Read Biblia Mixe de Quetzaltepec 2 Crónicas 11 Bible Online

2 Crónicas 11 - Biblia Mixe de Quetzaltepec bible

2 Crónicas 11

¹Ko yë Roboam jam jyä'äjty Jerusalén, ënät tyajmujky nimëko'px ja majkta'px mil ja tsyiptuunpëtëjk, win'ixy winpiy tyajmujky ja Judá ja'ay ets Benjamín ja'ay ets tsyiptuna'any mëët ja Israel ja'ayëty, yë'ë nyitsiptunäämpy jatëkok ja kyutujktakn.

²E yë Wintsën ojts ënätyë tmëkäjpxy yë Semaías, Wintsën yë tyuunpë ets t'ënëmaay:

³Ënëëmë yë Roboam, yë myaank yë Salomón mëti'ipë yajkutujkpën jam Judá ets tëkokyë yë Judá ja'ayëty, Benjamín ja'ayëty,

⁴koos ënä'ämënës yam nyäjkpy ko këtii mëët tsyiptuntëty yë myëkä'äxtëjkëty. Wä'än yë tyëjk tpata'atë jä'ä ko ëjts ënaanp. Ko jëtu'un tmëtoowtë ja Wintsën ja y'ënä'ämën, ënät jatëkok jyänty wyimpijtaaytyë ets ka'ap ojts tnipëtë'ëktë ja Roboam.

⁵Roboam jam tsyënaaytyaknpëjky Jerusalén ets ojts tkojy may ja kajpn mëti'ipë ta'tspëkyëtyën.

⁶Ojts yajxon mëk tkuwa'any ja Belén kajpn, Etam, Tecoa,

⁷Bet-sur, Socó, Adulam,

⁸Gad, Maresá, Zif,

⁹Adoraim, Laquis, Azecá

¹⁰Sorá, Aialón ets Hebrón, mëti'ipë ta'tspëky ijtëpën jam ma Benjamín nyaaxjotmën ets ma Judá nyaaxjotmën.

¹¹Ojts tyaj'o'oyëtyä'äy jatëkok ya'atë naax kajpn mëti'ipë ënäty ta'tspëky të y'ityën ets jam tpëjktäky ja tyuunpëtëjk mëti'ipë tyukëwent'ajtypyën ja naax kajpn. Ja jë'kxy pëky may'äämpyëty jam tnajtskäjxëy këtiipë ja këwent'ajtpë jyi'kxykyukëxëtëty.

¹²Ojts may tuknikexy yë naax kajpn yë akëëytyuk ets ku'umën, yajxon ojts tuknipëjktaakë wi'ix nyäkyuwa'anëtëtyën. Jëtu'un'äämpy ja Judá kajpn ets ja Benjamín kajpn yë'ë tniwä'ky ja Roboam.

¹³Ja teetytyëjkëty ets ja Leví ja'ayëty ojts muum wiinktsow tsyoontë ets tnimiintë ja Roboam tääts tpuwa'këtyë,

¹⁴jä'ä ko ja Leví ja'ayëty ojts t'ëxmatstë ja tyuunkëty ma ja tsajppax ets kupixyny tkëwent'atën ets ojts nyëjkxtë jam Jerusalén ets jam muum ma ja Judá nyaaxjotmën mëët ko ja Jeroboam ja jyä'äy ënäty ka'ap të t'a'ixëtë ets jam tyeety'atëty.

¹⁵Jeroboam tëë ënäty kë'ëm t'ijxta'ay pën yajteety'atäämpyën ma ja tsajptëjkën ka'apë y'oyëtyën, ma ja mëjku'u t'ëwtatën, naaxpotsy ets ja awinax t'ëwtatëty mëti'ipë jëtu'un këxë'kpën tä tsajpkaa u'unkën.

¹⁶Ja ja'ayëty mëti'ipë ja Wintsën y'ijxtaaytyëpën, mëti'ipë y'ëwtajtëpën ja Israel ja Wyintsën, ojts tpanëkxtë ja Leví ja'ayëty ets ja teetytyëjkëty ets jam tyajktë ja wintsë'kën ma Wintsënën, mëti'ipë ja y'aptëjk y'ëwtajtën.

¹⁷Jëtu'um'aämpy tyajmëjnaxtë ja kutujktakn jam Judá, ma ja Roboam ojts y'ëne'emyën, ja Salomón ja myaank; tëkëëk jëmëjt jëtu'un y'ijty jä'ä ko yë'ë je'eyë tëkëëk jëmëjt tmëmëtäky winë tunëty tä ja David ets Salomón winë tuuntën.

¹⁸Roboam ojts pyiky mëët yë to'oxytyëjk mëti'ipë xyëëwajtypyën Mahalat, Jerimot yë nyëëx; Jerimot yë'ë myaank yë David mëët yë Abihail, yë'ë nyëëx yë Eliab, Jesé y'ok'u'unk.

¹⁹Roboam y'u'unk y'ëna'k ets Mahalat jä'ä xyëëwajtë: Jehús, Semarías ets Záham.

²⁰Ojts näjyëtu'un pyiky mëët ja Maacá, Absalón yë nyëëx; ja y'u'unk y'ëna'këty jä'ä xyëëwajtë: Abiam, Atai, Zizá ets Selomit.

²¹Roboam, majkmokx tëkëëk yë tyo'oxytyëjk tmëët'ajty ets tëkë'px mëti'ipë jëtu'unyë nyamëët'ajtën; je'eyëp ko ja Maacá ni'ik tsyojkë këtiinëm jyëtu'unëty ja wiinkëtypë. I'pxtuktujk ijty yë myaank ets nitëkë'px yë nyëëx.

²²Roboam ojts ja Abiam tuknipëky ets ja myëku'uktëjk tnikopk'atëty, jä'ä ko yë'ë ënäty tyukmëwin'ijxtë'ëwëp yajkutukëty. Roboam yë'ë mëët tmaank'aty yë Abiam yë Maacá.

²³Ojts oy wyinma'anypyääty, ojts tyajwa'kxta'ay ja y'ëna'k ma ja Judá ets ja Benjamín ja nyaaxjotmën, maajaty ja kajpnën mëti'ipë ta'tspëkyën, aak myooytyääy ja mëti'ipë tyukjuuky'atëpën ets mayëty ja tyo'oxytyëjkëty ojts t'ixtaayë.