Read Biblia Mixe de Quetzaltepec Génesis 5 Bible Online

Génesis 5 - Biblia Mixe de Quetzaltepec bible

Génesis 5

¹Yaa jëtu'un kuja'ay myiny ja y'u'unk y'okëty yë Adán. Ko yë Tios ojts tyajkojy yë naaxwiinyëtë ja'ay. Jëtu'un ojts tyajkojy ijxtëm yë Tios kë'ëm y'ixëtyën.

²Ye'eytyëjk ets to'oxytyëjk ojts tyajkojy ets tmooy yë kyënu'kxën. Ja xëëw ma Tios ojts tyajkojyën yë naaxwiinyëtë ja'ay, ënät ojts y'ënä'äny: Ja'ay txëëwatëty.

³Mëko'px ja i'px majk ënäty yë Adán yë jyëmëjt, ko myëxu'unk'ajty yë myaank mëti'ipë xyëëwajtypyën Set. Yë Set jëtu'un ënäty y'ixëty tä yë tyeetyën.

⁴Ko jëtu'un yë Set y'ëkmiiny naaxwiiny, yë Adán jä'ä ojts jyaakjuuky'äty tuktujk mëko'px jëmëjt ets ojts jyaak mëxu'unk'atë yë y'u'unkëty y'ëna'këty ye'etyëjkpë ets to'oxytyëjkpë.

⁵Paaty yë Adán jä'ä ojts kä'pxy jyuuky'äty taxtujk mëko'px ja i'px majk jëmëjt. Jä'ä ojts y'o'knë.

⁶Mëko'px ja mëkoxk ënäty yë jyëmëjt yë Set ko myëxu'unk'ajty yë myaank Enós.

⁷Ko jëtu'un y'ëkmëxu'unk'ajty yë Enós, yë Set jä'ä ojts jyaakjuuky'äty tuktujk mëko'px ja wëxtujk jëmëjt ets ojts jyaak mëxu'unk'atë y'u'unkëty y'ëna'këty, ye'etyëjkpë ets to'oxytyëjkpë.

⁸Paaty yë Set jä'ä ojts kä'pxy jyuuky'äty taxtujk mëko'px ja majkmäjtsk jëmëjt ets jää ojts y'o'knë.

⁹Enós jä'ä ënäty yë jyëmëjt majkta'px majk, ko myëxu'unk'ajty yë y'u'unk mëti'ipë xyëëwajtypyën Cainán.

¹⁰Ko yë Cainán jëtu'un y'ëkmëxu'unk'ajty, jä'ä ojts yë Enós jyaakjuuky'äty tuktujk mëko'px ja majkmokx jëmëjt ets ojts jyaak mëxu'unk'atë y'u'unkëty y'ëna'këty, ye'etyëjkpë ets to'oxytyëjkpë.

¹¹Paaty yë Enós, jä'ä ojts kä'pxy jyuuky'äty taxtujk mëko'px ja mëkoxk jëmëjt. Ets jää ojts y'o'knë.

¹²Cainán jä'ä ënäty yë jyëmëjt tëkë'px majk ko myëxu'unk'ajty yë myaank mëti'ipë xyëëwajtypyën Mahalalel.

¹³Ko jëtu'un yë Mahalalel y'ëkmëxu'unk'ajty, yë Cainán, jä'ä ojts jyaakjuuky'äty tuktujk mëko'px ja wëxtyikxy jyëmëjt. Ets ojts jyaak mëxu'unk'atë yë y'u'unkëty y'ëna'këty, ye'etyëjkpë ets to'oxytyëjkpë.

¹⁴Paaty yë Cainán jä'ä ojts kä'pxy jyuuky'äty taxtujk mëko'px ja majk jëmëjt ets jää ojts y'o'knë.

¹⁵Yë Mahalalel jä'ä ënäty yë jyëmëjt tëkë'px mëkoxk, ko myëxu'unk'ajty yë y'u'unk mëti'ipë xyëëwajtypyën Jared.

¹⁶Ko jëtu'un y'ëkmëxu'unk'ajty yë Jared, yë Mahalalel, jä'ä ojts jyaakjuuky'äty tuktujk mëko'px ja i'px majk jëmëjt. Ets ojts jyaak mëxu'unk'aty yë y'u'unkëty y'ëna'këty ye'etyëjkpë ets to'oxytyëjkpë.

¹⁷Paaty yë Mahalalel jä'ä ojts kä'pxy jyuuky'äty tuktujk mëko'px ja majkta'px majkmokx jëmëjt ets jää ojts y'o'knë.

¹⁸Jared jä'ä ënäty yë jyëmëjt mëko'px ja tëkë'px mäjtsk, ko myëxu'unk'ajty yë myaank mëti'ipë xyëëwajtypyën Henoc.

¹⁹Ko jëtu'un y'ëkmëxu'unk'ajty yë Henoc, jä'ä ojts yë Jared jyaakjuuky'äty tuktujk mëko'px jëmëjt ets ojts jyaak mëxu'unk'atë y'u'unkëty y'ëna'këty, ye'etyëjkpë ets to'oxytyëjkpë.

²⁰Paaty yë Jared jä'ä ojts kä'pxy jyuuky'äty taxtujk mëko'px ja tëkë'px mäjtsk jëmëjt. Ets jää ojts y'o'knë.

²¹Henoc jä'ä ënäty yë jyëmëjt tëkë'px mëkoxk, ko myëxu'unk'ajty yë y'u'unk myääy mëti'ipë xyëëwajtypyën Matusalén.

²²Yë Henoc xëmë ojts jyuuky'äty ijxtëm ënäty yë Tios tsokyën. Ko ënäty jëtu'un yë Matusalén të myëxu'unk'aty yë Henoc, jä'ä ojts jyaakjuuky'äty tëkëëk mëko'px jëmëjt ets ojts jyaak mëxu'unk'atë y'u'unkëty y'ëna'këty ye'etyëjkpë ets to'oxytyëjkpë.

²³Paaty yë Henoc jä'ä ojts kä'pxy jyuuky'äty tëkëëk mëko'px ja tëkë'px mëkoxk jëmëjt.

²⁴Yë'ë jëtu'un ënäty xëmë të jyuuky'äty ijxtëm yë Tios tsokyën, tu'kxëëw tu'kjëmëjt ojts jëtu'unyë tyëkooynyë. Jä'ä ko Tios ënäty të yajnëjkxyë.

²⁵Matusalén jä'ä ënäty yë jyëmëjt mëko'px ja majkta'px wëxtujk, ko myëxu'unk'ajty yë y'u'unk Lámec.

²⁶Ko jëtu'un y'ëkmëxu'unk'ajty yë Lámec, jä'ä ojts yë Matusalén jyaakjuuky'äty wëxtujk mëko'px ja majkta'px mäjtsk jëmëjt ets ojts jyaak mëxu'unk'atë yë y'u'unkëty y'ëna'këty ye'etyëjkpë ets to'oxytyëjkpë.

²⁷Paaty yë Matusalén jä'ä ojts kä'pxy jyuuky'äty taxtujk mëko'px ja tëkë'pxtaxtujk jëmëjt. Ets jää ojts y'o'knë.

²⁸Lámec jä'ä ënäty yë jyëmëjt mëko'px ja majkta'px mäjtsk, ko ojts tu'uk yë y'u'unk myääy jyä'ty naaxwiiny.

²⁹Jä'ä ojts txëëwmo'oy Noé ets y'ënäny: Yë Wintsën të tpoky yë naax. Mëk jëtu'un ntu'unmëty täänëm jam winë pyëtsëmëty kamwinm. E ya'atë u'unk maay të jyä'tyën, yë'ë nëjkx yë po'kxën xytyuk'ijxëmë.

³⁰Ko yë Noé jëtu'un y'ëkmëxu'unk'ajty, yë Lámec jä'ä ojts jyaakjuuky'äty mëkoxk mëko'px ja majkta'px majkmokx jëmëjt. Ets ojts yë y'u'unkëty y'ëna'këty jyaakmin jyaakja'të naaxwiiny, ye'etyëjkpë ets to'oxytyëjkpë.

³¹Paaty yë'ë jä'ä ojts kä'pxy jyuuky'äty wëxtujk mëko'px ja tëkë'px majkmokx mäjtsk jëmëjt ets jää ojts y'o'knë.

³²Noé jä'ä ënäty yë jyëmëjnë mëkoxk mëko'px, ko ojts yë y'u'unkëty myëxu'unk'atë, mëti'ipë xyëëwajtëpën Sem, Cam ets Jafed.