Read Biblia Mixe de Quetzaltepec Génesis 48 Bible Online

Génesis 48 - Biblia Mixe de Quetzaltepec bible

Génesis 48

¹Ko jëtu'un ja xëëw jëmëjt nyäjxy, ënät yë José ojts yajtuk'ëwaanë ko ënäty jam ja tyeety pyëjkënë. Ënät ojts ja José ja tyeety ninëjkxy mëët nimäjtsk ja myaank, mëti'ipë xyëëwajtëpën Manasés ets Efraín.

²Ko yë Jacob tnija'awëy ko tëë ja myaank José nyiminyë, ënät ojts oywyi'ix nyäpyutëkëty ets pyëti'ky jam myaapäjnkëjxm.

³Tä t'ënëmaay ja José: Yë Tios mëti'ipë maaytyääyëpën winë, yë'ë ojts jam nyänyikëxë'ëkyë maas ënäty jamën, ma ja Luz kajpnën ma Canaán y'itjotmën, etsës ojts xykyënu'kxy

⁴mëët ya'atë aaw ayuk: Ëk'ix, ëjtsës nyajnimayëjäämpy yë m'u'unk m'ëna'k ets m'ok'u'unk m'ok'ëna'k nyimayëtëty. Ko nyämyukëtëty, naax kajpn nëjkx mëjpë tyajkojtë ets yë'ëjës näjyëtu'un nmo'ojäämpy ya'atë it naaxwiinyëtë ets yë'ë xëmëkyëjxm tjä'ä'atëty.

⁵E tyam ënät yë mmaank Efraín ets Manasés, mëti'ipë të myintën naaxwiiny yaa Egiptë, maas ënäty ka'anëm nminyëm yaa ma mijts myajpaatyën, ëjts yë njä'ä'ajtëp. Jëtu'unës yë njawëtë tääjës njawëtën yë Rubén ets Simeón.

⁶Ko yë m'u'unk m'ëna'k wiinkpë xypyaatëty mijts nëjkx xyjyä'ä'ajnë, mëët ko nyämyëku'uk'atëtë mëët yë Efraín ets Manasés, nëjkxëp näjyëtu'un yë kyuma'ayën tpaatë t'ixtë.

⁷Koos ojts nwinpijnë jam Padán-aram, ojtsës xykyu'o'knë yë mtaak Raquel jam ma nyaaxjotmën yë Canaán; jamës ënäty ntimjya'tanëtë Efrata, tääjës ojts jämyë nyajnaaxtëkë jam tu'u'am, mëti'ipë tyam txëëwajtnëpën Belén.

⁸Ko yë Israel tuk'ijxpejty yë José yë y'u'unk y'ëna'k, ënät tyajtëëy: E ya'atë, ¿pën yë'ëjëty?

⁹Ëjts yë n'u'unk n'ëna'k, mëti'ipës yë Tios të xymyo'oy të xykyexyën yaa Egiptë, jëtu'un y'ëtsooy yë José. Ënät yë tyeety y'ënëmaayë: Tun yë mëyajtën yaa yajmëjwa'aktë winkon, wä'änës n'ëkënu'kxtë.

¹⁰Yë Israel tëë ënäty myëjja'ayënë, ka'ap oy y'ëk'ijxnë, paaty yë José yë myaank nimäjtsk tukmëwinkoony ja tyeety Jacob ets tmëneeny ja y'ok'u'unk y'ok'ëna'k ets ojts tsu'kxy.

¹¹Ënät näjyëtu'un yaj'ënëmaay yë José: Ëjts ka'apës ënäty n'ëk'ënanë jatëkok n'ixëty mijts, e tyam mijts jatëkok n'ixy npaaty ets Tios jëtää näjyëtu'un ënaanp ets m'u'unk m'ëna'k njaak'ixëtyës.

¹²Ënät yë José tjëwooy yë myaank, ma ja tyeety yë kyoxën ets nyaaxkooy twinkutsë'ëkë jëtu'un ja tyeety.

¹³Ënät ojts tukwinkuwowë ja tyeety ja nimäjtskpë ja myaank, yë Efraín yë'ë a'oytsyow ets Manasés anajnytsyow. Tää ojts ja Israel yajtukwinkuwowë ets ojts yë Efraín wyi'imy ma Israel yë y'anajnykyë'ëjën ets Manasés a'oykyë'ëjën.

¹⁴E ko ojts yë Israel xyajtëy, tä ojts ja kyë'ë tyajnäywyinnaxyë ets ja kyë'ë ja a'oy'äämpyë jam tpëjktä'äky ma Efrainkën, mëti'ipë ënäty mutsknëmën, e ja anajny'äämpyë jam tpëjktäky ma ja Manasesën, oy ënäty jä'ä jyakä'äxkopkëty.

¹⁵Ënät ojts yë José yajkënu'kxy mëët ya'atë aaw ayuk: Yë Tios mëti'ipë ojts t'ëwtatën tmëmëtowtën yë Abraham ets Isaac, mëti'ipës nteetyajtën, Ja Tios mëti'ipës të xykyënu'kxyën xëmë, koos nmiiny naaxwiiny ets tyampaat.

¹⁶Yë Tios yë tsyajpjotmëtë kukäjpxy mëti'ipës xyaj'ëwaatsëpëtsëëmpën ma ëxëëkpë jëpyëkpën. Yë'ë kyënu'kxëp jyëkyäpëp ya'atë ëna'këty. Mëët yë'ëkyëjxmëty ja'amyetsy xëmë yë nxëëwës y'itëty ets xyëëw yë nteetyës n'apës Abraham ets Isaac. Myëët'atëp nimay yë y'u'unk y'ëna'këty, ets jëtu'un nimay y'itëty tsyëënëtëty yaa naaxwiiny.

¹⁷Yë José wiink ojts t'ixy, ko yë tyeety tpëjktä'äky yë y'a'oykyë'ë ma Efrainkën, paaty ojts tmajtsë ja tyeety ja kyë'ë ets tuknixajtuty ja Efraín ma kyëpajkën ets tpëjkta'aka'any jam ma Manasés ja kyëpajkën.

¹⁸Oy ënäty ja tyeety tja'ënëëmë: Tatë ka'ap jëtu'un y'oy'atëty, ya'atë yë'ë mëj, pëjkta'ak yë m'a'oykyë'ë ma kyëpajkën.

¹⁹E yë tyeety ka'ap jëtu'un t'a'ijxëy ets y'ëtsooy: Ëjts nija'ap u'unk, ëjts nija'ap; yë'ë nëjkxëp näjyëtu'un yë kyajpn y'awinpity mëjwiin këjää, je'eyëp ko ni'ik nëjkx mëj'äämpy y'ity yë y'uty yë nyaax kyajpn ets y'u'unk y'ok wäänë nimay nëjkx yë nyaax kyajpn tyaj'ixta'aktë.

²⁰Jä'ä xëëw jä'ä jëmëjt ojts yë Jacob tkënu'kxy yë y'ok'u'unk y'ok'ëna'k mëët ya'atë aaw ayuk: Yë Israel ja'ayëty yë'ë yajtuntëp mijts yë mxëëwëty, ko pën tkënu'kxtëty ets y'ëna'antëty: Tios yë'ë jëtu'un mkënu'kxëtëp, ijxtëm ojts tkënu'kxyën yë Efraín ets Manasés. Jëtu'un yë Israel ojts jëyëjp tpëjktä'äky yë Efraín ets ok yë Manasés.

²¹Ënät t'ënëmaay yë José: Ëk'ix ëjts tsojkës n'ookanë, Tios yë'ë mkënu'kxanëtëp ets mëët'ita'anëtë ets yë'ë näjyëtu'un nëjkx jatëkok myajwinpitëtë ma ja y'it nyaaxwiinyëtën ja m'ap m'okëty.

²²Mijts ni'ik winë të nmo'oy këtiinëm jyëtu'unëty yë mmëkä'äxtëjk, mijts yam nmoopy yë nyaax kyajpnëty ma txëëwatyën Siquem, mëti'ipës ojts mpëjkëtën yë Amor ja'ayëty, koos mëët ntsiptuuny.