Read Biblia Mixe de Quetzaltepec 2 Samuel 9 Bible Online

2 Samuel 9 - Biblia Mixe de Quetzaltepec bible

2 Samuel 9

¹Tu'kxëëw tu'ktiempë ojts yë David tyajtëy ja ja'ayëty ets y'ënäny: ¿Këtii jëtäätën maa pën y'ëkjuuky'ajnë mëti'ipë yë Saúl myëku'uk'ajtypyën ets jeexyë nkumayës mëët ko ja Jonatán ijty oy mëët näjyawëtyësë?

²E jam ijty tu'uk yë to'oxytyëjk myëtuny, yë'ë Saul yë jyä'äy, Sibá xyëëwajtyp; yë'ë ojts tmëkajpxtë ets twinkuwa'akëty yë David. Ko yë Sibá jam jyä'äjty ma David yajkutukyën, ets yajtëëwë ja yajkutujkpë: ¿Mijts mSibá'ajpë? Ëjts, jëtu'un y'ëtsooy ja Sibá.

³Ënät ja ënä'ämpë yajtëëwë: ¿Ka'ap xynyijawë'aty jam muum pën jyaak yajpaaty yë Saúl yë jyä'äy mëti'ipë jeexyë nmoopyënës tu'uk yë näkyumayë mëët yë Wintsën xyëëwkëjxmë? Tääts ja Sibá y'ëtsooy: Tam tu'uk jyaakjuuky'äty yë Jonatán yë myaank, tekymya'at mäjtskpa'ajëty.

⁴¿Maa ja yajpaaty? Jëtu'un ja ënä'ämpë tyajtëëy. Jam Lodebar, ma tyëjkën yë Maquir, yë myaank yë Amiel, jëtu'un y'ëtsooy yë Sibá.

⁵Ënät ja ënä'ämpë tnikäjxëy ets myinëty;

⁶e ko ja Mefi-bóset jam jyä'äjty ma ja David yajpaatyën, ënät wyintäky nyaaxkooy yë'ë wyintum tyajkëxë'ëky jëtu'un ja näwyinkutsë'ëkë. Mefi-bóset. Jëtu'un ja David mëët ja xoontakën yujk'ënany. Wi'ix Wintsën, jëtu'un y'ëtsooy ja Mefi-bóset.

⁷Tä ja David y'ënäny: Këtii mtsë'ëkëty, ëjts janty'oy nmëku'ukjawë, mëëtkyëjxm ja mteety Jonatán. Ëjts tyamës mijts nmooytya'aja'any ja m'apteety Saúl ja nyaax kyamtëjk ets jam xëmë mkayëty m'uukëty maas yë nkaaypyäjnën.

⁸E ja Mefi-bóset, ojts wyintä'äky nyaaxkoy jëyëjp ets y'ënäny: ¿Ëjts ka'apës nijawë, tii ko jëtu'un yë ënä'ämpë xy'ënëëmës? Yë ënä'ämpë wa'ats tnijawë ko ka'apës nitii xymyäy ets ntunëtyës, jëtu'unës ëjts tä tu'uk yë uk ookyën.

⁹Ja yajkutujkpë ojts ja Sibá jatëkok tmëkäjpxy, mëti'ipë ijty jam mëtuunpën ma ja Saulën ets t'ënëmaay: Tëës nmooytyä'äy jatëkok winë yë y'ok'u'unk yë Saúl mëti'ipë mëtuunën, tëkokyë mëti'ipë yë'ë jyä'äy'ajtën ets näjyëtu'un ja y'u'unk y'ok ja jyä'äjëty.

¹⁰E mijts yam ntuknipëjkyp ets xyajtunëty tääpë naax kam; ja mëti'ipë ënäty jam myajpëtë'kpyën kamwinm tu'uwinm jap xypyëjkë'ëkëty ma tu'uk yë tëjkën ets jëtu'un tmëët'atëty ja jyi'kxy pyiky ja Saúl ja jyä'äy mëti'ipë jää jaakyajpatëpën; oy yë Mefi-bóset jam y'ita'any maas yë ntëjkën ets jam tu'ukyë mëët nkayä'äny n'uuka'anyës maas yë nkaaypyäjnën. E ja Sibá jä'ä ënäty ja y'ëna'k nimajktu'uk ets i'px yë tyuunpë,

¹¹tä y'ëtsooy: Tëkokyë mëti'ipë mijts të xynyi'ënä'ämën Wintsën, tyam jëtu'un yajtunëty. E ja Mefi-bóset jam ojts tyimkay tyim'uuky tu'ukyë mëët ja David ma ja kyääytyaknën, jëtu'un jam y'ijty tä jeexyë yë'ë kë'ëm timy'u'unk'atyën.

¹²Yë Mefi-bóset tam ënäty näjyëtu'un tu'uk yë myaank mutsknëm, jam ojts mëët tu'ukyë y'ity ma ja David ja kyutujktaknën, jä'ä xyëëwajtyp Micaías ets tëkokyë ja ja'ayëty mëti'ipë ojts jam y'itën ma ja Sibá ja tyëjkën aakyë'ë myëtuuntë ja Mefi-bóset.

¹³Ja Mefi-bóset, mëti'ipë mäjtskpa'ajëty tekymya'at, jam tsyënaay Jerusalén, jä'ä ko jam kyääy y'uky xëmë ma David yë tyëjkën, ja yajkutujkpë.