Read Biblia Mixe de Quetzaltepec 2 Reyes 20 Bible Online

2 Reyes 20 - Biblia Mixe de Quetzaltepec bible

2 Reyes 20

¹Jä'ä xëëw jä'ä jëmëjt ojts yë Ezequías pya'ampety mëk, ko ja käjpxynyajxpë Jeséas tnija'awëy, Amós yë myaank, ko tëë ja Ezequías pya'ampety, ënät ojts tninëjkxy ets t'ënëmaay: Tuk'ëwaanë yë m'u'unk mto'oxytyëjk tii mëpaat tuntën jä'ä ko mijts m'ookaanp yë'ë; ka'ap mtso'oka'any.

²Ko jëtu'un ja Ezequías tmëtooy, tääts kyi'itwinpijty, jam kyëx'ixy potsywinm ets tyëjkëy kajpxtakpë tmëkäjpxy ja Wyintsën:

³Wintsën tyam mijts n'amëtoy npëjktsoy ets xyjyä'ämatsëtyës, xyjyä'ämyätsëty näjyëtu'un wi'ix mijts oy të nmëtunyën, tëë nmëmëtoy, tëëjës ntuny winë tä mijts xy'oy ixyën. Tääts tyëjkëy jëëpyë yaxpa.

⁴E kajnëm ënäty ja Jeséas tuknajxta'aynyëm ja tëja'aw mëti'ipë jam yajpatpën ma ja akujktëjkën, ko ja Wintsën ojts myëkäjpxyë ets y'ënëmaayë:

⁵Wimpit ets ënëëmë yë Ezequías, mëti'ipë nyiwintsën'ajtypyën yë nnaaxës nkajpnës: Yë Wintsën, mëti'ipë m'apteety David y'ëwtajtën, jëtu'un y'ënä'äny: Tëës nmëtoow'ity ja mjëëytyak mnu'kxtakën ets mjë'ëyën myaxën. Oy'atëp, tyam nyajtso'okëty, ko jyatëkëëk xëëw'atëty jyëkyäpëp mnëjkxëty ma tsajptëjkën.

⁶Ja majkmokx jëmëjt yam njaakyajni'ikëja'anyës ja mxëëw mjëmëjt. Mijts ets ja Jerusalén kajpn tyam nyajtso'oktëty ma ëxëëk ja Asiria yajkutujkpë mjatuna'anëtën, ëjts kë'ëm nkëwent'atäämpyës ja naax kajpn mëët koos ja David oy ntsojky nja'awëy ets koos kë'ëm nätsyokyë.

⁷Tä ja Jeséas tni'ënä'ämëy ets nëjkx tma'atstë ja higo të'ëts, yë'ëts tyuknipëktëp ja tsëtyut ma ënäty ja Ezequías pyikyën ja nyini'kx, jëtu'un ja yajkutujkpë tsyoky y'akëtäky.

⁸Tä ja Ezequías tyajtëëy ja Jeséas: ¿Tiijës ntuk'ixëp, koos ënäty ja Wintsën xyjyänty yajtso'oky ets ko kom tëkëëk xëëw jyëkyäpëp nëjkxëtyës ma ja Wintsën ja tsyajptëjkën?

⁹Tä ja Jeséas y'ëtsooy: Ya'atë mwa'anëp ijxpät ets xynyijawëty ko ënäty ja Wintsën myajtso'okyë: ¿Mtsojkpy ets äpk nyajtsnëjkxëty tu'kja'aytyänën, ëkë mtsojkpy ets wyimpitëtyë nän tu'kja'aytyänënë?

¹⁰Ets ja Ezequías y'ëtsooy: Ko nyajtsnëjkxëty ka'ap tsyipëty. Yë'ë tëy ko wyimpitëty ixtëkë.

¹¹Ënät ja käjpxynyajxpë tyëjkëy kajpxtakpë, t'amëtoy tpëjktsoy ja Wintsën ets tyajwinpitëty ja äpk ixtëkë tu'kja'aytyänë, ja äpk ojts jyänty ixtëkëye'ey tu'kja'aytyänë.

¹²Jä'ä xëëw jä'ä po'o yë yajkutujkpë Merodac-baladán, yë myaank yë Baladán, mëti'ipë jam ënä'ämpën Babilonyë, ojts tnijawë ko yë Ezequías ënäty jam pyikyë, ënät tkejxy yë kyukäjpxy mëët tu'uk yë näynyamo'ojë.

¹³Yë Ezequías mëët ja oyjyot oywyinma'any t'ëxajëy ja Babilonyë ja'ayëty ets tuk'ijxtaay ja wit meeny ets tëkokyë mëti'ipë myëët'ajtypyën, tä yë pu'ts pujxn, poop pujxn, mëti'ipë oy xu'kpën; jë'kxy pëky ets nëë oyëtypë xyuukyën ets mëti'ipë ënäty jap pëjkë'ëky yaj'ijtypyën ja tuunpäjn mëti'ipë yajtuuntëpën ko tsyiptuntë. Wa'ats winë tuk'ijxtaay, nitii ojts tkayajninaxy mëti'ipë ka'ap tuk'ijxyën.

¹⁴Ënät ja Wintsën ja myëtuunpë Jeséas ojts tninëjkxy ja Ezequías ets tyajtëëy: ¿Maajën tääpë ja'ay tsyoontë ets wi'ix të m'ënë'ëmxëty? Tä ja Ezequías y'ëtsooy: Tääpë ja'ayëty jëkäm tsyoontë, jam Babilonyë.

¹⁵Tä ja Jeséas jatëkok tyajtëëy: ¿E tii të t'ixtë ma mkutujkëntëjkën? Tä yë Ezequías y'ëtsooy: Tëë t'ijxta'atë tëkokyë tiijaty japën. Ka'apës nitu'uk të nyajninaxy mëti'ipë ka'ap të tka'ixtën.

¹⁶Tä ja Jeséas t'ënëmaay ja Ezequías: Amëtoow'it ya'atë aaw ayuk mëti'ipë ja Wintsën jyä'ä'ajtypyën:

¹⁷Minaanp ja xëëw ma tëkokyë mëti'ipë jap ijtpën ma ja akujktëjkën, mëti'ipë të tyajmuktën ja m'aptëjkëty ets mëti'ipë tyampaat jaakmujkpën, aakjam yajmënëjkxta'aja'any Babilonyë, yaa nitii kyawë'ëma'any.

¹⁸Yë'ëpaat ja m'u'unk m'ok nëjkxëp jam tsumy matsy nyëjkxtë. Ja yä'äy'ëna'ktëjk nëjkxëp tsujktaayëtë ja ye'etyëjk'ajtënëty ets nëjkx je'eyë tmëtuntë ja yajkutujkpë jampë Babilonyë y'ëne'emyën.

¹⁹Ja Ezequías, tyaa ënäty myäy tyäjy ko ma yë'ë tyunyën ka'ap ënäty ja jëtu'unpë nyatuna'any nyajata'anyë, paaty t'ëtsooy ja Jeséas: Ja aaw ayuk mëti'ipë ja Wintsën mtukmëkäjxëyëpën oy yë'ë.

²⁰Ja nyikäjpxy nyimëtyä'äky ja Ezequías ets tëkokyë mëti'ipë tyuunën kyajpxën, wi'ix ojts ja nëëtu'u tpëjktä'äkyën ets tyaja'tyën ja nëë kajpnjoty, jap myiinta'ay kuja'ay ma ja nokyën mëti'ipë jyä'ä'ajtëpën ja yajkutujkpëtëjk jampë ojts y'ënä'ämtën Judá.

²¹Ko ja Ezequías y'o'ky, yë'ë ojts tyëkë yajkutujkpë ja myaank Manasés.