Read Biblia Mixe de Quetzaltepec 2 Crónicas 26 Bible Online

2 Crónicas 26 - Biblia Mixe de Quetzaltepec bible

2 Crónicas 26

¹Ënät ja naax kajpn ojts tnikajpxpety ja Uzías ets yë'ë yajkutukëty, jä'ä ko ja tyeety Amasías tëë ënäty y'o'knë. Uzías jä'ä ënäty jyëmëjt majkmokx tu'uk,

²ko ojts tyëkë yajkutujkpë. Tëë ënäty ja tyeety y'o'knë ko ojts t'koj'oyë ja naax kajpn mëti'ipë yajtijpën Elád ets jä'ä tukë'ëtëjkëy ja Judá ja'ayëty.

³Uzías jä'ä ënäty jyëmëjt majkmokx tu'uk ko tyëkë yajkutujkpë ets jä'ä ojts jam Jerusalén yajkutuky wëxtyikxy majkmokx mäjtsk jëmëjt. Jecolías ja tyaak ijty xyëëwajtyp ets Jerusalén kyukajpnëty.

⁴Yë Uzías oy ojts winë tuny Tios wintum, jëtu'un tä ja tyeetyën Amasías.

⁵Maapaat ja Zacarías ojts jyuuky'ätyën xëmë ojts ja Wintsën t'awä'äky, jëtu'un tä ënäty të y'ityën yë Amasías mëti'ipë tyeety'ajtën ets mëti'ipë tyatwelë'ajtën. Ko ja Wintsën ijty yë'ë t'awä'äky xëmë ojts pyutëkëty.

⁶Uzías ojts kanaak ok mëët tsyiptuny yë filistejë ja'ayëty, ojts may tjity ja potsy, mëti'ipë ja filistejë ja'ayëty ijty tyukuwantëpën ja kyajpnëty, ma ja kajpnën mëti'ipë yajtijpën Gad, Jabnia ets Asdod. Ojts tyajkojy kanaak kajpn jam ma ja itjot tnitänëtën yë filistejë ja'ayëty, ma txëëwatyën Asdod.

⁷Yë Wintsën yë'ë ojts pyutëkëty ets ka'ap tyajmëta'akëty yë filistejë ja'ayëty, Árabe ja'ayëty mëti'ipë jam tsënaaytyëpën Gur-baal ets Meunim ja'ayëty.

⁸Yë Amón ja'ayëty yajktëp ijty yë kyëpäjtën jam ma Uzías yajkutukyën, Uzías akäjpxy ojts y'ity jampaat Egiptë, jä'ä ko yë'ë ojts myëjtëkë yë kyutujkën.

⁹Ojts mëjpotsy tkojy jam Jerusalén, ma ja tëjk'aawën jampë ma potsy tyäkën, ma ja tëjk'aawën jampë joyjotmën ets maajaty ja potsy tyäkën jëtu'un këwent'aty xëmë y'itëty.

¹⁰Ojts näjyëtu'un potsy tyajkojy jam të'ëts'itjotm, ojts may nëëjut tyaj'ëwa'atsy, jä'ä ko yë'ë may ijty jëyujk tsajpkaa tmëëtëty; jam joyjotm ets jam kopkëjxm. Tam ijty näjyëtu'un tmëëtëty may tuunpë ma kyam tyu'ujën jam tunjotm ets maajaty y'ääy y'ujts tyaj'ityën, yë'ë oy ijty tsojkën'aty naax tuunk.

¹¹Tam ijty yë Uzías näjyëtu'un tmëët'aty may yë ja'ay mëti'ipë tsip'ixyëtyën, jëna'ajëty ijty tsyoontë ets nëjkx muum tsyiptuntë, jaaypyëtsimy ijty muum nyëjkxtë; yë'ë yë Jehiel jaaypëtsëëmëtëp mëti'ipë ja yajkutujkpë jyääpyë'ajtypyën ets Maaseías, mëti'ipë nyiwintsën'ajtypyën yë tsiptuunpëtëjkëty, yë Hananías yë'ë tu'uwinwoowëtëp, mëti'ipë ja yajkutujkpë tyukwinkuwa'këpën ja tsip.

¹²Jä'ä ijty nyiwinë'atë ja ja'ayëty mëti'ipë ja myëku'uk nyikopk'ajtëpën, nimäjtsk mil ja tëkëëk mëko'px, aakjä'ä mëti'ipë jotmëkëtyën.

¹³Ja Uzías jä'ä ijty tmëët'aty ja mëti'ipë tsiptuuntëpën tëkëëk mëko'px ja wëxtujk mil ja mëkoxk mëko'px, mëti'ipë ja tsip xëmë wyinkuwa'këtyëpën.

¹⁴Uzías ojts may tyajkojy ja pujxn mëti'ipë yajtuuntëpën ja tsiptuunpëtëjkëty ko muum nyëjkxtë tsiptuunpë, ojts tyajkojy pujxn nijän, ti'pxn, ku'umën ets tsaawëtu'un.

¹⁵Jam Jerusalén ojts jam tyajkojy tuunpäjn mëti'ipë yajmëtsiptuunpën, mëti'ipë jam pyëjktakën muum kopkkëjxm ets jam muum tëjkëpajkm ets jam kyuti'pxnaxtëty ja ja'ayëty mëti'ipë kyuwantëpën. Yë Uzías mëj'äämpy ojts muum nyäxy ets ojts myëjë kyëjääjë ja myëj'ajtën kyutujkën. Wintsën Tios ojts kë'ëm pyutëkëty.

¹⁶Je'eyëp ko ojts nyäjyawëty tëë myëktä'äky jam ma kutujktaknën, amëj akëjxm ojts y'awinpijnë. Ka'ap ja Wintsën t'ëkmëj'ijxnë, tëjkënyëp jap tsajptëkoty kë'ëmwinma'any ets tno'ky ja poom kë'ëmwinma'any ma ja poom wintsë'këntyaknën.

¹⁷Yë'ë mëët tyëjkëy tsajptëkoty ja teety Azarías, mëët nimajkta'px ja teetytyëjkëty,

¹⁸ets ojts t'ojtë ja yajkutujkpë, jëtu'un t'ënëmaaytyë: Mijts yajkutujkpë tëë mtëkoy, jä'ä ko ka'ap myijtsëty mpaatyë xyakëty yë wintsë'kën ets mijts xytyukwino'ok xytyukwinxamëty yë poom yë Wintsën, yë teetytyëjkëty yë'ë patëtëp, yë Aarón yë y'u'unk y'ok, mëti'ipë të yajtukmëkënu'kxëtën. Paaty tim pëtsëm tyämyë, jä'ä ko mijts ka'ap yë Wintsën të xymyëj'ixy, yë'ë ka'ap t'oy'ixy ko mijts jëtu'un të m'ëtë'ëtsy.

¹⁹Ja Uzías tam ënäty tkë'ëwits'aty tu'uk yë jëëntsijtk ko tukjoot'anpëjky ja teetyëjk. Ënät tyukpëtsëëmë ënätyë pu'uts pa'am ma wyimpokën mëti'ipë yajtijpën lepra, jap ënäty tsajptëkoty yajpaaty, ma ja poom wintsë'këntyaknën, ets tap ënäty yajpaatë ja teetytyëjkëty näjyëtu'un.

²⁰Ko ja teety kyopk Azarías twin'ijxpejty ets näjyëtu'un ja wiinkëtypë ja teetytyëjkëty ets t'ijxpatë ko tam tyukpëtsëmyë ma wyimpokën, ënätyë tyajpëtsëëmtë; yë'ë ënätyë näjyëtu'un kë'ëm y'ënäny ko pyëtsëmëty, jä'ä ko tëë ënäty twinjawë ko yë Wintsën tëytyuunp yë'ë.

²¹Yë yajkutujkpë Uzías, jëtu'un ojts jyaakjuuky'äty pa'amjoty ets pu'uts pa'am yaj'o'kë, ëpëky yajpëjktäky ets atu'uk jyuuky'atëty, ka'ap yaj'ëwatsy ets jap tyëkëty tsajptëkoty, ja myaank Jotam yë'ë ojts tjaakkutuny ja tyeety ets ja naax kajpn yë'ë twinkuwa'këy.

²²Yë Uzías yë nyikäjpxy nyimëtyä'äky, jap myiny kuja'ay ma ja nokyën mëti'ipë jyääyën ja Jeséas, ja Wintsën ja myëtuunpë, yë Amós yë myaank.

²³Ko ja Uzías ojts y'o'knë jam ojts nyaaxtëkë ma y'aptëjk nyaaxtëjkëtyën, mëët ko pu'uts pa'am ënäty të yaj'ookyë. Yë myaank Jotam yë'ë ojts kyutëkëty ma ja kutujktaknën.