Read Biblia Mixe de Quetzaltepec 2 Samuel 16 Bible Online

2 Samuel 16 - Biblia Mixe de Quetzaltepec bible

2 Samuel 16

¹Je'eyë ënäty yë David të tninajxta'ay ja kopk, ko jam pyatë yë Sibá, yë'ë tyuunpë yë Mefi-bóset. Yë'ë wyojpmiimpy yë krukts nimäjtsk, mäjtsk mëko'px yë tsajpkääky tsëëmmintë, mëko'px kony yë tsatym myä'ätsy, mëko'px yë ujtstëëm tsa'amjatypë ets tu'k apëjkën yë uuky.

²Tä ja ënä'ämpë yajtëëwë: ¿Tiitën tääpë xyajminyën? Ets ja Sibá y'ëtsooy: Ya'atë krukts nyajminyënës mijts ntuk'u'unyëp ets yajkutujkpë y'u'unk tyo'oxytyëjk; yë tsajpkääky ets ujtstëëm tsa'ampë yë'ë jyë'kxtëp yë tsiptuunpëtëjkëty, e yë uuky mëti'ipës nmëmiimpyën yë'ë y'uuktëp mëti'ipë jam muum tu'ujoty ënu'kxëpën jam të'ëts'itum.

³¿Maajën ja y'okmaank ja mwintsën? jëtu'un ja yajkutujkpë yajtëëwë. Jam ja Jerusalén të wyi'imy, jëtu'un y'ëtsooy ja Sibá, jä'ä ko jëtu'un myäy tyäjy kooxyëp ntij ënät ja kyutujkën jatëkok nyawinpitëty mëti'ipë ja tyatwelë patëpën.

⁴Oy jëtu'un, jëtu'un y'ëtsooy ja yajkutujkpë, tyam n'ënëëmë ko mijts tyam mjä'ä'ajnëp mëti'ipë ijty yë Mefi-bóset jyä'ä'ajtypyën. Jëtu'unpëk jeexyë xëmë mijts xy'oyjyawës mijts Wintsën, jëtu'un y'ëtsooy ja Sibá ets nyaax'ijxy nyaaxkooy, tyajnikëxë'ëky ja näwyinkutsë'ëkë ma ja yajkutujkpën.

⁵Ko yë David jyä'äjty ma jam ma Bahurim kopkën, jam nyipëtsëëmë tu'uk yë ja'ay jä'ä xyëëwajtyp Simí, yë'ë yë Saúl yë jyä'äy. Yë'ë ja myaank ja Guerá ets wiinkjaty jyänty ënë'ëmxëty, jyänty pyokyë,

⁶ets tyukpaka'atsyë yë tsaa, jëtu'un yë'ë ets näjyëtu'un ja tyuunpëtëjk; oy yë David ënäty jam jyapaminyë ja mëti'ipë kuwanëpën,

⁷ja Simí ëxëëkjaty tjanty ënëëmë ets tpojky; tyaa y'ënä'äny: Nëjkx mijts ka'oypyë, ëxëëk ja'ay, yaja'ay'o'kpë.

⁸Yë Wintsën yë'ë tyam mtëytyuunëp mëët ja mëti'ipë të xytyimtunyën ko ojts ja Saúl ja y'u'unk y'ëna'k xyaj'o'k xyajtëkooyë ets mijts jam mnaaxwe'tsy ma ja kyutujktaknën. Paaty tyam yë'ë ja kutujktakn ja maank Absalón të yajmo'oy ets ënät je'eyë mkäknë mpujnë mëët ko kë'ëm xykyatukjaty wi'ix mja'ay'atëtyën, mijts ka'ap nitii xykyëjxmëty je'eyë myajja'ay'ooky.

⁹Ënät ja Abisai, yë Sarvia myaank t'ënëmaay ja yajkutujkpë: ¿Tim pën jëtää tyaapë ja'aynyë ets jëtu'un ëxaty t'ënëëmëty ja yajkutujkpë? tyamës yaa nëpujxëty yë kyëpajk.

¹⁰E ja ënä'ämpë tyaa y'ëtsooy: Ya'atë ka'ap myijtsëty mpaatyë, yë Sarvia y'u'unk y'ëna'k. Pën xypyojkpës wä'änxyëp yë Wintsën yë'ëjëty të y'ëne'emyë. E pën janty jëtu'unts, ¿pën mëpaat wi'ix y'ëktunyë?

¹¹Ets tni''ijxwinpijty yë Abisai ets ja tsyiptuunpë wintsën, t'ënëmaay: Pën yë'ëpaatës yë nkë'ëm u'unk xyaj'ooka'any, wi'ixpëm jëtää yë ja'ay ka'apës mpën'atyën tä yë Benjamín y'u'unk y'okën. Wä'än t'ixy pën xypyojkpës, yë Wintsën ënät të tyuk'ëne'emyë.

¹²Pën xypya'ëyoopës jëna'a Wintsën ets pën jam tkëwentëtuny maas yam ëxëëk njaty nkëpetyën, wä'änxyëp ja ni'ikyë nëjkx xy'ëkënu'kxnës ets nëjkx jëëmpit winë y'ëktuun y'ëkjajtënë oyës ënäty të njayajpoky jëtu'un tääjës tyam nmëtoyën.

¹³Ja David ojts ja nyëjkxtë, e ja Simí ni'ikyë ja näjyëtu'un pyanëjkxëtë ma ja David ënäty jam nyëjkxtën ets jyänty pyokyë ets jyänty tyuk'aka'tstukyë tsaa.

¹⁴Ko ja ënä'ämpë ets ja ja'ayëty mëti'ipë mëët nyëjkxtën jam jyajtë ma ja Jordán mëj nëëjë, tëë ënäty yajxon y'ënu'kxëtë paaty ojts jam wyimpo'kxnaxtë.

¹⁵Ënät ja Absalón kyajpntëjkëy mëët tëkokyë ja Israel ja'ayëty ets ja Ahitófel.

¹⁶E ja Husai, ja David ja myëku'uk, ojts näjyëtu'un ënätyë tjëjpaatë'ëky ja Absalón ets tyëjkëy yaxpë jojkpë: Tëë ja yajkutujkpë jyä'ty, tëë ja yajkutukpë jyä'ty.

¹⁷Ënät ja Absalón yajtëëwë: ¿Jëtu'un mijts ja m'oyjot m'oywyinma'any xyajnikëxë'ëky ma ja mëku'ukën David mëti'ipë m'oyjya'apënë? ¿Wi'ix ko të xykyapanëjkxy?

¹⁸Ka'ap tjëkyepy, jëtu'un y'ëtsooy ja Husai, jä'ä ko kopkpëky koos jam nwë'ëmëty ma ja ënä'ämpën mëti'ipë ja Wintsën të twin'ixyën ets mëti'ipë ja naax kajpn tyukjotkëtäkpyën.

¹⁹Ets näjyëtu'un ënät pën ëjts yë'ëjës nmëtuumpy ja wintsëntëjk, yë'ëjës nmëtunäämpy ja mëj ënä'ämpë ja myaank. Paaty yam mijts n'ënëëmë ko nmëtuna'any jëtu'un tääjës ja mteety ojts nmëtunyën.

²⁰Ok ja Absalón tyajtëëy ja Ahitófel: ¿Wi'ix miitsëty m'ëna'antë tii mëpaat ntu'unëm?

²¹Ets ja Ahitófel t'ëtsooy ja Absalón: Mëëtko'knë yë to'oxytyëjkëty mëti'ipë yë mteety ijty myëët'ajtypyën, jampë të tyajwë'ëmyën tëjk këwent'ajtpë ma ja kutujkëntëjkën. Jëtu'unts ja ja'ay tnijawëtëty ko mijts tëë yajxon xymyëtsiptsoony yë mteety, jëtu'un'äämpy ja ja'ayëty ni'ikyë mmëjwa'kpätëtëty mëti'ipë mpukajpxëyëpën.

²²Ënät ojts tu'uk yë tëjk tnikämtë jap tëjkkëjxy mëti'ipë tyukni'oytyu'unëtyën yë Absalón ets jap tmëëtko'knëty ja to'oxytyëjktëjk mëti'ipë ja tyeety të tmëët'atyën ets ni'ëmukë ja ja'ay t'ixtëty;

²³jä'ä xëëw, ko ijty yë ja'ay tii tyajtëwtë ja Ahitófel, jëtu'un ijty nyäxy tä pën tii yë Tios tyajtëyën; jä'ä ko yë Ahitófel mëj'äämpy yë ja'ay jyëkyepyë, paaty yë David mëj'äämpy muum nyäxy ets Absalón mëët yë'ëkyëjxm ko ja Ahitófel jyamëty.