Read Biblia Mixe de Quetzaltepec 2 Samuel 2 Bible Online

2 Samuel 2 - Biblia Mixe de Quetzaltepec bible

2 Samuel 2

¹Ko jëtu'un y'ëktuun y'ëkjajtë, yë David ka'ap ojts jëtu'unyë wyi'imy, ojts ja Wintsën tyajtëy, t'ënëmaay: ¿Wi'ix m'ëwatsyp etsës muum nëjkxëty kajpntumë? Tä ja Wintsën y'ëtsoowë: Ëjts n'ëwatsypës ets muum kajpntum mnëjkxëty. Tä ja David jatëkok tyajtëëy: ¿E maakajpn xy'ëwa'atsy nëjkxëtyës? Tä ja Wintsën y'ëtsooy: Jam mnëjkxëty Hebrón.

²Jam ojts ja David nyijkxy mëët nimäjtsk ja tyo'oxytyëjk; ja Ahinóam jampë kyukajpnëtyën Jezreel ets ja Abigail, mëti'ipë ja Nabal nyi'o'ktutën ja Carmel ja'ay.

³Wa'ats tpawoowtaay ja myëku'uktëjk, ja y'u'unk y'ëna'k y'u'unk tyo'oxytyëjk ets jam tsyënaaytyaknpëjktë Hebrón.

⁴Jamts ojts jya'të ja Judá ja'ay ets nikajpxpäjtë ja David ets yë'ë y'ënä'ämëty. Ojts tukmëmëtya'aktë ja David ko ja ja'ayëty mëti'ipë jam tsënaaytyëpën Jabés jam Galaad naaxjotm, yë'ë ojts tyajnaaxtëkëtë ja Saúl ja nyini'kx.

⁵Paaty ja David ojts tu'uk ja ayuk tkexy ma tääpë ja'ayëtyën ets t'ënëmaay: Yë Wintsën yë'ë mkënu'kxëtëp mëët ko ja oyjyot oywyinma'any të xyajkëxë'ëktë, ko xyajnaaxtëjkëtyë ja Saúl ja nyini'kx mëti'ipë tu'uwinwoowën.

⁶Yë Wintsën yë'ë oy tsuj myaj'itëtëp ets mpa'ëyow mnajts'ëyowëtëty. E ëjts tyamës kë'ëm nikäjpxy ko miitsëty oy njawëja'antë mëët ja mëti'ipë të xytyuunta'aktën, ko ja oyjyot oywyinma'any të xypyaatë.

⁷E këtiits mmontë mtuktë, ni'ikyë jotmëkta'aktë, jä'ä ko oy n'ëna'anmëty ja Saúl të y'ooky mëti'ipë të tyu'uwinwoyën, yë Judá jyä'äy tëëjës xynyikajpxpätë etsës ëjts n'ënä'ämëty.

⁸E yë Abner, yë'ë myaank yë Ner, mëti'ipë ënäty nyikopk'ajtypyën ja tsiptuunpëtëjk ja Saúl ja jyä'äy, ojts twoowtsoony ja Is-boset, yë Saúl yë myaank ets ojts twoownëjkxy ma tu'uk ja it txëëwatyën Mahanaim,

⁹jamts ojts tkënu'kxy ets yë'ë y'ënä'ämëty yajkutukëty jam Galaad, jam Guesurí, mëti'ipë Jezreel nyitënääpyën, ma näjyëtu'un tnitänën yë Efraín, yë Benjamín ets ma tëkokyë yë Israel tnitänën.

¹⁰Ko ja Is-boset jam yajkutujktso'ony ma ja Israel kajpnën jä'ä ënäty yë jyëmëjt wëxtyikxy, mäjtsk jëmëjt je'eyë tyuuny. E ma ja Judá ja jyä'äyëtyën yë'ë ënäty jam ënä'ämp ja David,

¹¹jä'ä jam tyuuny wëxtujk jëmëjt ets ja tëtujk po'o, jam tmëët'ajty ja kyutujktakn jam Hebrón.

¹²Ënät yë Abner tsyo'ony jam Mahanaim ets ojts nyijkxy jam Gabaón mëët nitëkokyë ja tsyiptuunpëtëjk mëti'ipë myëtuuntëpën ja Is-boset.

¹³E näjyëtu'un ja Joab, yë Sarvia myaank, tsyo'ony mëët ja tsyiptuunpëtëjk mëti'ipë myëtuuntëpën ja David; jam Hebrón tsyo'ontë ets ojts nyëjkxtë jam Gabaón, jam nyäpyëjktakëtë ma tu'uk yë nëëwookyën. Ënät ja tsiptuunpëtëjkëty poj'am nyänyi''ijxëtyë ets tsyiptuna'antë; tu'kpëky ojts wyi'imy awinmtsow ets tu'kpëky miin'aay.

¹⁴Tä ja Abner t'ënëmaay ja Joab. Wä'än aak ëna'ktëjk tsiptuntë, tä ja Joab y'ëtsooy, oy'atëp.

¹⁵Ënät nimajkmäjtsk nyajxtë jam jëjp'am, mëti'ipë kyutënaaytyëpën ja Benjamín ja jyä'äy ets ja Is-boset ets nyajxtë näjyëtu'un nimajkmäjtsk mëti'ipë kyutënaaytyëpën ja David ja jyä'äy.

¹⁶Tääts nyänyimajtsëtë, aakjam nyämyajtsëtë kyuwaaykyijxy, xim yam ojts y'ëkëty nyämyoxmëkumëtë ets nyäyaj'o'këtë. Paatykyëjxm ja tampë ja Gabaón nyaaxjotm txëëwmooytyë Helkat-hasurim.

¹⁷Ja tsip mëti'ipë jä'ä xëëw tso'ontakën, ojts ja yoonë wyo'tsnë ets y'amëktaknë, ja Abner ojts kyäkta'atë mëët ja tsyiptuunpëtëjk, ka'ap myëtaktë.

¹⁸Jamts ënäty yajpaatë ja Sarvia ja y'ëna'k, mëti'ipë xyëëwajtëpën Joab, Abisai ets ja Asael. Yë Asael wiinkëm ijty pyëyi'iky, jëtu'un tä tu'uk yë jëtyu'ujën.

¹⁹Ënät amëjaaw tpatso'ony ja Abner, jëtu'un ojts timpyanëjkxy, kamaa tkayajtu'utëkooy,

²⁰ko ja Abner y'ijxwinpijty, tä mëk yujk'ënany: Mijtstëm jëtu'un Asael. Ëjts, pën xyjyëjp'ixy, jëtu'un y'ëtsooy ja Asael.

²¹Ënät ja Abner y'ënäny: Këtiijës nëkoo xypyapo'oy, tyam mëët ja oy'aaw oy'ayuk n'ënëëmë, nikë yë'ë tu'uk mëwë'ëm yë ntuunpës, mijts mnija'ap pën mpëjkëtyääpy tëkokyë mëti'ipë myëët'ajtypyën. E ja Asael ka'ap jyä'äkyujkëy, ni'ikyë tpapooy'ëti'itsy.

²²Ja Abner ojts jatëkok jya'ëna'any: Këtiijës nëkoo xypyapo'oy, ëjts nän jot anpëkëpës ënät yam pën këtii mja'akyukë ets natëkë nëkoo nyaj'ook nyajtëkoyëty, e ko jëtu'un jyatëty kyëpätëty tii ayukës ënät nmo'ojëp ja m'ajty Joab.

²³Yë Asael oy jëtu'un jyayaj'ënëmaay, yë'ë niwi'ixtsow tka'ëxmajtsy ja Abner, ënät tu'uk ja pujxnku'umën tyukmoxmëku'umëyë, ojts tyukjë'pnaxyë ets jämyë kyëtääy; ja ja'ayëty mëti'ipë jam najxtëpën je'eyë tjantynyaxku'ixëtë.

²⁴E ja Joab ets ja Abisai, ojts timpyanëjkxtë ja Abner, tam ënäty ja xëëw tyimkëta'akanë ko jam jyajtë Amá, winkon mëët ja itjot mëti'ipë xyëëwajtypyën Guíah, ma ja tu'u nyäxyën mëti'ipë nëjkxpën Gabaón, ma ja të'ëts itjotmën.

²⁵Ma tääpë itën jam mëët ja Benjamín ja jyä'äy nyäpyatëtë ja Abner ets tu'ukyë nyäpyëjktakëtë jam tunkëjxm.

²⁶Ënät ja Abner ojts tmëkäjpxy ja Joab: Joab ¿këtii jëtäätën ënät tyaapë tsip nyaxëtyë? ¿Ti këtiijëtën xytyim'ixy ninu'un ko tyaapë je'eyë ënäty nëkoo tu'knax näyajmo'on näyajtujkëmëtyë? ¿Wi'ix ko xykya'ënëëmë yë mja'ay wä'än yë jyiiky myëku'uk t'ëxmatstë, këtii nëkoo t'ëkpapooy t'ëkpapujnëtë?

²⁷Tä ja Joab y'ëtsooy: Jëëky mëku'uk, tyamës ntukajpxpety yë Wintsën yë xyëëw, kooxyëp jeexyë mijts wi'ix mka'ëna'any, katii nija'awën tiijaty jeexyë yë nja'ayës tyuuntëkoopy, yë'ë tëë ënäty tpatso'onëtë myëku'uk koonëm jeexyë xyiiynyë.

²⁸Tä ja Joab ënätyë ni'ënä'ämëy ets ja ja'ayëty ja tsajpkaawaj tukxu'uxtëty, jä'ä myëtowtëp këtiipë ja myëku'uk t'ëkpapooynyëtëty ets ja tsip jëtu'unyë xyäämëty.

²⁹Ja Abner mëët ja jyä'äy ojts jam tsyo'onëtë ets nyëjkxnëtë jamtsow joyjyotm ma txëëwatyën Arabá, tu'ktsu'um ojts ye'eytyë, jam nyajxtë ma Jordán itjotmën ets Bitrón ets jyajtë Mahanaim.

³⁰Ja Joab ojts t'ëxmatsy ja Abner, ka'ap ojts t'ëkpapooynyë, ënät ojts tmëtyowtë ja myëku'uktëjk, ënät t'ijxpatë ko ja David ja tsyiptuumpë ja'ay jä'ä ënäty të y'ooktë nimajkmokx majktaxk, ëpëky ja Asael.

³¹E yë David yë tsyiptuunpë jä'ä ojts tyaj'o'ktëpë ja Benjamín ja tsyiptuunpëja'ay ets ja Abner, tëkëëk mëko'px ja tëkë'px.

³²Ja Asael ja nyini'kx jam ojts yajmënëjkxy Belén ets jam ojts nyaaxtëkë, jam mëtëy ma ja tyeety näjyëtu'un nyaaxtëjkëyën. Ja Joab mëët ja jyä'äy tu'ktsu'um ojts ye'eytyë, ko xyiinytyäky tëë ënäty jam jya'të Hebrón.