Read Biblia Mixe de Quetzaltepec 2 Crónicas 31 Bible Online

2 Crónicas 31 - Biblia Mixe de Quetzaltepec bible

2 Crónicas 31

¹Ko kyijxy nyäjxy ja xëëw, ja Israel ja'ayëty ojts nyëjkxta'atë kajpntum ets tjijtë'ktaaytyë ja potsy ets ja tsaa mëti'ipë ënäty ja ja'ay tyijtëpën ko myëj'ajtënmëëtëty ets tukjijtëtyääytyë ja Aserá y'awinax ets tëkokyë mëti'ipë ënäty wiink yaj'ijxpën, jëtu'un ja mëti'ipë jam yajpatpën ma Efraín ja kyajpnën ets ma ja Manasés ja kyajpnën. Kom'oknëm ja Israel ja'ayëty nyëjkxtaaytyë ma jyëën tyëjkëtyën.

²Ezequías tyuknikäkëtyääy ja teetytyëjkëty tiijaty tyuntëpën, mëti'ipë ojts tyuka'ajëtë tyaktëty ja wintsë'kën ma Wintsënën ma ja nay'ëëw'oy näykyajpx'oyë y'ityën, mëti'ipë ojts tyuka'ayë twin'ëw twinya'axtëty ja Wintsën ets mëti'ipë ojts tyuka'ayë tkëwent'atëty ja tsajptëjk'aaw.

³Kë'ëm ojts ja yajkutujkpë tyäky mëti'ipë wintsë'kën'atëpën jopyëp ets jënäkxyëëw, mëti'ipë tunëpën xëëwjoty, po'kxënxëëw, ko po'o yeeky'atëty ets tii xëëw mëjpë tyunëtëty, jëtu'un tä jap myinyën kuja'ay ma ja Wintsën ja y'ënä'ämënën kyutujkënën.

⁴Ezequías ojts tuknipëky ja Jerusalén ja'ayëty ets tmo'otëty ja teetyëjk ets ja Leví ja'ayëty ja ayajk ako'onën ets tyuntëty tu'kjëjp ma ja Wintsën ja tsyajpjëën tsyajptëjkën.

⁵E ko ojts ja ayuk jëtu'unpë ye'eywyä'kxy, ja ja'ayëty kë'ëm jot kë'ëmwinma'any ijty winë tjanty yaktë, mëti'ipë yajë'kx yajpëjkpën ets mëti'ipë yaj'ukpën, ja kamwinmëpë pyëtsimyën. Ëpëky näjyëtu'un tyajktëpë tu'kpëkyjyäty ja maypyë.

⁶Näyjyëtu'un ja Israel ja'ayëty ets ja ja'ayëty jampë muum tsyëënëtën ma ja Judá y'itjotmën, ojts tmëmintë tu'kpëkyjyätypë ma ja majk pëkpyën yajpëjkwä'kxyën: tä ja tsajpkaajën ets mutskjatypë ja jëyujk, tä kupixynyën, tsajpaxën ets ëpëky mëti'ipë ja Wintsën yajtuknipëjkë'këpën. May'äämpy jam tnipëjkpäjtë.

⁷Ma myëtëkëëk po'opetyën jää tyajtso'ontaktë, ënät may tmëmiintë winë ets jyëjpkëjxy ma myëwëxtujk po'opetyën.

⁸E ko ja Ezequías mëët ja kutuunktëjkëty ojts t'ixtë may ja ja'ay winë të tmëmintë, ënät ja Wintsën tmëja'awëtyë ets ojts tkënu'kxtë ja naax kajpn.

⁹Ënät ja Ezequías tpëjktsooy ja teetytyëjkëty ets tmëtyowtëty jënu'un ënäty jam winë ja'ay të tmëmintën ets tuk'ëwaanëtëty ja naax kajpn,

¹⁰ets y'ëtsoowë ja teety Azarías, ja Zadoc ja jyä'äy: Maju'unëm ja'ay may winë tmëmintën, ka'apës tii të xytyëkoy'ajtëtë, ni'ikyënëm winë të nyatëkë may'äämpy; tëkokyë mëti'ipë të nyatëkën aakyë'ë mëti'ipë Wintsën të tkënu'kxyën.

¹¹Paatykyëjxm yë Ezequías ojts tni'ënä'ämë ets t'oytyuntëty tu'uk yë tëjk, winkon ma ja tsajptëjkën ets jap yajpëjkë'ëkëtyën winë. Ko kyojtaay,

¹²tääts jap tpëjktaktaaytyë mëti'ipë ja ja'ay ënäty të tyaktën ets mëti'ipë ënäty ja Wintsën të yajtuknipëjktaakën. Conanías mëët ja y'uty Simí yë'ë ojts tuknipëktë ets tkëwent'atëty.

¹³Ëpëky yë yajkutujkpë Ezequías ets ja teety Azarías ojts tuknipëktë ja'ayëty mëti'ipë pyutëkëtëpën ja Conanías ets ja y'uty Simí ets ojts yajtuunkmo'otë yë Jehiel, Azazías, Náhat, Asael, Jerimot, Jozabad, Eliel, Ismaquías, Máhat ets Benaías.

¹⁴Ja mëti'ipë yajtuknipëjkën ets tkëwent'atëty ja tsajptëjk'aaw matsow ja xëëw pyëtsimyën, yë'ë Coré, mëti'ipë ojts näjyëtu'un yajtuknipëkyën tkëwent'atëty ja mëti'ipë ja ja'ay nyayajktëpën jëtu'unyë ets tpëjkwa'kxëty mëti'ipë ja'ay näjyëtu'un myëmiintëpën ets nyätyukuyakëtë ets näjyëtu'un tkëwent'atëty mëti'ipë ja ja'ayëty jä'ä ja Wintsën tyukwintsë'këtyëpën.

¹⁵Coré yë'ë putëjkëyë jam ma teetytyëjkëty ja kyajpnëtyën, ja ja'ayëty mëti'ipë txëëwajtëpën: Edén, Miniamín, Jesús, Semais, Amarías ets Secanis, mëti'ipë ijty winë pyëjkwa'kxtëpën tu'knax jënu'un tyu'kmëku'uk'atën. Jëtu'un ijty tyajtu'uye'eytyë ja tuunk jëtu'un tä pyaatëtën nitu'ukjaty, wä'än yë'ëjëty mutsk tuunk ëkë mëj tuunk,

¹⁶aakjëtu'un ja ja'ayëty mëti'ipë tuuntëpën ma tsajptëjkën, mëjja'ay mutskja'ay ets aak kuja'ay nyäxy, mëti'ipë jyëmëjt të t'apetyën tëkëëk jëmëjt.

¹⁷Ja teetytyëjkëty aak kuja'ay y'itë mëët ja y'u'unk y'ëna'këty y'u'unk tyo'oxytyëjkëty ets ja Leví ja'ayëty mëti'ipë jyëmëjt të t'apetyën i'px, wi'ixjaty ja tuunk të nyikääkëtën.

¹⁸Wä'än mëjja'ay mutskja'ayëty, ye'etyëjk to'oxytyëjk aak kuja'ay ijty nyaxtë jä'ä ko aak ojts tuunk tyuka'ajëtë jam ma tsajptëjkën.

¹⁹Maajaty ja kajpnën aak ojts ja ja'ay yajtuknipëktë mëti'ipë pyëjkwa'kxëpën nu'unjaty ja ja'ay pyaatëtën ma ja teetytyëjkëtyën, ja Aarón y'u'unk y'ok ets ma Leví ja'ayëtyën, mëti'ipë kuja'ay miintëpën ja xyëëwëty jampë tsyëënëtën ma ja naax kamën ma jëyujk tsajpkaa tyänëtën.

²⁰Ezequías ojts jëtu'unpë ënä'ämën tyajwë'ëmy maajaty ja kajpnën. Mëti'ipë tyuunën oy wyimpëtsëëmy jyëjpëtsëëm ets oy Wintsën tmëtuuny.

²¹Tëkokyë mëti'ipë tyuknipëjktakëyën, wä'än yë'ëjëty ja tuunk japë tsajptëkotyën ets wä'än yë'ëjëty ma yajpatuna'anyën ja Wintsën ja tyiyajtën, yë'ëkyëjxm tuuny ets tmëjjawëja'any ja Wintsën ja xyëëw.