Read Biblia Mixe de Quetzaltepec 1 Crónicas 22 Bible Online

1 Crónicas 22 - Biblia Mixe de Quetzaltepec bible

1 Crónicas 22

¹Paaty y'ënäny yë David: Yaa jëtu'un y'itëty yë Tios ja tsyajptëjk mëti'ipë Wintsën'ajtpën ets ja wintsë'këntyakn ma ja Israel ja'ayëty tyaktëty ja jyëyujk'ooky nino'okpyë.

²Ënät ja David tyajtu'ukmujktaay ja jaaypyaat jaaypyo'kxy ets ojts tuk'ëne'emy tsyaawoptëty, mëti'ipë tunëpën ma ja Tios ja tsyajptëjk kyojja'anyën.

³Ojts näjyëtu'un may tnipëjkpety ja pujxn, mëti'ipë yajtuk'awojpmukëpën ja kepy ets mëti'ipë mëët tya'tspëkyëtyën maajaty y'ëtuka'anyën ja tëjk'aaw; yajmujk may tsuxkpujxn,

⁴pyat may ja kepy, aakyë'ë oyëtypë, ajë kepy ets tsaakepy, jä'ä ko ja ja'ayëty mëti'ipë kukajpnajtëpën Tirë ets Sidón yë'ë may ojts tnamo'otë ja David.

⁵David tyaa ënäty myäy tyäjy: Yë nmaankës Salomón mutsknëm oy, e ja tsajptëjk mëti'ipë yajkojaanpën, mëj mëpaat yajkojy, jëtu'un oy kyëxë'ëkëty ets y'itëty mëj'äämpy ets akäjpxy y'itëty oymyaajëty. Paaty ja David jëjp'ixy winë tyajwë'ëmtaay ma ënäty ka'ap y'ookynyëmën.

⁶Ënät ojts tyaxtsoy ja myaank Salomón ets nyimiinë, tä t'ënëmaay ko yë'ë nëjkx jëna'a tkojy ja tsajptëjk, mëti'ipë tyëjk'atëpën ja Wintsën Tios mëti'ipë Israel ja'ayëty y'ëwtajtëpën,

⁷jëtu'un t'ënëmaay: U'unk maay, ëjts jëtu'unës ënäty të nja'ëna'any koos nkoja'any ja Wintsën ja jyëën tyëjk.

⁸Je'eyëp ko Wintsën tëëjës xy'ënëëmë: Ëjts kë'ëmës të n'ixy ko mijts may oy jot ne'pny të xytyääm të xyjyä'tsnë, nëkooyë tsip mëk të xypyajjëtijnë; paaty ëjts ka'apës n'a'ixë ets mijts ntëjkës xykyojëty.

⁹E nëjkxëp tu'uk yë mmaank y'ity, mëti'ipë jotkujk yajpaatammpën ets ka'ap tiitsip tpaata'any; ëjts kë'ëm ntuknipëjktaakëjäämpy ets ka'ap nëkoo myëtsip yajjotkëxëtëty. Paatykyëjxm txëëwata'any Salomón. Ma ënäty yë'ë tyunyën akujk jotkujk nëjkx ja naax kajpn yajpaaty.

¹⁰Yë'ës nëjkx ja ntëjkës tkojy ëjts nxëëwkyëjxmës; n'u'unk nmaankës nëjkx njawë, ets ëjts nëjkx xytyeety'äty ets nëjkxëpës xëmë ja kyutujktakn nyaj'ijtë ma Israel kajpnën.

¹¹E tyam ënät n'ënëëmë u'unk maay ets Wintsën mputëkëtëty ets xykyojëty ja mWintsën ja tsyajptëjk, jëtu'un ijxtëm yë'ë të y'ënä'änyën ko mijts xykyojëty.

¹²Mmo'ojëtëp ja Wintsën ja wijyajtën kejyajtën, ko ënäty mooyënë ja kutujktakn, mijts, mpatunëp yë mWintsën yë y'ënä'ämën kyutujkën.

¹³Tëkokyë winë aak'oy mwinpëtsë'ëmxëtëty pën mtuumpy jëtu'un winë tä ja y'ënä'ämën kyutujkën myinyën mëti'ipë ja Moisés tyukmëwë'ëmën ja Israel ja'ayëty ets yë'ë tyajtuntëty. Mijts amëk jotmëkmës it ets këtii mayëty mtajëty.

¹⁴Ëk'ix, ëjts tëëjës yajxon nyajnimëjaawtä'äky koos yë pu'ts pujxn të nipëjkpety, jä'ä wyinë'aty tëkëëk mil ja tëkëëk mëko'px katsy ets poop pujxn jä'ä wyinë'aty i'px majktëkëëk mil katsy ets ëpëky may ja tsyuxk pujxn ets wiinkëtypë pujxn mëti'ipë ka'ap t'ëkjëkyäjpnën nmëtsyo'owmëty. Tëës näjyëtu'un jam ni''ixë kepy tsaa mëti'ipë mijts kë'ëm nëjkx xyjyaak'ixta'ayën.

¹⁵Mijts tam xymyëëtëty mayjyä'äy mëti'ipë nëjkx pyotstën, tsyaawoptën, kyepyjyëëtën ets mëti'ipë kanaakjëjp ja tuunk yajtu'uye'eytyëpën ma pu'ts pujxn, poop pujxn, tsaptspujxn, tsuxkpujxn yajtuunk'atyën. E paaty ënät mijts, tuuntëkë ets Wintsën yë'ë mputëkëtëp.

¹⁷Tä ja David näjyëtu'un tuknipëjky ja mëjja'aytyëjk ets tputëkëtëty ja Salomón ko ënäty ja tuunk tyajtso'ontä'äky, jëtu'un t'ënëmaay:

¹⁸Yë Wintsën, mijts ja mTiosëty yë'ë jëtu'un yajpatp ma miitsëtyën oy tyimjëna'ajëty, paaty të mo'ojëtë ja jotkujk'ajtën oymyaajëty, jä'ä ko tëë tpëjktä'äky ja naax kajpn ma ëëtsajtëmën ets niwaantä'ämyëty, yë'ëjëty, ëëts xymyëjwa'kpäjtmëty ets tmëjwa'kpätëty ja Wintsën.

¹⁹E tyam yë'ë ënät mtuntëp, tu'ukyë ja mwinma'any xypyëjkta'aktëty ma Wintsënën, mëti'ipë m'ëwtatëpën. Tuknipëjktaakëtë yajxon ets xykyojtëty ja Wintsën ja tsyajpjëën tsyajptëjk ets jëtu'un yajmëminëty ja kyaaxë ets ja apëjk atu'unën mëti'ipë ëmaayëtyën ma Wintsën ja tyëjkën ets jap yajpëjkta'akëty ma ja mëti'ipë yajkojaanpën.