Read Biblia Mixe de Quetzaltepec 2 Reyes 19 Bible Online

2 Reyes 19 - Biblia Mixe de Quetzaltepec bible

2 Reyes 19

¹Ko yë yajkutujkpë Ezequías ja ayuk pyatë, ënät ojts ja mëkjotmay tyuktëkëty ets ja wyit tyujkxy tkë'tstaay mëët ja jotmay aakjä'ä tyuktëjkëy ja xa'kwit mëti'ipë kuumpën u'kxpën ets ojts nyijkxy ma ja tsajptëjkën.

²Tääts tkejxy ja Eliaquim mëti'ipë kutujkëntëjk kyëwent'ajtypyën, ja Sebná mëti'ipë ja noky myëët'ajtypyën ma jap winë këxja'ay myinyën ets ja teetytyëjkëty mëti'ipë mëjja'ayëtyën ets ja wyit tuktëjkëtyë ja këëtsëtypë ets ja xa'kwit ets ojts tninëjkxtë ja Jeséas käjpxynyajxpë, yë Amós yë myaank,

³ets ja yajkutujkpë ja y'aaw y'ayuk tukmëtowa'antë: Tyam o'ktëy ëëts njatë nkëpätë, ja tëytyu'unën jä'äs yam nmënajx nyajnajxtëp ets jëtu'un ëëts näjyawëtë naaxkutij naaxkumatsëpë, tä tu'uk yë to'oxytyëjkën mëti'ipë tëë myëjaawkëxyën ets u'unk maay yajminäämpy naaxwiiny.

⁴Jääpëk yë mWintsën jeexyë të tmëtoy, wi'ixjaty të y'ënä'änyën yë Asiria ja'ay, tsiptuunpë wintsën, mëti'ipë je'eyë të myinyën ets ëxëëkjaty të tijy ja Wintsën juukpyë ets tkumëtowëty mëti'ipë yë Wintsën kë'ëm të tmëtoyën. E tyamts myajpëjktsoy ets xymyëkajpxëty ja Wintsën ets xykyukajpxta'akëty ja ja'ay mëti'ipë të jyaakwë'ëmtën juuky.

⁵Ënät ja wintsëntëjk ojts tninëjkxtë ja Jeséas, mëti'ipë ja yajkutujkpë Ezequías ojts tkexyën,

⁶ets ja Jeséas y'ënëmaayëtë: Jëtu'un xy'ëtsowtëty ja mwintsënëty ko yë Wintsën jëtu'un y'ënä'äny: këtii nëkoo xytsyë'ëkëty xyjyawëty ja aaw ayuk mëti'ipë Asiria tsiptuunpë të tkäjpxyën, maas ëjts nëkoo je'eyë të xynyi'ojën ets të xykyajpxpaatyën.

⁷Ëjts yam kë'ëm ntuknipëjktaakëjäämpy ets tmëtoowpaatëty tu'uk ja ayuk mëti'ipë atsip'atëtëpën ets wyimpitëty ma nyaax kyajpnën, jamts nëjkx pën yaj'ookyë.

⁸Ja Asiria tsiptuunpë ojts tnijawë ko ja Asiria yajkutujkpë tëë ënäty jam tsyoony Laquis. Ënät jam tsyo'ony Jerusalén ets jam Libná tpaty ma ënäty jam nyitsiptunyën.

⁹Jam ojts ja Asiria yajkutujkpë pyäätyë ja ayuk, ko yë yajkutujkpë mëti'ipë jap tso'onpën Etiopíë tëë mëët tsyoony ja myäytsyiptuunpë ets tnipëtë'ëka'any ja Asiria yajkutujkpë. Tääts jatëkok ja Asiria ja'ay yajkutujkpë tkäjpxynyikejxy ja Ezequías mëti'ipë jam yajkutujkpën Judá,

¹⁰ets t'ënëmaay: Yë mWintsën jëtu'un m'ënë'ëmxëty ko ka'apës yë mnaax mkajpn xymyäyëty këtiijë, je'eyëp ko tyam mijts yajxon n'ënëëmë ko këtii xymyëpëjkëty yë y'aaw y'ayuk.

¹¹Mijts wa'ats xynyijawë tiijaty yë Asiria kyutujkpëtëjkëty të tuntën maajaty yë naax kajpn të tnitëkën. ¿Ets ënät mijts ka'ap wi'ix mjatëtyë?

¹²¿Tiosëm jëtää ojts tputëkë ja kajpn mëti'ipëjaty ja Asiria ja'ay nyitëjkëtyë, ëëts yë nteety n'apëty: tä yë Gozán kajpnën, Harán kajpnën, Résef kajpnën ets ja ja'ayëty jampë ijty yajpaatën Bet-edén, mëti'ipë jam tsënaaytyën Telasar?

¹³¿Maajën ënät tyam ja yajkutujkpëtëjkëty mëti'ipë jam tso'ontëpën Hamat, Arfad, Sefarvaim, Hená ets Ivá?

¹⁴Tä ja Ezequías ojts ja noky t'ëxajë ets tkäjpxy, tä ojts tmënëjkxy ma ja tsajptëjkën ets jap twijtstëëy Wintsën wyintuuy,

¹⁵ënät ja Wintsën t'ënëmaay: Wintsën mëti'ipë y'ëwtajtëpën yë Israel ja'ayëty, ma xyaj'ityën ja mkutujktakn jampë itkujky yajpaatyën ma käkn mëëtpë ja mkukajpxpën: mijts tu'uk mwintsën'ajtp ma tëkokyë yajkutujkpëtëjkën mëti'ipë tuuntëpën naaxwiiny naaxkëjxy; mijts myajkoj yë tsajp ets naaxwiinyëtë.

¹⁶Mëtoow'it, Wintsën ets ja'akyukë ya'atë ja nnu'kxtakënës, ni''ijxwa'kxkës ets ni''ijxkëtakës. Mëtoow'it mëti'ipë ja Senaquerib të tkäjpxyën, mëti'ipë të tukmëkäxën ja tyuunpë ma ëjtsën ets mijts myajni'oj myajniyaaxë, mijts Tios mëti'ipë juukyën.

¹⁷Wintsën, tyam ntuk'ëwaanë, ijxtëm y'ënä'änyën ko yë yajkutujkpë mëti'ipë jam të tyuntën ma Asiria ja'ayëtyën tëë kanaak yë naax kajpn tyajkutëkoytyë ets mëët ja kyam tyu'ujëty, janty tëy yë'ë,

¹⁸ets ko tëë ja tyios tyajkutëkooytya'atë jëënjoty, jä'ä ko ka'ap ja tyios'atë, aakyë'ë ja tsaatsetsy, mëti'ipë ja ja'ay kë'ëm y'oytyuunpyën. Paatykyëjxm të timyajkutëkoytyë.

¹⁹E tyam mijts myaj'amëtoy myajpëjktsoy Wintsën, ma mijts myaj'ëwtatyën, koos xynyiwaantu'utëty ets ëwaatsëtuuy xyajwë'ëmtëtyës këtiipës tääpë ja'ayëty ëxëëk xytyuntëty, jëtu'un tëkokyë ja naax kajpn tnijawëtëty ko mijts tu'uk mWintsën, mëti'ipë mëpaat yë naaxwiinyëtë ja'ay t'ëwtatyën.

²⁰Ënät ja Jeséas tkäjpxynyikejxy ja Ezequías ets t'ënëmaay: Jëtu'un yë Wintsën y'ënä'äny, mëti'ipë yë Israel ja'ayëty y'ëwtajtëpën: Tëës nyajnaxy ja m'amëto'ow mpëjktso'owën ma xynyikäjpxyën ja Senaquerib, mëti'ipë jam yajkutujkpën Asiria.

²¹Jëtu'un ja Wintsën kyajpxwinpity, ma tnikäjpxyën ja Senaquerib mëti'ipë jam yajkutujkpën Asiria: Ja naax kajpn mëti'ipë yajtijpën Sión, jëtu'un npëjktakmëty tä ja to'oxy'ëna'kën, mëti'ipë je'eyë mnëxikpy mtukxikpyën mijts Senaquerib. Yë Jerusalén je'eyë kyëpajk timjyëpipy mëët ja mmëj'ajt mkëjxm'ajtën ko mkäknë.

²²¿Pënën määpy mtäjpy nëkoo ëxaty mnëmääpy ets mtukxi'kpy? ¿Pënën määpy mtäjpy nëkoo mnikäjpxyp mnimëtyäkpy ets xywyinkäjpxy xyjyëjpkäjpxy amëj akëjxm? Yë'ë të xykyamëj'ixy ja mëti'ipë kënu'kxy mëj Wintsënën, mëti'ipë y'ëwtajtëpën ja Israel ja'ayëty.

²³Mëët ja ja'ay mëti'ipë mtukmëkäjxëpën ja m'aaw m'ayuk yë'ë mëët ja Wintsën ëxaty të xy'ënëëmë. Të m'ëna'any: Mëëtës ja mmaypyujxn wintëkäämpë, mëti'ipës nmëtsiptuunpyën, ¿tiijës xykyamayëp? Ëjts oyës muum tunkëjxm kopkkëjxm mpäta'anëty, oy jënu'un tyimtsipëty jam Líbano. Xymyäyëpës yë npuxëty nka'atsëty yë kepy oyëtypë mëti'ipës ntimtsyojkpyën, tä yë tsiinën ets ajë kepyën. Ëjts jampaatës nja'ty ma ja këjxmëtypë ja kopkën, ma janty yenyëtypë kepyën mëti'ipë oyëty këxë'kpën tä yë ujtskam pëjykyamën.

²⁴Tëës muum nja'ty kajpntum etsës të nyaj'ëwa'atsy yë nëëjut, täätsës të n'uuky këtii pën myëjëty, jotkujkës të nye'ey të nnaxy jap Egiptë etsës ja nyëëwok të nyajtëtstaayë.

²⁵¿E mijts ka'ap xynyijawë, ko ëjts jëtu'un mëti'ipë të tyajkutukyën ets mmëta'akëty ets xytyunëty tëkokyë mëti'ipë të xytyunyën? Ëjts tëëyëpës ntuknipëjktaakë ets tëëjës jëtu'un nyajtuny nyajjatyë; paatykyëjxm mijts may ja naax kajpn të xyaj'atëkoy mëti'ipë ënäty mëk ets ta'tspëky të nyätyijyën, tä të y'awinpijta'atë je'eyë potsykyopkën.

²⁶Ja ja'ayëty mëti'ipë ënäty jam tsënaaytyëpën, ka'ap ojts ja mëk'ajtën t'ëkmëët'ajnëtë, je'eyë ja tsë'ëkë tyuktëjkëtyääyëtë ets ja mëktsëtyu'un, jëtu'un të jyaak'itë tä yë ujts yonyën kamjotm tu'ujotm, tä yë mëëynyakën ets tä yë aay ujts mëti'ipë tëjkëjxm muum yoonpën, wäänë y'ity tääts jëënpoj jëtu'unyë të yajtëtsta'ayë.

²⁷Ëjts wa'atsës ntyätynyijawë tii mtuunpyën ets wi'ix may mtajyën; tëëjës nijawë koos mijts të xytyukjoot'anpëky.

²⁸E jä'ä ko tëëjës nijawë wi'ix mijts ja joot'an të mtuktëkëtyën ets wi'ix nëkoo m'atoy m'apojyën, tyam jëtu'un yam mijts ntuna'any tä ja'ay jyëjp yaj'ajëëpyën mëët yë pujxn, ëkë tä jëyujk yaj'awo'onë'ëkyën këtiipë muum kyuye'eyëty ets jatëkok mwinpitëty maatsow të minyën.

²⁹Tä ja Jeséas t'ënëmaay ja Ezequías: Ya'atë jëtu'un ja ijxpäjtën yakäämpy mëët ja mëti'ipë tunan jatanëpën: Ya'atë jëmëjt ets tääpë myinyën yë'ë nëjkx xykyäytyë xy'uuktë ja tsajpmok mëti'ipë kë'ëm yoonpën, kom tëkëëk jëmëjt jyëkyejpy myuunëtëty mtuunëtëty ets mnipnëtëty mkojnëtëty, xyajpëtë'knëtëty ja mpëjktä'äkyëty, jyëkajpnëp xypyäntëty xykyojtëty ja m'aay mkepyëty.

³⁰Ja ja'ayëty mëti'ipë jam Judá të jyaakwë'ëmtën juuky yë nyaxtë tyam tä tu'uk yë aay ujtsën: Mëti'ipë tiktskäkpën ets tëëmpäjtpën.

³¹Jä'ä ko jam wyë'ëma'any Jerusalén, ma ja Sión kopkën, nëjkxëp näjyëtu'un jyam'aty ja ja'ayëty mëti'ipë të tsyo'oktën o'kënjëjp'am. Ko ënäty jëtu'un jyäty kyëpety yë'ëkyëjxm ko ja Wintsën ja tsyojkën jya'awën maaytyääyëp winë.

³²E ja Wintsën ojts tnikäjpxy wi'ix jyata'any kyëpäta'anyën ja Asiria yajkutujkpë: Ka'ap nëjkx tyëkë jam Jerusalén, nitu'uk nëjkx ja tyi'pxn tkati'pxë'ëky; ka'ap nëjkx tyajtuny ja mëti'ipë nätyuk'akëëytyujkëpën ets nän ka'ap nëjkx ja mëjpotsy ye'eypyäjn jam tpëjktä'äky ma ja kajpn pa'ajën.

³³Yë'ë tu'u nëjkx jatëkok tpëky ko ënäty wyimpijnë, ma ja tu'ujën mëti'ipë të tpaminyën; ka'ap nëjkx yaa tyëkë ma ya'atë kajpnën. Ëjts mëti'ipë Wintsën'ajtpën, ëjts ënaanp.

³⁴Ëjts nkuwa'anäämpyës ya'atë naax kajpn, etsës nyajtso'oka'any, mëët koos n'oyjyawë ja ntuunpës David ets mëët ko ja nxëëwës mëj'äämpy nyaj'ita'any.

³⁵Jä'ä tsu'um ja Wintsën ja kyukäjpxy ojts tyaj'o'kta'ay ja Asiria ja'ayëty ma ënäty jam jyajta'aktën, mëko'px ja tëkë'px mëkoxk mil ja Asiria tsyiptuunpëja'ayëty y'o'ktë, komjëpom may o'kpë ojts kyuxëënyë.

³⁶Ënät ja Senaquerib ojts tyajpëtë'knë ja y'ijtakn ma ënäty jam ja tsyiptuunpë të y'ijta'aktën ets ojts nyëjkxnë jam Nínive.

³⁷E tu'kxëëw tu'kjëmëjt, jam ënäty yajpaaty tsajptëkotm, jä'ä jap y'ëwtajtyp ja Nisroc, mëti'ipë yë'ë wyintsën'ajtëpën, tä jam tyukja'ajtë nimäjtsk ja myaank mëti'ipë xyëëwajtëpën Adramélec ets Sarézer, mëti'ipë yaj'o'kën, ja tuuntëkoopyë ënätyë ojts kyakojnëtë ets jam nyëjkxtë Ararat itjotmën. Ma ja kutujktaknën yë'ë ojts kyutëkëty ja myaank Esarhadón.