Read Biblia Mixe de Quetzaltepec 2 Samuel 17 Bible Online

2 Samuel 17 - Biblia Mixe de Quetzaltepec bible

2 Samuel 17

¹Ok t'ënëmaay yë Ahitófel yë Absalón: Mooykyës nimajkmäjtsk mil yë tsiptuunpë ets ya'atë ux nëjkx n'ixta'atës yë David.

²Jääjës mëtëy ntukja'ta'any ma ënäty yajxon të y'ënu'kxën ets ma ka'ap tii tuna'anyën; yajxonës n'ëk'ëtsë'ëkëtëty mëët ja ja'ayëty mëti'ipë jam mëët yajpaatyën ets kyäkta'atëty. Yi'iyës nyaj'ookankojpy yë ënä'ämpë ets ka'ap wiinkpë,

³täätsës n'ënëëmëja'any yë mayjyä'äy wä'än min mëët mijts tkajpx'oyëtë ja tsip, jëtu'un tä yë ja'ay mëti'ipë naanpëkëtyën tkajpx'oyëtën yë jyotmay. Jä'ä ko mëti'ipë mijts mtsojkpyën yë'ë ets y'ookëty tu'uk je'eyë ja'ay ets nitëkokyë wä'än akujk jotkujk tjuuky'atë.

⁴Ya'atë winma'any oy ojts tmëtoy ja Absalón ets näjyëtu'un ja mëjja'aytyëjkëty.

⁵E ja Absalón ojts tmëkäjpxy ja Husai mëti'ipë arquitë ja'ayën ets tnikajpxëty wi'ix yë'ë y'ënaanpë.

⁶Ko ja Husai jam jyä'äjty ma ja Absalonkën, ënät ja Absalón y'ënëmaayë: Yë Ahitófel ya'atë winma'any të tyäky, ¿wi'ix mijts m'ënaanpë, oy ntu'unmëty ëkë oy ka'apë?

⁷Tä ja Husai y'ëtsooy: Tyam, tääpë winma'any mëti'ipë yë Ahitófel të tjayäkyën ka'ap myëtëyëty.

⁸Mijts wa'ats xynyijawë ko yë mteety ets jyä'äy jotmëk yë'ëjëty; tyam yajxon jam jyottoyëtë tä tu'uk yë uk'iinpën ko muum yë myëku'uk t'a'ijxnaxy. Ets näjyëtu'un yë mteety wa'ats yë tyäty nyijawë wi'ix yë tsip tyunyën, tyam m'a'ijxëp xyij jam myaanaxyë ma ja myëku'uktëjkënë.

⁹Yu'utsy ja jam muum y'ity aankjoty ëkë muum tsaajoty. Pën mëpaat tyam y'ëkmëmayëty, ka'ap xywyinjawëty oy ko xymyëtoowpaatëty tëë kanaak ja mja'ay nya'o'knë ets ko ka'ap të myëta'aktë.

¹⁰Yë'ëpaat yë ja'ay mëti'ipë näjya'awëyëpën jotmëk, jëtu'unpë myëkëtyën tä tu'uk yë kaa jëyujkën; nëjkxëp ja wyinmaaytyëkatsy, jä'ä ko yë ja'ayëty nyija'awëtyëp ko yë mteety tsip'ixy ets aakjëtu'un yë tsyiptuunpëtëjk.

¹¹E mijts mëti'ipë ntukwinjawëjäämpyën, mëti'ipë jeexyë mëpaat xytyunyën, nikë yajmujkta'a tëkokyë yë ja'ay mëti'ipë jam tsënaaytyëpën Dan ets jampaat Beerseba, ko yë'ëjëty nyämyukëtëty yajxon ënäty nimay nyäpyatënëtë jëtu'un tä yë nëë ajinën ets mijts kë'ëm ya'atë tsip mtimwyinwowëp.

¹²Jëtu'unts ja mteety ajotkumonë ntukja'ajtmëty oy ënäty myaajëty muum yajpaaty. Jëtu'un nëjkx ntukja'ajtëm tä myaanikyën; nitu'uk pën kyawë'ëmëty juuky, ni yë mteety ets tsyiptuunpëtëjk.

¹³Oy muum kajpnjoty jyanäyu'utsëtëty, tëkokyë yë Israel ja'ayëty nëjkxëp tmënëjkxta'atë tejpxy ets kepy, tsaajëty ets njijtä'ämyëty ja naax kajpn ma ënäty të nyäyu'utsyën, wa'ats nëjkx jap muum n'ijxta'ayëmë winë, nitu'uk ja kepy tsaa kyawë'ëmëty.

¹⁴Absalón ets tëkokyë yë Israel ja'ayëty ojts tkajpxmuktë ko oy ni'ik tmëtoowtë ijxtëm ja Husai myäy tyäjyën ets ijxtëm të tuknipëjktaakën këtiinëm jyëtu'unëty ja Ahitófel. Ja Wintsën ënäty jëtu'un të tnipëjktaakë ets tjo'opanë ja Ahitófel ja wyinma'any mëti'ipë jeexyë tuunpën, mëët ko ënäty jä'ä t'ëyo'onmo'oja'any ja Absalón.

¹⁵Ënät ja Husai ënätyë tuk'ëwa'anëy ja teety Sadoc ets ja teety Abiatar mëti'ipë ja Ahitófel të tukmëwë'ëmyën ja Absalón, ets näjyëtu'un ja mëjja'aytyëjkëty Israel ja'ayëty ets näjyëtu'un ja David ja myëjja'aytyëjkëty.

¹⁶Ets yajtuk'ëwaanëty ja David ënätyë këtiipë jam tsyuunaxëty të'ëts'itjotm ma jyoyëtyën nikë wä'än tninaxy ja Jordán nëë jamtsow awinm këtiipë ja ja'ay yaj'ookëtëty mëët ja tsyiptuunpëtëjk.

¹⁷E jä'ä ko yë Jonatán ets Ahimaas tam ënäty yajpaatë ma En-roguel kajpnën, ka'ap tjëkyepy pyëtsëmëty këtiipë ja ja'ay y'ixëtëty, ënät tu'uk ja to'oxytyëjk mëtuunpë nyimiinëtë mëti'ipë tuk'ëwa'anutyääyëtën winë, tääts ënätyë tsyo'ontë ets tukmëmëtyaktë ja David.

¹⁸E ojts tu'uk yë pi'k ëna'k y'ixëtë mëti'ipë tyuk'ëwa'anëyën ja Absalón. Ënät ja Jonatán ets Ahimaas tyëjkëtyë pe'tym ye'epyë ets jyajtë ma Bahurim ja myëtëjkën, jam tu'uk ënäty yë jut tëjk'ëkë'ëm jap poj'am tyëjkëtyë.

¹⁹Tä ja Bahurim ja tyo'oxytyëjk tku'ëkëëy ja jut, jam t'o'oxtëëy yë triikë pu'uxm ets ka'ap yaj'ixy tii jap.

²⁰E ko ja Absalón ja jyä'äy jyajtë, ënät tyajtëëwtë ja to'oxytyëjk: ¿Ka'ap të xy'ixyë ma ja Jonatán ets ja Ahimaasë? Yaa të nyaxtë, jëtu'untsow të nyëjkxtë tu'knëë'aaw, jëtu'un y'ëtsoowëtë ja to'oxytyëjk. Tää ja Absalón ja jyä'äy ojts nyëjkxtë matsow ënäty të yajtuk'ëwaanëtën, e kajts tpatë tää ojts tyimwinpijnëtë jatëkok jam Jerusalén.

²¹E yë Ahimaas ets Jonatán je'eyë t'ijxtë ko tëë nyëjkxtë ja Absalón ja jyä'äy ënät jap pyëtsëëmtë jutjoty ets pëyi'ikyë ojts nyëjkxtë tuk'ëwaanëtë ja David mëti'ipë ënäty të tnijawë'atën; tä t'ënëmaaytyë ja David ets poj'am pyëtë'ëkëty wä'än tninaxy yë Jordán nëë ets jamtsow awinm nyëjkxëty jä'ä ko yë Ahitófel tëë ënäty tkajpxtë'ëy ko tukjata'antë ja David.

²²Ënät ja David mëët ni'amukë ja jyä'äy, tsyiptuunpëtëjk pyëtë'ktaaytyë ets ninajxtë ja Jordán nëë. Ko xyiinyëy komjëpom tëë ënäty tuknajxta'atë ja Jordán nëë.

²³Ko ja Ahitófel t'ijxy ko ja wyinma'any ka'ap të tyuny, tää tniwë'ëny tnijujky ja jyëyujk ets ojts nyëjkxnë ma tyëjkën, jam ma ja nyaax kyajpnën ma ënäty të myinyën naaxwiiny. Ko tyajwintu'upëjktaay ja jyotmay jampë ma jyëën tyëjkën, tä nyäyaj'o'kë. Jëtu'un y'oky ets jam nyaaxtëjkëy ma ja tyeety nyaaxtëjkëyën.

²⁴Tää ojts David jam jyä'ty Mahanaim ma Absalón jam näjyëtu'un tuknajxpën yë Jordán nëë mëët yë tsyiptuunpëja'aytyëjk Israel ja'ayëty.

²⁵Absalón yë'ë ënäty të tuknipëky yë Amasá ets yë'ë tniwintsën'atëty ja tsiptuunpë ja'ay. Jëtu'un tä jeexyë yë Joab yë'ë tyunyën. Amasá jä'ä ijty tyeety xyëëwajtyp Itra, Ismael ja'ay. Yë Itra ojts tmëëtsëënë yë Abigail, Nahas yë nyëëx yë'ë myëkä'äx yë Sarvia, Joab yë tyaak.

²⁶Absalón mëët ja Israel ja'ayëty ja tsyiptuunpëja'aytyëjk jam ojts nyäpyëjkta'akëtë Galaad y'itjotm.

²⁷Ko yë David jam jyä'äjty Mahanaim, kanaak ja'ay myiintë mëti'ipë jëjpye'eytsyoowëtën ets y'ëxajëtë; miin yë Sobi, Nahas yë myaank mëti'ipë jam tso'onpën Rabá ma Amón y'itjotmën; miin näjyëtu'un yë Maquir, myaank yë Amiel, jampë kyukajpnëty Lodebar ets miin yë Barzilai mëti'ipë kukajpn'ajtpë jam Roguelim, Galaad y'itjotm.

²⁸Ya'atë ja'ayëty mëti'ipë nyimiintën yë David ojts tmëmintë maapäjn, apëjk atu'unën mëti'ipë pujxnën ets mëti'ipë naaxën; myëmiintë yë tsajpmok, cebadë, tsajpmokway; mëjxëjk, mutskxëjk, ujtspajk të'ëts ets lentejas.

²⁹Ojts näjyëtu'un tmëmintë uuxpa'ak, quesë mëti'ipë yajpëtsëmtëpën ma tsajpkaajën ets ma kupixynyën ets ja David kyäytyëty y'uuktëty mëët ja mayjyä'äy mëti'ipë të pyaminyën; jä'ä ko yë'ë pyanajtsja'awëtyëp ko këjää të ye'eytyë jam të'ëts'itjotm ets ko mëk'ënu'kxë tyuktëkë ets yuu tëëtsë.