Read Biblia Mixe de Quetzaltepec 2 Samuel 8 Bible Online

2 Samuel 8 - Biblia Mixe de Quetzaltepec bible

2 Samuel 8

¹Ko jëtu'un nyäjxy, ënät ojts ja David tsyiptun mëët ja filistejë ja'ayëty, ka'ap tyajmëtäky; ni'ikyënëm ojts tpëjkë ja kyutujkën ets ja filistejë ja'ayëty tmëtuuntë ja Israel ja'ayëty.

²Ojts näjyëtu'un tyajkutëkoy ja Moab ja'ayëty: Ka'ap tyaj'oky ni'ëmukë, je'eyë ojts tkijpxy mëët tu'uk yë tejpxy; mëti'ipë wyinnajxypyën ja tejpxy jä'ä yaj'o'k e mëti'ipë naje'eyë patëpën ja tejpxy jä'ä juuky yajwë'ëm. Jëtu'un'äämpy ja Moab ja'ayëty ja David ka'ap yajmëta'akëtë ets ojts tyuk ënä'ämëtë nyäkyukëpätëtëty.

³David ka'ap ojts tyajmëtä'äky näjyëtu'un ja Hadad-ézer, yë myaank yë Rehob, jampë y'ëne'emyën Sobá, mëti'ipë ënäty jatëkok jyä'äpëkäämpyën ja itjot jam Éufrates.

⁴David, jä'ä ojts jam tmatsy ja tsiptuunpëtëjk niwëxtujk mëko'px, mëti'ipë kwaay tyuk'u'unyääytyëpën ets i'px mil mëti'ipë jëtu'unyë teky'am jëtijtëpën; ëpëky tekytsyujktaay ja këwaaw këtiipë pyëyë'ëktëty mëti'ipë ja pujxnwintëkäämpë jyëtujtëpën; yi'iyë ojts tyajwë'ëmy nitu'kmëko'px ja kwaay mëti'ipë ja pujxnwintëkäämpë tyukpajëtutantëpën.

⁵Ënät näjyëtu'un myiintë tsiptuunpë ja sirië ja'ayëty mëti'ipë jam tso'ontëpën Damaskë ets tputëkëja'antë ja Hadad-ézer, jampë y'ëne'emyën Sobá; David ka'ap ojts tim yajkopkë tääpë sirië ja'ayëty, jä'ä tyaj'o'ky ni''i'px mäjtsk mil.

⁶Ojts yë David jam tyajwë'ëmy yë tsyiptuunpëtëjk ma ja Damaskë ja y'itjotmën, jëtu'un'äämpy ja sirië ja'ayëty ojts ja David tmëmëtowtë ets ojts yajtuknipëktë nyäkyuyakëtëty. Tä yaj'ixy ko ja Wintsën pyutëjkëp ja David oy maa tyimnëjkxy.

⁷Ja David ojts tjä'ä'ajta'ay ja mëti'ipë ënäty ja Hadad-ézer myëtsiptuuntëpën, tä ja akëëytyukën aak pu'ts pujxnpë ets tmënëjkxtaay jam Jerusalén.

⁸Ojts näjyëtu'un kanaakpëky ja pujxn tjä'ä'aty, mëti'ipë jam tso'onpën Bétah ets Berotai, ya'atë kajpn aakyë'ë yë Hadad-ézer ijty jyä'ä'ajtyp.

⁹Ja Toi, mëti'ipë jam ënä'ämpën Hamat, ko tnija'awëy ka'ap ja David të tyajmëtä'äky ja Hadad-ézer,

¹⁰Ënät ja myaank tkejxy jam ma ja David yajpaatyën ets tuknikejxy yë poop pujxn, pu'ts pujxn ets tsuxkpujxn ets tkajpxpo'kxa'any ets tukxoonta'aka'any ko ja David të tyajtëkoy ja Hadad-ézer, jä'ä ko yë Toi xëmë ënäty myëmayëty yë Hadad-ézer.

¹¹Yë David aakyë'ë ojts yë Tios tmooytyä'äy winë, tä yë pu'ts pujxn, poop pujxn, tsuxkpujxnën, mëti'ipë muum yajtso'ontëpën ma ja kajpn tmëmëta'aktën:

¹²ijxtëm ma mëti'ipë yajtso'ontën jam Edom, Moab, Amón, ma ja kyajpnëtyën ja filistejë ja'ayëty ets Amalec ja'ayëty, mëti'ipë ënäty të tpëjkëtën ja Hadad-ézer, yë myaank yë Rehob, jampë y'ëne'emyën Sobá.

¹³David mëj'äämpy nyäjxy ets ko ojts jatëkok wyinpijnëpë ma të tsyiptunyën mëët ja Edom ja'ayëty, jä'ä ojts jam joyjyotm tjaakyaj'ooky, ma txëëwatyën Kaan Joy, nimajkmokxtëkëëk mil.

¹⁴Ojts jam Edom tyajwë'ëmy yë tsyiptuunpëtëjk ets tëkokyë yë Edom ja'ayëty aakyë'ë ojts ja David y'ënä'ämëtë, ja mëti'ipë ënäty xëmë ja Wintsën putëjk pupäjtëpën oy maa tyimnëjkxy.

¹⁵Yë David oy ojts y'ëne'emy ets yajkutuky, jä'ä ko aak mëtëy winë tuuny jam ma Israel kajpnën.

¹⁶Mëti'ipë ojts ja tsiptuunpëtëjk tniwintsën'atyën jä'ä ijty xyëëwajtyp Joab, yë'ë Sarvia myaank ets Josafat; yë myaank yë Ahilut, yë'ë ojts y'ity jääpyë ma ja ënä'ämpën.

¹⁷Yë Sadoc, yë myaank yë Ahitub ets Ahimélec, yë myaank yë Abiatar yë'ë ojts y'itë teety; yë Seraías yë'ë ijty winë kyujääpy

¹⁸E ja Benaías, yë myaank yë Joiadá, yë'ë ijty jam winë y'ijxpy tyuunpy ma ja Queret ja'ayëtyën ets ja peleteëja'ayëtyën mëti'ipë ja David këwent'ajtëpën. Yë David yë y'ëna'k aak teety y'ijtë.