Read Biblia Mixe de Quetzaltepec 1 Reyes 8 Bible Online

1 Reyes 8 - Biblia Mixe de Quetzaltepec bible

1 Reyes 8

¹Ënät ja Salomón ojts tyajtu'ukmuky jam Jerusalén ja mëjja'aytyëjkëty ets kopktëjkëty mëti'ipë ja jyiiky myëku'uk nyikutuunk'ajtëpën, jampë yajpaatën ma ja Israel kajpnën; yë'ë yajtsoonantëp ja Wintsën ja kyaaxë jam Jerusalén, ma ja David ja kyajpnën.

²E jä'ä xëëw ma ënäty yajxon yajnixëëwtunyën ja tëjkxo'omy, ma Etanim po'o y'änyën, wa'ats myujktaaytyë ja Israel ja'ayëty mëët ja Salomón.

³Ojts myiinta'atë ja mëjja'aytyëjkëty jampë yajpaatën ma ja Israel kajpnën, tä ja teetytyëjkëty tkëëyë'ktë ja Wintsën ja kyaaxë

⁴ets tyajtso'ontë mëët ja nyiwittëjk, ma Wintsën mëët ja näpyaatë y'ityën ets tëkokyë jënu'un jap winë tyunyën, tä ja apëjk atu'unënyën, ojts tmënëjkxta'atë ja Leví ja'ayëty ets ja teetytyëjkëty.

⁵Ja Salomón ets ja Israel ja'ayëty, jëyëjp nyëjkxtë, tyaktë ja wintsë'kën ma ja Wintsën ja kyaaxën, yë tsajppax ooky ets ja tsajpkaa ookyëty yë'ë tyukwintsë'këtyë ja Wintsën, may'äämpyëty tyajktë ka'ap tjëkyepy yajmëtyowëty.

⁶Tä ja teetytyëjkëty ojts jap tmëtëkëtë ja Wintsën ja kyaaxë tsajptëkoty, ma ja tëkot ja kënu'kxypyën, jap tkëxkëëytyë ma ja kyäknpa'tkën ja Wintsën ja kyukajpxpë,

⁷ja kyäknëty jä'ä tyuknikëëytyëp ja kaaxë, mëët tëkokyë ja nyikepy mëti'ipë mëët yajpakë'ëyën.

⁸Je'eyëp ko ja kepy mëti'ipë ijty yajtukpakëëpyën, yenyjyätyëty ijty, ka'ap nyitujktaay, paaty ko jap pën tyänë ma ja tëjk apu'uyën mëti'ipë kënu'kxyën, këxë'kp ya'atë kepy, jäpyë ka'ap kyëxë'ëky tëja'p, jëtu'un ojts wyi'imy tyampaat.

⁹Jap kaaxëjoty yë'ë jap ja majkpë ënä'ämën kutujkën mëti'ipë tsaakëjxy miinpën këxja'ay mëti'ipë Moisés y'ëxajëyën jam Horeb, jampë ojts yajkëxja'ayën ko Wintsën ja käjpxytyu'unën tuuny mëët ja Israel ja'ayëty.

¹⁰Je'eyë ja teetytyëjkëty jap pyëtsëëmtë tsajptëkoty tääts ja yoots nyäpyëjktakë tsajptëjk këpajkm,

¹¹e mëët ko ënäty tëë nyitujkta'ay ja tsajptëjk mëët ja yoots, ja teetytyëjkëty ka'ap ojts t'ëkjëkyäjpnë jam kyajpxta'aktëty winkon, jä'ä ko ja Wintsën ja myëj'ajt y'oyajtën tëë ënäty ja tsajptëjk tyajtuktuky.

¹²Ënät ja Salomón y'ënäny: Mijts Wintsën, jëtu'un m'ëna'any, ko akootstuuy mtsëënë.

¹³E tyam tëëjës tu'uk ja mtsajptëjk nkojyës, ma mtsëënëtyën xëmë.

¹⁴Ko jëtu'un kyajpxtaay, tä ojts tni''ijxwinpity ja mayjyä'äy ma jam yajpaatën ja Israel ja'ayëty, aak tënaaytyëp ets ojts tkënu'kxy

¹⁵y'ënäny: Yë Wintsën kënu'kxy yë xyëëw y'ity mëët ko të tpatuny ja y'aaw y'ayuk tä tukwinwa'anëyën ja David, yë nteetyës, ko t'ënëmaay:

¹⁶maju'unëmës yë nnaax nkajpn njuutyën jap Egiptë, kamaajës tu'uk ja naaxwiinyëtë nkawin'ixynyëm ma ja Israel ja'ayëty tnitänëtën ets jam tu'uk ja tsajptëjk kyojëty, maas ja nxëëw yajja'amyätsëtyën. E yë'ëts yë David, ojtsës yë nwin'ixy ets yë'ë nnaax nkajpnës t'ënä'ämëty.

¹⁷E yë David, mëti'ipës nteetyajtën, ojts jya'ëna'any ets jeexyë tu'uk tkojy ja tsajptëjk, mëti'ipë ja Wintsën yajtukmëjjawëpën, mëti'ipë yë Israel ja'ayëty y'ëwtajtëpën.

¹⁸Je'eyëp ko yë Wintsën jëtu'un t'ënëmaay: Ka'ap tääpë wyi'ixëty ko mja'ëna'any tu'uk yë ntsajptëjkës xykyojanë,

¹⁹je'eyëp ko ka'ap myijtsëty xykyojëty, yë'ë nëjkx jëna'a tkojy yë mmaank mëti'ipë mkutëkëjayëpën.

²⁰E jëtu'unts tyam yaj'ixy ko tëëjën ja Wintsën ja y'aaw y'ayuk tjanty tyukniwä'äky. Jëtu'un tä yë'ë y'ënänyën, tëëjës ja nteety njantykyutëkë koos ja kutujkën ëjts të njëjpwa'akë ma ja Israel ja'ayëtyën ets tëëjës yam tu'uk ja tsyajptëjk njanty kyojë.

²¹Tëës näjyëtu'un ëpëky ja tyëjk nkojë ma ja Wintsën ja kyaaxë y'itëtyën, mëti'ipë myë'ijtypyën ja käjpxytyu'unën mëti'ipë tyuunën mëët ja n'ap'ajt n'ok'ajtëmë, ko tju'ty jap Egiptë.

²²Ënät ja Salomón jam wya'ak'o'oyëy ma ja Wintsën ja wyintsë'këntyaknën. Tam ënäty ja naax kajpn të tyu'ukmuky, tääts ojts tyujkxajy ja kyë'ë jam tsajpwinm,

²³ets y'ënäny: Wintsën mëti'ipë yë Israel ja'ayëty y'ëwtajtëpën, kamaa Wintsën jëtu'unpë kyayajpaaty tsajpkëjxm ets naaxkëjxy tä mijtsën, mëët ko mijts mpatuunpy ja m'aaw m'ayuk ets myaj'ijxëp ja m'oyjot m'oywyinma'any ma ja'ayën mëti'ipë ëmuumtu'ukjot mëmëtoowëpën.

²⁴Mëët ko tëë xytyuny jëtu'un tä ja nteetyës David xytyukwinwa'anëyën ets y'atëy ya'atë xëëw ja aaw ayuk mëti'ipë ojts xyajwë'ëmyën.

²⁵E paaty yam mijts Wintsën nmëpëjktsoy mëti'ipë ja Israel ja'ayëty y'ëwtajtëpën, tun mëyajtën yaj'atëw ja m'aaw m'ayuk ma ya'atë mtuunpën, jëtu'un tä ojts ja mtuunpë David xytyukwinwanën. Ko xy'ënëmaay ko ja David jä'ä y'u'unk y'ëna'k ka'ap y'ëmaaytya'aka'any ets yë'ë ja kutujktakn tmëwë'ëmtëty je'eyëp ko yë'ë pën tyuuntëp winë mëtëy.

²⁶E paaty mijts Wintsën, tun mëyajtën m'ëwa'atsëp ets tyunëtëty jyatëtëty tä ja aaw ayuk xymyooyën ja nteetyës David mëti'ipë oy mëtuunën.

²⁷Je'eyëp ko ¿Wä'än jëtää tyiyëty ko yë Wintsën jyëkyejpy jyuuky'atëty naaxwiiny naaxkëjxyë? Ix yë tsajp, ix jënu'un myëjëty ets ka'ap myäyë nyikojta'ajëtëty. E ya'atë tsajptëjk mëti'ipës yam të nkojyën tim yi'inëm yë'ë.

²⁸E ëjts npëjktsoopyës yam Wintsën, mëtoow'ijtkës yë n'aaw n'ayuk ets kupëk ja njëëytyak nu'kxtakënës mëti'ipës yam nyajnajxypyën ma mijtsën.

²⁹Ni''ijxkëta'ak ya'atë tsajptëjk xëëny koots ma të xynyikäjpxyën ko jap myajpata'any. Mëtoow'it ja jëëytyak nu'kxtakën mëti'ipë ya'atë mtuunpë yam yajnajxypyën.

³⁰Mkupëkëp ets mëtowëp ya'atë ayuk mëti'ipë ya'atë mtuunpë yajnajxypyën ets ja naax kajpn ja jyä'ä ma ya'atë tsajptëjkën. Mëtoow'itëp ja jëëytyak nu'kxtakën jam tsajpjotm ma m'ityën mtsëënën ets mooykyës pokymyä'kxën.

³¹Ko ënäty pën ja jyiiky myëku'uk tmëtëkoy ets tuknikajpxa'anëty mëët ja mxëëw ma mwintsë'këntyaknën jap tsajptëkoty,

³²Mijts Wintsën mmëtowëp jap tsajpjoty ets mijts kë'ëm mtunëp winë. Mijts mnipaye'eyëp ja m'u'unk m'ëna'k. Mtëytyunëp mëti'ipë ënäty pokymyëëtën jëtu'un tä pyäätyën ja y'ëxëëktu'un y'ëxëëkkajpxën ets ja wa'ats ja'ay mëti'ipë ka'ap pyokymyëëtëtyën xynyipaye'eyëty.

³³Ko ënäty ja mëtsip ëxëëk ja mnaax mkajpn tuny mëët ko ja pyoky tkëpety ma të myajmëtëkoyën, ets jyotwinpitëty ets yaa myinëty, mëjëëytya'ak mënu'kxta'ak t'amëtowëty ja poky wimmä'kxën.

³⁴Tun mëyajtën kupëjkë ja jyiiytyäky nyu'kxtakën, pokymyä'kx, tukpaat jatëkok ja nyaax kyajpn ma ja y'aptëjk tsyëënaaytyën.

³⁵Ko ënäty nëkooyë ja anpë myiinë, mëët ko ja naax kajpn të mëtëkoyë ets jyotwinpitëty ets mëkajpxëtëty ets mwin'ëw mwinya'axëtëty, tjawëty ko tëë tyëkoy, ko tsë'ëkë ja mtëytyu'unën,

³⁶mëtowëp jam tsajpjotm ets mpokymyä'kxëp ja mnaax mkajpn ets mtukni''ixëp ja në'ë tu'u oypyë. Mkäxëp ja nëë tuu naaxwiiny ma ja mnaax mkajpn të xytyukkumayën.

³⁷Ko ënäty jyää'aty ja yuu xëëw, ja pa'am ëyo'on, ja ëyo'on jotmay, ëkë myinëty ja aay ujts ja nyipa'am, tyëtstaaynyëty mëët ja xëëw'an ëkë ko y'ëyo'onpëjkta'akëty ja mëkuk, poo, kumtënë'k, mu'u ets oynatii jëyujk, ëkë ja mëtsip tyajku''ëtukëty ja naax kajpn, ëkë myinëty tiijaty ëyo'on tiijaty pya'am, tun mëyajtën mpa'ëyowëp yë mnaax mkajpn, mëtoow'ijtë ja jyiiytyak nyu'kxtakën.

³⁸Oy tyimtii'ëyo'onëty, pën ja ja'ay ëmuumtu'ukjot jyootwinpity ets tnajtsxajëty ja kyë'ë yaa ma ja mtëjkën,

³⁹mmëtowëp jam tsajpjotm ma myajpaatyën. Mpokymyä'kxëp ets mijts nipaye'ey ja ja'ay nitu'ukjaty wi'ixëty pyaatëtën, jä'ä ko mijtsyë jëtu'un tu'ukyë mnija'ap wi'ixjaty ja amay jotmay yajmëëtëtyën ets wi'ixjaty ja ja'ay myäy tyajtën.

⁴⁰Jëtu'un'äämpy ja ja'ay mwinkutsë'ëkëtëty ma jyuuky'ätyën yaa naaxwiiny, ma naaxën mëti'ipë mtukumaayën ja n'ap n'okëtyës.

⁴¹Nëjkxëp jëna'a xëëw jëmëjt tpaaty ma wiink naax wiinkajpn tnijawëtëtyën ja mxëëw ets wi'ix ja mëj'ajtën xymyëëtëtyën.

⁴²Pën miintëp ja ja'ayëty wiink kajpnëpë yaa jëëytyak nu'kxtakpë, ma yaa mjëën mtëjkën.

⁴³Mëtoow'ijtëp ja y'aaw y'ayukëty jam tsajpjotm ma myajpaatyën ets mo'ojëp mëti'ipë ënäty m'amëtoow mpëjktsoowëpën. Jëtu'un tu'kë'ëyë ja naax kajpn tnijawëtëty ja mxëëw ko myëkëty ets mwinkutsë'ëkëtëty jëtu'un tä Israel naax kajpn mwinkutsë'ëkëtën ets nëjkx tnijawëtë ko yaa ja mxëëw yajmëjjawë, ma ya'atë tsajptëjkën, mëti'ipë yam të yajkojyën.

⁴⁴Ko ënäty ja naax kajpn nyijkx tsiptuunpë mëët ja myëtsip ma ja në'ë tu'ujën mëti'ipë të xytyukni''ixën ets jam tmëpëjktsowtëty ja Wintsën, nyajts'ixëtëty ma ja mtsajptëjkën mëti'ipë tyam të yajkojyën,

⁴⁵mijts mëtoow'itëp jam tsajpjotm ja wyaantso'ow pyëjktso'owënëty ets xynyipaye'eyëp.

⁴⁶Ko ënäty pën mëtëkoyë, jä'ä ko aak tëkoopyë ja'ay y'ity ets mjoot'anpëkëty, xykyë'ëyakëty ma ja myëtsipëtyën ets ja myëtsip ëxëëk tyunëtëty, yajnëjkxëtëty tsumy matsy wiink naax wiink kajpn, ma ja mëtsip ja kyajpnën, ëkë ma ja kajpn tmëwinkon'atën,

⁴⁷pën jootwinpijtë ets yaj'o'oyëtëp ja jyot wyinma'anyëty; y'ëna'antëty: Tëë mpokytyu'unëmë ets tëë ntëko'oyëmë, nmëët'ajtëmë ja nëë poky.

⁴⁸Pën jootwinpijtëp winë aaw winëjot ma mijtsën ets tu'ukyë ja wyinma'any tpëjkta'aktëty ma ënäty jam yajpaatën wiink naax wiink kajpn mëët ko ja myëtsip jam të yajnëjkxëtë ets m'amëtow mpëjktsowëtëty ko wyimpita'antë jatëkok ma ja nyaax kyajpnëtyën mëti'ipë mtukmëwë'ëmën ja y'ap y'okëty ets ja naax kajpn mëti'ipë mijts mwin'ijxën ets jam ja wyinma'any tpëjkta'aktëty ma ja mtsajpjëën mtsajptëjkën, ma mijts m'ity mtsëënën mëti'ipës të nkojyën.

⁴⁹Mijts mëtowëp jam tsajpjotm ma m'ityën ja jyiiytyakn nyu'kxtakënëty ets kuwa'an nixaj ets niwaantu'ut ja jyuuky'ajtënëty.

⁵⁰Mpokymyä'kxëp ja mnaax nkajpn mëti'ipë të mëtëkoyën. Mä'kxëp ja y'ëxëëkjot y'ëxëëk winma'anyëty ma ënäty të mëtëkoyën, mijts mtunëp yë mëyajtën ets xypya'ëyow xynyajts'ëyowëty, pya'ëyowëtëty näjyëtu'un ja ja'ayëty mëti'ipë ënäty tsumy matsy të yajnëjkxëtën.

⁵¹Jä'ä ko mkajpnën yë'ë, mëti'ipë ojts xyajpëtsëmyën jap Egiptë, ma ënäty yajpaatën jëënjoty yowë nyitoytyë.

⁵²Mni''ijxkëta'akëp ja mtuunpë ets ja mnaax mkajpn ko ënäty mënu'kxtä'äkyë, m'amëtoow'ijtëp ja nyujkxtakënëty ma mijtsën.

⁵³Jä'ä ko mijts ojts xywyin'ixy ets ëpëky xyajnajxy ma ja naax kajpnëtyën, mijts ojts xyjyä'äniwa'any, jëtu'un ijxtëm ojts m'ëna'anyën ma ja Moisés xytyukkajpxnajxyën ja m'aaw m'ayuk, mëti'ipë mëtuunën ko xyajpëtsëëmy ja n'aptëjkëtyës jap Egiptë.

⁵⁴Ko ja Salomón kyajpxtaay ets tyajkëjxy ja jyiiytyäky nyu'kxtakën ma ënäty jam të kyoxtänën winkon ma wintsë'këntyaknën ets të xyajjë'ëky jamtsow tsajpwinm,

⁵⁵ënät wya'akë'ky ets ojts tkënu'kxy ja naax kajpn mëti'ipë jam të tyu'ukmuktën ets y'ënäny:

⁵⁶Kënu'kxy mëjjawë ja Wintsën y'itëty mëti'ipë ja Israel kajpn të tmo'oyën ja jotkujk'ajtën, jëtu'un tä ënäty të tnikäjpxyën. Yë'ë tëë tuunta'ay tä ojts ja Moisés tukkajpxpëtsëmyën, mëti'ipë yë'ë tyuunpëajtën.

⁵⁷E tyam wä'än ja Wintsën yaa mëët ëëts'ajtëmë tyajpaaty, jëtu'un tä ojts yajpaatyën mëët ja nteety'ajt n'ok'ajtëmë, ka'ap mëpaat xy'ëxmajtsëmë ets ka'ap mëpaat xynyawa'ktutëmë.

⁵⁸Wä'än tyaj'oyë ja n'aaw'ajt njot'ajtëmë ets ntu'uye'eymyëty ma oypyë në'ë'aaw tu'u'aawën, tääts yi'iyë nmëma'ay nmëtajmëty ja y'ënä'ämën tyiyajtën, ja y'aaw y'ayuk ets tuunk mëti'ipë ojts tyajwë'ëmyën mëët ja nteety'ajt n'ap'ajtëmë.

⁵⁹Ya'atë ja aaw ayuk mëti'ipës ja Wintsën të ntukmëtoyën xëmë tja'amyätsëty xëëny koots jëtu'unts tnipaye'eyëty ja tyuunpë ets ja Israel ja nyaax kyajpn, ko myëyatëty,

⁶⁰jëtu'un ja wiinkëtypë ja naax kajpn nijawëtëty ko yë'ë tu'ukyë Wintsënajtp ets ka'ap maa wiinkpë.

⁶¹Näyjyëtu'un miitsëty ja mjot mwinma'any xëmë xyaj'itëty ma Wintsënën, mëti'ipë n'ëwtajtëmën ets mye'eytyëty mnaxtëty jëtu'un tä yë'ë tsokyën ets xytyuntëty ja y'ënä'ämën tyiyajtën tä tyamën.

⁶²Ënät ja yajkutujkpë ets ni'ëmukë ja Israel kajpn mëj këjää ja Wintsën ja wyintsë'kën tmooytyë.

⁶³Salomón jä'ä Wintsën tukwintsë'këy i'px mäjtsk mil ja tsajpkaa ets mëko'px ja i'px mil ja kupixyny, tyaktë jëtu'un ja wintsë'kën mëët ko yajtuny ja nay'ëëw'oy näykyajpx'oyë. Tääts ja yajkutujkpë ets ja Israel ja'ayëty tkënu'kxtaaytyë ja tsajptëjk mëti'ipë ënäty të kyoj'apaatën.

⁶⁴Jä'ä xëëw ja yajkutujkpë ojts tkënu'kxy ja tëja'aw mëti'ipë yajpatpën tsajptëjkwintuuy, ma tyäjkyën ja wintsë'kën mëti'ipë yajtukuyajkpën ja nay'ëëw'oy näykyajpx'oyë, tä ja ujts pajkën ets ja jëyujk onën, paaty jää tyäjky ma ja tsajptëjk tëja'awën jä'ä ko ja wintsë'këntyakn mëti'ipë oytyunyën mëët ja tsuxkpujxn mëti'ipë jap tëkotyën, mutsk ënäty, ka'ap pyäjta'ay ja wintsë'kën, tä ujts pajkën ets ja tsajpkaa onën mëti'ipë nätyukuyajkëpën ja naax kajpn ma ja nay'ëëw'oy näykyajpx'oyë tuntën mëët ja Wintsën.

⁶⁵Näy jä'ä xëëw ja Salomón ojts tnixëëwtuny ja tëjk xo'ompyë mëët tëkokyë ja may Israel ja'ayëty. Mayjyä'äy ënäty jam yajpatp, ojts myiinta'atë ja mëti'ipë jam tsënaaytyëpën Hamat ets jampaatpë tsyëënëtën ma ja Egiptënaax mëët nyäpyaatëtën. Wëxtujk xëëw wëxtujk tsu'um xyëëwtuuntë, ëpëky ojts kyä'pxy majkmajkts xëëw.

⁶⁶Ko tyuktujkxëëwpejty tä ja Salomón ja mayjyä'äy mëët nyäjyëkajpxtaayënë e yë'ëjëty ojts yajkutujkpë tkënu'kxtë. Tääts këëkjä'äjaty nyëjkxtaaynyëtyë ma ja tyëjkëtyën mëët akujk'ajt jotkujk'ajtën ko të t'ixtë wi'ix ja wintsën ja tyuunpë David oy të tkënu'kxyën ets wi'ix ja naax kajpn näjyëtu'un oy tyajmëj'atyën.