Read Biblia Mixe de Quetzaltepec 2 Crónicas 18 Bible Online

2 Crónicas 18 - Biblia Mixe de Quetzaltepec bible

2 Crónicas 18

¹Josafat, mëj këjää ja wit meeny tpaty t'ijxy, jëtu'un'äämpy ojts mëj'äämpy ja ja'ay yajnaxyë ets yë'ë myë't'ajt Ahab.

²Tëkok ojts nyijkxy yë Josafat jam Samaria ets tku'ixëja'any ja Ahab, Ahab ënätyë tu'uk xëëw tnipëjktakëy ets twintsë'ëkëja'any ja Josafat mëët ja mëti'ipë mëët myinyën, may ja tsajppax ja kupixyny ets tsajpkaa tyaj'o'ky ets tukmëmëtyäky ko tnitëkëja'antë ja Ramot kajpn ets Galaad kajpn.

³Ja Ahab mëti'ipë jam Israel yajkutujkpën, ojts tyajtëy jëyëjp ja Josafat, ja Judá yajkutujkpë: ¿Wi'ix oyës xyjyämyëët'atëtyë, ja'am Ramot kajpn ets Galaad kajpn nitëjkëmë? Tä Josafat y'ëtsooy: Ëjts nmëëtës yë ntuunpëtëjk, tyam ëëtsëty, oy nja'amëty.

⁴Je'eyëp tëy, ko jëyëjp yë Wintsën tuk'ëwaanë.

⁵Tä ja yajkutujkpë tjanty woowmujktaay ja Wintsën ja myëtuunpëtëjk, jä'ä nyiwinë'atë nimajktaxk mëko'px, jä'äts yajtëëw: ¿Wi'ix oy'atëp etsës nëjkx nitëkëtë yë Ramot kajpn ets Galaad kajpnë, oy'atëp ëkë oy ka'apë? Tä y'ëtsoowtë: Oy'atëp, nëjkx nitëkëtë, jä'ä ko yë Tios tëë y'ënä'äny ko miits mëta'aka'antë.

⁶Tä ja Josafat tyajtëëy: ¿Wi'ix ka'ap ma wiinkpë ja'aynyë mëti'ipë myëtuumpyën yë Wintsënë, mëti'ipë jeexyë näjyëtu'un nyajtë'ëwëmë?

⁷Ënät ja yajkutujkpë t'ëtsooy ja Josafat: Tää wiinkpë mëti'ipë tyam yaa ka'ap yajpaatyën, mëti'ipë jyëkyejpyën näjyëtu'un nyajtë'ëwmëty wi'ix ja Wintsën y'ënä'änyën. Yë'ë Micaías, yë Imlá myaank. Je'eyëp tëy ko ëxëëkës tääpë ja'ay n'ixy, jä'ä ko ka'ap nijëna'a tii oy tnikäjpxy, aak ëxëëk winë tnimëtyä'äky. Tä y'ëtsooy ja Josafat: Këtii jëtu'un m'ëna'any.

⁸Tä ja yajkutujkpë tnikäjxëy tu'uk ja tyuunpë ets t'ënëmaay: Nëjkx woy yë Micaías, yë Imlá myaank.

⁹Ja Josafat, mëti'ipë jam Judá ënä'ämpën ets ja Ahab mëti'ipë jam Israel ënä'ämpën, tëë ënäty tpëjkta'aktë ja nyijänëty mëti'ipë myëtsiptuuntëpën ets jam pyo'kxtë pyëktë ma y'ënyääypyäjnëtyën jam tëjk'ëkë'ëm, jam Samaria. E ja ja'ayëty mëti'ipë käjpxynyajxtëpën jëtu'un ojts tyëkëtë ëtëtspë ënaanpë jëtu'un tä ja'ay myu'ukyën.

¹⁰Ja mëti'ipë txëëwajtpën Sedequías, yë Quenaaná myaank, tëë ënäty tu'uk t'oytyuny tsajpkaawaj, aak pujxnëpë ets mëk jyänty'ënäny: Mëët ya'atë tsajpkaawaj yë'ë mëët xyajkutëkoyëty yë Siria ja'ayëty, koonëm y'o'kta'atëty.

¹¹Tëkokyë ja käjpxynyajxpëtëjkëty aakjëtu'un t'ënëmaaytyë ja yajkutujkpë: Nitëkëmës tääpë Ramot kajpn mëti'ipë nyitënääpyën Galaad, Wintsën yë'ë myajmëta'akanëp ets mo'oja'anyë tääpë naax kajpn.

¹²Ja kukexyye'epyë, mëti'ipë ënäty të tninëjkxyën ja Micaías ets myinëty, jëtu'un ja Micaías t'ënëmaay: Tëkokyë yë Wintsën yë tyuunpëtëjk aak'oy të kyajpxtë ma ja yajkutujkpën. Paaty yam mijts n'ënëëmë xytyunëty mëyajtën oy winë xynyikajpxëty ets oy ja yajkutujkpë aaw ayuk xymyo'ojëty.

¹³Tä ja Micaías y'ëtsooy: Tyam yajxon n'ënëëmëty ets mëët ja Wintsën ja xyëëw, ko yi'iyës yam nikajpxäämpy mëti'ipës yë Wintsën xytyuk'ënä'ämpën nikajpxëty.

¹⁴Tä nyäwya'këxë'kë jam ma ja yajkutujkpën ets ja yajkutujkpë y'ënëmaayë: Micaías, ¿wi'ix myäyëp ëëts nitëkëtëty yë Galaad kajpnë, ëkë ka'apë? Ënät ja Micaías y'ëtsooy: Nitëkëtë, mijts mëta'akaanp, jä'ä ko yë Wintsën tëë y'ënä'äny ko mijts tääpë naax kajpn mo'oja'anyë.

¹⁵E ja yajkutujkpë tyaa y'ëtsoowë: ¿Naak'okën yam mijts n'ënëëmëty ets xynyikajpxëp Wintsën xyëëwkyëjxm yi'iyë mëti'ipë mëtëyën?

¹⁶Ënät ja Micaías ya'atë ja aaw ayuk tkajpxpëtsëëmy: Tëës n'ixy wi'ix ja Israel ja'ayëty yajpaatën axit ako'owë jam tunkëjxm, jëtu'un tä muum yajpaatën yë kupixyny mëti'ipë ka'ap nyiwintsënën. Jëtu'un ja Wintsën të y'ënä'äny: Tyaapë ka'ap pën nyiwintsën, wä'än tim nyëjkxta'atë ma tyëjkëtyën.

¹⁷Tä ja Israel yajkutujkpë t'ënëmaay ja Josafat. Tä ix tëë ntimy ënëëmë ko tyaapë ja'ay nijëna'a tii oy tkanikäjpxy.

¹⁸Ja Micaías jyaak nikajpxëy ja aaw ayuk ets y'ënäny: Ya'atë aaw ayuk mëti'ipës yam nnikäjpxypën Wintsën yë y'aaw y'ayuk; mëtoow'it wi'ix y'ënä'änyën: Tëës n'ixy ja Wintsën jam pyo'kxy pyiky ma y'ënyääypyäjnën, ma yajkutukyën ets ja tyuunpëtëjk tsajpkëjxmëpë tam myäyajpaatë ma yë'ëjën anajny aka'any.

¹⁹Ënät ja Wintsën tyajtëëy ja tyuunpëtëjk, pën nëjkx t'ëk'ënëëmë ja Ahab tëkatsy ets tnitëkëty ja Ramot kajpn mëti'ipë ja Galaad nyitënääpyën ets jam y'ookëty. Pën tëkatsyëty ja aaw ayuk ojts t'ëtsoy ets ja wiinkpë nän tëkatsy.

²⁰E tu'uk ja ëxëëk poj ojts y'ënä'äny ko yë'ë nyëjkxa'any. Tä ja Wintsën yajtëëwë wi'ixën tuna'any,

²¹ets y'ëtsooy ja ëxëëk poj, ko yë'ë tyuktëjkëtya'ajäämpy ja yajkutujkpë ja kyäjpxynyajxpë. Ënät ja Wintsën y'ëtsooy, ko jëtu'un tyuna'any jyata'anyë ets wä'än nëjkx jëtu'un tuny.

²²E tyam tëë xynyijawë ko ja Wintsën yë'ë të tpëjktä'äky tu'uk ja ëxëëk poj mëti'ipë antakpën ma ja käjpxynyajxpëtëjkëtyën ets tnikajpx tnimëtya'aktëty mëti'ipë ka'ap tyiyëtyën ets ëxëëk mjat mkëpätëty.

²³Tä ja Sedequías, myaank yë Quenaaná, wyä'ätsë'ky ets tmëwinkoony ja Micaías, tääts tu'kkë'ë t'amëkojxëy ets t'ënëmaay: ¿Ëjts ka'apës nnijawë maa të nyijkxy ja Wintsën ja myëk'ajtën ets mijts nmëmëtya'akëty?

²⁴E Micaías tyaa y'ëtsoowë: Jäänëm xynyijawëty ko ënäty yu'utsy kë'ëy mjaakjëtity winjëën wintëjk.

²⁵Ënät ja yajkutujkpë, mëti'ipë Israel ja'ayën ni'ënä'ämëy ja Micaías ets t'ënëmaay ja tyuunpëtëjk: Matstë yë Micaías ets xymyënëjkxtëty ma Amón yajkutukyën ets maajës yë nmaankën Joás.

²⁶Jëtu'un xy'ënëëmëtëty ko jap tpëjkta'aktëty pujxn tëkoty, wäänjaty xyajkaytyëty ets xyajnëë'uuktëty, koonëmës nwinpitëty oy mëk maas nëjkx ntsiptuna'anyën.

²⁷Ojts ja Micaías jyaakëna'any: Pën mijts oy mwinpity, ka'ap ënäty Tyiosëty të xyajkäjpxyës.

²⁸Ënät tsyo'ontë ja yajkutujkpë mëti'ipë jam ënä'ämpën Israel ets ja Josafat mëti'ipë jam ënä'ämpën Judá, yë'ë nyitëkëjantëp yë Ramot kajpn mëti'ipë nyitënääpyën yë Galaad.

²⁹Tä ja Israel yajkutujkpë t'ënëmaay ja Josafat: Ëjts ka'apës nwit mpëjkta'aka'any jam tsipjotm mëti'ipës nmë'ëne'empyën, mijts yë mjä'ä mpëjkta'akëp. Jëtu'un ja Israel yajkutujkpë y'ënäny; ko tyëjkëy tsiptuunpë wiink wit myëtsiptuun.

³⁰E ja Sirië yajkutujkpë, tëë ënäty t'ënëëmë ja tyuunpëtëjk ko këtii nëkooyë pën tyaj'ooktëty, yi'iyë y'ixtëp tyuntëp pën jam ënä'ämpën Israel.

³¹Paaty ko ja sirië ja'ayëty t'ijxtë ja Josafat, jëtu'un y'ënantë ko jä'ä ja Israel yajkutujkpë, tä ënätyë tyajnatujktë. Tä Josafat ënätyë tmëpëjktsooy ja Wintsën ets pyutëkëtëty, yë'ë ënätyë jyänty pyutëjkëyë. Ënätyë tyajjëwa'ktaay ja sirië ja'ayëty,

³²jä'ä ko kë'ëm t'ijxtë ko ka'ap jyä'äjëty ja Israel yajkutujkpë, tääts ka'ap wi'ix tuuntë.

³³Ajotkumonë ojts tu'uk ja Siria ja'ayëty tyi'pxë'ëky, kujk ojts tyimpaatyë ja Israel yajkutujkpë. Ënät t'ënëmaay ja mëti'ipë ja kepy wintëkäämpë yajye'epyën: Wimpit jatëkok, ju'tkës yaa tsipjoty jä'ä ko tëëjës ntsëtyuty.

³⁴Mëj ojts ja tsip tyunyë jä'ä xëëw, jëtu'un kyutsu'ujëy; paaty ja yajkutujkpë oy wi'ix tjaakyajxnajxy ja xëëw tänë jam ma ja keypywyintëkäämpën, ma mëët ja Siria ja'ayëty tsyiptuntën. Jënäkyxyëëw ojts y'o'knë, ma xëëw tyimkëtaknën.