Read Biblia Mixe de Quetzaltepec 2 Samuel 12 Bible Online

2 Samuel 12 - Biblia Mixe de Quetzaltepec bible

2 Samuel 12

¹Yë Wintsën ojts tkexy yë tyuunpë Natán ets nëjkx t'ixy ja David. Ko Natán jam jyä'äjty ma ja David jam yajpaatyën, ënät t'ënëmaay: Ma tu'uk yë naax kajpnën jam ijty nimäjtsk yë ja'ay yajpaatë. Tu'uk kuwit kumeeny ets tu'uk ëyoop jotëkoopy.

²Ja ja'ay mëti'ipë kuwit kumeenyën, may'äämpy ijty tmëëtëty yë jëyujk tsajpkaa,

³e ja mëti'ipë ëyoopën je'eyë tu'kpajk ja kupixyny tmëëtëty mëti'ipë ënäty kë'ëm të tjuyën. Kë'ëm ojts tyajyeeky tu'knax mëët ja y'u'unk y'ëna'k, jëtu'un tu'knax tyajkay tyaj'uuky; tmu'uxy tpe'eny, yë'ë tyukjë'kxyp mëti'ipë kë'ëm jyi'kxyp pyijkpyën ets nän jap tu'ukyë mëët y'ukmuky ma ja y'a'ukënyën. Ja ja'ay jëtu'un ja kyupixyny ënäty tjawë tä jeexyë nyëëxën.

⁴Tëkok ja ja'ay jam jya'ajtäky ma ja jyëën tyëjkën ja kumeenyjyä'äy; e yë'ë ka'ap tonany nitu'uk ja tsyajpkaa ëkë ja kyupixyny ets jeexyë tukwintsë'ëkë ja ja'ay jampë të jyä'tyën, jä'ä ojts poj'am tninëjkxy ja ëyoopëja'ay ets tpëjkëy ja kyupixyny tu'kpajkpë, jä'ä yaj'o'oyëy ets ojts tuktojkxy ja ja'ay mëti'ipë ënäty të kyuja'tëtyën.

⁵David yajxon ojts y'ëwa'antaknë, mëët tääpë ja ja'ay mëti'ipë ënäty ja ëyoopëja'ay ni'ikyë të tpëjkën ja kyupixyny, tä ja Natán t'ënëmaay: Ëjts yam jëtu'un ënaanp ko tääpë ja'ay nitëjkëyëpë y'ookëty.

⁶Ets taxk'oknipety mëpaat tkujuy ja kupixyny, jä'ä ko ka'ap ninu'un ja pa'ëyo'ow najts'ëyo'owën të tmëët'aty.

⁷Ënät ja Natán y'ënëmaayë: Mijts tääpë ja'ay. Jëtu'un ja Tios të y'ënä'äny mëti'ipë wyintsën'ajtypyën yë Israel kajpn: Ëjts mijts të nwin'ixy ets xynyikopk'atëty yë nnaax nkajpnës, mijts ka'ap të n'ëxmatsy ets Saúl myaj'ook myajtëkoyëtëty.

⁸Ëjts mijts të nmo'oy yë kutujkëntëjk, mëët ja to'oxytyëjktëjk mëti'ipë ja Wintsën myëtuuntëpën ets ma ja naax kajpnën ma ja Israel ets Judá tnitänën. Ka'ap yi'iyëty ni'ikyënëm winë njaaktimmyo'oja'any.

⁹¿E mijts wi'ix ko ënät ja n'ayukës të xykyumëtoownaxy ets të xytyuny ja ka'apë tyuunëtyën? Mijts të xyaj'ooky yë Urías, ja Hit ja'ay, je'eyë të xytyukniwoy ja Amón ja'ayëty ets yë'ë tyaj'ooktëty ets të xypyëjkë ja tyo'oxytyëjk.

¹⁰Mëët koos ka'ap të xymyëj'ixy, ko të xypyëjkë ja Urías ja tyo'oxytyëjk, ja Hit ja'ay, jam ma mjëën mtëjkën itëp jam xëmë ja tsip äkë.

¹¹Ëjts, mëti'ipë Wintsën'ajtpën ëjts yam jëtu'un nikäjpxyp: jam ma mjëën mtëjkën jämyë nëjkx kë'ëm ja m'u'unk m'ëna'k nyämyëtsiptsoonyë ets nëjkxëp kë'ëm xy'ixy ko ënäty ja mto'oxytyëjk myajpëjkë ets jä'ä tmëëtko'knëty tu'uk ja mmëku'uk.

¹²Pën mijts tëë tii ayu'utsy ame'tsyë xytyuny xykyäjpxy, ëjts ijxnë kä'äxnës ets xëënyës nëjkx winë nyajtuny nyajjatyë.

¹³David ojts tkupëky ja pyoky ijxtëm ënäty ja Natán të y'ënë'ëmxëtyën ets y'ënäny: Ëjts nja'apës ko tëëjës njantypyokytyuny ma Wintsënën. Ets ja Natán y'ëtsoowë: Yë Wintsën ka'ap myijtsëty mtëytyuna'anyë ets ka'ap mtimyaj'ooka'anyë.

¹⁴Je'eyëp ko ja maank mëti'ipë të myëxu'unk'atyën kopkpëky ko y'ooka'any, mëët ko të ntuuntëkoy këjää yë Wintsën tjawë.

¹⁵Ko ja Natán ojts wyimpijnë nyëjkxnë ma tyëjkën, jä'ä xëëw ojts ja mëxu'unk pya'ampäjnë mëti'ipë ënäty ja David mëët ja Urías ja tyo'oxytyëjk t'u'unk'atyën.

¹⁶Ënät ja David mëktä'äky tyëjkëy nu'kxtakpë ets jeexyë ja Wintsën tyajtso'oky ja mëxu'unk, ojts ja David jya''ayuu'aty ets naaxkëjxy tyajnajxy ja tsuu.

¹⁷Ja mëjja'aytyëjkëty mëti'ipë ënäty yajpatëpën ma ja kyutujktaknën ojts tjaninëjkxtë ets tjä'ënëmaaytyë jeexyë pyëti'iky ets kyäyëty, yë'ë ka'ap tkupëjky ets ka'ap kyääy mëët yë'ëjëty.

¹⁸Kom wëxtujk xëëw ojts y'o'knë ja mëxu'unk, ja David ja tyuunpëtëjk ka'ap tnija'awëtyë wi'ix t'ënëëmëtëty ja David, jä'ä ko tyaa y'ëna'antë: Ko ënäty jyuuky'ätynyëm yë mëxu'unk ojts njamëkajpxëmë ets ka'ap xynyi''ijxë'këmë, ¿e tyam wi'ix nä'ënëmä'ämyëty ma të y'o'knën? Tsojk ajotkumonë tii tnatunëty.

¹⁹Ko ja David t'ijxy ko jëtu'un kyajpxtë myëtya'aktë ja myëkutuunktëjk, ënät tyajtëëy: ¿Ti tëë ja mëxu'unk y'ookyë? Tëë ja y'ooky, jëtu'un y'ëtsoowtë.

²⁰Ënät ja David wyä'ätsë'ky ets tsyiiy xyijtsy, nyäy'oon nyäpyëjkë ets ja wyit tjääntëkajtsy, tääts jap tyëjkëy tsajptëkoty ets ja Wintsën t'ëwtata'any; jam tsyo'ony tääts ojts nyijkxy ma tyëjkën t'amëtooy ja kääky uuky ets kyääy pyijky.

²¹Ënät yajtëëwë ja myëkutuunktëjk: ¿Tiitën mtuumpy mijts mëj'ënä'ämpë? Ko ënäty ja mëxu'unk jyaak juukyëtynyëm mijts mjëëpy myaxp ets m'ayuu'ajtp jää, e tyam ma të y'o'knën ni'ikyë mtëjkënë kääpyë ukpë.

²²Tä ja David y'ëtsooy: Ko ënäty ja mëxu'unk jyaak juuky'ätynyëm, jääjës ojts n'ayuu'aty n'axëëw'aty, kooxyëp ntij jeexyë ja Wintsën tnapa'ëyoy ets jeexyë tyajjuuky'äty.

²³E tyam ma të y'o'knën, tiijës ntuunta'akëp, oyës jënu'un n'ayuu'atëty etsës nu'kxta'akëty, ka'ap yë'ëkyëjxm ënät jyuukpyëkëty. Ëjts jamës jëna'a mëët näpyaatëtëty, e yë'ë ka'ap tjëkyepy jatëkok yaa min xypyäätyës.

²⁴Yë David ojts ja Betsabé jatëkok ja jotkujk'ajtën tmo'oy. Ojts tninëjkxy ets tmëët tsënaay, ënät ojts u'unk mëët wyi'imy ets tyajmëxu'unk'ajty tu'uk ja u'unk maay, mëti'ipë ja David ojts txëëwmo'oyën Salomón. Yë Wintsën ojts ya'atë mëxu'unk tsoky tjawë,

²⁵jëtu'un ja David yajtuknija'awëy, yë Natán yë'ë tuk'ëwa'anëyë. Mëët ko ja David ënäty të tja'akyukë wi'ix ja Wintsën y'ënë'ëmxëtyën paaty ojts ëpëky txëëwmo'oy ja mëxu'unk Jedidías.

²⁶Ja Joab mëët ja tsyiptuunpëtëjk, ojts tsyoontë ets nyëjkxtë jam Rabá ma ja Amón ja'ayëty ja kyajpnëtyën ets tnitëkëja'antë, Joab tëë ënäty t'a'ixë ko yë'ë mëtaknëp,

²⁷paaty ojts poj'am tkäjpxynyikäxë yë David ets t'ënëmaay: Tëës yë Rabá kajpn nitëkë, ja mutsk kajpn ma ënäty tyajtsoontën yë nëë tëëjës ja nyajku'ëtuky.

²⁸Paaty yam n'ënëëmë mijts mëj'ënä'ämpë, yajtu'ukmuky yë mja'ay ets xynyitëkëty tääpë kajpn, mijts kë'ëm nitsiptun, këtiipës ëjts ja nxëëw myëjnaxëty.

²⁹Ënät ja David tyajtu'ukmujky ja tsyiptuunpëtëjk ets tnitëjkëy ja Rabá kajpn ets yë'ë tjä'äpëjky.

³⁰Ojts tpëjkë ja ënä'ämpë ja kyujup, pu'ts pujxn mëëtpë, ja kujän myëët ja oyëtypë ja tsaa, jä'ä jye'emtyëty i'px majktëkëëk tsimën ets ojts jä'ä ja David yajtukujeny. Ojts yë David jam ëpëky winë kajpnjotm tyajpëtsëëmpë mëti'ipë tsowëtyën,

³¹e ja ja'ayëty mëti'ipë ojts wyë'ëmtën juuky, ojts tuunkmo'oy, tam mëti'ipë myooyën yë jë'tn, naaxwo'kn, naaxjä'pn ets pujxn mëti'ipë kepy yajtukpujxpën ets mëti'ipë yajkë'ëwtëpën ja muutsy. Maajaty ojts ka'ap tyajmëtä'äkyën ja Amón ja'ay aak ojts tuunkmooytyä'äy. E ja David ojts wyimpijnë mëët ja tsyiptuunpëtëjk jam Jerusalén.