Read Biblia Mixe de Quetzaltepec 2 Samuel 23 Bible Online

2 Samuel 23 - Biblia Mixe de Quetzaltepec bible

2 Samuel 23

¹Ya'atë ja aaw ayuk ojts tjaakäjpxy ja David: Yë David, myaank yë Jesé, tu'uk ja ye'etyëjk mëti'ipë ojts ja Wintsën mëj yajnaxyën, mëti'ipë ja Wintsën kë'ëm timwin'ijxën ets yajkutukëty; mëti'ipë oyëty ja ëy myä'kxën, ets oyëty ja aaw ayuk ojts tkäjpxy:

²Yë Wintsën yë myëk'ajtën y'oyajtën jëtu'un y'ënä'äny maas ëjtsën; yë'ë kë'ëm ja aaw ayuk të tpëjktä'äky maas ëjts ja nyä'änën.

³Yë Wintsën, mëti'ipë yë Israel ja'ayëty y'ëwtajtëpën; mëti'ipë kyuwäämpy nyixäjpyën ja Israel kajpn, jëtu'unës të xy'ënëëmë: Mëti'ipë tyu'uwinye'epyën ja ja'ayëty mëët ja tëyajtën, mëti'ipë winë tyuunpyën mëët ja Wintsën ja wyinkutsë'kën,

⁴jëtu'un ja tyi'kxy jyäjy tä xëëw jyäjyën, jëtu'un tä janty'oy y'aantä'äkyën ko winwa'ats ja tsajp kyuxëënyë, mëti'ipë yajyoompy yaji'tsypyën ja aay ujts ko tyuukëtä'äky.

⁵Paatykyëjxmës ja n'u'unk n'okës amëk jotmëk yajpaatë ets akujk jotkujk yajpaatë ma Wintsënën, yë'ë ojts mëët tuny tu'uk ja ëëwtu'un käjpxytyu'unën mëët ëjts xëmëkyëjxm, tuknima'kxë yajxon y'ijty, kopkpëky ets oytyuny. Yë'ë xëmë të xyajmëtä'äkyës ets jëtu'un winë tyajtuny tyajjatyë tääjës ntimy tsyokyën.

⁶E yë'ë tëy yë ëxëëkja'aytyëjk, jëtu'un nëjkx jyatë tä ja'ay äpny t'ixpëkyën, ka'ap myëëtëty yë kë'ë yajmatsy.

⁷Jëtu'un tä yë äpnyën yë'ë mëët yajmatsy yë pujxn ëkë kepy, ko yajjëënkupëky ets jap tyooytya'akëty.

⁸Yaa jëtu'un ja xyëëw myintë këxja'ay mëti'ipë ja David tsyiptuunpëajtën, jotmëkëtypë: Mëjëyëjp yë'ë kuja'ay miimp yë xyëëw yë Is-boset, Amón ja'ay, mëti'ipë ojts ni'ik këjxm nyijkxyën ma ja nitëkëëkpë ja tsiptuunpën jotmëkëtypë; jä'ä tëkok yë ja'ay tyaj'o'ky mëët yë kyu'umën nituktujk mëko'px.

⁹Ok pyaminyë yë Eleazar, yë myaank yë Dodó, ahohitë ja'ay, nän yë'ë mëët ja nitëkëëkpë jotmëkjatyëtypë yajmëtyoy. Yë'ë ojts mëët yë David tu'ukyë yajpaaty ko ja tsip y'ijty jam Pasdamim mëët ja filistejë ja'ayëty, ma ja Israel ja'ayëty ojts kyä'äktën.

¹⁰E yë'ë tu'ukyë ojts ja wyinma'any tpëjktä'äky, yajxon may ja filistejë ja'ay tyaj'o'ky jä'ä xëëw, koonëm ja kyë'ë ojts jëtu'unyë jyu'unë jam yenypyujxnkëjxm. Yë Wintsën yë'ë ojts yajmëta'akëtë jä'ä xëëw. Ko jëtu'un t'ijxtë yë Israel ja'ayëty ënät tëkokyë tpuwa'këtyääytyë ja Eleazar ets tpëjkmujktaaytyë winë mëti'ipë ënäty ja myëtsipëty jëtu'unyë të tnipëyë'ktu'utën.

¹¹Ok pyaminyë ja Samá, yë'ë myaank yë Agué, Ará ja'ay. Ko ja filistejë ja'ayëty jam tëkok nyäpyëjktakëtë Lehi, ma tu'uk ja xëjk kam ënäty jamën, ja Israel ja'ayëty ënätyë kyäktaaytyë.

¹²E ja Samá tu'ukyë jam wya'ak'o'oyëy xëjk kamjotm ets tkuwany ja nyaax kyajpn, ojts yë'ë myëtä'äky, yajkäktaay ja filistejë ja'ayëty. Jëtu'un ja Wintsën ojts myëtä'äky jä'ä xëëw.

¹³Tëkok, ma ënäty ja pëjktä'äky yajtuunk'atyën, ojts nitëkëëk tsyoontë ja jotmëkja'aytyëjk ma ja ni''i'px majkpën ets jam mëët nyäpyatëtë ja David ma tu'uk yë aankën jam Adulam, ja filistejë ja'ayëty jam ënäty yajpaatë Refaim.

¹⁴David tam ënäty yajpaaty ma tu'uk ja kajpnën ta'tspëkpyë, ko ja filistejë ja'ayëty nyäpyëjktakëtë jam Belén.

¹⁵Ënät ja David y'ënäny: jääpëk jeexyë pën yë nëë t'ëkninëjkxy jam ma Belén kajpn yajnitëkën etsës jeexyë yë'ë n'uuky.

¹⁶Ënät ojts nyëjkxtë nitëkëëk ja jotmëkja'aytyëjkëty jam ma ënäty kyëwent'atën ja filistejë ja'ayëty, tääts ja nëë tyajpëtsëëmtë ma tu'uk nëëjutën, winkon ma yajnitëkën ja Belén kajpn, tääts ja David ojts tukninëjkxtë. Je'eyëp ko yë'ë ka'ap ojts t'uuky, je'eyë tpijky ets tukwintsë'këy ja Wintsën,

¹⁷jëtu'un y'ënäny: Tiosës xypyutëkëp etsës ka'ap ya'atë nëë n'uukëty, jä'ä koos n'uukëty jëtu'un ënäty tpaaty tääjës jeexyë nye'pny n'ukën ja ja'ayëty mëti'ipë ojts të tyajtsoontën. Jëtu'un ka'ap t'uky. Ya'atë jëtu'unpë ja mëkwinma'any yë'ë ojts tuntë ja nitëkëëkpë ja ja'ayëty mëti'ipë jotmëkëtyën.

¹⁸E yë Abisai, Joab yë y'uty, yë Sarvia myaank, yë'ë ojts tnikopk'aty ja ni i'px majkpë ja jotmëkja'aytyëjk. Tëkok ojts tyaj'ooky tëkëëk mëko'px ja myëtsip mëët ja kyu'umën. Jëtu'un ojts näjyëtu'un mëj'äämpy nyäxy ma ja ni i'px majkpë jotmëkja'aytyëjkëtyën,

¹⁹jaakni'ik mëj'äämpy ojts nyäxy këtiinëm jyëtu'unëty ja myëku'uktëjk, paatykyëjxm ojts yë'ë tnikopk'aty. Je'eyëp ko ka'ap ojts tmëpaaty ja nitëkëëkpë.

²⁰Benaías, yë myaank yë Joiadá, jampë kyukajpnëtyën Cabseel, nän jotkmëk ja'ay ojts y'ity; ojts kanaak'ok tyajwinkëxë'ëky ja jyotmëk'ajtën. Yë'ë ojts tyaj'ooky nimäjtsk ja myaank ja Ariel, jampë kyukajpn'atën Moab. Tëkok, ojts tyaj'ooky tu'uk yë kaa jap jutjoty, mëk ënäty yajxon wyintuky.

²¹Ojts näjyëtu'un tu'uk yë Egiptë ja'ay tyaj'ooky; tääpë Egiptë ja'ay yajxon ënäty kyëjxmëty ets amaj kë'ëmaj, tam tu'uk ja kyu'umën nmëëtëty, Benaías kepy ojts mëët tnipëtë'ëky ja Egiptë ja'ay jëtu'unyë tukë'ënäjptuty ets kyë'ëmku'umën tyukyaj'o'k.

²²Ya'atë, mëti'ipë yë Benaías tyuunën, yë Joiadá myaank, yë'ë ojts mëj'äämpy yajnaxyë, paaty ojts näjyëtu'un yajmëtyoy ma ja ni i'px majkpë ja jotmëkja'aytyëjkën;

²³jaakkëjxm ojts yajpëjktä'äky, këtiinëm jyëtu'un'atë ja myëku'uktëjkëty, je'eyëp tëy ko ka'ap ja nitëkëëkpë tmëpaty. Paatykyëjxm ojts yë David yë'ë pyëjktä'äkyë ets tniwintsën'atëty ja tsiptuunpëtëjkëty mëti'ipë ja David kyëwent'ajtëpën.

²⁴Ma ja ni i'px majkpën ja jotmëkja'aytyëjkëty, tam ënäty näjyëtu'un ja mëti'ipë xyëëwajtëpën: Asael, yë myëkä'äx yë Joab; Elhanán, myaank yë Dodó, jampë kyukajpnëtyën Belén;

²⁵Samá, jampë tsyoonyën Harod; Elicá, jampë näjyëtu'un tsyoonyën Harod,

²⁶Heles, mëti'ipë yajtijpën paltita; Irá, yë myaank yë Iqués, jampë kyukajpnëtyën Tecoa;

²⁷Abiézer, jampë kyukajpnëtyën Anatot; Sibecai, jampë kyukajpnëtyën Husah;

²⁸Salmón, ja ahohitë ja'ay; Maharai, jampë kyukajpnëtyën Netofá;

²⁹Heled, yë myaank yë Baaná, nän jam tsyoony Netofá; Itai, yë myaank yë Ribai, jampë tsyoonyën Guibeá, jampë yajpatyën Benjamín nyaaxjotm;

³⁰Benaías, jampë tsyoonyën Piratón; Hidai, mëti'ipë jam tso'onpën ma wokjot txëëwatyën Gaas;

³¹Abi-albón, ja Arbad ja'ay; Azmávet, jampë tsyoonyën Bahurim;

³²Eliahbá, saalponitë ja'ay, ja y'u'unk y'ëna'këty ja Jasén; Jonatán;

³³Samá, ja Ará ja'ay; Ahiam, yë myaank yë Sarar, Ará ja'ay näjyëtu'un;

³⁴Elifélet, yë myaank yë Ahasbai ets myaank yë Maacá; Eliam, yë myaank yë Ahitófel, jampë tsyoonyën Guiló;

³⁵Hesrai, jampë kyukajpnëtyën Carmel; Paarai, ja Arbad ja'ay;

³⁶Igal, yë myaank yë Natán, jampë kyukajpnëtyën Sobá; Paní, jampë kyukajpnëtyën Gad;

³⁷Sélec, jampë tsyoonyën Amón; Naharai, jampë kyukajpnëtyën Beerot, mëti'ipë ijty yë Joab pyutu'unëp'ajtypyën, yë myaank yë Sarvia;

³⁸Irá, jampë kyukajpnëtyën Jatir; Gareb, mëti'ipë jam tso'onpën Jatir;

³⁹ets ja Urías, ja Hit ja'ay. Jä'ä nyiwinë'ajtë ni''ipxmajkmokx mäjtsk.