Read Biblia Mixe de Quetzaltepec 2 Crónicas 27 Bible Online

2 Crónicas 27 - Biblia Mixe de Quetzaltepec bible

2 Crónicas 27

¹I'px tu'uk ënäty Jotam jyëmëjt ko tyëjkëy yajkutujkpë jam Jerusalén, majkmokx tu'uk jëmëjt ojts y'ëne'emy. Jä'ä ijty yë tyaak xyëëwajtyp Jerusá, Sadoc yë nyëëx.

²Jotam oy winë tuuny ma Wintsënën, jëtu'un tä Uzías ënäty winë të tunyën mëti'ipë yë'ë tyeety'ajtën. Je'eyëp ko yë'ë ka'ap jap tsajptëkoty tyëjkëy. E oy jyajëtu'unëty ja naax kajpn je'eyëm ojts winë ëxëëk tuny tkäjpxy.

³Jotam ojts tyajkojy ja tsajptëjk ja nyitëjk'aaw, ja anëkëjxytsyowpë wyi'imyën, ojts näjyëtu'un kanaak ja tëjk tkojy jam ma ja mëjpotsy nyäxyën mëti'ipë xyëëwajtypyën Ofel.

⁴Ojts tyajkojy naax kajpn jam Judá, ojts tyajpëtë'ëky potsy mëjatyëtypë mëti'ipë ja naax kajpn tyukuwanën, kanaak ja potsy ojts tyajpëtë'ëky jam yukjotm ma ja'ay y'ijx'it kyëwent'atën.

⁵Ojts tsyiptuny mëët ja yajkutujkpë mëti'ipë Amón ja'ayën ets ka'ap tyajmëtäky. Jä'ä jëmëjt ja Amón ja'ayëty xëmë ijty myeenyyaktë ma ja Jotamën, tëkëëk mil ja tëkëëk mëko'px tsim yë poop pujxn, mäjtsk millon ja mäjtsk mëko'px apëjkën ja tsajpmok ets ëpëky ja cebadë. Jëtu'un ijty tyaktë winjëmëjt.

⁶Mëj'äämpy yë Jotam nyäjxy oymyaajëty, jä'ä ko ojts ja Wintsën oy tmëmëtoy.

⁷Ja nyikäjpxy nyimëtyä'äky ja Jotam ets tëkokyë wi'ix tsyiptuunyën, jap myiinta'ay ma nokyën mëti'ipë jyä'ä'ajtëpën yë yajkutujkpëty jampë ojts y'ënä'ämtën Israel ets Judá.

⁸I'px mëkoxk ënäty Jotam jyëmëjt ko tyëjkëy yajkutujkpë jam Jerusalén ets majkmokx tu'uk jëmëjt ojts y'ëne'emy.

⁹Ko y'o'knë, jam nyaaxtëjkë ma ja David ja kyajpnën, ma nyaaxtëjkëtyën ja y'aptëjk. Yë'ë kutëjkëyë ma ja kutujktaknën ja myaank Ahaz.