Read Biblia Mixe de Quetzaltepec 2 Reyes 12 Bible Online

2 Reyes 12 - Biblia Mixe de Quetzaltepec bible

2 Reyes 12

¹Ma mëwëxtujk jëmëjt yajkutujkyën yë Jehú, jää ojts yë Joás tyëkë yajkutujkpë jam Jerusalén, wëxtyikxy jëmëjt ojts tyuny. Yë tyaak jä'ä ijty xyëëwajtyp Sibiá, jam kyukajpnëty Beerseba.

²Yë tyu'unën kyajpxën oy ojts yë Wintsën t'ixy, jä'ä ko yë'ë ënäty oy tsuj të tyu'uwinwoy të tyu'uwinwitsyë yë teety Joiadá.

³Je'eyëp tëy ko ka'ap ojts yajijta'ay ja tëjk ma ja'ay ijty t'ëwtatën ja ka'apë Wyintsënëtyën, jä'ä ko ja ja'ayëty je'eyëm jam ja wyintsë'kën ets ja pyoom tyaktë.

⁴Tëkok yë Joás, t'ënëmaay ja teetytyëjkëty: Yajmuktë tëkokyë ja wit meeny mëti'ipë yë ja'ayëty myëmiintëpën jap tsajptëkoty, mëti'ipë yojxtëpën ets mëti'ipë nätyukukëpäjtëtëpën ets tëkokyë ja mëti'ipë wyaantaktëpën jap tsajptëkoty ets ja Wintsën tukmëjjawëtë, ets xy'amëtowtëty yë ja'ayëty mëti'ipë jap winë y'ijxtëp tyuuntëp tsajptëkoty wä'än t'a'o'oyëtyä'äy winë mëti'ipë jap tuunpën.

⁶E nyäjxy jëtu'un i'px tëkëëk jëmëjt, ja teetytyëjkëty ka'ap tuuntë tä ënäty të yajtuk'ënä'ämtën.

⁷Ënät ja Joás ojts tmëkäjpxy ja teety Joiadá ets wiinkëtypë ja teetytyëjkëty, tääts t'ënëmaay: ¿Wi'ix ko ka'ap xyaj'a'oyëtë ja tsajptëjk? Tyam ka'ap ënät meeny xy'ëk'ëxajënëtëty ma ja'ayëtyën mëti'ipë jap winë tsajptëkoty y'ijxtëp tyuuntëpën; mëti'ipë miitsëty mëët'ajtëpën yë'ë mtuknikoonë'ëkëtëp ets ja tsajptëjk y'a'oyëty.

⁸Ja teetytyëjkëty ojts tkupëktë, ojts y'ëna'antë ko ka'ap t'ëk'ëxajëjanëtë ja meeny mëti'ipë ja ja'ayëty yajktëpën ets ko ka'ap ja tsajptëjk tkoj'oyëja'antë.

⁹Ënät ja teety Joiadá tpëjkë'ky tu'uk yë kaaxë ets twi'itjujty ja y'akë'ë ets jam tpëjktäky a'oytsyow ma ja wintsë'këntyaknën, jäätsow ma ja tsajptëjk yajnitëkën; ënät ja teetytyëjkëty mëti'ipë ja tsajptëjk kyëwent'ajtëpën jap ja meeny t'apëkëtë ma ja kaaxën mëti'ipë ja ja'ay myënëjkxtëpën ma ja Wintsën ja tsyajptëjkën.

¹⁰E ko ijty t'ixtë tëë ja kaaxë y'utsy mëët ja meeny, ënät ja jääpyë myiny mëti'ipë mëët ja yajkutujkpë tyunyën ets mëët ja teety wintsën tmëtyoy ja meeny mëti'ipë jap nipäjtpën tsajptëkoty; jap tpëjkta'aktë ma tu'uk ja apëjkënën,

¹¹e ko tmëtyoowta'atë, tääts tmo'otë ja mëti'ipë nyiwintsën'ajtëpën ja tuunk ets yë'ë tukmëjuytyë ja mëti'ipë pojtstëpën, tsäjtstëpën, xä'äwtëpën ets tyuntë jap ma ja Wintsën ja tyëjkën,

¹²näjyëtu'un mëti'ipë tsaawojptëpën ets tjuytyëty ja tsaa, kepyëty, mëti'ipë tyukyaj'oyëtëp ja tsajptëjk ets tëkokyë tiijaty mëyajtpën.

¹³Je'eyëp ko tääpë ja meeny mëti'ipë jap myënëjkxtëpën tsajptëkoty ka'ap ijty tyajtuntë ets yajtuk'oytyunëty ja a'ukën, atojkxën, jä'pn, xuxn, ëkë mëti'ipë ënäty poop pujxn ëkë pu'ts pujxn mëët y'oyëjä'änyën,

¹⁴jä'ä ijty yajtukë'ëtëjkëtyëp ja ja'ayëty mëti'ipë nyiwintsën'ajtëpën ja tuunk ets ja tsajptëjk y'a'oyëty ets yajtukmëjuytyëty ja tuunpë, mëti'ipë ëmuumtu'ukjot tuuntëpën.

¹⁵E ja ja'ayëty mëti'ipë tuunpë mëjuuytyëpën, ka'ap yaj'amëtowtë ets tnikajpxtëty jënu'un ja meeny tyajtuntë, jä'ä nyija'awëtyëp ko oy ja jot winma'any tmëët'atë ets mëtëy ja mëtyo'owën tyajtu'uye'eytyë.

¹⁶E jä'ä ënät ja meenypë mëti'ipë ja ja'ay nätyukukëpäjtëpën ko pyokytyuny, ëkë ko ja tëko'oyën tmëëtëty, ka'ap ja yajmënëjkxy ma ja tsajptëjkën, jä'ä ko jä'ä ja teety jyä'ä'ajtëp.

¹⁷Jä'ä jëmëjt yë Hazael mëti'ipë jam yajkutujkpën Sirië, ojts tkexy yë myaytsyiptuunpë ma nyaaxjotmën yë Gad ets tjä'äpëjky, jam tsyo'ony tääts ojty nyijkxy Jerusalén.

¹⁸Joás, jampë yajkutukyën Judá, ënätyë twinpëjkmujktaay winë mëti'ipë kënu'kxyën, mëti'ipë të tyaktën ja yajkutujkpëtëjk Josafat, Joram ets ja Ocozías; mëti'ipë yë'ë y'apäjtën jampë näjyëtu'un yajkutujktën Judá; ojts tpëjkmujkta'ay näjyëtu'un mëti'ipë ënäty yë'ë kë'ëm të tyäkyën ets tëkokyë winëjaty mëti'ipë pu'ts pujxn myëët'ajtypyën jap tsajptëkoty ets ma ja kutujkëntëjkën ets tmooytyääy ja Hazael, jëtu'un ja Hazael ojts ka'ap ja naax kajpn tnitëjkënëpë.

¹⁹Ja nyikäjpxy nyimëtyä'äky ja Joás ets mëti'ipë tyuunën kyajpxën, jap myiinta'ay këxja'ay ma ja nokyën mëti'ipë jyä'ä'ajtëpën ja yajkutujkpëtëkëty jampë tyuuntën Judá.

²⁰Kë'ëm ojts ja tyuunpëtëjk nyikäjpxytyunëty ets y'o'ky jap ma naax y'apojtsë'ëkyëtyën ma txëëwatyën Silá.

²¹Yë'ë ojts yaj'ookyë yë Josacar, yë myaank yë Simat, ets Jozabad, yë myaank yë Somer, mëti'ipë ënäty yë'ë tsyiptuunpë wintsën'ajtypyën këjää ojts tyajtsëtyutyë ets y'o'ky; ko y'o'ky jam tyajnaaxtëjkëtyë ma ja David ja kyajpnën. Ok, yë'ë ojts kyutëkëty yë myaank Amasías.