Read Biblia Mixe de Quetzaltepec 2 Crónicas 10 Bible Online

2 Crónicas 10 - Biblia Mixe de Quetzaltepec bible

2 Crónicas 10

¹Ja Roboam ojts jam nyijkxy Siquem, jä'ä ko jam ënäty të nyëjkxta'atë ja Israel ja'ayëty ets tnikajpxpäta'antë ja Roboam ets yë'ë yajkutukëty.

²E ja Jeroboam, ja Nabat ja myaank, jap ënäty tsyëënë Egiptë, mëti'ipë kyukäkën ja Salomón, ojts tnijawë ko ja Roboam yajnikajpxpäta'any ets yajkutukëty, ënät tsyo'ony jap Egiptë.

³Ko yajyaxtsooy, ënät yë Jeroboam mëët yë Israel ja'ayëty ojts tninëjkxtë yë Roboam ets mëët myëtyaktë, jëtu'un t'ënëmaaytyë:

⁴Yë mteety mëkës ojts xyajtuntë; tyam tun yë mëyajtën yajyu'unkë wäänë yë ntuunkëtyës mëti'ipë ojts yë'ë xymyo'otën, jëtu'unts mijts nmëtuntëty oy.

⁵Tä ja Roboam y'ëtsooy: Tëkëm jatëkok mmintëty. Tä wyimpijtë,

⁶ënät ja yajkutujkpë Roboam tyajtëëy ja mëjja'aytyëjk mëti'ipë ënäty mëët të tyuntën ja tyeety Salomón, ko ënäty jyuuky'ätynyëm. Jëtu'un tyajtëëy: Miitsëty ¿wi'ix m'ëna'antë, wi'ixës tyaapë ja'ay mëpaat n'ëtsoy?

⁷Tä y'ëtsoowtë ja mëjja'aytyëjk: Pën mijts m'oyjya'ap ya'atë naax kajpn ets myajjotkujk'ajtyp ko xytyunëty mëti'ipë y'amëtoowtëpën, yë'ëjëty xëmë nëjkx oy tsuj mëtunëtë.

⁸Je'eyëp ko Roboam ka'ap ojts jëtu'un t'ëktuunë tä ënäty ja mëjja'aytyëjk të y'ënë'ëmxëtyën, yë'ë yajtëëw ja myë'ëna'ktëjk mëti'ipë ënäty mëët të yeeky të pyetyën ets mëti'ipë mëët tyuunmukyën,

⁹tä tyajtëëy: ¿Miitsëty wi'ix m'ëna'antë, wi'ix ya'atë ja'ay mëpaat n'ëtsowtës mëti'ipë ënantëpën koos ja tyuunk nyajyu'unkëtëty mëti'ipës ojts ja nteety tyuknipëkëtën?

¹⁰Tä ja ëna'ktëjkëty y'ëtsoowtë, mëti'ipë ënäty mëët tu'knax të yeeky të pyetyën: Ja ja'ayëty mëti'ipë ënantëpën ko xyajyu'unkëty ja tyuunk mëti'ipë ja mteety ojts tyuknipëkëtën, jëtu'un xy'ëtsowëty: Pën ja nteetyës mëk ojts mtuunkmo'ojëtë, ëjts wäänë ni'ikës yam miits mëk ntuunkmo'oja'antë;

¹¹pën je'emty ojts winë mtuknitsëmëtë, ëjts wäänë je'emtyës yam miits ja tsëmy nmo'oja'antë; pën ojts mtukwopëtë yë tejpxy, ëjts yë'ëjës yam miitsëty ntukwoptëp yë po'otejpxy mëti'ipë jam jëjp'am pujxn myëët'ajtypyën.

¹²Kom tëkëëk xëëw ojts ja Jeroboam mëët tëkokyë ja Israel ja'ayëty tnimintë ja yajkutujkpë Roboam, jëtu'un tä ënäty kë'ëm të t'awitsyën.

¹³E ja Roboam mëk ja y'ëtsoowëtë, ka'ap ninu'un timyjä'äymyejtsy wi'ix ënäty ja mëjja'aytyëjk të jya'ëna'antën,

¹⁴jä'ä ojts ja ëna'ktëjk ja y'aaw y'ayuk tnikajpxë ets t'ënëmaay: Pën Je'emtyëty ojts ja tyeety winë tyuktsëëmë'ëkëtë, yë'ë wäänë je'emty winë tyuktsëëmë'ëka'anëtë ets pën tejpxy ojts ja tyeety tyukwopëtë, yë'ë po'otejpxy tukwopanëtëp mëti'ipë myëët'ajtypyën pujxn jam jëjp'am.

¹⁵Jëtu'un'äämpy ja yajkutujkpë ka'ap ja naax kajpn tmëmëtooy, jä'ä ko Wintsënën ënäty kë'ëm të tnipëjktaakë ets jëtu'un jyatëty kyëpätëty, jëtu'un'äämpy y'atëwëty ja Wintsën ja y'aaw y'ayuk mëti'ipë tyukwinwa'anëyën ja Jeroboam, Nabat yë myaank, mëët ja Ahías, jampë kyukajpnëtyën Siló.

¹⁶Ko ja naax kajpn t'ijxy ko ka'ap ja yajkutujkpë të myëjpëjktä'äkyë, tä y'ëtsoowinpijtë: Ëëtsëty ka'ap kyopkpëkyëty nmëjwa'kpätëtyës yë David. Nitii näykyumayë ëëts nkajëjp'ixtë mëët yë Jesé myaank. Paaty tsojk ntimjya'amta'ayëmë ma ntëjk'ajtëmën Israel ja'ayëty. E yë David wä'än yi'iyë y'u'unk tyo'oxytyëjk t'ixy tuny. Ja Israel ja'ayëty ënäty tsyo'ontaaytyë ets nyëjkxtaaytyë ma ja tyëjkëtyën.

¹⁷E ma ja Israel ja'ayëtyën mëti'ipë jam tsënaaytyëpën ma ja Judá y'itjotmën, jam ja Roboam ojts jyaak'ëne'emy.

¹⁸Ko yë Roboam tkejxy yë Adoram mëti'ipë ja tuunk nyikopk'ajtypyën ja atsipë, yë Israel ja'ayëty ënätyë Adoram tkuka'tstë. Ënät ja yajkutujkpë ënätyë tukpejty ja pyujxnwintëkäämpë ets kyeky, jamtsow Jerusalén kyäktsoky.

¹⁹Jëtu'un'äämpy ja Israel ja'ayëty ojts tmëtsiptso'onëtë ja David ja kyutujktakn ets tyampaat jëtu'unyëm ka'ap oy mëët nyäyaj'itëtë.