Read Biblia Mixe de Quetzaltepec 2 Crónicas 28 Bible Online

2 Crónicas 28 - Biblia Mixe de Quetzaltepec bible

2 Crónicas 28

¹I'px ënäty yë Ahaz jyëmëjt ko tyëjkëy yajkutujkpë ets majkmokx tu'uk jëmëjt ojts yajkutuky jam Jerusalén; je'eyëp ko yë'ë ka'ap ojts oy ja Wintsën tmëtuny, jëtu'un tä David mëti'ipë y'apäjtën.

²Yë'ë ojts ja në'ë tu'u tpanëjkxy ja ka'apë y'oyëtyën, jëtu'un tä ja yajkutujkpëtëjkën jampë ënäty të yajkutuktën Israel. Ojts tyajkojy pujxn awinax jëtu'unpë yaj'ixyën tä ja Baalën,

³ojts ja poom tyajjoky tyajwiixy jam ma ja joyjyot txëëwatyën Ben-hinom, ni'ikyë ja y'u'unk y'ëna'k ojts tnino'k tniixaamnë, tukwintsë'ëkë ja ëxëëkpë ku'oypyë, tuunë winë tä ja naax kajpnëtyën mëti'ipë ënäty ja Wintsën të t'ëxkexyën.

⁴Ëpëky wintsë'kën jam muum tpëjktäky ma kepypya'tkën, ëkë ma muum tu'u ye'eywä'kxyën, ëkë jam muum tunkëjxm kopkkëjxm ets jam nyo'ky xyäämy.

⁵Paatykyëjxm ja Wintsën kyë'ëyajkë ets ja Siria ja'ayëty myëmëtakë, may ojts ja Siria ja'ayëty tyajnëjkxtë ja ja'ay tsumy matsy jam Damaskë. Ojts kyë'ëyäkyë näjyëtu'un ja Wintsën ma ja Israel ja'ayëtyën, mëti'ipë ëxëëk tuunën ets ka'ap yajmëtakë.

⁶Jam ijty tu'uk yë ja'ay yajpaaty, jä'ä xyëëwajtyp Pécah, jä'ä ojts yë Judá ja'ay tyaj'ooky mëko'px ja i'px mil, aakjä'ä ja mëti'ipë mëj'äämpy ijtëpën jam Judá. Jëtu'un tkëpäjtë mëët ko ënäty ka'ap ja Wintsën të tmëj'ixtën, mëti'ipë y'aptëjk y'ëwtajtën.

⁷Tam ijty wiinkpë ja'ay, Efraín jyä'äy, tsip'ixy ijty näjyëtu'un. Yë'ë yaj'o'k ja Maaseías, ja yajkutujkpë myaank; tääts ja Azricam, mëti'ipë nyikopk'ajtypyën ja kutujkëntëjk, ets ja Elcana mëti'ipë ja yajkutujkpë ja tyuunpëtëjk tyukwintsën'ajtypyën.

⁸Ja Israel tsiptuunpëtëjkëty ëpëky ja Judá ja'ay may tsuumtë tmajtstë, nimäjtsk mëko'px mil nyiwinë'ajtë, ye'etyëjk to'oxytyëjk ets pi'k ëna'k; ojts winë tyajpëtsëëmta'atë jam kajpnjotm ets tyajnëjkxtaaytyë jam Samaria.

⁹E jamts ijty tu'uk ja Wintsën ja tyuunpë yajpaaty jä'ä xyëëwajtyp Obed, ojts jam tjëjpye'eytsyoy ja tsiptuunpë ja'ayëty mëti'ipë jam Samaria ënäty jajtëpën ets t'ënëmaay: Ja Wintsën, ja m'aptëjk ja Wyintsënëty, yë'ë të tukjoot'anpëky ja Judá, paaty miitsëty të myajtukë'ëtëkëtë. Je'eyëp ko miitsëty nëkooyë näjyëtu'un ja mëku'ukëty të xytyimniwa'kënëtë.

¹⁰Ëpëky ja mayjyä'äy të xyajmintë mëti'ipë mwa'anantëpën mëtuunpë ëyoopë, jampë kyukajpn'atën Judá ets Jerusalén. Ëkmëmay ëkmëtajtë miitsëty, ¿këtii jëtää näjyëtu'un mtëkoytyë?

¹¹Paaty yam n'ënëëmëtë ets xymyëtoow'itëty ja n'aaw n'ayukës, ko xynyajtsmatsëtëty ja tsumjyä'äy, mëku'uk yë'ëjëty, jä'ä ko yë Wintsën wiink t'ixy ko jëtu'un m'ëtë'ëtstë.

¹²Ënät ja ja'ayëty mëti'ipë xyëëwajtëpën Azarías, yë myaank yë Johanán, yë Berequías yë myaank yë Mesilemot, yë Ezequías, yë myaank yë Salum ets Amasá, yë myaank yë Hadlai, mëti'ipë ënäty nyikopk'ajtëpën ja Efraín ja'ayëty, tääts tjëjpkuwa'këtyë ja ja'ay mëti'ipë ënäty ojts të tsyiptuntën,

¹³ets t'ënëmaaytyë: Këtii yaa xyajmintë yë tsumjyä'äytyëjk, jä'ä ko nëkoopë nmëpokytyëjkëmëty ma Wintsënën. Miitsëty je'eyë nëkoo xy'ixta'atë jotmay mëti'ipë ënät ni'ikyë xyajpokykya'amëpën, tyam këjää ja amay jotmay tjapatëmpë ets ja Wintsën ënät ni'ikyë njaakyyajjoot'anpëjkmëtyë, ka'ap mëpaat.

¹⁴Ënät tnajtsmajtsëtyë ja tsumjyä'äytyëjk ets tmooytyääytyë jatëkok mëti'ipë ënäty të tpëjkëtën ja kyopktëjkëty ma ja kyajpnëtyën.

¹⁵E ja ja'ayëty mëti'ipë të yajnikajpxtën, yë'ë wyoownëjkxtaaytyë ja tsumjyä'äyëty ma ja nyaax kyajpnëtyën; jap ma mëti'ipë ënäty të yajpëjkëtën ja jyä'äyëty jap yajju'ty ja wit tujkxy mëti'ipë yajtukxojxtën, ojts yajmo'otë ja kyë'ëkëty, ojts tyajkay tyaj'uuktë ets tyajtsooypyäjtë ja tsyëtyutëty; ënät tyajpäjtë jëyujk këjxy mëti'ipë ka'ap ye'eytyën, jëtu'un jam tyajja'ajtë Jericó, ma ja tëëxykyepy myäytyänën ets tukë'ëtëjkëtyë ja jyiiky myëku'ukëty. E yë'ëjëty tä ojts wyimpijnëtë jam Samaria.

¹⁶Jä'ä xëëw jä'ä jëmëjt ojts yë Ahaz, mëti'ipë jam ënä'ämpën Judá tkäjpxynyikexy ja yajkutujkpë mëti'ipë jam Sirië ënä'ämpën ets t'amëtoy ja putëjkën,

¹⁷jä'ä ko tëë ënäty ja Edom ja'ayëty nyitëkëty ets tëë ënäty may ja ja'ay tsum tyajnëjkxy.

¹⁸Ets ja filistejë ja'ayëty nän tëë ënäty tnitëkëtë ja Négueb kajpn, mëti'ipë Judá nyitënääpyën; tëë ënäty näjyëtu'un tyajnatuktë yë Bet-semes, Aialón ets Guederot ets Socó, Timná ets Guimzó mëët tëkokyë ja nyaax kyamëty mëti'ipë myëët'ajtëpën ets jam të nyäpyëjktakta'ajëtë.

¹⁹Wintsën ojts jëtu'un kë'ëm tuknipëjktaakë, mëët ko ja Ahaz ka'ap kyäpxyjyä'äykyujkë, mëti'ipë jam Judá ënä'ämp yajkutujkpën, tëë ënäty ja Judá kajpn tyajma'aty, ka'ap ja Wyintsën Tios tmëj'ijxy tmëjpëjktäky.

²⁰Ja Tiglat-piléser, mëti'ipë Asiria ja'ayën, jëtu'un ijxtëm jeexyë pyutëkëtyën ni'ikyënëm ojts jyotmaymyo'oyë.

²¹Jä'ä ko ojts may winë tjamo'oy, tä ja pu'ts pujxnën, poop pujxnën mëti'ipë japën tsajptëkoty, këmoontëkoty ets ma ja wintsëntëjkëty ja tyëjkëtyën, ka'ap ojts pyutëkëty.

²²E yë'ë oy ja amay jotmay tjapaty kä'äpyëm ja jyot wyinma'any tyaj'o'oyëy ets kä'äpyëm ja Wintsën tmëjpëjktäky, jëtu'un jyä'äy'äjty ja yajkutujkpë Ahaz.

²³Ni'ikyënëm ojts ja wyintsë'kën tmo'oy ja tios mëti'ipë Damaskë ja'ay y'ëwtajtëpën, yë'ë ojts yajtëkoyë. Jëtu'un ojts myäy tyäjy pën tyaapë tios yë'ë të tputëkë yë Sirië yajkutujkpë näjyëtu'un nëjkx pyutëkëty ko tmo'ojëty yë wyintsë'kën. E yë'ë ni'ikyënëm ojts o'ktëy yajjatyë ets o'ktëy ja nyaax kyajpn tyajjajty tyajkëpejty.

²⁴Ahaz wa'ats twinpëjkmujktaay ja apëjk atu'unën mëti'ipë ënäty japën tsajptëkoty ets piw nuuk tuuntaay, ojts ja tsajptëjk tyaj'ëtujknë ets ni'ënä'ämëy tyaj'oyëtëty yë wintsë'këntyakn maajaty ja kajpn tatskën jam Jerusalén.

²⁵Jam Judá ojts jam may tkojy ëxëëkpë nyitsajptëjk ets jap tukwino'ok tukwinxamtëty ja poom ja wiink tios ets jëtu'un'äämpy ni'ikyë ja Wintsën tyajjoot'anpëjky, mëti'ipë ënäty ja y'aptëjk të t'ëwtatën.

²⁶Ja nyikäjpxy nyimëtyä'äky ets tëkokyë mëti'ipë tyuunën, wi'ix tsyo'ontäkyën ets wi'ix jyëjpkëjxyën jap myiinta'ay ma ja nokyën mëti'ipë jyä'ä'ajtëpën ja yajkutujkpëtëjk jampë ojts y'ënä'ämtën Judá ets Israel.

²⁷Ko ojts y'o'knë jam nyaaxtëjkëy ma Jerusalén kajpnën, je'eyëp ko ka'ap jyamëty ma nyaaxtëkëtën ja yajkutujkpëtëjk mëti'ipë oy të tyuntën jam Israel. Yë'ë kutëjkëyë myaank Ezequías ma ja kutujktaknën.