Read Biblia Mixe de Quetzaltepec 1 Reyes 14 Bible Online

1 Reyes 14 - Biblia Mixe de Quetzaltepec bible

1 Reyes 14

¹Jam ijty tu'uk yë Jeroboam yë myaank jä'ä xyëëwajtyp Abías, ojts pya'ampety.

²Ënät ja Jeroboam t'ënëmaay ja tyo'oxytyëjk: Mijts yë'ë ënät mtunëp, wiink wit mpëjkta'akëp, këtiipë yaj'ixëty ko mijts nto'oxytyëjk'ajtyp ets jam mnëjkxëty Siló. Jam tu'uk tsyëënë ja'ay Ahías xyëëwajtyp, Wintsën myëtuumpy, yë'ëjës ojts xytyuk'ëwaanë koos ëjts n'itëty yajkutujkpë ma ja naax kajpnën.

³E yë'ëts mënëjkxëp; majk yë tsajpkääky ets wiinkëtypë tsajpkääky ets uuxpa'ak tu'uk tu'ts, tääts nëjkx jam xy'ixy ets yajnijawëty wi'ix ya'atë mëxu'unk y'itëty.

⁴Jëtu'un ojts tjantytyuny ja Jeroboam ja tyo'oxytyëjk. Ojts nyänyi''ixëty ets ojts nyijkxy jam Siló, ko jyä'äjty ma Ahías ja tyëjkën. Ahías ka'ap ënäty oy y'ëk'ijxnë, jä'ä ko mëj ja'aynyë,

⁵e ja Wintsën tëë ënäty nyatuknija'awëyënë ko ja Jeroboam ja tyo'oxytyëjk nyimina'any ets tyajtëwa'any wi'ix wyë'ëma'anyën ja y'u'unk mëti'ipë pëjkëpën. Ojts tyuknijawëty wi'ix t'ëtsowëtyën ja to'oxytyëjk ets ko ënäty myina'any wiink xoxy.

⁶Ko ja Ahías tmëtooy kyuwa'akë jam ma ja tëjk apu'uyën, tä t'ënëmaay: Nax tëkoty, mijts to'oxytyëjk, Jeroboam yë tyo'oxytyëjk. ¿Wi'ix ko tëkatsy të mnäxyoxyë ets wiink ja'ay mnäyajnaxyë? Ëjts tëëjës nyajtuknipëky ko mijts mëk nmëkajpxëty,

⁷paaty yam n'ënëëmë ets mwinpitëty, xy'ënëëmëty yë Jeroboam, ko jëtu'un yë Wintsën y'ënä'äny: Ëjts mijts të nwin'ixy ma ja naax kajpnën ets ja naax kajpn xy'ënä'ämëty mëti'ipë yë Israel ja'ayëty kyajpn'ajtëpën.

⁸Ojtsës ja David ja y'u'unk y'ëna'k ets ja y'ok u'unk y'ok ëna'k npëjkë ja kutujkën ets mijts nmooy. Je'eyëp ko mijts ka'ap tii winë oy xy'ëktuunë tä ja David winë oy tuunyën, ko ojts tpatuny ja n'ënä'ämënës ntëyajtënës winë aaw winëjot ets aak'oy ojts n'ijxës ja tyuunk;

⁹Mijts ni'ik o'ktëy winë të xytyuny, këtiinëm ja mmëku'uktëjk mëti'ipë jëyëjp të tyuntën; mijts je'eyës nëkoo të xyajjoot'anpëky, ko tëkatsypë ja awinax të xyajkojy ka'apë jeexyë mëpaat xy'ëwtatën, aak pujxntsetsy, aak pu'ts pujxnpotsy ets ëjts jëkäm xypyëjktaknës.

¹⁰Paaty ëjts, nyajkëta'akäämpyës ja ëyo'on jotmay ma ja m'u'unk m'okën; nyaj'o'kta'ajäämpyës ja ye'etyëjktëjk ma ja mja'ayën mëti'ipë yajpatëpën ma ja Israel kajpnën; nitu'uk nëjkx kyawë'ëmy juuky. Pe'ety jaaxyës nyajnaxa'any, jëtu'un ja ja'ay twinpätmukyën yë putsta'ak.

¹¹Ja mëku'uktëjk mëti'ipë ënäty kajpntum o'ktëpën uk nëjkx tsyu'tsëtë, e ja mëti'ipë muum tunkëjxm o'ktëpën, lut majkwejkxy nëjkx tsyu'tsëtë, jä'ä ko ëjts, mëti'ipë Wintsën'ajtpën jëtu'unës të ntuknipëjktaakë.

¹²E mijts ënät to'oxytyëjk, pëtë'ëk ets mnëjkxëty ma mtëjkën. Je'eyë jam mja'tëty tääts yë m'u'unk y'ooka'any.

¹³Tääts tëkokyë ja Israel ja'ayëty tyëkëtëty jëëpyë yaxpë mëët yë'ë ets xyajnaaxtëkëtëty; jä'ä ko yi'iyë ënäty tu'uk oy naaxtëjkëp ma ja Jeroboam ja jyiiky myëku'ukën, y'u'unk y'ëna'kën. Jä'ä ko ma tëkokyë yë jyiiky myëku'ukën yi'iyë tu'uk ja Wintsën oyjyawëjanëyëp.

¹⁴Ok yë Wintsën tpëjktaka'any tu'uk yë yajkutujkpë mëti'ipë yajkutëkooytya'ajäämpyën ja Jeroboam ja y'u'unk y'ok.

¹⁵Tyam ets jëtu'un tyu'uye'eyä'äny, yë Wintsën jëtu'un txijt yu'kxa'any yë Israel kajpn tä aay kepy xyijtyu'kxyën ko yë mëj nëëkom jyënäky. Nëjkxëp tkë'ëtsë'ëky ma ya'atë naax kamën oypyë tsujpë ets tyajwojpkëtaka'any jëkäm, tyimninaxëp ja mëjnëë mëti'ipë yajtijpën Éufrates, mëët ko të tyajnikojtutpë ja Astarté ka'apë Wyintsënëtyën, ka'apë mëpaat yaj'ëwtatyën, mëti'ipë mëët ja naax kajpn mëj këjää të tyajpokytyunyën mëti'ipë ja Wintsën të tukyajjoot'anpëktën.

¹⁶Yë Wintsën nëjkxëp jëna'a t'ayajk tkë'ëyajknë yë Israel ja'ayëty, mëëtkyëjxm ko ja Jeroboam ja nëë poky të tmëtëkë ets ko të tyajpokytyuny ja naax kajpn.

¹⁷Tä ja Jeroboam ja tyo'oxytyëjk pyëti'ky ets ojts nyijkxy; ko jyä'äjty jam Tirsá, tim je'eyë jyä'äjty tyëjk'ëkë'ëm ets tniwa'knajxy ja tëjk'apu'uy tääts ja myaank y'o'ky.

¹⁸Tëkokyë ja Israel ja'ayëty nyëjkxtaaytyë ma ënäty jam nyaaxtëkën ja o'kpë ets tnimoon tnitujktë, tnijëëy tniyaxtë, jëtu'un jyäjty kyëpejty tä ënäty ja Wintsën të tnikäjpxyën, mëët ja tyuunpë mëti'ipë xyëëwajtypyën Ahías.

¹⁹Ja nyikäjpxy nyimëtyä'äky ja Jeroboam, tiijaty tyuunën, wi'ix ojts tsyiptunyën ets wi'ix tyuunyën ko y'ijty yajkutujkpë, jap myiinta'ay këxja'ay ma ja nokyën mëti'ipë yajtijpën Crónicas, ma kyuja'ayëtyën ja tyu'unënëty kyajpxënëty ja yajkutujkpëtëjk.

²⁰I'px jëmëjt ojts yë Jeroboam y'ëne'emy, ko y'o'ky yë'ë ojts kyutëkëty ja myaank mëti'ipë yajtijpën Nadab.

²¹Yë Roboam, yë myaank yë Salomón, jam yajkutujky Judá. Wëxtyikxy tu'uk ënäty yë jyëmëjt ko tyëjkëy yajkutujkpë, majkmokx mäjtsk jëmëjt ojts tyuny jam Jerusalén kajpnën, ja kajpn mëti'ipë ja Wintsën kë'ëm wyin'ijxën ets jam y'ita'any tsyënëja'any. Yë Roboam tyaak jä'ä ijty xyëëwajtyp Naamá, Amón ja'ay.

²²Je'eyëp ko ja Roboam aak ëxëëkjaty ojts winë tuny jam Wintsën wyintum, yë Wintsën ni'ik ojts twiink'ixy ja Roboam ja tyuunk këtiinëm ja y'aptëjk mëti'ipë jëyëjp yajkutujktën.

²³Jä'ä ko yë'ë ojts näjyëtu'un tnimëktä'äky ets ja ja'ayëty t'ëwtatëty mëti'ipë jeexyë ka'ap t'ëwtatën, ojts ja nyitsajptëjk tkojë ja awinax mëti'ipë yajtijpën Aserá, ojts tyajkojy ja awinax tsaapotsypë ets kepy tsetsypë, tpëjktäky jam muum tunkëjxm ets kepypya'tkë'ëm ma muum ja mëj kepy tyänën.

²⁴Näyjyëtu'un ja ja'ayëty kë'ëm ijty ja jyot nyini'kx tyajknëtë tukwintsë'ëkëtë ja tyiosëty ets jëna'ajëty yi'iyë tyimniye'eymujkëtyëp, tuunëtë tkajpxnëtë ja ëxëëkpë ets ja tëkatsypë ja jot winma'any, näjyëtu'un tä ja mëti'ipë ijty ja wiink naax wiink kajpn tyuuntëp kyajpxtëpën, mëti'ipë ja Wintsën të t'ëxwojpta'ayën ma ja Israel ja'ayëtyën.

²⁵Ma ja Roboam ënäty ja kyutujkën myëkoxk jëmëjt pety, jää ojts tu'uk yë yajkutujkpë jam jyä'ty jä'ä xyëëwajtyp Sisac, jap Egiptë tsyoony ets ojts tnitëkë ja Jerusalén kajpn,

²⁶ko jap tyëjkëy tsajptëkoty wa'ats tyajpëtsëëmtaay ja wit meeny ets näjyëtu'un ma ja Kutujkëntëjkën. Wa'ats winë tmä'tstaay ets ojts tmënëjkxta'ay ja pu'ts pujxn mëti'ipë ijty ja tsiptuunpë ja'ay nätyuk akëëytyujkëtëpën, mëti'ipë ja Salomón yajkojën.

²⁷Yë yajkutujkpë Roboam ojts ja jyä'ä näjyëtu'un tyajkojy, jä'ä ja pujxn mëti'ipë ijty ja tsiptuunpë ja'ayëty nätyuk'akëëytyujkëtëpën ko tsyiptuuntë, aakyë'ë pujxn ojts tyajtuntë mëti'ipë yajtijpën tsuxk pujxn, tääts tuknipëjky ja tsiptuunpëtëjk ets yë'ë tkëwent'atëty, ja mëti'ipë jam këwent'ajtëpën ma ja kutujkëntëjkën.

²⁸Ets ko ijty nyijkxy ja yajkutujkpë jap tsajptëkoty jääyë ja këwent'ajtpë tyajnëjkxtë ja pujxn mëti'ipë nätyuk'akëëytyujkëtëpën ko wyimpijnëtë tääts jatëkok jap tpëjkta'aktë ma nyitëjkën.

²⁹Ja jyuukyajtën ja Roboam ets tëkokyë mëti'ipë tyuunën ko ojts yajkutujky, aak tap myiinta'ay këxja'ay ma ja nyokyëtyën ja yajkutujkpëtëjk.

³⁰Yë Roboam xëmë ojts tsip tmëët'aty mëët yë Jeroboam.

³¹Ko ojts yë Roboam y'o'knë jam nyaaxtëjkëy ma ja y'aptëjk nyaaxtëjkëtyën, jam ma David yë kyajpnën. Yë tyaak jä'ä ijty txëëwaty Naamá, jam kyukajpnëty Amón. Ko ojts y'o'knë yë'ë ojts kyutëkëty yë myaank mëti'ipë xyëëwajtypyën Abiam.