Read Biblia Mixe de Quetzaltepec 1 Reyes 16 Bible Online

1 Reyes 16 - Biblia Mixe de Quetzaltepec bible

1 Reyes 16

¹Ënät ja Wintsën ojts tmëkäjpxy ja Jehú, yë'ë myaank yë Hananí ets tukmëtowa'any ja aaw ayuk ma ja Basá yajnikäjpxyën ko tëkatsy winë tuny:

²Jëtu'un ja Basá yajnikäjpxy: Ëjts ojts mijts njuuty ma Israel kajpnën, tä ja'ay muum tii naaxwayjoty tpaatyën, ets të npëjktä'äky ënä'ämpë yajkutujkpë ma Israel kajpnën mëti'ipës nkajpn'ajtypyën. Je'eyëp ko ja naax kajpn tëë xyajpokytyuny timjëtu'un tä ja Jeroboam y'ëtitsyën. Yajxonës të xyajjoot'anpëky mëët ja poky mëti'ipë të xytyunyën.

³Paaty yam ntuknijawë ko tëëjës ntuknipëjktaakë ko nyajkutëkoyä'äny mijts ets ja m'u'unk m'ëna'k, mjëëky mëku'uk; jëtu'un ëxëëk nyajata'any tä ëxëëk jyäjtyën yë Jeroboam, yë myaank yë Nabat.

⁴Ko y'ookëty yë mjëëky mëku'uk kajpnjoty, uk nëjkx tsyu'utsyë; e mëti'ipë o'kpën kamjotm lut majkwejkxy nëjkx yajkëxyë.

⁵Yë nyimëtyä'äky yë Baasá, mëti'ipë tyuunën ets wi'ix winë tuunyën jap myiny këxja'ay ma ja nokyën mëti'ipë yë yajkutujkpëtëjk jyä'ä'ajtëpën jampë ijty y'ënä'ämtën Israel.

⁶Ko Baasá y'o'ky jam tyajnaaxtëjkëtyë Tirsá. Ma ja kutujktaknën, yë'ë kutëjkëyë yë myaank Elá.

⁷Ya'atë aaw ayuk yë'ë ojts yajtukmëkäxë Jehú, Hananí yë myaank; ja Wintsën jä'ä ojts tnikäjpxy wi'ix ja Baasá tkumëtowëtyën ja pyoky mëët ja y'u'unk y'ëna'k y'u'unk tyo'oxytyëjk, jä'ä ko tëkatsy ojts winë tuny. Basá ojts yë Wintsën tyajjoot'anpëky, jä'ä ko ëxëëk winë tuuny jëtu'un tä ja Jeroboam mëët ja y'u'unk y'ëna'k ëxëëk winë tuuntën, mëti'ipë ojts näjyëtu'un kyutëkoytyën.

⁸Ma y'i'px tëtujk petyën, ma yajkutukyën ja Asá jam Judá, jää ojts tyëkë yajkutujkpë yë Elá, myaank yë Baasá, jam Tirsá mëti'ipë Israel nyitënääpyën ets jä'ä ojts yajkutuky mäjtsk jëmëjt;

⁹e jamts ijty tu'uk yë tyuunpë, Zimri xyëëwajtyp yë'ë nyiwintsën'ajtyp yë tsiptuunpëtëjk, yë'ë kyëwent'ajtyp ja pujxnwintëkäämpë mëti'ipë myëtsiptuuntëpën, tä mëët ja myëku'uktëjk nyäkyajpxë ets tyaj'ooka'antë ja Elá. Tu'kxëëw ojts tëkok yë Elá nyäyajmukpëkyë nëkooyë, jam ënäty yajpaaty ma tyëjkën yë Arsá, mëti'ipë yajputu'unëpën, jam Tirsá y'itjotm.

¹⁰Ko y'ëkëty jyä'äjty yë Zimri ets yaj'o'kë, tääts yë'ë kyutëjkëyë ma yajkutukyën. Jää jëtu'un jyäjty kyëpejty ma y'i'px wëxtujk jëmëjtpetyën, ma ja Asá yajkutukyën jam Judá.

¹¹Tim je'eyë ja Zimri tyëjkëy yajkutujkpë, tääts tyaj'o'ktaay tëkokyë ja y'u'unk y'ëna'k ets ja y'u'unk tyo'oxytyëjk yë Baasá, nitu'uk ojts tkayajwë'ëmy juuky ja ye'etyëjktëjk ma ja Baasá jyä'äyën, jyiiky myëku'ukën ets wyin'ixyën, mëti'ipë jeexyë mëpaat yaj'ookwinpityën.

¹²Jëtu'un'äämpy ja Zimri tyajkëjxtaay ja Baasá ja jyä'äy, tä jëtu'un y'atëëy tä ënäty ja Wintsën të t'akäjpxyën mëët ja Jehú, ko jëtu'un jyata'any kyëpäta'any ja Baasá,

¹³Mëët yë'ëkyëjxm ko ojts ja nëë poky tuny yë Baasá ets myaank Elá, ko tyajpokytyuuntë ja naax kajpn Israel ja'ayëty ets tyajjoot'anpëjktë ja Wintsën mëët ko t'ëwtajtë ka'apë Tyiosëtyën.

¹⁴Ja nyimëtyä'äky ja Elá ets mëti'ipë tyuunën ets wi'ix winë tuunyën, jap ja myiny këxja'ay ma ja nokyën mëti'ipë nyoky'ajtëpën ja yajkutujkpëtëjkëty jampë y'ënä'ämtën Israel.

¹⁵Ma y'i'px wëxtujk jëmëjtpetyën, ma yajkutukyën yë Asá jam Judá, yë'ë ënäty yë Israel ja'ayëty të tyajnatuktë yë Guibetón kajpn, filistejë ja'ay jam tsënaaytyëp, ko tyëjkëy yë Zimri yajkutujkpë jam Tirsá. Je'eyëp ko wëxtujk xëëw ojts je'eyë tyuny,

¹⁶jä'ä ko jä'ä xëëw ma ja tsiptuunpëtëjk tnija'awëtyën ko ënäty ja Zimri, të tnikäjpxytyunë ja yajkutujkpë ets ko ënäty të tyaj'ooky ets yë'ë ja kutujkën tniwaaka'any, ënät ojts jämyë tnikajpxpätë ja Omri, tu'uk ja tsiptuunpë Wintsën ets jä'ä yajkutukëty ma Israel kajpnën.

¹⁷Ënät ja Omri mëët ja Israel ja'ayëty mëti'ipë tsiptuunpë ja'ayëtyën, ojts t'ëxmatstë ja Guibetón ets yë'ë tnitëjkëtyë ja Tirsá kajpn.

¹⁸Ko ja Zimri t'ijxy ko tëë ja kyajpn yajnitëkë, ënät ënätyë kyupëyë'ëkëy jap tëkoty ma yajkutukyën ets tjëën ixko'onëy ja kutujkëntëjk, tap ënäty yë'ë tëkoty, jëtu'un'äämpy ojts nyäyaj'ookyë kë'ëm.

¹⁹Paatykyëjxm jëtu'un jyäjty kyëpejty, mëët ko ojts ja nëë poky tmëtëkë ma ja naax kajpnën ets ko ojts ja Wintsën mëk tyajjoot'anpëky, jä'ä ko nän yë'ë poky ojts tuuntëkoy mëti'ipë ja Jeroboam tyuuntëkooyën.

²⁰Yë nyimëtyä'äky yë Zimri, mëti'ipë tyuunën ets wi'ix winë tuunyën, jap ja myiny këxja'ay ma ja nokyën, mëti'ipë nyoky'ajtëpën ja yajkutujkpëtëjk.

²¹Ënät ojts ja Israel kajpn nyäwyä'kxyë mäjtskpëky. Tu'kpëky jä'ä pyutëjkëp ja Tibní, Guinat yë myaank ets yë'ë yajkutukëty, e jatu'kpëky jä'ä pyutëjkëp ja Omri.

²²Ja jyä'äy ja Omri, jä'ä ojts myëtä'äky, jëtu'un'äämpy ja Tibní yë Guinat yë myaank jyä'äy tkupëjktë oy wi'ix jyanäjya'awëtyë. Ojts ja Tibní y'o'knë, tä ja Omri ojts yë'ë tyëkë yajkutujkpë.

²³Omri, jä'ä ojts yajkutujktsoony jam Israel, ma ënäty myë'i'px majktu'uk jëmëjtpetyën ma Asá yajkutukyën jam Judá ets jä'ä ojts tyuny majkmäjtsk jëmëjt, tëtujk jëmëjt yajkutujky jam Tirsá.

²⁴Ojts tjuy tu'uk yë naax jam ma ja Samaria kopkën, yë'ë Semer jyä'ä, jä'ä tkujuuy tëtujk kilë aak poop pujxn; jam ojts tu'uk tkojy ja kajpn, ma ja näkyëwent'atë y'itëtyën, jä'ä txëëwmooy Samaria, jä'ä ko ja mëti'ipë ijty nyiwintsën'ajtypyën jä'ä ijty txëëwaty Semer.

²⁵Yë Omri, ëxëëk ojts winë tuny, ka'ap ninu'un Wintsën oy t'ijxy, jaakwäänëni'ik ëxëëk winë tuuny këtiinëm jyëtu'unëty ja yajkutujkpëtëjk mëti'ipë ënäty të tyuntën,

²⁶Jä'ä ko nän tim yë'ë poky ojts tuny mëti'ipë ja Jeroboam tyuunën; yë Nabat yë myaank, ko tyajpokytyuuny ja Israel kajpn, mëti'ipë Wintsën mëk yajpojkën, ja Israel ja'ay ja Tyiosëty, ko ja ja'ayëty ojts t'ëwtajtnëtë ka'apë jeexyë mëpaat t'ëwtatën.

²⁷Ja nyimëtyä'äky ja Omri, tëkokyë mëti'ipë tyuunën ets wi'ix winë tuunyën, jap myiny kuja'ay ma ja nokyën, mëti'ipë nyoky'ajtëpën ja yajkutujkpëtëjk mëti'ipë tuuntën jam Israel.

²⁸Ko y'o'ky jam ojts tyajnaaxtëkëtë Samaria, ma ja kutujkënën. Yë'ë ojts kyutëkëty ja myaank Ahab.

²⁹Ma ënäty myë'i'px tuktujk jëmëjtpetyën, ma Asá jam yajkutukyën Judá; yë Ahab, Omri myaank, jää ojts tyuuntsoony jam Israel. Jä'ä ojts yajkutuky i'px mäjtsk jëmëjt, jam Samaria.

³⁰E ja tyu'unën kyajpxën ka'ap ojts oy ja Wintsën t'ixy, wäänë o'ktëy winë tuuny, këtiinëm jyëtu'unëty mëti'ipë ënäty të y'ënä'ämtën,

³¹jä'ä ko yë'ë ka'ap ojts ninu'un tmëkjawë ko nän yë'ë ja poky tyuunpy mëti'ipë ja Jeroboam tyuunën, Nabat yë myaank. Ni'ik yë'ë, jä'ä ko ojts mëët pyiky ja Jezabel, yë nyëëx yë Et-baal, mëti'ipë yajkutujkpën jam Sidón ets ojts t'ëwtajnë ja Baal.

³²Ojts tu'uk wintsë'këntyakn tkojy ets tu'uk ja tsajptëjk jam Samaria ma ja Baal yaj'ëwtatëtyën.

³³Ojts näjyëtu'un tu'uk tkojy yë awinax mëti'ipë ijty tyijtëpën Aserá, mëti'ipë ojts ja Wintsën mëk tyajpokyën, ni'ik ojts ja Wintsën tyajoot'anpëky këtiinëm jyëtu'unëty ja yajkutujkpëtëjk mëti'ipë ënäty të tyuntën.

³⁴Ma ja Ahab ënäty yajkutukyën, jää ojts yë Hiel tkoj'oyë yë Jericó kajpn. Ojts yë y'u'unk Abiram, ja kä'äxkopk tyaj'ooky ets ja potsy ëjx tyapëtë'ky; yaj'o'k näjyëtu'un ja myaank ja mutskpë mëti'ipë kutëëmën, Segub xyëëwajtyp, tääts ja tëjk'aaw tyaj'o'oyëtyääy; jëtu'un tyuunë jyajtë tä ënäty ja Wintsën të t'akäjpxyën mëët ja Josué, ja myaank ja Nun.