Read Biblia Mixe de Quetzaltepec 2 Reyes 14 Bible Online

2 Reyes 14 - Biblia Mixe de Quetzaltepec bible

2 Reyes 14

¹Ma ënäty myëmäjtsk jëmëjtpetyën, ma ja Joás, ja Joacaz ja myaank, yajkutukyën jam Israel; jää ojts yë Amasías, yë myaank yë Joás tyëkë yajkutujkpë jam Judá.

²Yë Amasías i'px mëkoxk ënäty yë jyëmëjt ets jä'ä ojts yajkutuky jam Jerusalén i'pxtaxtujk jëmëjt. Jä'ä ja tyaak ijty xyëëwajtyp Joadán, jam kyukajpnëty Jerusalén.

³Yë Amasías oy ojts winë tuny, yë Wintsën ojts t'oy ixy, je'eyëp ko ka'ap tyimjëtu'unëty tä ja tyatitën David. Jä'ä ko näjyëtu'un ojts winë tuny tä ja tyeetyën Joás,

⁴ka'ap kyutëkooy ja nyitëjk ja wiinkëtypë ja tios, ja ja'ayëty je'eyëm tyajktë ja wyintsë'kënëty ets ja pyoomëty tno'oktë txamtë.

⁵Ko yë Amasías jam tpaty ja kyutujktakn, wa'ats tyaj'o'ktaay ja tsiptuunpëtëjkëty mëti'ipë ënäty ja tyeety të yaj'o'kxëtyën.

⁶Je'eyëp ko ja yu'unk y'ëna'këty ja yaja'ay o'kpë ka'ap ojts tyaj'o'kë, yë'ë ojts tpatuny ja ënä'ämën, ma ja Wintsën y'ënänyën: Yë teety taak ka'ap tjëkyepy tkukëpätëty ja nyëë pyoky ja y'u'unk y'ëna'k ets näjyëtu'un ja u'unk ëna'k ka'ap tjëkyepy tkukëpätëty ja tyeety tyaak ja nyëë pyoky, ja ja'ay mëti'ipë tuuntëkoopyën yë'ë ja kyë'ëmpoky kyukëpätëp.

⁷Yë Amasías ojts tëkok tyaj'ooky nimajk mil ja Edom ja'ayëty, jam ma yajtijyën, Kaanjoy, ets tniwany ja Selá kajpn, jä'ä kë'ëm txëëwmooy Jocteel, mëti'ipë tyampaat jëtu'un yajtijpën.

⁸Ënät ok tkäjpxynyikejxy ja Joás, yë myaank yë Joacaz, yë y'ok'u'unk yë Jehú, mëti'ipë jam yajkutujkpën Israel, ma t'ënëmaayën: Ma mkaminy ets wiinxë jëjpxë yajxon näy'ijxëmëty.

⁹E ja Joás tyaa y'ëtsoowinpijtë: mijts ko jëtu'un m'ëna'any jëtu'un tpaaty tä Tu'uk yë ujts u'unk t'ënëmaayën tu'uk yë mëj kepy jampë yajpaatyën Líbano: Mo'o yë mnëëx yë nmaankës ets yë'ë to'oxytyëjk'atëty. E ko ojts tu'uk nyäxy yë mëj ujtsjëyujk jëtu'unyë tkutä'änë'ky ja ujts'u'unk.

¹⁰Ëjts n'ijxkäjpyës ko mijts mjotmëkëty ets ko tëë xyajtëkoy ja Edom ja'ayëty ets mpatëp ets mijts amëj akëjxm mnäjyawëtëty. Oy mëj'äämpy m'ëk naxëty; je'eyëp ko ënät y'oy'atëty ko jämyë mwë'ëmëty ma mtëjkën. ¿Wi'ix ko nëkoo kë'ëm yë mjotmay xy'ixta'aja'any ets näjyëtu'un yë jyotmay yë Judá?

¹¹E ja Amasías ka'ap ojts jëtu'unpë ja ayuk tmëjpëjktä'äky. Ënät ja Joás tsyo'ony ets mëët tsyiptuna'any ja Amasías, jam Bet-semes, ma ja Judá ja y'itjotmën.

¹²Ja Judá ka'ap yajmëtakë ja Israel, ënät kyäktaaytyë ja ja'ayëty ets nyëjkxtaaytyë ma tyëjkëtyën.

¹³Ja Joás, mëti'ipë jam yajkutujkpën Israel, ojts tmatsy ajuukyë ja Amasías jam Bet-semes, ja Judá yajkutujkpë ets ojts nyijkxy jam Jerusalén, ma tyaj'ëwatsyën ja mëjpotsy mëti'ipë ja naax kajpn nyapots'ajtypyën, jä'ä myëjwiinëty mëko'px xajpk, këjääpaat ja potsy tjijty, jampaat tsyo'ontä'äky ma ja tyëjk'aawën ja Efraín ets jyä'ty maapaat ja kajpnnuxën.

¹⁴Ojts tjä'ä'ajta'ay ja poop pujxn, pu'ts pujxn, mëti'ipë ënäty japën tsajptëkoty ets näjyëtu'un mëti'ipë japën ma ja kutujkëntëjkën. Ko ojts wyimpijnë jam Samaria ojts kanaak ja'ay je'eyë t'ëkjaakmajtsnë ajuuky ets ojts tmënëjkxy.

¹⁵Ja Joás ja nyikäjpxy nyimëtyä'äky, mëti'ipë tyuunën ets wi'ix winë tuunyën, wi'ix ojts mëët tsyiptunyën ja Amasías, jampë yajkutukyën Judá, jap myiinta'ay ma ja nokyën mëti'ipë nyoky'ajtëpën ja yajkutujkpë, jampë ojts y'ënä'ämtën Israel.

¹⁶Ko ojts y'o'knë, jam nyaaxtëjkëy Samaria, ma nyaaxtëjkëtyën näjyëtu'un ja yajkutujkpëtëjk mëti'ipë ënä'ämtën jam Israel. Ok ojts kyutëkëty ja myaank Jeroboam.

¹⁷Yë Amasías, yë myaank yë Joás, mëti'ipë yajkutujkën jam Judá, ojts majkmokx jëmëjt jyaakjuuky'äty ma ënäty të y'o'knën yë Joás, yë myaank yë Joacaz, mëti'ipë jam Israel yajkutujkën.

¹⁸Yë Amasías yë nyikäjpxy nyimëtyä'äky, jap myiinta'ay ma ja nokyën mëti'ipë nyoky'ajtëpën ja yajkutujkpëtëjk jampë ojts y'ënä'ämtën Judá.

¹⁹Jam Jerusalén tëë ënäty yajnikäjpxytyunë ja Amasías, paaty kyeky ets ojts nyijkxy jam Laquis; je'eyëp ko ojts ënätyë ja myëtsiptëjk pyanëjkxyë ets jam yaj'o'kë.

²⁰Ko jam yajmëtso'ony ooky kwaaykyijxy, jam yajmëja'ajty Jerusalén, jam nyaaxtëjkëy ma ja David ja nyaax kyajpnën.

²¹Ënät ja ja'ayëty mëti'ipë jam kukajpnajtëpën Judá ojts yë Azarías tnikajpxpätë ets yë'ë tkutëkëty ja tyeety Amasías ma ja kutujktaknën. Jä'ä ënäty ja Azarías ja jyëmëjt majkmokx tu'uk,

²²yë'ë ojts tkoj'oyë jatëkok ja kajpn mëti'ipë yajtijpën Elád, mëti'ipë ja Judá jyä'ä'ajtypyën.

²³Ma myajkmokx jëmëjtën ma tyëkën yajkutujkpë yë Amasías, yë myaank yë Joás jam Judá; jää ojts tyëkë yajkutujkpë yë Jeroboam, yë myaank yë Joás mëti'ipë ënä'ämën jam Israel ets jä'ä jam yajkutujky Samaria wëxtyikxy tyu'uk jëmëjt.

²⁴Je'eyëp ko ja tyu'unën kyajpxën ka'ap ojts ja Wintsën oy t'ixy, jä'ä ko ka'ap t'ëxmajtsy ja pokytyu'un pokykyajpxën mëti'ipë ja Jeroboam, Nadab ja myaank tyuktuuntëkooyën ma ja Israel ja'ayëtyën.

²⁵Ja Jeroboam ojts jatëkok ja tsëpa'an tpëjktä'äky ma ja Israel ja nyaaxjotëtyën, tsyo'ontä'äky jam Hamat ets jyä'ty Arabá mejy ëkë'ëm, timjëtu'un tä ënäty ja Wintsën të tnikäjpxyën, mëti'ipë jam Israel yaj'ëwtajtpën, mëët ja tyuunpë Jonás, myaank yë Amitai, jampë kyukajpnëtyën Gad-héfer.

²⁶Jä'ä ko yë Wintsën tëë ënäty t'ixy wi'ix ja Israel kajpn o'ktëy jyajnën kyëpäjnën, mëti'ipë ka'ap ninu'un pën të tjëkyepy tkukä'äk tkuputëtyën ja ëyo'on jotmay ets ko yë Israel ka'ap nitiiputëjkën të tpaaty.

²⁷Ënät tputëjkëy ets tmooy ja jotkujk'ajtën, ko nyitsiptuunëtë yë Jeroboam, myaank yë Joás, jä'ä ko yë'ë ka'anëm ënäty tuknipëjktaakënëm tjo'otsa'any ja Israel kajpn.

²⁸Ja nyikäjpxy nyimëtyä'äky ja Jeroboam, mëti'ipë tyuunën ets wi'ix ojts winë tunyën tkäjpxyën, ma tsyiptuunyën ets wi'ix ojts jatëkok tjä'äpëkyën ja Damaskë kajpn ets ja Hamat kajpn mëti'ipë ja Israel ja'ayëty jyä'äy'ajtën, jap myiinta'ay kuja'ay ma nokyën mëti'ipë nyoky'ajtëpën ja yajkutujkpëtëjk mëti'ipë ojts jam y'ënä'ämtën Israel.

²⁹Ko ja Jeroboam ojts y'o'knë, jam tyajnaaxtëjkëy ma ja yajkutujkpëtëjk jam të nyaaxtëkëtën, mëti'ipë ojts jam tyuntën Israel. Yë'ë kutëjkëyë yë myaank Zacarías.