Read Biblia Mixe de Quetzaltepec 1 Reyes 12 Bible Online

1 Reyes 12 - Biblia Mixe de Quetzaltepec bible

1 Reyes 12

¹Yë Roboam jam ojts nyijkxy Siquem, jä'ä ko aakjam ënäty të nyëjkxta'atë ja Israel ja'ayëty ets yë'ë yajnikajpxpäta'any yajkutujkpë.

²E ja Jeroboam, yë myaank yë Nabat, ojts tnijawë, japnëm ënäty yajpaaty Egiptë, ma kyäktsokyën ko ja Salomón jyayaj'ookanë, e jap ënäty të jyuuky'äty jeky.

³Ko ojts yajwoowtsoy, yë Jeroboam ets tëkokyë yë Israel ja'ayëty ojts tninëjkxtë ja Roboam ets mëët myëtyaktë, jëtu'un t'ënëmaaytyë:

⁴Yë mteety mëk ojts tyuny ma ëëtsëtyën; tyam mijts mpatëp ets wäänë xyaj'oyëty ets xyajyu'unkëty ja tuunk mëti'ipë ojts ëëts yë'ë xytyuknipëktën, ënätnëm ëëts jotkujk näjyawëtëty ets myajmëtunëty.

⁵Tä ja Roboam y'ëtsoowëtë: Oy tyam mnëjkxtëty, jää jatëkok mintëty ja tëkëëk xëëw. Tä ojts ja ja'ayëty nyëjkxtë.

⁶Ënät ja yajkutujkpë Roboam, tyajtëëy ja mëjja'aytyëjkëty, mëti'ipë ënäty jeky të tmëtuntën ja Salomón, Roboam ja tyeety ko jyuuky'äjty, jëtu'un t'ënëmaay: ¿Wi'ix miits m'ëna'antë, wi'ixës tääpë ja'ay n'ëtsowtëty?

⁷Tä ja mëjja'aytyëjk y'ëtsoowtë: Pën mijts yë'ë yë naax kajpn oy mëtunäämpy ets oy ja ayuk xymyo'oy, yë'ëjëty oy tsuj näjyëtu'un nëjkx mëtunyë.

⁸E ja Roboam ka'ap ojts tkäjpxymyëmëtoy ja mëjja'aytyëjkëty, jä'ä ojts ja myë''ëna'ktëjk t'amëtoy ja winma'any mëti'ipë ënäty mëët të yeekyën, japë tu'ukyë mëët tyuunmukyën,

⁹jëtu'un tyajtëëy: ¿Wi'ix miits m'ëna'antë, wi'ixës mëpaat n'ëtsoy tääpë ja'ayëty mëti'ipë ënantëpën koos nyajyu'unkëty ja tuunk mëti'ipës ja nteety ojts tyuknipëkëtën?

¹⁰Tääpë ëna'ktëjkëty mëti'ipë ënäty mëët tu'knax të yeekyën, tyaa ja y'ëtsoowtë: Tääpë ja'ayëty mëti'ipë ënantëpën ko xyajyu'unkëty ja tuunk mëti'ipë ja mteety ojts tyuknipëkëtën, tyaa mëpaat xy'ëtsoy: Pën ëjts yë nteetyës mëk ojts ni'ik mtuunkmo'ojëtë, ëjts jaakwäänë mëkës ni'ik miits ntuunkmo'oja'antë;

¹¹pën mëk ojts winë mtuktunëtë, ëjts wäänë mëk yam winë ntuktuna'antë; pën mwojpëtëp ijty mëët yë tejpxy, ëjts yë'ëjës yam miits ntukwoptëp yë po'oxu'tsn mëti'ipë pujxn jyëjp'ajtypyën.

¹²Kom tëkëëk xëëw ojts ja Jeroboam jam nyäwya'këxë'ëkyë mëët ja naax kajpn ma ja Roboamën, jëtu'un tä ënäty ja yajkutujkpë të y'ënë'ëmxëtën.

¹³E ja yajkutujkpë mëk ojts y'ëtsowëtë, ka'ap jyëtu'unëty tä ënäty ja mëjja'aytyëjkëty të jyakäjpxymyo'oyën,

¹⁴jä'ä ojts tkäjpxy ja aaw ayuk mëti'ipë ënäty ja ëna'ktëjk të tnikajpxtën, ko ënäty të y'ënë'ëmxëty: Pën ja tyeety mëk ojts ja tuunk myo'ojëtë, yë'ë jaakwäänë mëk tyaka'any ja tuunk, ëkë pën ojts ja tyeety tyukwopëtë ja tejpxy yë'ë nëjkxëp tyukwopëtë ja po'oxu'tsn mëti'ipë pujxn jyëjp'ajtypyën.

¹⁵Ja yajkutujkpë ka'ap ojts timmyëj'ixy ja naax kajpn, jä'ä ko ja Wintsën ënäty jëtu'un të tuknipëjktaakë ets y'atëwëty ja aaw ayuk mëti'ipë ja Wintsën të tukwinmëtoyën ja Jeroboam, yë myaank yë Nabat, ko myëëtmëtyakë ja Ahías, jampë tsyoonyën Siló.

¹⁶Ko ja Israel ja'ayëty t'ijxtë ko ja yajkutujkpë ka'ap të myëjpëjkta'akëtë, ënät t'ëtsoowtë: Ëëtsëty nitii jotmayës nkamëët'atë mëët yë David. Ka'ap yam n'ëna'anmëty ënät ja kyuma'ayën t'ëk yajwa'kxa'any mëët ëëtsajtëm tääpë Jesé myaank. Nëjkxta'atë ma mtëjkëtyën miitsëty Israel ja'ayëty. David wä'än yi'iyë tkëwent'aty, mëti'ipë jyiiky'äjtyp myëku'uk'ajtypyën. Tä ënätyë nyëjkxtaaytyë ja Israel ja'ayëty ma tyëjkëtyën.

¹⁷Je'eyëp ko ja Israel ja'ayëty mëti'ipë jam tsënaaytyëpën ma ja Judá tnitänën ja naax, yi'iyë ojts ja Roboam tjaak ëne'emy.

¹⁸Ko ja Roboam tjakäjpxy ja Adoram ets tni'ënä'ämëty ja tuunk mëti'ipë atsipën, ënätyë ja Israel ja'ayëty tkuka'tstë. Ënät ja Roboam ënätyë ja pyujxnwintëkäämpë tukpejty ets kyeky, jam ojts nyijkxy Jerusalén.

¹⁹Jëtu'un'äämpy ja Israel ja'ayëty ojts tmëtsiptsoontë ja David ja jyä'äy, tyampaat jëtu'unyëm tyu'uye'ey.

²⁰Ko ja Israel ja'ayëty tnija'awëtyë ko tëë ja Jeroboam wyimpity, ënät ojts tnikäxëtë ets t'ënëmaaytyë ets nyäwya'këxë'ëkëtëty ma ja naax kajpnën, e jëtu'unts ojts tnikajpxpätë ets yë'ë yajkutukëty ma tëkokyë ja Israel ja kajpn tnitänën ets ja Israel ja'ayëty ka'ap ojts t'ëkmëjwa'kpäjnëtë ja David ja y'u'unk y'ok, ëpëky ja Judá ja jyä'äy.

²¹Ko ja Roboam jam jyä'äjty Jerusalén, ënät tyajmujky nitu'kmëko'px ja majkta'px mil ja tsiptuunpëtëjk, aak win'ixy winpiypyë mëti'ipë jam kukajpnajtëpën Judá ets jam ma Benjamín ja'ayëtyën, jëtu'unts tsyiptuna'any mëët ja Israel ja'ayëty ets tpëka'any jatëkok ja y'ënä'ämtakn.

²²E ja Wintsën ënätyë ojts tmëkäjpxy tu'uk yë ja'ay mëti'ipë Wintsën oy myëtuumpyën, Semaías xyëëwajtyp ets ojts tuk'ëne'emy:

²³Ënëëmë yë Roboam, yë myaank yë Salomón, mëti'ipë y'ëne'empyën yë Judá kajpn ets Benjamín yë jyä'äy ets tëkokyë yë naax kajpn,

²⁴ko ëjts yam jëtu'un ni'ënä'ämëp ko këtii yë myëku'uk nëkoo mëët tsyiptuntëty, yë Israel ja'ayëty. Nikë wä'än timwyimpijta'atë ma tyëjkëtyën jä'ä ko jëtu'unës të ntuknipëjktaakë. Ko jëtu'un tmëtoowtë, ënätyë ojts jyänty wyimpijta'atë, jëtu'un tä ja Wintsën ënäty të tni'ënä'ämën.

²⁵Jeroboam ojts t'akojë ja kajpn mëti'ipë ijty yajtijpën Siquem, ma Efraín nyaaxjotmën ets jam tsyënaaytyaknpëjky. Ojts näjyëtu'un t'akojë ja kajpn mëti'ipë ijty yajtijpën Penuel.

²⁶Je'eyëp ko tyaa ojts myäy tyäjy: Yë David yë y'u'unk y'ok, jyëkyejpy jatëkok tpaatëty ja kyutujktakn,

²⁷pën ya'atë ja'ayëty nëjkxtaaytyëp jam Jerusalén ets tyaktëty jam yë wintsë'kën tsajptëkotm ma Wintsënën. Nëjkxëp jatëkok tmë'oypyëktë ja Roboam, mëti'ipë jam yajkutujkpën Judá, etsës nëjkx xy'ëkyaj'o'knëtë tääts ja Roboam yë'ë tpanëjkxtëty, mëti'ipë jam yajkutujkpën Judá.

²⁸Ko ya'atë ja winma'any ojts yajxon tyajtëy tyajtëtä'äky, ënät ja yajkutujkpë ojts t'oytyuny mäjtsk yë tsajpkaa ayääkë, aak pu'ts pujxn mëët y'oytyunyëty ets t'ënëmaay ja naax kajpn: Miitsëty Israel ja'ayëty, tëë yowë m'ënu'kxënyëtë ko jam xëmë mnëjkxtë Jerusalén. Tyaa ja mwintsënëty, mëti'ipë ojts jap Egiptë mjuutëtën.

²⁹Ënät tu'uk jam tpëjktäky Betel ets tu'uk jam Dan.

³⁰E ya'atëts ojts ja Israel ja'ay yajpokytyunëtë, jä'ä ko ja ja'ayëty jam ja nyëjkxtaaytyë Betel ets Dan ets yë'ë t'ëwtajtë.

³¹Ojts ja nyitsajptëjk tkojë ka'apë tyiosëtyën jam ma tuuntakn kajpxtaknën tunkëjxmëpë kopkëjxmëpë ets pyëjktak näjyëtu'un ja nyiteety mëti'ipë jam tim itëpën ka'apë Leví ja'ayëtyën.

³²Ojts näjyëtu'un tu'uk ja xëëw tyajnaxkëtä'äky, ma myajkmokx'anyën ja mëtuktujkpo'opë, jëtu'un tä ijty jam xyëëwtuntën ja ja'ayëty ma ja Judá kajpnën ets kë'ëm wyintsë'kën ojts tkë'ëyajkojy ma ja wintsë'këntyaknën. Ya'atë ojts jam tuny Betel, ko tmooy ja wyintsë'kën ja tsajpkaa ayääkë, ma ënäty ja nyiteety kë'ëm të tpëjktakën.

³³Ma myajkmokx anyën ja mëtuktujkpo'opë, jää ojts ja Jeroboam tu'uk ja wintsë'kën tyäky ma ja wintsë'këntyaknën mëti'ipë ënäty jam Betel të t'oytyunyën. Ya'atë xëëw kë'ëm ojts tpëjktä'äky ets tnikäjpxy ko tmëjjawëtëty ja Israel ja'ayëty, jä'ä po'o jam pyejty ma ja wintsë'këntyaknën ets jam tyajtoyä'äny ja poom.