Read Biblia Mixe de Quetzaltepec 2 Crónicas 14 Bible Online

2 Crónicas 14 - Biblia Mixe de Quetzaltepec bible

2 Crónicas 14

¹Ko yë Abiam y'o'ky jam ojts tyajnaaxtëkëtë ma ja David ja kyajpnën. Yë'ë kutëjkëyë ma ja kutujktaknën yë myaank Asá. Mapaat yë Asá yajkutujkyën ojts jyam'aty jotkujk'ajtën, majk jëmëjt tyuuny.

²Yë Asá oy ojts winë tuny ets mëtëy Wintsën wyintum, mëti'ipë Tios'ajtpën.

³Ojts tyajjëwa'kta'ay ja wintsë'këntyakn, awinax ets ja tsajptëjk ma ja'ay ijty t'ëwtatën ka'apë Wyintsënëtyën; ojts tjijtë'kta'ay ja tsajptëjk mëti'ipë yajpatëpën tunkëjxm kopkkëjxm, piw nuuk tuuntaay ja tsaa mëti'ipë nipiiwpety yaj'ijtëpën, ja kënu'kxypyë tijtën; jëtu'unyë tpu'utaay tkë'tstaay ja Aserá awinax.

⁴Ëpëky ojts mëk tni'ënä'ämë ets ja Judá ja'ayëty tja'amyätstëty ja Tyiosëty, mëti'ipë ja tyeety y'ap y'ëwtajtën ets tpatuntëty ja y'ënä'äm tyiyajtën.

⁵Maajaty ja naax kajpnën ojts tjëpëjkta'ay ja tsajptëjk ets ja wintsë'këntyakn ma ja ja'ay t'ëwtatën ka'apë Tyiosëtyën. Paaty ojts jyää'aty ja jotkujk'ajtën mapaat ojts yë'ë y'ëne'emyën.

⁶Mëët ko ënäty jä'ä xëëw jä'ä jëmëjt akujk jotkujk ja naax kajpn yajpaaty ets ka'ap maa tsip käjpxy, ko jëtu'un ja Wintsën t'a'ijxëy, ënät ojts Asá may tyajkojy yë kajpn mëkëtypë ta'tspëkyëtypë jam Judá.

⁷Tä t'ënëmaay ja Judá ja'ayëty: Tsojk ya'atë naax kajpn nyajta'tspëjkëmë ets mpojtsmëty tu'uk mëjpotsy na'ëwtityë, n'oytyu'unëmë tu'uk potsy ma ja ijx'ijtpë këwent'ajtpë yajpaatëty; ja tëjk'aaw ta'tspëkyëty yajpëjkta'akëty ja nyipotsy tyam maanëm naax kajpn ëëts njaakjä'ä'ajtëmën. Jä'ä ko tëë yë Wintsën n'ixta'ayëmë, mëti'ipë nTios'ajtëmën ets të xymyo'oyëmë jotkujk'ajtën mëët ja nmënaax'ajt nmëtsëpa'an'ajtëmë. Jëtu'un'äämpy ojts tkojtë oy yajxon ja potsy mëti'ipë ënäty të tuknipëjktaakëtën.

⁸Tam ënäty Asá tmëëtëty tsyiptuunpëtëjk, jä'ä nyiwinë'atë tëkëëk mëko'px mil, yë'ë Judá ja'ayëty; myëët'ajtëp ja pujxn mëti'ipë nätyuk'akëëytyujkëtëpën ets kyu'umënëty ets nimäjtsk mëko'px ja majkta'px ja Benjamín ja'ayëty, myëët'ajtëp ja pujxn mëti'ipë nätyuk'akëëytyujkëtëpën ets ti'pxn, aakjä'ä jotmëktëjk.

⁹Ojts nyipëtë'ëkëtë Zérah, Etiopíë ja'ay, mëët may ja tyuunpëtëjk; jä'ä nyiwinë'ajtë tu'uk millon ja ye'etyëjktëjk ets tëkëëk mëko'px ja kepy wintëkäämpë mëti'ipë myëtsiptuuntëpën, jampaat jyajtë Maresá.

¹⁰Ënät ja Asá mëët ja jyä'äy tsyo'ontë tsiptuunpë, jam nyäpyëjktakëtë joyjotm ma txëëwatyën Sefata, winkon ma ja Maresá.

¹¹Asá ojts ënätyë Wyintsën tmëkäjpxy mëti'ipë Tyios'ajtypyën ets t'ënëmaay: Mijts tu'knax ja'ay xypyutëkë oypyënëty, wä'än yë'ëjëty mëti'ipë ëmaay amutskën ets wä'än yë'ëjëty mëti'ipë amëk jotmëkën. Paaty yam mijts npëjktsoy etsës xypyutëkëtëty, ma mijts yë mxëëwën jamës mpëjkta'aktë ja njot nwinma'anyëty ets jëtu'un yam ya'atë nmëtsip ëëts nwinkuwa'akëja'antë. Mijts Wintsën, mëti'ipës nTios'ajtëpën, ka'ap mëpaat pën mjënaxyë.

¹²Jëtu'un'äämpy ja Wintsën ojts yë'ë tyajmëtä'äky ja Asá ets ëxëëk tuuny ja Etiopíë ja'ay, ojts kyäkta'atë.

¹³E ja Asá ets ja jyä'äy jampaat tpaja'ajtë ja Etiopíë ja'ay Guerar; wa'ats tyaj'o'ktaaytyë, nitu'uk ojts kyawë'ëmy juuky; ëxëëk jyajtë kyëpäjtë ma ja Wintsën ja tyuunpëtëjkën; ko myëtaktë may tpatë winë mëti'ipë ja mëtsip ënäty të tmëmintën.

¹⁴Tä ëpëky tnitëjkëtyë ja kajpn mutskëtypë mëti'ipë jam Guerar winkon yajpatëpën; ja ja'ayëty jampë tsyëënëtën ojts ja tsë'ëkë tyuktëjkëtya'ajëtë Wintsën wyintuuy. Ja Judá ja'ayëty wa'ats tmajtstaaytyë tääpë kajpn, may jam tpatë wit meeny.

¹⁵Ojts näjyëtu'un tnitëkëtë ma ja jëyujk tsajpkaa tyajtänëtën tääts tyajpëtsëëmtaaytyë ja kupixyny ets jëyujk jëku'ux. Ok jatëkok ojts wyimpijnëtë jam Jerusalén.