y'utyëtyën, yë mutskpë xya'kën, tu'ukyë mëët xypyëjkta'akëty yë meeny, mëti'ipë të tukujuyën yë tsajpmok. Jëtu'un ojts tjantytyuny ja José ja pyutu'unëpë, tä ënäty të yajtuk'ëne'emyën.

³Je'eyë ënäty yë xëëw jam pyëtsimnyëm ko yë José yë myëkä'äxtëjk t'ënëmaay ets nyëjkxtëty mëët tu'kë'ëyë jyëyujkëty.

⁴Ka'anëm ënäty nëkoo tmëjëkämkä'äktë ja kajpn, ko ja José ja pyutu'unëpë t'ënëëmë: Panëjkx ets papo'o tääpë ja'ayëty pe'tym, ko xynyajtspaatëty, tää xy'ënëëmëty: ¿Wi'ix ko miitsëty ëxëëk të xytyuunwinpitë ja oyjyot oywyinma'any? Wi'ix ko të xy'ëkmä'tstëpë ja a'ukën mëti'ipë poop pujxn mëët y'oytyunyëtyën.

⁵¿Mëti'ipës yë nwintsën tyuk'ukëpën ets mëti'ipë winë mëët tuknasjawën? Miitsëty ëxëëk winma'any jëtu'un mpatëp.

⁶Ko ja tuunpë tnajtspatëy, ënät ojts jëtu'un tjanty'ënëëmë tä ënäty ja José të nyajtskajpxëtyën.

⁷Tä ojts y'ëtsowtë: ¿Wi'ix ko ëëtsëty jëtu'un xy'ënëëmëtë? Ëëtsëty ni winma'any jëtu'un nkapaatës ets jëtu'un n'ëtë'ëtstëtyës.

⁸Ix maa ëëtsëty muum ntsoontë Canaán ets nyajwinpita'antës ja poop meeny mëti'ipës të npaatën nxa'k ëkë'pëtyës, koos jam nja'ajtë. ¿Wi'ix ko ënät tyam n'ëkmä'tstëpëtyës ja pu'ts pujxn ja poop pujxn ma ja mWintsën ja jyëën tyëjkën?

⁹Pën mpatyp muum ja a'ukën ma ëëts ja nxa'këtyën ets pën myëët'ajtyp ja a'ukën ma xya'k'aawën, jä'ä ookëp ets tu'kë'ëyë ëëtsëty nëjkxta'atëpës mëtuunpë ëyoopë ma miitsëtyën.

¹⁰Ënät ja José ja pyutu'unëpë y'ëtsooy: Oy jyëtu'un'atëty, jatëp këpätëpën ënät jëtu'un tä yam m'ëna'antën. E yi'iyë jëtu'un nëjkxëp mëtuunpë ëyoopë, mëti'ipë ja a'ukën myëët'ajtypyën ma xya'k'aawën, nitu'kë'ëyë ëwaatsëtum mwë'ëma'antë.

¹¹Nitu'ukjaty ja xya'k tyajjënajktaaytyë jëyujk këjxm ets t'akäjtaaytyë.

¹²Ënät ja putu'unëpë tuk'ijxëtyääy tukwo'onëtyääy ja xa'k ets t'ëk'ixa'any maa yajpaatyën ja a'ukën, tyajtso'ontäky ma ja mëjpën ets tyajjëjpkëjxy ma ja mutskpën. E ja a'ukën jap ojts yajpaaty ma ja Benjamín ja xya'kën.

¹³Ënät ojts nyänyikëëts nyäy'ixkëëtsëtë, tjamëkjawëtë tja'ëxëëkjawëtë ko jëtu'un jyatë kyëpätë. Ënät jatëkok ja tyimy t'atsëëmpëktë nitu'ukjaty ets tukjëwë'ënë'ktaaytyë ja jyëyujkëty ets jëtu'un jatëkok wyimpijnëtë kajpntum.

¹⁴Ko yë Judá mëët yë myëku'uktëjk jya'ajtë ma ja José ja tyëjkën, jaaktam'ajtpnëm ënäty yë José, ënät nyaaxkoowtë José wyintuuy, tyajnikëxë'ëktë jëtu'un ja näywyinkutsë'kën.

¹⁵Tää y'ënä'äny yë José: ¿Wi'ix ko miitsëty jëtu'un m'ëtë'ëtstë? ¿Këtii xynyijawëtë, ko ja'ay jëtu'unpë tä ëjtsën nyajtsja'ap winë?

¹⁶Tä yë Judá y'ëtsooy: ¿Wi'ix ëëtsëty mijts n'ëk'ëtsowtëty? ¿Wi'ix ëëtsëty n'ëk'ëna'antëty, ko ka'ap tii ëxëëkpë ntuntë nkajpxtë ets ka'ap ëëtsëty npokymyëët'atë? Yë Tios yë'ë tëy wa'ats nyija'ap, ko ëëtsëty pokymyëëtës nyajpaatë. Tyaa ënät ëëtsëty mijts xykyë'ë'am'atë, yajtuuntëkës ijxtëm mijts xytyimtsokyën, tu'ukyë mëët mëti'ipë ënäty myëët'ajtypyën ja a'ukën xya'kjoty.

¹⁷Yë José tyaa y'ëtsooy: Niwi'ixtsow, yi'iyës jëtu'un nyajwë'ëmäämpy mëti'ipë të yajpaatyën ja xya'k mëët ja n'a'ukënës ets yaa myëtun y'ëyowëty, miitsëty akujk jotkujkmës winpitë ma ja mteetyëty ja jyëën tyëjkën. Ets ni pën mkamëmayëtëty.

¹⁸Ënät yë Judá tmëwinkoony yë José ets t'ënëmaay: Tyam mijts nmënu'kxtä'äky wintsën etsës xyajkajpxëty tu'k'aaw mäjtsk'aaw. Tun yë mëyajtën këtiis xytyukjoot'anpëkëty, mijts jëtu'un yë'ë ijxtëm jeexyë kë'ëm myajkutukyën.

¹⁹Ko mijts xyajtëëwtës pën nmëët'ajtëpës ënäty yë nteetyëty ets pën njaakmëët'ajtëpës ënäty wiinkpë n'utyëty,

²⁰ets ojts ëëtsëty n'ëtsowtë ko nmëët'atës yë nteety ets tëë myëjja'ayënë ets tu'uk yë n'utyëtyës mëti'ipë mutsknëmën, mëti'ipë ojts jää myëxu'unk'atyën ma ënäty yë nteetyëtyës të myëjja'ayënën. Jëtu'un ojts mijts n'ënëëmëtë ko yë nteetyëtyës tsyojkpy jya'ap oy yë myaank, jä'ä ko yi'iyë tu'uk jyaak u'unk'ajtyp ma tu'ukyë tukmuktën ja tyaak tyi'tskëty, jä'ä ko ja y'äjty ojts ja y'o'knë.

²¹Tä ojts näjyëtu'un xy'amëtoy, ko nwoowmintëtyës, jä'ä ko m'ixy'atäämpy ënäty.

²²Ënät ojts mijts n'ënëëmëtë, ko ja n'utyëtyës ka'ap tjëkyepy ja tyeety t'ëxmatsëty, jä'ä ko pën y'ëxmajtsyp, tsojk ja y'ookëty mëët yë monyëtukyë.

²³E mijts jä'ä ko m'ënany: pën ka'ap ëëtsëty nyajmintë ja n'utyëtyës, nikë oyës nkatimmyintëty yaa ma mijtsën ets myajmëkajpxëty ets oy njamiintëpëtyës, mijts ka'ap xy'ëkupëjknëtëtyës.

²⁴Koos ojts nja'të ma ëëtsëty ja nteetyëtyën, ënät ntukmëmëtyaktaaytyës, tääjës ënäty mijts të xy'ënëëmëtën.

²⁵Tä ja nteetyëtyës ojts jatëkok xy'ënëëmëtës: Nëjkx jaakjuytyë yë tsajpmok,

²⁶ets n'ëtsoowtës: Ka'ap tjëkyäp ëjts nëjkxtëty, pën ka'ap nyijkxy yë n'uty mëët ëëtsëty, jä'ä ko pën ka'ap mëët nëjkxtës, ka'ap tjëkyäpëty n'ixtëtyës ja wintsën.

²⁷Ënätës ja nteety xy'ëtsoowtë: Miitsëty mnija'awëtëp wa'ats, ko yë nto'oxytyëjkës je'eyë mäjtskpajk yë u'unk maay të tpaaty të t'ixy.

²⁸Tu'uk ojts jëtu'unyë y'ooky tyëkoy, e tyampaat ka'apës nimaa näky'y'ixy, ets mëtëy yë'ë ko jëyujk yë ëwa'anpë ojts tyuknuk tyukwëtsëty ets yaj'o'kë.

²⁹Pën xytyukwinwoowtutëpës ja wiinkpë ja n'u'unkës ets muum wi'ix jyatëty kyëpätëty, miits yë poky mëët'atëp, ko ya'atë mëjja'ay y'ookëty tyëkoyëty mëët yë monyëtukyë.

³⁰Paaty yë nteetyëtyës janty tu'ukyë yowë jyot wyinma'any timyaj'ity mëët yë myaank, pën yë'ë ka'ap xypyanëjkxtës maas tyam nwinpijnëtën.

³¹Ko yë'ë t'ixëty ko ka'ap ma myaank, tsojk y'ëk'o'knëty etsës ënät nwë'ëmtëty pokymyëët, ko yë mëjja'ay y'ëk'o'knëty mëët yë monyëtukyë.

³²Ëjts jëtu'unës të n'ënëëmë yë nteetyëtyës, koos ëjts nkëwent'atanëp yë myaank Benjamín ets näjyëtu'un të n'ënëëmës, ko pën ka'apës nyajwinpijtë yë myaank, ëjts nku'ëtsowëp etsës pokymyëët nwë'ëmëty kë'ëyxyëëw kë'ëyjyëmëjt mapaatës njuuky'ätyën.

³³Paaty yam mijts nmënu'kxtä'äky etsës xyajwë'ëmëty, wä'änës yë n'uty nkutuny ets yë'ë wä'än tnëjkxy mëët yë y'äjtytyëjk.

³⁴Jä'ä ko wi'ixës ëjts nwinpitëty ets nteetyës jotkujk nwinkuwa'akëtyës, ¿pën ka'apës yë myaank nyajnëjkxë? Ëjts ka'apës oy näjyawëtëty ko ja nteetyës ëxëëk jyatëty kyëpätëty.