Read Biblia Mixe de Quetzaltepec 2 Crónicas 15 Bible Online

2 Crónicas 15 - Biblia Mixe de Quetzaltepec bible

2 Crónicas 15

¹Ja Azarías, Obed yë myaank, ojts nyiminyë yë Wintsën yë myëk'ajtën y'oyajtën,

²ets nitso'ony ja Asá ets t'ënëëmëja'any: Mëtow ya'atë aaw ayuk mijts Asá ets tu'kë'ëyë miitsëty Judá ja'ayëty ets Benjamín ja'ayëty. Yë Wintsën tää yajpaaty ma miitsëtyën, pën miitsëty myajpatëp näjyëtu'un ma yë'ëjën. Pën miitsëty m'ixtaaytyëp yë'ë, mpaatëp yë'ë; e pën miitsëty m'ëxmajtstëp, m'ëxmatsëtëp yë'ë näjyëtu'un.

³Yë Israel jeky jëtu'unyë të y'ity, ka'ap tnijawë pën Wyintsën'ajtyp, pën mëtëy tyeety'ätyp mëti'ipë yaj'ijxpëjkpën ets tukn'ijxëyëpën winë.

⁴E ko të t'ixta'ay yë Wyintsën ëmuumtu'ukjot ko amay jotmay tpaaty ets ko winë aaw winëjot t'ëwtaty mëti'ipë yë Israel ja'ayëty y'ëwtajtëpën ets mëktä'äky t'ixta'atë, yajpatp yë'ë.

⁵Jä'ä xëëw jä'ä jëmëjt ka'ap ënäty maa ja akujk'ajt jotkujk'ajtën; je'eyë ja tsë'ëkë jawë yajmëëtëty xiitsow yaatsow mëët ja wiinkëtypë ja kajpn.

⁶Nixim niyam ënäty ja naax kajpn je'eyë nyäyajkutëkoyë, jä'äkyëjxm ko ja Wintsën yë'ë tuk'ijxëtëp ja atsë'ëk ajawëpë mëët kanaakpëkpyë ja ëyo'on jotmay.

⁷E miitsëty xëmë m'itëty amëk jotmëk, ja tuunk mëti'ipë myajtu'uye'eytyëpën nëjkxëp mëjwiin këjää xytyuk'oy'atë.

⁸Ko ja Asá jëtu'un tmëtooy ya'atë ja aaw ayuk mëti'ipë nyikäjpxypën ja Wintsën ja tyuunpë, ënät myëkpëjky ets jyotmëktäky, tääts tyajkutëkooytyääy ja awinax ka'apë y'oyëtyën jampë ënäty yajpaatyën Judá ets ma Benjamín y'itjotmën; ma ja kajpnëtyën mëti'ipë të tnitsiptunyën ma ja Efraín y'itjotmën. Ojts tkoj'o'oyë ja Wintsën ja tsyajptëjk, ja wintsë'këntyakn mëti'ipë yajpatpën winkon ma ja teetytyëjkëty ja wyit nyätyukxoxëtën.

⁹Tä tyajmujktaay ja Judá ja'ayëty, Benjamín ja'ayëty, ets ja ja'tja'ayëty mëti'ipë jam tsënaaytyëpën; yë Efraín ja'ay, Manasés ja'ay ets Simeón ja'ay; jä'ä ko may ënäty yë Israel ja'ayëty jäätsow të nyaxtë ma Asá kyutujktaknën ko ojts t'ijxtë ko putëjkëyëp yë Wintsën.

¹⁰Jam ye'eymyujktë Jerusalén, ma tyëkëëkpo'opetyën ja mëmajkmokx jëmëjtpë, ma tyëkën yajkutujkpë ja Asá.

¹¹Tä ja Wintsën tukwintsë'këtyë wëxtujk mëko'px ja tsajpkaa ets wëxtujk mil ja kupixyny; aakjä'ä mëti'ipë ënäty të tpëjkëtën ja myëtsipëty.

¹²Ets ëmuumtu'ukjot tukkajpxpäjtë ja Wintsën ja xyëëw ets y'ënantë ko yë'ë xëmë tmëkajpxa'antë winë aaw winëjot, ja Wintsën mëti'ipë ja tyeety y'apëty y'ëwtajtën.

¹³Ojts tkäjpxy'atë ma Wintsënën: pën ka'ap tmëj'ixy ja Wintsën, mëti'ipë ja Israel ja'ayëty y'ëwtajtëpën, mëjpë mutskpë, ye'etyëjkpë to'oxytyëjkpë, kopkpëky ko y'ookëty.

¹⁴Yajxon mëk yaxtë jyojktë ets tukmëtoowtë ja Wintsën ya'atë ja winma'any, mëët ja ëëwpë koopë ets ja xuxpë wojpë.

¹⁵Tëkokyë ja Judá ja'ayëty akujk jotkujk nyäjya'awëyëtë mëët ya'atë ja aaw ayuk mëti'ipë ja Wintsën ojts tukwinwanëtën winë aaw winëjot, mëët ja tsojkën ja'awën ënäty ja Wintsën të t'ixta'atë ets Wintsën tëë ënäty jam yajpaaty mëët yë'ëjëty. Ojts tyaj'akujk'aty tyajjotkujk'aty ma mëët y'itën oy ja naax kajpn mëti'ipë mëët nyäwyinkon'atëtën.

¹⁶Ëpëky ja Asá ojts tpëjkë ja Maacá kyutujktakn ma ënäty yajpaatyën jëtu'un tä tu'uk nanwelën ma kutujktaknën, mëët yë'ë ko ojts yë Maacá tni'ënä'ämëpë ets yajkojëty yë Aserá y'awinax. Asá tyuka'tsëtyääy ya'atë awinax, xit ko'ow tuuntaay ets jam tyajnitooy wokjotm ma txëëwatyën Cedrón.

¹⁷Oy jam Israel ka'ap tyajjëwa'ktaaytyë ja tsajptëjk jampë muum tunkëjxm kopkkëjxm yajpaatën, ma ijty t'ëwtatën ja wiink wintsën; yë Asá je'eyëm ojts nyëye'ey tyu'uye'ey oy,

¹⁸ets tpëjktaktaay jap ma Wintsën yë tyëjkën tëkokyë ja pu'ts pujxn ets poop pujxn mëti'ipë ënäty yë'ë të tpaatyën ets mëti'ipë ënäty ja tyeety näjyëtu'un të tpaatyën; aakyë'ë myooytyääy ja Wintsën jap tsajptëkoty.

¹⁹Ka'ap tmëët'ajty tsip käjpxy mëët wiink kajpn ko yë'ë yajkutujky, jëtu'un ojts yajkutuky i'px majkmokx jëmëjt.