Read Biblia Mixe de Quetzaltepec 1 Crónicas 20 Bible Online

1 Crónicas 20 - Biblia Mixe de Quetzaltepec bible

1 Crónicas 20

¹Tëkok ojts tyunyë jyätyë ma ënäty xyëkopk'atyën, jää ijty ja yajkutujkpëtëjk muum nyëjkxtë tsiptuunpë. Ënät ja Joab ojts twoowtsoony ja tsyiptuunpëtëjk ets wa'ats tukjëtijtëtyääy ja Amón ja'ayëty ja y'it nyaaxwiinyëtë. Jam ojts tsyoony ets ja Rabá kajpn tnitëjkëy, wa'ats tjijtaay ja nyapots ets xit ko'ow tuuntaay. Ja David jam ënäty yajpaaty kajpnjotm.

²Tä ja David tukkujääntuty ja kyujän ja yajkutujkpë mëti'ipë jam yajkutujkpën, aak pu'ts pujxn ja kujän mëët y'oytyunyëty ets oyëtypë tsaa, tsowëtypë, jä'ä jye'emtyëty i'px majk tsimën; tääts ja David jä'ä yajtukujeeny. Ojts näjyëtu'un ja David jap winëjaty tyajpëtsëmy mëti'ipë tsoowpaatyëtyën ma ja kajpnën mëti'ipë ënäty të tyajkutëkoytyën,

³e ja ja'ay mëti'ipë käktsoktën jap kajpnjoty, yajpëtsëëm ja David ets tuunkmooytyääy, tam mëti'ipë tyuknipëjkën ets kyepyjyëëtëty, kyepykya'atsëty. David ojts ja Amón tuunkmooytyä'äy ets ojts wyimpijnë jam Jerusalén mëët ja tsyiptuunpëtëjk.

⁴Ënät tmëët'ajtë tsip mëët ja filistejë ja'ayëty jam Guézer. Jä'ä xëëw yë Sibecai, jampë kyukajpnëtyën Husá ojts tyaj'ooky ja Sipai, pajkyenyjyä'äy ijty ets o'ktëy tuuny.

⁵Ojts wiinkpë tsip tyunyë mëët yë filistejë ja'ayëty. Yë Elhanán yë myaank yë Jair ojts tyaj'ooky yë Lahmí, yë'ë Goliat yë myëkä'äx, jampë Gad kyukajpnëtyën, ja kyu'umn jëjp ëxëëk yeny ijty jëtu'un tä nyikepyën ja pi'tk, mëti'ipë wit yajtuktakpën.

⁶Ojts jam Gad wiinkpë tsip y'ity. Jam ijty tu'uk ja'aypyajkyeny yajpaaty, i'px majktaxk yë kyë'ëwa'axy tyekywyä'äxy: Tëtujkjaty ma kyë'ëjën ets tëtujkjaty ma tyekyën. Näy yë'ë pajkyenyjyä'äy ja myëku'ukëty,

⁷e ojts tëkok jam tyajjoot'anpëky ja Israel ja'ayëty, paatykyëjxm ja Jonatán yaj'o'kë, Simí myaank, yë'ë David yë myëkä'äx.

⁸Ya'atë pajkyenyjyä'äyëty, yë'ë ja Refa y'u'unk y'ok, jampë Gad kyukajpnëtyën, je'eyëp ko ojts ja David yaj'o'kënëtë ets ja David ja jyä'äy.