Read Biblia Mixe de Quetzaltepec 1 Crónicas 9 Bible Online

1 Crónicas 9 - Biblia Mixe de Quetzaltepec bible

1 Crónicas 9

¹Je'eyëp ko ja ja'ayëty mëti'ipë jyä'äyäjtypyën ja Judá, ojts ja jam tsyo'ontaaynyëtë ma nyaax kyajpnëtyën tsumy matsy, mëët ko ënäty ja tuuntëko'oy kajpxtëko'oyën tmëët'atë.

²Ja ja'ayëty mëti'ipë ojts jatëkok wyimpitën ma ja nyaax kyajpnëtyën ets jatëkok jam tsyënaaytyaknpëjktë, jä'ä ja teetytyëjkëty, Leví jyä'äyëty ets ja mëti'ipë jap tsajptëkoty tuuntëpën.

³Jam ma Jerusalén kajpnën yë'ë ojts jam tsyënaaytyaknpëktë, ja y'u'unk y'okëty yë Judá, Benjamín, Efraín ets Manasés.

⁴Ja Judá y'u'unk y'ok mëti'ipë xyëëwajtën: Utai, myaank yë Amiud, myaank yë Omri, myaank yë Omri, myaank yë Paní, Fares y'u'unk y'ok, Judá y'ëna'k.

⁵Silonitë jyä'äy jä'ä xyëëwajtë: Asaías, mëti'ipë kä'äxkopk'ajtën.

⁶Zérah yë'ë y'u'unk'ajt y'ok'ajt: Yë Jeuel ets myëku'uktëjk, nitëtujk mëko'px ja majkta'px nyiwinë'ajtë ja ye'etyëjktëjk.

⁷Ja Benjamín ja y'u'unk y'ok jä'ä xyëëwajtë: Salu, Mesulam myaank, myaank yë Hodavías, myaank yë Asenúa;

⁸Ibneías, myaank yë Jeroham; Elá, myaank yë Uzí, myaank yë Micri; Mesulam, myaank yë Sefatías, myaank yë Reuel, myaank yë Ibneías.

⁹Ja jyiiky myëku'uk, tëkokyë ninu'un ënäty të nyajtsmin të nyajtsja'tëtën, jä'ä nyiwinë'ajtë taxtujk mëko'px ja wëxtyikxy majk tu'uk aakyë'ë ja kopktëjkëty, mëti'ipë nyikopk'ajtën ja y'u'unk y'ëna'këty ets ja jyëën tyëjkëty.

¹⁰Ja teetytyëjkëty jä'ä mëti'ipë xyëëwajtën: Jedaías, Joiarib, Jaquín,

¹¹Azarías, myaank yë Hilquías, myaank yë Mesulam, myaank yë Sadoc, myaank yë Meraiot, myaank yë Ahitub, mëti'ipë jap mëj'äämpy tuumpën ma ja Wintsën ja jyëën tyëjkën;

¹²Adaías, myaank yë Jeroham, myaank yë Pashur, myaank yë Malquías; Masai, myaank yë Adiel, myaank yë Jahzera, myaank yë Mesulam, myaank yë Mesilemit, myaank yë Imer;

¹³ets tëkokyë ja jyiiky myëku'ukëty, jä'ä nyiwinë'ajtë mil ja wëxtujk mëko'px ja tëkë'px, tyaapë ja'ayëty nyija'awëtyëp ijty wi'ix ja tuunk tyajtu'uye'eytyëtyën jap tsajptëkoty.

¹⁴Ja Leví ja'ayëty jä'ä mëti'ipë xyëëwajtëpën: Semaías, myaank yë Hasub, myaank yë Azricam, myaank yë Hasabías, mëti'ipë Merarí myëku'uk'ajtypyën;

¹⁵Bacbacar, Herés, Galal ets Matanías myaank yë Micaías, myaank yë Zicri, myaank yë Asaf;

¹⁶Abdías, myaank yë Semaías, myaank yë Galal, myaank yë Jedutún; Berequías, myaank yë Asá, myaank yë Elcaná, mëti'ipë jam tsënaayën ma ja naax kamën mëti'ipë Natofat ja'ayëty nyitënaaytyëpën.

¹⁷Ja mëti'ipë tëjk'aaw këwent'ajtëpën, jä'ä xyëëwajtëp: Salum, Acub, Talmón, Ahman ets ja myëkä'äxtëjkëty, Salum ijty nyikopk'ajtyp,

¹⁸tyampaat yë'ë tëjk'aaw kyëwent'ajtëp ma ja yajkutujkpë ja jyëën tyëjkën, jamtsowpë xëëwpëtsëmy yajpaatyën. Ya'atë jëtu'un ijtë tëjk'aaw këwent'ajtpë ma ja Leví ja'ayëty ja y'ijtaknëtyën.

¹⁹Salum, myaank yë Coré, myaank yë Ebiasaf, myaank yë Coré ets ja jyiiky myëku'ukëty mëti'ipë Coré jyä'äy'äjtypyën; yë'ë yajtuknipëjktë ets t'ijx'it tkëwent'atëty ma yajnitëkën ja tsajptëjk, jëtu'un tä ënäty tëëyëp ja y'ap y'okëty të tkëwent'atën ja tëjkëtyakn ma yajnitëkën ja Wintsën ja jyëën tyëjk witnikojpyë.

²⁰Ma ënäty ka'ap yajmo'otënëm jëtu'unpë ja tuunk, yë Finees yë'ë ojts nyikopk'atëtë. Wintsën kënu'kxëtëp.

²¹Zacarías, myaank yë Meselemías, jam ijty tyuny ma ja wit tëjk yajnitëkën, ma ja näpyaatë y'ityën mëët ja Tios.

²²Ja ja'ayëty mëti'ipë ojts yajtuknipëktën ja tëjk'aaw këwent'ajtk jä'ä nyiwinë'ajtë mäjtsk mëko'px ja majkmäjtsk, mëti'ipë yajjaaypyäjtën, maajaty tsyënaaytyën. David ets Samuel yë'ë ojts ya'atë tuunk tyuknipëkëtë, jä'ä ko yë'ë ojts yajtukmëwin'ixëtë tyatu'u ye'eytyëty.

²³Ma ja tyuunkëtyën, nixim niyam ënäty nyätyuknikääkëtë ets t'atänëtëty ja tëjkëtyakn ma ja Wintsën ja tsyajptëjkën, ma näpyaatë y'ityën mëët yë Wintsën.

²⁴Ja këwent'ajtpëty mëti'ipë ja tëjk'aaw y'atënaaytyëpën, taxkpëky ojts nyäwya'kxëtë; tu'uk jam anëkëjxmtsow, tu'uk apa'tkë'ëytsyow, tu'uk a'oytsyow ets tu'uk anajnytsyow.

²⁵Ja jyiiky myëku'ukëty mëti'ipë jam kajpnjotm ijtëpën, nimiinëtëp ijty xëmë ets tëtujk wëxtujk xëëw pyutëjkëkyojëtë.

²⁶E ja mëti'ipë ojts yajxon tyimyajtuknipëktën këwent'atëty ja taxkpëkpyë ja tëjkëtyakn, mëti'ipë Leví ja'ayëty, ka'ap ijty nijëna'a t'awa'ktu'utë ja tëjk'aaw, xëmë jam yajpaatë ets tkëwent'atë ja Tios ja jyëën tyëjk.

²⁷Jam ja timnyama'a timnyapo'kxtë ets jopyëp tsojk tyaj'ëwatskojtë.

²⁸Tam mëti'ipë ijty yë'ë kyë'ë'am'ajtypën ja apëjk atu'unën, ko tyuna'any jä'ä jap poj'am jyu'typ ets aak mëtyoy tyajnaxy.

²⁹Tam ja wiinkpë mëti'ipë yë'ë kyë'ë'am'ajtypën ja apëjk atu'unën mëti'ipë kënu'kxyën mëti'ipë tuunpën ko ja kajpxta'ak y'ity, ëpëky ja mookwayëty, uukyëty, onëty, poomëty ets ja pa'akxu'kpëty.

³⁰Jëna'ajëty ijty yë'ë teetyëjk kë'ëm tyaj'oyëtë ja pa'akxu'kpë;

³¹Jam ijty tu'uk yajpaaty ja teety mëti'ipë xyëëwajtypyën Matatías, Salum myaank, Coré jyä'äy; yë'ë ijty xëmë tyimyaj'o'oyëp ja ma'atsy mëti'ipë yajpijkpën jam awinaxwintum.

³²Pënëty, mëti'ipë Quehat jyä'äy'äjtypyën, yë'ë yaj'o'oyëtëp ja tsajpkääky mëti'ipë winjëpom pyijktëpen waatswitsy jam awinaxwintum po'kxënxëëwëtë.

³³Tam'ajtëp ijty näjyëtu'un yë ëëpë yaxpë, jam ja tyim'ijtëpë ma ja tsajptëjkën, mëti'ipë nyikopk'ajtëpën ja Leví ja'ayët;, nän yi'iyë ijty tyimtuunk'ajtëp, ka'ap tii ëpëky tuntë.

³⁴Ya'atë jëtu'un ojts Leví tja'ay'äty tnikopk'atë, mëti'ipë jam ma tsajptëjkën tim tuuntën, jampë tsyënaaytyën Jerusalén, jëtu'un tä ënäty tyu'kja'ay'atën.

³⁵Jam ma kajpn txëëwatyën Gabaón, jam ijty tsyëënë yë Jehiel, Gabaón tyeety mëët ja tyo'oxytyëjk mëti'ipë xyëëwajtypyën Maacá.

³⁶Ja y'u'unk y'ëna'këty jä'ä xyëëwajtë: Abdón, ja kä'äxkopk ets Zur, Quis, Baal, Ner, Nadab,

³⁷Guedor, Ahio, Zacarías ets Miclot,

³⁸mëti'ipë tyeety'ajtën yë Simeam. Näyjyëtu'un ya'atë ja'ayëty nän jam Jerusalén tsyënaaytyaknpëjktë, tä ja myëku'ukëtyën.

³⁹Ner yë'ë teety'ajtë Quis, Quis yë'ë teety'ajtë Saúl, e yë Saúl yë'ë teety'ajtë Jonatán, Malquisúa, Abinadab ets Es-baal.

⁴⁰Jonatán yë'ë teety'ajtë Merib-baal, mëti'ipë tyeety'ajtën yë Micaías.

⁴¹Micaías jä'ä y'u'unk y'ëna'k xyëëwajtë: Pitón, Mélec, Tarea ets Acaz.

⁴²Acaz yë'ë teety'ajtë Jará, e Jará yë'ë teety'ajtë Alémet, Azmávet ets Zimri; Zimri yë'ë teety'ajtë Mosá,

⁴³Mosá yë'ë teety'ajtë Biná, mëti'ipë tyeety'ajtën Refaías, mëti'ipë tyeety'ajtën Elasá, mëti'ipë tyeety'ajtën Azel.

⁴⁴Azel nitëtujk yë y'ëna'k y'ijtë, jä'ä xyëëwajtë: Azricam, Bocrú, Ismael, Searías, Abdías ets Hanán. Ya'atë y'u'unk'ajt y'ëna'k'ajt yë Azel.