Read Biblia Mixe de Quetzaltepec 2 Reyes 17 Bible Online

2 Reyes 17 - Biblia Mixe de Quetzaltepec bible

2 Reyes 17

¹Ma ënäty myajkmäjtsk jëmëjtpetyën, ma yajkutukyën ja Acaz, jam Judá; jää ojts tyëkë yajkutujkpë yë Oseas, myaank yë Elá jam Israel ets taxtujk jëmëjt jam yajkutujky Samaria.

²E ja tyu'unën kyajpxën ka'ap ojts ja Wintsën oy t'ixy; je'eyëp ko ka'ap tyimjëtu'unëty tä ënäty ja myëku'uktëjk winë të tuntën, mëti'ipë të yajkutuktën jam Israel.

³Yë Salmanasar, jampë y'ëne'emyën Asiria, ojts tnitëkë yë Oseas jam kyajpnjotm ets ka'ap tyajmëtäky, paaty yë Oseas jam ijty kyëpety ets yë'ë ojts tmëmëtoy yë Salmanasar.

⁴Yë Oseas ojts tëkok tjanikäjpxytyunë yë Salmanasar, je'eyëp ko yë Salmanasar ojts ënätyë tnijawë ko yë Oseas tëë ënäty jyä'äy tyuknikexyë jam So, mëti'ipë yajkutujkpën jap Egiptë; ojts näjyëtu'un tnijawë ko yë Oseas ka'ap ënäty y'ëkkëpäjnë ma ja yajkutujkpën Salmanasar. Ënät ja Salmanasar ojts tyajnitukë ets Oseas yajtsumëty;

⁵ok tnitëjkëtyääy ja naax kajpn oymyëti'ipëty, ja Samaria kajpn tëkëëk jëmëjt ojts natuky tyaj'ity.

⁶E ma tyaxtujk jëmëjtpäjtnën ma ja Oseas yajkutukyën, ja Asiria yajkutujkpë jää ojts tmëmëtaknë ja Samaria ja'ay ets ja Israel ja'ayëty ets tyajnëjkxtaay ni'ëmukë jam Halah, ma ja Habor ja y'itjotmën, jam Gozán ma ja mëjnëë jyënäkyën, mëti'ipë nyiwantëpën ja Medos ja'ayëty.

⁷Yë Israel ja'ayëty paaty ojts jëtu'un jyatë kyëpätë jä'ä ko ojts ja Wyintsën tmëpokytyuntë, mëti'ipë jap Egiptë yajpëtsëëmëtën, ma ja faraón yajkutukyën; ojts t'ëwtajnëtë oynatii,

⁸jëtu'un ojts winë tuunëtë tä ja naax kajpn ja jyot wyinma'anyëtyën ets ja tyu'unën kyajpxënëtyën mëti'ipë ënäty ja Wintsën të t'ëxwojpta'ayën ma yë'ëjëtyën; jëtu'un tä ënäty myinyën kuja'ay kukeetsy ma ja ënä'ämën kutujkënën mëti'ipë ja yajkutujkpë ja'ayëty yajwë'ëmtën.

⁹Yë Israel ja'ayëty ojts tëkatsypë ja aaw ayuk tuknipëtsëëmnëtë ja Wintsën, xii yaa ojts muum tkojnëtë ja tuuntakn kajpxtakn ma kyajpnëtyën, nän timjëtu'un ma ja këwent'ajtakn tmëët'atën ets ma ja itjotmën mëti'ipë këwent'atyën.

¹⁰Ojts ja tsaapotsy muum tpëjktaknëtë mëti'ipë y'ëmaaytyijtëpën ets ojts tyajnikojtutnëtë ja Aserá, jam muum tunkëjxm ets jam muum kepypya'tkë'ëm,

¹¹timjëtu'un ojts winë t'atuunajxnëtë tä ja kajpnëtyën mëti'ipë ja Wintsën ënäty të t'ëxëëk'ixtën ets ja naax kajpn mëti'ipë ënäty të t'ëxwopyën; ojts twino'k twinxaamnëtë mëët ja poom, ka'apë wyintsënëtyën, tuunëtë tkajpxnëtë ja ka'apë tyuunëtyën ets tyajjoot'anpëktë jëtu'un ja Wintsën mëjwiin këjää.

¹²Ojts t'ëwtajnëtë ja naaxpotsy ets ja kepy tsyetsy, mëti'ipë ënäty mëktä'äky ja Wintsën të tyajkupokyën.

¹³Tëë ënäty ja Wintsën ja jyot wyinma'any tjaakmëktuny, ko tkejxy ja kyäjpxynyajxpëtëjk ets ja wyijyjyä'äytyëjk ko t'ënëmaay ja naax kajpn ets jeexyë jyootwinpitë, tyaj'oyëtë ja jyot wyinma'any, ja nyë'ë tyu'ujëty; tuntë jeexyë jëtu'un winë tä ja ënä'ämën tëyajtën myinyën, mëti'ipë ojts tjatukmëwë'ëmyën ja y'apëty y'okëty ko ja Wintsën ja kyäjpxynyajxpë ojts tjakajpxwa'kxtë ja oypyë ja aaw ayuk.

¹⁴E yë'ëjëty ninu'un ojts kyaja'akyukëtë, ni'ikyë ja jyot wyinma'any juun tpëjkta'aktë timjëtu'un tä ja y'ap y'okëtyën ets ka'ap ja Wintsën ojts t'ëktuk'ijxpäjnëtë;

¹⁵jëkäm jëxkë'ëm tpëjktaktë ja ënä'ämën tëyajtën, ja käjpxytyu'unën mëti'ipë tyuuntën ja y'apëty y'okëty ets ja ënä'ämën mëti'ipë ënäty të yajmo'otën. Jä'ä pyanëjkxtëjkëtyë ja tios ka'apë nitii tsowëtyën ets ojts ja jyot wyinma'any tyajtëkoytyë, tuunëtë näjyëtu'un winë tä ja naax kajpnëtyën jampë ënäty winkon yajpaatën, mëti'ipë ja Wintsën ka'ap ninu'un të tyajkutukyën tuntëty.

¹⁶Wa'ats tja'atyëkooytyääytyë ja Wintsën ja y'ënä'ämën tyiyajtën ets ojts tyajkojtë mäjtsk ja tsajpkaa aak pujxnëmpë; ojts tyajnikojtu'utë ja Aserá, ja mëtsa'a ets Baal.

¹⁷Ojts ja y'u'unk y'ëna'k tyajnitooynyëtë, tyajknëtë ets wyintsë'kën'atëty, ojts tjajtnëtë wi'ix winë tnajtsjawëtëtyën ets ojts tnija'awënyëtë wi'ix ja kë'ë tyajmëtya'aktëtyën, tuunëtë tkajpxnëtë ja ëxëëkpë, mëti'ipë ja Wintsën ojts tukyajjoot'anpëktën.

¹⁸Paaty ojts ja Wintsën tukjoot'anpëjknë ja Israel ja'ayëty, tyajkutujknë ets o'ktëy jyajnëtëty; paaty ojts ja Wintsën y'ëxwojpënëtë jam ma ënäty yajpaatën, yi'iyë jaakwë'ëmtë ja Judá ja'ay.

¹⁹E ja Judá ja'ay nän kä'äpyëm ojts myäyë tpatuntëty ja Wintsën ja y'ënä'ämën tyiyajtën, jä'ä ojts tpanëjkxtë ja ëxëëktu'un ëxëëk kajpxën mëti'ipë ja Israel ja'ayëty tyuuntën.

²⁰Paatykyëjxm ja Wintsën ojts tim nyas'ijxënyë ja Israel ja'ayëty ets ëxëëk jyajtë kyëpäjtë, ma ëxëëk tyuunëtën ja mëti'ipë yajja'ay'o'ktëpën; koonëm jam y'ëxwojpëtë ma ja nyaax kyajpnëtyën, kyë'ëyajktaayëtë ma ja mä'tspëtëjkëtyën y'ijxwojpëtë Wintsën wyintum.

²¹Ojts ja David ja kyutujkën yajpëjkë ma ja y'u'unk y'ëna'kën ets jä'ä nikajpxpäjtë ja Jeroboam yajkutukëty, yë Nadab, yë myaank, mëti'ipë yajpokytyunëtën.

²²Jëtu'un'äämpy ja Israel ja'ayëty ojts pyokytyuntë, tä ja Jeroboam ënäty të pyokytyunyën ets ëxëëk në'ë ëxëëk tu'u kä'äpyëm ojts t'ëxmatstë.

²³Tä ja Wintsën ojts tim'ëxmajtsnë ja Israel kajpn, jëtu'un tä ënäty të t'akäjpxyën mëët ja kyäjxynyajxpëtëjk, paaty ojts ja Israel ja'ayëty yajmënëjkxnëtë tsumy matsy jam Asiria, ma tyampaat yajpaatën.

²⁴Ja yajkutujkpë jampë y'ëne'emyën Asiria, ojts tyajnëjkxy yë ja'ay mëti'ipë kukajpnajtëpën Babilonyë, Cuta, Avá, Hamat ets Sefarvaim, yë'ë jam kyukäjxëy ma ja Samaria kajpnën, ijxtëm jeexyë jam yë Israel ja'ayëty y'itën ets jam tsyënaaytyaknpëjktë.

²⁵E jä'ä ko ya'atë ja'ayëty ka'ap ijty Wintsën t'ëwtatë, paatykyëjxm ojts yë Wintsën tyuknikäxëtë kaa ets jëyujk ëwa'anëtypë ets ojts kanaak yajtsu'utstë.

²⁶Ënät ojts tninëjkxtë ja Asiria yajkutujkpë ets tuk'ëwa'anëtyë: Yë ja'ay mëti'ipë jam të xykyuwowën ma Samaria kajpnën ets jam tsyëënëtëty, ka'ap tnijawëtë wi'ix yë Israel ja'ayëty yë Wyintsën t'ëwtatën; e jä'ä ko ka'ap jyänty yajnijawë yë'ë tëë tkexy yë kaa ets jëyujk ëwa'anëtypë ets nëkoo të y'ëkyaja'ay'o'knë.

²⁷Ënät ja Asiria yajkutujkpë ni'ënä'ämëy: Käxtë tu'uk yë teety mëti'ipë tsumy të myinyën jam Samaria ets jam nyëjkxëty jatëkok tsënääpyë, yë'ëts yaj'ijxpëkëp wi'ix tääpë ja'ayëty t'ëwtatën yë Wyintsën.

²⁸Ënät tu'uk tjanty kyäjxtë ja teety, mëti'ipë ënäty jam Samaria të tyajtsoontën tsumy matsy ets tsyënaaytyaknpëjky jam Betel, yë'ë ojts tyukni''ixëtë wi'ix ja Wintsën t'ëwtatëty.

²⁹E ja ja'ayëty këëkjä'ä ojts ja kyë'ëmtios tyaj'o'oyënëtë maajaty kajpn tsyoontën ets jam tpëjktaktë tunkëjxm kopkkëjxm ma ja tsajptëjkën mëti'ipë ja Samaria ja'ayëty të tkojtën.

³⁰Ja mëti'ipë tso'ontëpën jam Babilonyë ojts tyajnikojtu'utë ja tyiosëty mëti'ipë tyijtëpën Sucot-benot; ja mëti'ipë tso'ontëpën jam Cuta, ojts tyajnikojtu'utë ja tyiosëty mëti'ipë tyijtëpën Nergal; e ja mëti'ipë tso'ontëpën jam Hamat, ojts tyajnikojtu'utë ja tyiosëty mëti'ipë tyijtëpën Asimá.

³¹E ja mëti'ipë tso'ontëpën jam Avá, ojts tyajnikojtu'utë ja tyiosëty mëti'ipë tyijtëpën Nibhaz ets ja Tartac; ja mëti'ipë tso'ontëpën jam Sefarvaim nyo'ktëp xyaamtëp ja y'u'unk y'ëna'këty ets tukwintsë'ëkëtë ja tyiosëty mëti'ipë tyijtëpën Adramélec ets ja Anamélec.

³²Näy y'ëwtajtëp myëjja'awëtyëp ijty ja Wintsën, ojts jämyë tuknipëktë ja teety ets ja kajpxtakën tyaj'apaatëty janaam jatsojk ma ja nyitsajptëjkën ja awinax ka'apë Wyintsënëtyën.

³³Yë'ë ojts ja Wintsën tjajanty'ëwtatë, je'eyëp ko ka'ap ojts t'ëxmatstë ja kyë'ëmtiosëty, mëti'ipë ënäty yë'ëjëty y'ëwtajtëpën ma ja nyaax kyajpnëtyën.

³⁴Tyampaat je'eyëm jëtu'un tyajtu'uye'eytyë, ka'ap yë Wintsën t'ëwtatë ets ka'ap tuntë jëtu'un tä ja Wintsën ja y'ënä'ämën tyiyajtën myinyën, ni tkatuntë këwentë mëti'ipë ojts ja Wintsën tjatuk'ëne'emyën ja Jacob ja y'u'unk y'ëna'k, mëti'ipë yajxëëwpäjtën Israel kajpn.

³⁵Ko ja Wintsën tuuny ja käjpxytyu'unën mëët yë'ëjëty, ojts tuk'ëne'emy: Këtii wiink tios xy'ëwtatëty ets xymyëjjawëtëty, ka'ap xymyo'otëty yë wyintsë'kën.

³⁶Ëjtsyë je'eyë xywintsë'ëkëtëp, mëti'ipë miits mWintsën'ajtëpën, mëti'ipë ojts mjuutëtën jap Egiptë, mëët tu'uk ja mëj'ajtën mëjwiinpë këjääpë. Ëjtsyë mëpaat xy'ëwtatës, xymyëjjawëtës ets xytyukwintsë'ëkëtës winë.

³⁷Ets ja n'ënä'ämënës ntëyajtënës yajxon mëpaat xykyuuytyuntë, tëkokyë ja mëti'ipës të n'ëy të nkäjpxyën ets ntukni''ixëtën yë'ë jëtu'un mpanëjkx mpaye'eytyëp ets këtii mëpaat wiink tios xy'ëwtatë.

³⁸Këtii xyjyä'äytyëkoytyëty ja käjpxytyu'unën mëti'ipës të ntunyën mëët miitsëty, këtii wiink tios xy'ëwtatëty,

³⁹ëjtsyë jëtu'un xy'ëwtatëp, mëti'ipë Wintsën'ajtpën, jëtu'un'äämpy tjëkyäpëty miitsëty nyajtso'oktëty ma ja mëtsipëtyën.

⁴⁰E tääpë ja kajpn ka'ap ojts ninu'un jëtu'unpë ja aaw ayuk tmëjpëjkta'aktë, ni'ikyënëm ojts tpanëjkxtëkëtë ja ëxëëk në'ë ëxëëk tu'u, ëpëky näjyëtu'un t'ëwtajtë ja Wintsën ets ja wiink tios. Ja y'u'unk y'ëna'këty näjyëtu'un winë tuuntë tä ja y'ap y'okëtyën, tyampaat je'eyëm jëtu'un tyajtu'uye'eytyë.