Read Biblia Mixe de Quetzaltepec 2 Reyes 1 Bible Online

2 Reyes 1 - Biblia Mixe de Quetzaltepec bible

2 Reyes 1

¹Ko y'o'ky ja Ahab, tä yë Moab ojts tmëtsiptsoony yë Israel kajpn.

²Ko yë Ocozías jam kyënajxy ma ja tyëjkwiinën ma jam yajkutukyën jam Samaria, tsëtyujtaay yajxon, ënät t'ënëmaay ja tyuunpë ets jam nëjkx tyajnitëwëtë ma ja Baal-zebub jam yajpaatyën, tu'uk yë awinax mëti'ipë jamën Ecrón, tääts nijawëtëty pën tso'okjaanp ëkë pën ookaanp,

³je'eyëp ko ja Wintsën ënätyë ojts tkexy ja kyukäjpxy jam ma ja Elías yajpaatyën, jampë kyukajpnëtyën Tisbé: Nëjkx paat yë yajkutujkpë tyuunpë mëti'ipë jam të tsyoontën Samaria ets xyajtëwëty, ¿tii ka'apëtën jam yë Wintsënë ma Israel kajpnënë, tii ko yë'ë xynyinëjkxtë yë Baal-zebu, jampë yajpaatyën Ecrón ets yë'ë winë xyajtëwa'antë?

⁴Ets ënëëmë näjyëtu'un, ko ëjts mëti'ipë Wintsën'ajtpën, jëtu'unës n'ënëëmë yë Ocozías: Mijts ka'ap m'ëk niwijanë, m'ookaanp yë'ë. Ja Elías ojts jyänty nyijkxy ets jëtu'un tuuny.

⁵E ko ojts ja kukäjpxy wyimpijnëtë ma ja yajkutujkpën, tääts yajtëëwëtë: ¿Tii ko të mwinpitë?

⁶Tä y'ëtsoowtë: Ja'ayës tu'uk të mpaatë jam tu'ujotm ets të xytyu'u'ëtuktës ets të xy'ënëëmëtës koos nwinpitëty ma ja yajkutujkpën mëti'ipës të xykyäxtën ets n'ënëëmëtëtyës: Jëtu'un yë Wintsën y'ënä'äny: ¿Ti ka'ap yë Wintsën jää ma Israel kajpnënë, tii ko jam winë xyajtëwtë ma Baal-zebub, jampë yajpaatyën Ecrón? Mëët mëti'ipë të xytyunyën, ka'apëk ënät mtso'okëty, m'ookëpëk ënät.

⁷Tä ja yajkutujkpë yajtëëwëtë: ¿Wi'ix ja ja'ay y'ixëty mëti'ipë të mpaatëtën?

⁸Yë'ë wyit'ajtyp u'kxywyit ets jëtu'unyë nitëy'äty, tam pyo'owëën, jëtu'un y'ëtsoowtë. Elías yë'ë, mëti'ipë jam kukajpn'ajtpën Tisbé. Jëtu'un y'ënäny ja yajkutujkpë.

⁹Tä ënätyë tkejxy tu'uk ja tsyiptuunpë Wintsën, mëët niwëxtyikxymyajk yë tyuunpë. Ko jam jyajtë, yë Elías jam ënäty yajpaaty kopkkëjxm, ënyääpy ënäty jam. Tä ja tsiptuunpë wintsën y'ënëmaayë: Käjpxynyajxpë, yë yajkutujkpë jëtu'un y'ënä'äny koojëk mjënakëty.

¹⁰Tä ja Elías y'ëtsooy: Pën ëjts käjpxynyajxpë, wä'än jëën tsoony jam tsajpjotm ets wä'än myajnitoyë mëët niwëxtyikxymyajk yë mtuunpë. Tä poj'am ja jëën jam kyutëjkëy tsajpjotm ets yajnitooyëtë.

¹¹Ja yajkutujkpë ojts wiinkpë tkexy tsyiptuunpë Wintsën, mëët wëxtyikxy majk yë tyuunpë ets nyëjkxtë, ko jam jyajtë tääts t'ënëmaaytyë ja Elías: Käjpxynyajxpë, jëtu'un yë yajkutujkpë y'ënä'äny koojëk mjëjpta'akëty timtyämyë.

¹²Tä ja Elías y'ëtsoowinpijty: Pën ëjts käjpxynyajxpë, wä'än tu'uk yë jëën jam tsoony tsajpwinm ets mijts mnino'okëtëty mëët niwëxtyikxymyajk ja mtuunpë. Ets ënätyë ja jëën jyänty kyëtäky ets tyajnitooytyääy.

¹³Ënät ja yajkutujkpë mëtëkëëk'ok tkejxy ja tsyiptuunpë wintsën mëët niwëxtyikxymyajk ja tyuunpë. E ja tsiptuunpë wintsën mëti'ipë ënäty yajkäjxpën ma ja mëtëkëëk'okpën, jam ojts tyimja'ty ma ja Elías yajpaatyën ets nyäkyoxtënaaytyakë ma yë'ëjën, tmënu'kxtäky: Tun mëyajtën, käjpxynyajxpë, ijxpatkës ets ja'amyäts koos njuukyajtën tsoowpatp ets näjyëtu'un ya'atë niwëxytyikxymyajkpë ntuunpëtëjkës;

¹⁴jä'ä ko jëtu'unës nmëtoy'äty ko ja tsiptuunpë wintsënëty mëti'ipë miintën ojtsëk ja jëën tyukëta'akëtë ets jä'ä yaj'o'këtë mëët tëkokyë ja tyuunpëtëjkëty. E ëjts mpëjktsoopyës yam mëyajtën etsës yë njuukyajtën xynyimä'kxëty.

¹⁵Ënät tu'uk ja Wintsën ja kyukäjpxy t'ënëmaay ja Elías: Panëjkx këtii xytsyë'ëkëty. Tä ja Elías jam jyënäjky ets ojts tpanëjkxy ja yajkutujkpë ja tsyiptuunpë Wintsën,

¹⁶ko jam jyä'äjty, tä t'ënëmaay ja yajkutujkpë: Jëtu'un yë Wintsën y'ënä'äny: Mëët ko ja mkukäjpxy të xytyuknikexy ja Baal-zebub, ja awinax mëti'ipë jamën Ecrón, jëtu'un tä jeexyë ka'ap jyämëtyën yë Wintsën ma Israel kajpnën mëti'ipë jeexyë winë myajtëëpyën, tyam ka'ap ënät m'ëk tsok m'ëk akëtaknëty, m'ookaanp yë'ë.

¹⁷Ja Ocozías ojtsën ja jyänty y'ooky, jëtu'un tä ënäty ja Wintsën të tnikäjpxyën mëët ja Elías. E jä'ä ko yë Ocozías ka'ap tmëët'ajtë y'u'unkëty, paaty ojts yë'ë y'uty Joram kyutëkëty, ma ja kutujktaknën. Ya'atë jää ojts jëtu'un tyunyë jyätyë ma ënäty myäjtsk jëmëjtpetyën ja Joram ma jam yajkutukyën Judá, yë myaank yë Josafat.

¹⁸Ja nyimëtyä'äky mëti'ipë ja Ocozías tyuunën, jap ja myiinta'ay ma ja nokyën mëti'ipë jyä'ä'ajtëpën ja yajkutujkpëtëjk jampë ojts y'ënä'ämtën Israel.