Read Biblia Mixe de Quetzaltepec 2 Crónicas 13 Bible Online

2 Crónicas 13 - Biblia Mixe de Quetzaltepec bible

2 Crónicas 13

¹Yë Abiam jää ojts yajkutujktsoony jam Judá, ma ënäty majkmokx tëkëëk jëmëjt ëka'any y'ëne'emyën yë Jeroboam.

²Tëkëëk jëmëjt ojts jam Jerusalén yajkutuky, yë tyaak jä'ä ijty xyëëwajtyp Micaías, yë'ë nyëëx Uriel jam Guibeá kyukajpnëty. Ënät yë Abiam ja tsip tyajtso'ontäky mëët yë Jeroboam.

³Abiam jä'ä ënäty yë tsyiptuunpëtëjk nyimayëty taxk mëko'px mil, aak winpiy tyajtsiptuuny. E yë Jeroboam ojts nyäkyuwa'anyë, jä'ä jyä'äy tyajtso'ony nituktujk mëko'px mil mëti'ipë tsiptuuntëpën, nän aak win'ixy tyajtso'ony.

⁴Ënät ja Abiam jam kyuwa'këy kopkkëjxm ma txëëwatyën Zemaraim, ma ja kopkjotmën mëti'ipë Efraín nyitënääpyën ets mëk yujk'ënany: Mijts Jeroboam ets miitsëty Israel ja'ayëty, mëtoow'itë yajxon.

⁵¿Këtii xynyijawëtë ko yë kutujktakn yë'ë ojts Wintsën tukë'ëtëkë yë Davidjë ets y'u'unk y'okë ets yë'ë tmëët'atëty xëmëkyëjxm, mëët tu'uk ja käjpxytyu'unën mëti'ipë ka'ap pën myäyëtëty tjënaxëtyë?

⁶E yë Jeroboam, yë Nabat yë myaank, mëti'ipë tyuunpëajtën Salomón, David yë myaank, ojts ja wyintsën tmëtsiptsoony.

⁷Ënät ojts ja mayjyä'äy pyuwa'akëty mëti'ipë nuuxëtyën ka'apë tyuna'antën ets ëxëëk ja'ayëty, mëti'ipë ojts timy'ënä'ämtën ja Roboam, Salomón yë myaank, mëët ko ënäty myutsknëmëty ets ko ënäty wyintse'knyëmëty. Jëtu'un ojts ka'ap myääyë ja Roboam tjëjpkuwa'akëty amëk jotmëk.

⁸E tyam ënät miitsëty, ka'ap yowë ninu'un xytyimmëj'ixa'antë ya'atë kutujktakn mëti'ipë Wintsën jyä'ä'ajtypyën, mëti'ipë David y'u'unk y'ok tyuunk'ajtëpën, yë'ë nyätyijyë mtukmëta'akantëp mëët ko mnimay'atë ets ko xymyëët'atë ja awinax mëti'ipë mëët y'oytyunyëtyën yë pu'ts pujxn, jëtu'unpë kyëxë'ëkyën tsajpkaa u'unkën, mëti'ipë yë Jeroboam mtukni'oytyu'unëtën ets xy'ëwtatëty.

⁹¿Ix ja Wintsën ja tyeetytyëjk të xy'ijxwojptaayë, mëti'ipë ja Aarón y'u'unk'ajtyp y'ok'ajtypyën ets ja Leví ja'ayëty? Jëtu'un kë'ëm ja mteetytyëjkëty të xynyikajpxpätë tä wiinkëtypë naax kajpn y'ëtë'ëtstën. Ets ënät m'ëna'antë ko oy pën tyimminëty, miitsëty je'eyëm näkyënu'kxë xypyaata'antë, mëët yë'ë ko tmëminy tu'uk yë tsyajpkaa ets wëxtujk yë tsyajpax, oypyënëty jyëkyejpy tyeety'atëty ma ja wiinkëtypë ja awinaxën mëti'ipë ka'ap Wyintsënëtyën.

¹⁰E ëëtsëty ënät, ja nTiosëtyës yë'ëjës nWintsën'ajtëp ets nijëna'a yë'ë të nka'ëxmatstës. Ja teetytyëjkëty mëti'ipë jam ja Wintsën myëtuuntëpën aakyë'ë Aarón yë y'u'unk y'ok, mëti'ipë jam wiinkëëy kujkëëytyëpën yë'ë yë Leví ja'ayëty.

¹¹Yë'ëjëty jop tsuu yë Wintsën wyintsë'kën tmo'otë mëti'ipë nino'oky yajyajkpën ets poom. Xëmë tyaktë tsajpkääky winjëpom mëti'ipë kënu'kxyën, jam tkëxpëktë ma kaaypyäjnën ëmaaypyë; yë'ë yajmëjjëtyëp xëmë jënäkyxyëëw yë kutë'kxn mëti'ipë oytyunyën mëët yë pu'ts pujxn. Jä'ä ko ëëtsëty je'eyëmës npatuntë ja Wintsën ja y'ënä'ämën kyutujkën e miitsëty ni'ikyë të xy'ëxmajtsnëtë.

¹²Yë'ë tëy ja'amyätstë yajxon, ko ëëtsëty yë'ëjës xytyu'uwinye'eytyëp yë Wintsën ets teetytyëjkëty, yë'ëjëty jëjp'ixy tyim'itë ets tyajxu'uxa'antë ja pujxnxuxn mëti'ipë nyikäjpxypën ja tsip ets miitsëty myajnipëtë'ëktëty. E paaty yam myaj'ënëëmëtë Israel ja'ayëty, ko këtii nëkoo mtsiptuntëty mëët yë Wintsën, mëti'ipë Tiosajtën ja m'aptëjkëty, jä'ä ko ka'ap mëta'aktëty.

¹³Jeroboam tëë ënäty t'ëne'emy ja jyä'äy ets tna'ëwtitëty ja Judá ja'ayëty mëti'ipë ënäty myëtsip'ajtëpën.

¹⁴Ko ja Judá jyä'äy y'ijxwinpijtë, ënät t'ijxtë ko tamtëm ënäty jëxkë'ëmtsow nyayajnipëtë'knëtë. Ënät ojts tmëkajpxtë ja Wintsën ets ja teetytyëjkëty tyajxuxtë ja pyujxn xuxnëty.

¹⁵Ko ja Judá ja'ayëty tyëjkëtyë yaxpë jojkpë ko ja tsip tsyo'ontä'äky, ja Wintsën ka'ap tyajmëtäky ja Jeroboam mëët ni'ëmukë ja Israel ja'ayëty. Yë Abiam ets Judá ja'ayëty yë'ë mëtaktë.

¹⁶Yë Israel ja'ayëty ka'ap ojts yë Judá ja'ay yajmëta'akëtë, jä'ä ko tëë ënäty ja Wintsën kyë'ëyakëtë.

¹⁷Abiam mëët yë jyä'äy may myëtsip tyaj'o'ktë, jä'ä nyiwinë'ajtë mëkoxk mëko'px mil aakyë'ë win'ixyëtypë ja tsiptuunpëtëjk Israel ja'ayëty.

¹⁸Jëtu'un'äämpy ja Israel ja'ay ojts tyëkoytyë tsipjotm, ja Judá ja'ayëty ni'ikyë ojts myëktaktëpë, jä'äkyëjxm ko yë'ë ojt tuk'ijxpätë ja Wintsën, mëti'ipë y'ëwtajtën ja y'ap y'okëty.

¹⁹Abiam ojts tpapo'oy ja Jeroboam ets ojts tpëjkë ja Betel kajpn, Jesaná kajpn ets Efraín kajpn, mëët ja mutskjaty kyajpn.

²⁰Jeroboam ka'ap myääyë tyaj'ixta'akëty jatëkok ja kyutujktakn mapaat jyuuky'äjtyën ja Abiam. Ok ojts yë Wintsën kë'ëm ja yuu pa'am tyukpaatyë ets y'o'ky.

²¹E yë Abiam ojts ni'ikyë myëktä'äky ma kyutujktaknën. Majkmajkts ijty tyo'oxytyëjk, i'px tëkëëk yë myaank ets majkmokx tu'uk yë nyëëx.

²²Ja nyikäjpxy nyimëtyä'äky yë Abiam, wi'ix tyuunyën ets tiijaty tyuunën ko jyuuky'äjty, jap myiinta'ay këxja'ay ma ja käjpxynyajxpë Iddo ja nyokyën.