Read Biblia Mixe de Quetzaltepec 1 Crónicas 26 Bible Online

1 Crónicas 26 - Biblia Mixe de Quetzaltepec bible

1 Crónicas 26

¹Ko ja tuunk nyikäkëtyääyëtë mëti'ipë ja tëjk'aaw kyëwent'atantëpën, jëtu'un ojts wyë'ëmtë: Ma ja Coré ja'ayëtyën, yë'ë ojts tyuka'ajëtë Meselemías, mëti'ipë ja myaank xyëëwajtypyën Coré, e ja Coré ja tyeety jä'ä xyëëwajtyp Ebiasaf.

²Ja y'u'unk y'ëna'k ja Meselemías, jä'ä xyëëwajtëp: Zacarías, ja mëjpë; Jediael ja mëmäjtskpë; Zebadías ja mëtëkëëkpë; Jatniel ja mëmajktaxkpë;

³Elám, ja mëmëkoxkpë, Johanán ja mëtëtujkpë ets Elioenai ja mëwëxtujkpë.

⁴Ja Obed-edom ja y'u'unk y'ëna'këty mëti'ipë xyëëwajtëpën: Semaías, ja mëjpë; Jozabad, ja mëmäjtskpë, Joah, ja mëtëkëëkpë; Sacar, ja mëmajktaxkpë; Natanael, ja mëmëkoxkpë;

⁵Amiel, ja mëtëtujkpë; Isacar, ja mëwëxtujkpë ets Peultai, ja mëjkutujkpë. Jä'ä ko Tios tëë ënäty mëj tkënu'kxy ja Obed-edom mëët may ja y'u'unk y'ëna'k.

⁶Ja Semaías, ja myaank ja Obed-edom, mäjtsk y'ëna'k y'ijtë mëti'ipë yajkutujktën ma ja jyä'äyëtyën, jä'ä ko tyaapë ja'ayëty mëj'äämpy ënäty yajpaatë ma nyaax kyajpnëtyën.

⁷Yë Semaías jä'ä y'u'unk y'ëna'k xyëëwajtë: Otni, Rafael, Obed, Elzabad, Elihú ets Samaquías; tsyapë ja'ayëty mëj'äämpy ijty yajpaatë ma nyaax kyajpnëtyën.

⁸Tëkokyë ya'atë ja'ayëty, mëti'ipë yë Obed-edom y'u'unk'ajt y'ok'ajtën ets mëët yë y'u'unk y'ëna'këty näjyëtu'un ets myëkä'äxtëjkëty, aak mëj'äämpy yajpaatë ma ja nyaax kyajpnëtyën, jä'ä ko amëjaaw ijty winë tuntën ets winë aaw winëjot. Jä'ä nyiwinë'atë tëkë'px mäjtsk ja y'u'unk y'okëty.

⁹Ja y'u'unkëty y'ëna'këty ets ja myëkä'äxëty ja Meselemías: Jä'ä y'ijtë ni'ëmukë nimajkmokxtëkëëk, aak mëj'äämpy näjyëtu'un y'itë ma nyaax kyajpnëtyën.

¹⁰Yë y'u'unk y'ëna'k yë Hosá, y'u'unk y'ok yë Merarí, jä'ä xyëëwajtë: Simri, mëti'ipë nyikopk'ajtypyën ja myëku'uktëjk, oy ënäty kyakä'äxkopkëty, tyeety ojts kë'ëm pyëjktä'äkyë ets tnikopk'atëty ja myëku'uktëjk;

¹¹mëmäjtskpë Hilquías xyëëwajtyp; mëtëkëëkpë Tebalías; mëmajktaxkpë Zacarías. Yë y'u'unk y'ëna'këty ets myëkä'äxëty yë Hosá jä'ä nyiwinë'atë majkmäjtsk.

¹²Ya'atë ojts tyuka'ajëtë ja tuunk ma ja tëjk'aaw t'ijx'itëtyën. Jëtu'un yë'ëjëty ets ja kopktëjkëty jap ojts tyuka'ajëtë tsajptëkoty ja tuunk.

¹³Aak tu'kjëëky tu'kmëku'uk ojts t'ijxpëtsëmtë ja tuunk, maajaty ja tëjk'aaw tyuka'aja'anëtë, ojts tyëkëtë ja ja'ayëty mëjpë mutskpë.

¹⁴Ja Selemías ko ojts yaj'ijxpëtsëmy ja tyuunk ma nija'awënën jam ojts tyuka'ayë ma ja tëjk'aawën xëëwpëtsëmtsyowpë, e ja myaank Zacarías, mëti'ipë mëjwinkajpxpë ijty ijtpën, yë'ë ojts tyuka'ayë ja tëjk'aaw anëkëjxytsyowpë.

¹⁵Ja Obed-edom yë'ë ojts tyuka'ayë ja ëpa'tkë'ëytsyowpë, e ja y'u'unk y'ëna'këty yë'ë ojts tyuka'ajëtë t'ijx'itëty ja tëjk ma jap winë pëjkë'ëky y'ityën.

¹⁶Ja Hosá yë'ë ojts tyuka'ayë ja tëjk'aaw maatsow ja xëëw kyëtä'äkyën, ma yajtijyën ja tëjk'aaw Salequet, jamtsow ma tu'u wyimpäjtë'ëkyën. Ja tuunk mëti'ipë yajnikajpxpën jëtu'un ojts yajpëjkwä'kxy:

¹⁷jëpom, jëpom, tëtujkjaty ijty twintänëtë ja tëjk'aaw jampë yajpaatyën matsow xëëw pyëtsimyën, nimajktaxk jam anëkëjxmtsow ets nimajktaxk jam apa'tkë'ëmtsow ets nimäjtskjaty pyatëtë ma ja tëjkën ma winë pëjkë'ëky y'ityën.

¹⁸Jam ma ja tsajptëjk tëja'awën, maatsow ja xëëw pyëtsimyën, taxk ijty jam yajpaatë ma ja y'apojtsë'ëkyëtyën, nimäjtsk ma ja tëja'aw jamën.

¹⁹Jëtu'un ënäty yajpaatë woowä'kxy ja ja'ayëty mëti'ipë y'ijx'ijtëpën ja tëjk'aaw, ja Coré ets Merarí ja y'u'unk y'ok.

²⁰Yë Leví ja'ayëty ojts näjyëtu'un yajtuknipëktë ets t'ijx'itëty maajaty winë y'ityën jap tsajptëkoty mëti'ipëjaty tsowëtyën ets mëti'ipë wit meeny may myë'ijtypyën, ja kënu'kxypyë ets ëmaaypyë.

²¹Jä'ä ja y'ëna'këty ja Laadán, mëti'ipë Guersón ets Jehiel y'u'unk'ajtyp y'ok'ajtypyën,

²²ja y'u'unk y'ëna'k ja Jehiel ets myëkä'äxtëjk ja Zetam ets Joel yë'ë ënäty y'ijx'ijtëp jap winë tsajptëkoty mëti'ipë tsoowpaatyëtyën ets tam ja wit meeny këjää tnëkëjxm'aty.

²³E ja y'u'unk y'okëty ja Amram, Ishar, Hebrón ets Uziel,

²⁴ja mëti'ipë nyikopk'ajtypyën ja tuunk ma winë yaj'ijx'ityën jap tsajptëkoty mëti'ipë tsowëtyën, jä'ä xyëëwajtyp Sebuel, yë'ë Guersón y'u'unk y'ok ets Moisés.

²⁵Ma ja Eliézer yë'ë ojts tmëku'uk'atë Rehabías, Eliézer yë myaank; Isaías, Rehabías yë myaank; Joram, Isaías yë myaank; Zicrí, Joram yë myaank ets Selomit, Zicrí myaank.

²⁶Selomit ets myëku'uktëjk yë'ë ojts yajtuknipëktë t'ijx'itëty ma winë pëjkë'ëky y'ityën mëti'ipë yajktën David, tsiptuunpë wintsënëty, mëjja'aytyëjk ets wintsëntëjkëty, mëti'ipë tyukwintsë'këtyën Wintsën.

²⁷Mëti'ipë jam pyatën ma tsyiptuuntën mëët ja myëtsiptëjkëty ets yë'ë tuknipëjkë'këtyë ma ja tsajptëjk tmëët'atën.

²⁸Tap ënäty yajpaaty näjyëtu'un mëti'ipë yajkën ja Samuel, mëti'ipë nasja'apën, mëti'ipë yajkën yë Saúl, Quis yë myaank, mëti'ipë yajkën Abner, Ner yë myaank ets mëti'ipë yajkën Joab, Sarvia myaank. Tëkokyë ya'atë pëjktä'äky mëti'ipë Wintsën të tukmëyoxtën yë'ë ojts yajtuknipëky t'ijx'it tkëwent'atëty yë Selomit ets myëkä'äxtëjk.

²⁹Yë Ishar y'u'unk y'ok, mëti'ipë ënäty të yajtuknipëktën ja kutujkën'ajtk ets t'ixtëty tuntëty ja tuunk ets ja amay jotmay mëti'ipë ja Israel ja'ayëty myëët'ajtëpën ets mëti'ipë yajpaye'eyaanpën mëktä'äky, yë'ë yajtuknipëjktë Quenanías mëët ja y'u'unk y'ëna'k.

³⁰Yë Hebrón y'u'unk y'ok, yë'ë ojts yajtuknipëktë tuunk'atëty, ma t'ixtëty nijawëtëty wi'ix ja naax kajpn yajpaatyën matsow ja xëëw kyëtä'äkyën ma ja mëjnëë jyënäkyën mëti'ipë yajtijpën Jordán, jëtu'un tä näjyëtu'un mëti'ipëjaty ja Wintsën jyä'ä'ajtypyën ets ma ja yajkutujkpë yajmëtunyën, jä'ä xyëëwajtëp Hasabías ets ja jyiiky myëku'uk, jä'ä nyiwinë'ajtë tu'uk mil ja wëxtujk mëko'px, ja ja'ayëty aakyë'ë mëti'ipë mëj'äämpy ijtëpën ma ja naax kajpnën.

³¹Ma jajëmëjt ënäty y'änyën wëxtyikxy, ma David yajkutukyën, ojts ja yajpaye'ey wi'ix ja Hebrón ja jyiiky myëku'uk ënäty të yajpaatën ets të jyuuky'atën ets ojts yajnijawë ko tamtëm ijty ja myëku'uktëjk mëti'ipë mëj'äämpy ijtëpën jam Jazer ma Galaad tnitänën. Yë'ë ojts tnikopk'aty ja myëku'uktëjk mëti'ipë txëëwajtpën ja ja'ay Jerías;

³²Mëët ja myëku'uktëjk, mëti'ipë ënäty näjyëtu'un mëj'äämpy ijtëpën; jä'ä nyiwinë'ajtë mäjtsk mil ja wëxtujk mëko'px, aakyë'ë mëti'ipë nyikopk'ajtëpën ja y'u'unk y'ëna'këty y'u'unk tyo'oxytyëjkëty. Tä ja David mëti'ipë yajkutujkpën ojts tuknipëky ets yë'ë twintänëtëty ja Rubén ja jyä'äy ets Gad ets nikujkwä'kxy ja Manasés ja jyä'äy, mëti'ipë yë'ë yajtuknipëjktën ets t'ixtëty tuntëty ets yë'ë tmëmay tmëtajtëty ma ja yajnijawëja'anyën wi'ix tsoky winë ja Wintsën ets ja yajkutujkpë.